1. Kuyini okuhle okwenziwa ngabantu bakaJehova?

 KUDALA iBhayibhili lathi abantu bakaNkulunkulu ‘babezazinikela’ ngokuthanda kwabo ekumkhonzeni bekhokhelwa yiNdodana yakhe. (Hubo. 110:3) Isiphrofetho leso siyagcwaliseka sibili lamuhla. Umnyaka ngamunye, izinceku zikaJehova ezikhutheleyo ziqeda amahora angamamiliyoni zitshumayela. Azibhadalwa ukwenza umsebenzi lo, ziwenza ngoba zifuna. Zincedisa abafowabo labodadewabo ngezinto abazidingayo, ziyabakhuthaza futhi ziyabancedisa ukuthi baqinise ukholo lwabo. Abadala lezinceku ezikhonzayo baqeda amahora amanengi belungiselela izinkulumo zabo futhi beselusa abazalwane. Kuyini okwenza abantu bakaNkulunkulu benze konke lokhu? Yikuthanda uJehova lomakhelwane.—Mat. 22:37-39.

2. Ngokwalokho okutshiwo kuRoma 15:1-3, kuyini okwenziwa nguJesu okumele sikulingisele?

² UJesu wayeqakathekisa kakhulu okufunwa ngabanye ukwedlula lokho yena ayekufuna. Lathi siyazama ukumlingisela. (Bala uRoma 15:1-3.) Labo abamlingiselayo bazabusiswa. UJesu wathi: “Ukupha kuyathokozisa kakhulu ukwedlula ukwamukela.”—ImiSeb. 20:35.

3. Sizaxoxa ngani esihlokweni lesi?

³ Esihlokweni lesi sizahlola okunye uJesu azinikela ukukwenza ukuze ancede abanye lokuthi thina singamlingisela njani. Sizabona lokuthi singenzani ukuze sizimisele kakhulu ukunceda abanye.

4. UJesu watshengisa njani ukuthi wayeqakathekisa kakhulu okufunwa ngabanye kulalokho yena ayekufuna?

⁴ UJesu wanceda abanye lanxa wayediniwe. Cabanga ngalokho okwenziwa nguJesu ixuku elikhulu labantu lize liye kuye entabeni okungenzeka yayiseduze leKhaphenawume. Wayethandaze ubusuku bonke yikho kumele ukuthi wayedinwe efile. Kodwa wathi ebona ixuku labantu wabazwela usizi ababengabayanga lababegula ababephakathi kwalo. Kazange abelaphe kuphela kodwa wenza leyinye yezinkulumo ezilamandla kulazo zonke ezake zenziwa ebizwa ngokuthi yiNtshumayelo Yasentabeni.—Luk. 6:12-20.

5. Inhloko zemuli zimlingisela njani uJesu lanxa zidiniwe?

⁵ Izinhloko zezimuli zimlingisela njani uJesu? Ake sithi inhloko yemuli ifika ngekhaya idiniwe ivela emsebenzini. Lanxa isizwa kungatsho ukuthi kwenziwe uKukhonza Kwemuli kwamhlalokho, icela uJehova ukuthi ayinike amandla okuthi ikwenze. UJehova uyawuphendula umthandazo wayo futhi imuli iyafunda njengoba isenza maviki wonke. Mhlalokho abantwana bafunda isifundo esiqakathekileyo sokuthi abazali babo baqakathekisa ukukhonza uJehova ukwedlula loba yini.

6. Nika isibonelo esitshengisa ukuthi uJesu wayetshiya ayefuna ukukwenza ukuze ancede abanye.

⁶ UJesu wayetshiya ayefuna ukukwenza ukuze ancede abanye. Akucabange ukuthi uJesu wezwa njani esizwa ukuthi umngane wakhe uJohane uMbhabhathizi wayesebulewe. Kumele ukuthi wezwa ubuhlungu obukhulu. IBhayibhili lithi: “UJesu uthe esizwa [ngokufa kukaJohane] wasuka lapho ngesikepe waya endaweni engelabantu ukuze abe yedwa.” (Mat. 14:10-13) Siyazwisisa ukuthi kungani wayefuna ukuba yedwa. Phela abanengi bethu sikubona kungcono ukuthi sikhale sisodwa. Kodwa uJesu kasitholanga isikhathi sokuba yedwa. Ixuku elikhulu labantu lamqalela ukufika endaweni ethuleyo ayesiya kuyo. Manje wenzani? Wacabanga ngalokho  elalikudinga “walizwela usizi.” Wananzelela ukuthi lalidinga ukuncediswa lokududuzwa nguNkulunkulu yikho wahle waqala ukulincedisa. ‘Waqalisa ukulifundisa izinto ezinengi.’—Mak. 6:31-34; Luk. 9:10, 11.

7-8. Nika isibonelo sendlela abadala abamlingisela ngayo uJesu.

⁷ Abadala bebandla bamlingisela njani uJesu? Siyababonga sibili abadala ngokuzinikela ukuthi benze imisebenzi esincedayo. Imisebenzi eminengi abayenzayo ayaziwa ngabantu abanengi ebandleni. Ngokwesibonelo, abazalwane abakuKhomithi Esebenzelana Lezibhedlela basukumela phezulu ukuthi bancedise abafowabo labodadewabo nxa sokube lohlupho kwezokwelatshwa oludinga ukulungisiswa masinyane. Izikhathi ezinengi lokhu kwenzakala phakathi kobusuku. Abadala laba abathandekayo kanye lezimuli zabo bayabazwela abafowabo labodadewabo abasebunzimeni yikho baqakathekisa ukubancedisa kulalokho bona abakufunayo.

⁸ Abadala bayancedisa lasemsebenzini wokwakhiwa kwamaWolu oMbuso lezinye izakhiwo zethu njalo bayabancedisa abafowabo labodadewabo nxa behlelwe ngumonakalo. Singasawabali amahora abawaqeda besifundisa, besikhuthaza njalo besisekela emabandleni. Kumele sibancome sibili abafowethu laba kanye lezimuli zabo. Sengathi uJehova angababusisa ngakho konke abakwenzayo! Kodwa kukhona okumele abadala bakunanzelele. Akumelanga baqede isikhathi esinengi besenza imisebenzi le baze baswele isikhathi sokuba lemuli zabo.

9. UFiliphi 2:4, 5 uthi kuyini okumele kwenziwe ngamaKhristu wonke?

⁹ Bala uFiliphi 2:4, 5. Ayisithi sonke esingabadala. Lanxa kunjalo sonke kumele silingisele uJesu ngokuqakathekisa kakhulu okufunwa ngabanye ukwedlula lokho esikufunayo. IBhayibhili lithi “wathatha isimo senceku.” (Flp. 2:7) Akucabange ngalokho esingakufunda evesini le. Inceku kumbe isigqili esithandwayo sasisenza konke okusemandleni aso ukuthi sithokozise inkosi yaso. Siyizigqili zikaJehova lezinceku zabafowethu labodadewethu, yikho akuthandabuzwa ukuthi sizimisele ukusebenzela uJehova labazalwane bethu. Esesizaxoxa ngakho kuzasinceda sikwenze lokho.

10. Yiphi imibuzo esingazibuza yona?

¹⁰ Zihlole. Zibuze imibuzo enjengale: ‘Ngizimisele kangakanani ukutshiya ebengifuna ukukwenza ukuze ngincede abanye? Ngokwesibonelo, ngenzani nxa ngicelwa ukuthi ngivakatshele umfowethu osekhulile ohlala lapho okugcinwa khona asebekhulile kumbe ukuthi ngihambise udade osekhulile emihlanganweni yebandla? Ngisukumela phezulu yini nxa kufuneka abantu bokuklina endaweni lapho okungenelwa khona umhlangano kumbe abokulungisa okuthile eWolu yoMbuso?’ Sathi sizinikela kuJehova samthembisa ukuthi sizasebenzisa konke esilakho ukuthi simkhonze yikho uyathokoza nxa sisebenzisa isikhathi sethu lezinto esilazo ukuze sincede abanye. Singenzani nxa singabona lapho okumele silungise khona?

11. Ukuthandaza kuzasinceda njani ukuthi sizimisele ukuncedisa abanye?

¹¹ Thandaza ngenhliziyo yonke kuJehova. Mhlawumbe usunanzelele ukuthi kulalapho okumele ulungisise khona, kodwa awuzimiselanga ukukwenza lokho. Thandaza ngenhliziyo yonke kuJehova. Ungamfihleli lutho. Mtshele yona kanye indlela ozizwa ngayo futhi ucele ukuthi akunike “isifiso lamandla okwenza okumthokozisayo.”—Flp. 2:13.

12. Kuyini okungenziwa ngabafowethu abasakhulayo ababhabhathiziweyo?

¹² Nxa ungumzalwane osakhulayo obhabhathiziweyo, cela uJehova akuncedise uzimisele ukuncedisa abafowenu labodadewenu ebandleni. Kwamanye amazwe, abadala bebandla banengi kulenceku ezikhonzayo futhi izinceku ezikhonzayo ezinengi sezikhulile. Inhlanganiso kaJehova iqhubeka ikhula yikho sidinga abazalwane abasakhulayo abanengi ukuthi bancedise abadala ukwelusa abantu bakaNkulunkulu. Uzathokoza okwamagama nxa ungazimisela ukuncedisa loba ngaphi. Okuzakwenza uthokoze yikuthi uyabe ujabulisa uJehova, ukhulunyelwa kuhle ngabanye futhi usuthiseka ngokuthi uyabancedisa.   

13-14. Singabancedisa njani abafowethu labodadewethu? (Khangela umfanekiso ongaphandle.)

¹³ Woba lelihlo elibukhali unanzelele nxa abanye bedinga uncedo. Umphostoli uPhawuli wakhuthaza amaKhristu ayengamaHebheru wathi: “Lingakhohlwa ukwenza okuhle lokwabelana labanye lokho elilakho ngoba imihlatshelo enjalo iyamthokozisa kakhulu uNkulunkulu.” (Heb. 13:16) Lokho awatshela khona kwawanceda sibili. Kungakayi ngaphi, amaKhristu la ayehlala eJudiya kwasekumele atshiye izindlu zawo, amabhizimusi awo kanye lezihlobo  ezazingayisiwo maKhristu njalo ‘aqalise ukubalekela ezintabeni.’ (Mat. 24:16) Ngalesosikhathi kwakuqakathekile sibili ukuthi ancedisane. Nxa ayevele esekwenza lokho ayekutshelwe nguPhawuli ukuthi abelane labanye lokho ayelakho, kwakuzaba lula ukuthi ajayele impilo endaweni entsha.

¹⁴ Abafowethu labodadewethu abasoze bakhulume sonke isikhathi nxa bedinga ukuncediswa. Ngokwesibonelo, umzalwane angafelwa ngumkakhe. Angabe edinga ukuphekelwa, ukuhanjiswa endaweni ethile kumbe ukuncediswa ukwenza imisebenzi yangekhaya. Angayekela ukucela uncedo ecabanga ukuthi uyabe esihlupha. Kodwa angabonga kakhulu nxa singamncedisa engasicelanga. Akumelanga sizitshele ukuthi uzancediswa ngomunye kumbe ukuthi uzahlala esitshela nxa edinga uncedo. Zibuze, ‘Aluba bekuyimi bengingafuna ukuncediswa njani?’

15. Kumele senzeni nxa sifuna ukuncedisa abanye?

¹⁵ Yenza kube lula ukuthi abanye bacele uncedo kuwe. Akuthandabuzwa ukuthi ebandleni lenu bakhona abafowenu labodadewenu obaziyo abahlala bekulungele ukuncedisa abanye. Abenzi sicabange ukuthi siyabe sibahlupha nxa sicela uncedo kubo. Siyakwazi ukuthi bazimisele ukusincedisa loba nini futhi siyafisa ukuba njengabo. Umdala webandla okuthiwa ngu-Alan oleminyaka engu-45 ufuna ukuba njalo. Ekhuluma ngalokho okwakusenziwa nguJesu uthi: “UJesu wayelezinto ezinengi zokwenza kodwa abantu bonke kungelani lokuthi banganani babemthanda futhi bekhululekile ukucela ukuthi abancedise. Babekwazi  ukuthi ulendaba labo. Ngiyafuna sibili ukuba njengoJesu futhi ngaziwe njengomuntu okulula ukukhuluma laye, olomusa njalo olendaba labanye.”

16. Ukwenza okutshiwo kuHubo 119:59, 60 kuzasinceda njani ukuthi siwalandele eduze amanyathelo kaJesu?

¹⁶ Akumelanga sidane nxa singehluleka ukulingisela uJesu ngokupheleleyo. (Jak. 3:2) Umuntu ofundela ukudweba ngeke adwebe njengalowo omfundisayo oyingcitshi ekudwebeni. Kodwa uzaqhubeka ethuthuka nxa angafunda emaphutheni akhe futhi azame ngazo zonke indlela ukuthi alingisele lowo omfundisayo. Lathi nxa singakusebenzisa lokho esikufunda eBhayibhilini futhi siqhubeke sizama ukulungisa lapho okumele silungisise khona sizenelisa ukuwalandela eduze amanyathelo kaJesu.—Bala iHubo 119:59, 60.

17-18. Ukulingisela uJesu kuzasinceda njani?

¹⁷ Nxa abafowethu labodadewethu bangabona ukuthi sizimisele ukuncedisa abanye labo bazafuna ukusilingisela. Umdala okuthiwa nguTim uthi: “Abanye abafowethu abasakhulayo babe zinceku ezikhonzayo besesebancane sibili. Okunye okubancedileyo yikuthi babone abafowabo labodadewabo bezimisela ukuncedisa abanye labo basebefuna ukubalingisela. Abafowethu laba abasakhulayo baluncedo ebandleni njalo bayabancedisa sibili abadala.”

¹⁸ Siphila emhlabeni ogcwele abantu abaqakathekisa okufunwa yibo kuphela. Kodwa abantu bakaJehova bona abanjalo. Sizimisele ukulingisela uJesu owayeqakathekisa okufunwa ngabanye kulalokho yena ayekufuna. Asingeke siwalandele ngokupheleleyo amanyathelo akhe kodwa ‘singawalandela eduze.’ (1 Phet. 2:21) Nxa singenza konke esingakwenza ukuthi silingisele uJesu sizathokoza ngoba sizabe sijabulisa uJehova.