1. Ngowapi mujimu wakanaka watinovona pakati po vandhu va Jehovha?

 MAKORE mazinji akapera, Bhaibheri rakananga kuti vandhu va Mwari ‘vaizozvipira ngo mwoyo unoda’ kuti vaite basa ra Jehovha vecitungamirihwa ngo Mwana wake. (Nduyo 110:3 Sandujo yo Nyika Imbza, mu Cishona) Ciporofita ici ciri kunasa kukwanirisika mazuva ano. Gore rimwe nga rimwe, vashandiri va Jehovha vanovangisira kupeja mazana o zviuru zvo nguva mu basa ro kucumaera. Ivona vanoita basa iri vacikapagahwi, vanoriita ngokuti vanoda. Cimwenizve, ivona vanopeja nguva vecibesera hama javo ku zviro zvavanonga vecida, kuvavangisa no kuita kuti rudo hwavo kuna Jehovha uvange. Vakuru no vabeseri vo ungano, vanopeja nguva yakawanda maningi vecinasirira musongano no kuvhakacira hama no hambzaji javo kuti vavangise. Ngo zvapi zvinovaita kuti ivona vade kuita basa rese iri? Zvinovaita kuti ivona vaite izvi irudo hwavo kuna Jehovha no kuno vadoni vavo.—Mateu 22:37-39.

2. Inga zvinonangwa pana Varoma 15:1-3, ngowapi muezaniso wakanaka wakagajwa ndi Jesu?

² Jesu wakagaja muezaniso wakanakisisa maningi wo kudira pakutanga zvido zvo vamweni kupinda zvake. Itusu ngatieje kutevera muezaniso wake. (Verenganyi Varoma 15:1-3.) Vaya vanomutevejera vanozobesereka maningi. Jesu wakati: “Kupekeja kunoviisa mudakaro mukuru kupinda kuashira.”—Mabasa o Vapostori 20:35.

3. Ngozvapi zvatinoda kuvona pamusoro uwu?

³ Pa musoro uwu, tinozovona kujipira kwakaita Jesu kuti abesere vamweni no kuvonazve kuti itusu tingaitisa kudini kuti titevejere muezaniso wake. Tinoda kuzovonazve kuti tingaitisa kudini kuti tikhwijirije cido cedu cokuda kubesera vamweni.

4. Jesu wakadirisa kudini pakutanga zvinodiwa zvo vamweni kupinda zvake?

⁴ Jesu wakabesera vamweni pikija paainga akaremba. Rangariranyi zvakaita Jesu apo vandhu vazinji vakaviya kwaari paainga ari mumbhiripiri mo dundhu, kangaije phedo no Kafarnaumi. Jesu wainga apeja usiku hwese eciita mukumbiro. Iyena wainga waremba kamare, asi paakavona vandhu vazinji, mwoyo wake wakazwira pena varombo no vandhu vainga vecihwaja pakati pavo. Aazivi kuvarapa basi, asi pa nguva iyi iyena wakaita hurukuro inovangisa maningi inodanijwaya kuti Hurukuro yo pa Dundhu.—Ruka 6:12-20.

5. Musoro jo mbhuri jingatevejeresa kudini muezaniso wa Jesu pajinonga jakaremba?

⁵ Musoro jo mbhuri jingatevejeresa kudini muezaniso wa Jesu? Rangariranyi muezaniso uwu basi: Pakupera kutakatira ecishanda, musoro wo mbhuri anoguma ku kumuzi akaremba maningi. Kangaije angada kuregera kuitisa Kunamata ko Mbhuri co usiku, asi anokumbira Jehovha kuti amupe simba rokutungamirira kunamata ko mbhuri uku. Jehovha anodavira mukumbiro wake, perapo okwanisa kuitisa jijo inga zvavaroveja kuita. Vana vanowana cijijo cinosisira maningi pa usiku wondhowo, cokuti vabari vavo, vanodira pakutanga zviro zvokunamata kupinda zviro zvese.

6. Ipanyi muezaniso unovonesa kuti Jesu wakashandisa nguva yaaida kugara ega kuti abesere vamweni.

⁶ Jesu waishandisa nguva yake kuti abesere vamweni, pikija waida kugara ega. Mungakwanisa kurangarira kuti Jesu wakajizwa kudini paakaziva kuti shamwari yake Johane Mubhabhatiji wainga wauraiwa? Jesu wainga wakasuruvara maningi. Bhaibheri rinoti: “Jesu naazvizwa, wakapakira ngarava, woenda ku ndau icina vandhu kuti agare ega.” (Mateu 14:10-13) Tingakwanisa kuzwisisa kuti ngenyi iyena waida kugara ega. Vandhu vazinji vanovona zviri nane kucema no vari vega. Asi kuna Jesu izvi zvainga zvicikakwanisiki. Vandhu vazinji vakatanga kuguma kundau yaaidaro kogara ega iyena acito agumeyo. Jesu wakaitenyi? Wakarangarira ngo pamusoro po zviro zvaidiwa ngo vandhu ava, “wovaitira pena.” Jesu wakavona kuti ivona vaida besero no vangiso inovha kuna Mwari. Ngo kudaro, iyena wakavabesera ngo  kukasika. Zvokadi, “iyena wakatanga kuvajijisa [haiwa zviro zvishoma, asi] zviro zvizinji.”—Marko 6:31-34; Ruka 9:10, 11.

7-8. Ipanyi muezaniso unovonesa kuti vakuru vano rudo vanotevejera Jesu kudari pano mundhu anoda besero mu ungano.

⁷ Vakuru vano rudo vangatevejeresa kudini Jesu? Tinobonga maningi basa rinoitwa ngo vakuru kuitira kutibesera. Hama no hambzaji zinji mu ungano ajizivi mabasa ese anoitwa ngo vakuru. Inga muezaniso, kudari pakamuka kuraphwa ngo kukasika, hama inoshanda pa Cikwata co Kuvhakacira Vanohwaja, ngo kukasika vanoenda kobesera hama no hambzaji javo. Kazinji kuraphwa uku ko kukasika kunoanja kuitika pakati po usiku. Asi vecindundihwa ngo usizi kuno hama no hambzaji javo jiri pa ngozi, vakuru vanoshanda mu cikwata ici pamwepo no mbhuri javo, vanodira pakutanga zvinodiwa zvo hama javo kupinda zvavo.

⁸ Cimwenizve, vakuru, vanobesera pa kuvaka Nyumba jo Umambo no nyumba jimweni panonga paitika ngozi jinonga jaitika jega. Ivona vanopejazve nguva yakawanda vecitijijisa, kutivangisa no kutibesera mu ungano. Hama jese iji no mbhuri javo vanofanera kusimbwa ngo mwoyo wese. Jehovha anodakara ngo zvavanoitari. Zvokadi kamare, mukuezana no vamweni, vakuru vanodikana kuva vakaezanana. Ivona avadikani kupeja nguva yakawanda maningi veciita mabasa aya o umwari vosiya mbhuri javo jecitambujika.

9. Mukuzwirana na Vafiripi 2:4, 5, murangariro wapi unodikana kuva no Makristu ese?

⁹ Verenganyi Vafiripi 2:4, 5. Vakuru andivopi vega basi vanodikana kutevejera Jesu, asi itusu tese tinodikana kujijira kuva inga  ndi Jesu no kudira zvinodiwa zvo vamweni pa ndau yo kutanga kusiyapo zvedu. Bhaibheri rinonanga kuti iyena wakaita “inga muranda.” (Vafiripi 2:7) Rangariranyi zvatingajija kuvha mu vhesi iyi. Muranda anokujwa kana mushandi, anodikana kupsaka mukana jo kudakajisa patrau wake. Inga muranda wa Jehovha no mushandiri wo hama jenyu, amukani-kani kuti cido cenyu ngo co kuda kushandiswa maningi ndi Jehovha no kushandira hama jenyu. Mungakwanisa kuita izvi ngo kuvona mazano anotevera.

10. Muvhunjo japi jatinodikana kujiita?

¹⁰ Rangariranyi ngo pamusoro po mugariro wenyu. Jiitenyi muvhunjo jakadari inga iji: ‘Ndingaitisa kudini kuti ndive no cido co kuda kushandisa nguva yangu no simba kuti ndikwanise kubesera vamweni? Inga muezaniso, ngozvapi zvandaizoita kudari ndikakumbihwa kuti ndiyende kovona hama yaamusharuka inogara ku ndau inongwaririhwa vasharuka kana kotora hambzaji yaamusharuka kuti iviye kumusongano? Ndaizokasika kujipira kobesera kudari panodikano yo vanoda kuzvipira kuitira kocenesa ndau inoitihwa magungano no kunasirira-nasirira Nyumba yo Umambo?’ Patakajipira kuna Jehovha takamugondesa kuti taizoshandisa zvese zvatinazvo kuti timushandire. Iyena anoda kuti tishandise nguva yedu, simba no zviro zvatinazvo kuti tibesere vamweni. Ngo kudaro, iyena anozodakara maningi kudari tikaita izvi. Waro kudari tikavona kuti tinodikana kuitisa nane pari pese, ngozvapi zvatinodikana kuita?

11. Mukumbiro ungatibeseresa kudini kusakurira mujimu wokujipira?

¹¹ Itanyi mukumbiro ngo mwoyo wese kuna Jehovha. Ngatiti mavona kuti munodikana kuitisa nane divi riri rese mu upenyu hweyu, asi motama cido cokuita cinjo iyi inodikana. Pa mugariro wakadari, itanyi mukumbiro ngo mwoyo wese kuna Jehovha. Nanganyi kamare zvamunodaro. Vhunjanyi Jehovha zvamuri kuzwa no kumukumbira kuti iyena amupe “cido no simba ro kuita.”—Vafiripi 2:13.

12. Ngozvapi zvamunodikana kuita kudari muri mujaha wakabhabhatijwa?

¹² Kudari muri mujaha wakabhabhatijwa, kumbiranyi Jehovha kuti amubesere kusakurira cido cokubesera hama no hambzaji mu ungano yenyu. Ku nyika jimweni, kuno vakuru vakawanda kupinda vabeseri vo ungano. Vabeseri variyo waro vazinji vakona vasharuka. Zvecivoneka kuti sangano ra Jehovha riri kuenderera mberi recikura, tinoda hama jakawanda jiciri majaha kuti jibesere vakuru pakutaja hama no hambzaji mu ungano. Kudari muno cido cokushandira kuri kwese kunonga kwecidikana, muzova mundhu wakadakara. Ngenyi? Ngo kuti munozodakajisa Jehovha, hama jinozovona kuti munoda kubesera vamweni nokutizve imwimwi munozowana mudakaro unovha pakushandira vamweni.

13-14. Ngozvapi zvatinodikana kuita kuti tibesere hama no hambzaji jedu? (Vonanyi foto yo pa kapa.)

¹³ Nasanyi kusotesesa zvinoda vamweni. Mupostori Pauro wakangwaja Vahebheru kuti: “Mucakanganwa kuita zvakanaka no kupekeja vamweni zvamunazvo. Ngokuti Mwari anodakara maningi ngo mupiro jakadaro.” (Vahebheru 13:16) Iyi indhungamiriro yakanaka kamare. Ucito wapera mukuvo wakareba novaashira karata iyi, Makristu o ku Judheya vaidikana kusiya nyumba javo, nyagoso javo no ukama hwavo hwainga hucikaripi Makristu perapo votanga ‘kutizira ku matundhu.’ (Mateu 24:16) Pacina kukana-kana, panguva iyi zvaisisira maningi kwavari kuti  vabesane umwe no umweni. Kudari vainga vecishandisa mbhangiro ya Pauro yo kupana zviro zvavainga nazvo izvi zvicito zvaitika, zvaizovarerukira maningi kuti vapone mukuzwirana no upenyu hupsa wavaingari vanawo.

¹⁴ Asipi nguva jese hama no hambzaji jedu jinotivhunja kuti jinoda besero. Inga muezaniso, hama inonga yafihwa ngo mukaji, inganesehwa maningi kukanganwa kusuruvara kwainonga yakaita. Kureva kuti hama iyi ingada kubesehwa kunasirira zvokuha, kuthwarihwa zviri zvese kana kubeswa kuita mabasa amweni o pamuzi? Kangaije iyona aingakumbiri kubeswa ngokuti aidi kupekeja hama basa. Asi yaizobongesera maningi kudari tikatanga kuibesera icito ikatikumbira besero. Atidikani kurangarira kuti mundhu umweni angaenda koibesera kana kuti iyona inodikana kutanga kuviya kotikumbira besero. Jivhunjisenyi kudari: ‘Nondainga ndiri pa mugariro uwu, besero rapi randaizoda kuashira?’

15. Ngozvapi zvatinodikana kuita kudari tecida kubesera vamweni?

¹⁵ Ivanyi mundhu anokhwederereka. Atikani-kani kuti mu ungano yenyu munoziva hama no hambzaji jokuti nguva jese vakanasiririka kuti vabesere vamweni. Narini ivona avazojizwi kuti vari kuvangirijwa kuita zvondhozvo. Tinoziva kuti nguva jese vano cido cokuda kutibesera, itusuvo tinoda kuvatevejera. Hama Arani vano makore anokwana kuita makumarongomuna na mashanu, vanoshanda inga mukuru, vaida kuva mundhu anokhwederereka. Vecirangarira ngo pamusoro po muezaniso wa Jesu, ivona vakati: “Mukuvo wese Jesu wainga akabatikana, asi vandhu vomupira wese vaiviya kwaari no kuzwa vakasujunuka kumukumbira besero. Ivona vaimuvona ari mundhu wainga ecivataja. Inini ndinodavo kuva inga ndi Jesu, ndozivika  inga mundhu anokhwederereka, anoushamwari no anotaja vamweni.”

16. Kushandisa zviri pana Nduyo 119:59, 60, kunozotibeseresa kudini kuti tinase kutevejera muezaniso wa Jesu?

¹⁶ Atidikani kuremba kudari tikakonehwa kutevejera Jesu ngo njira yakaperera. (Jakobo 3:2) Mujiji aangaezani kamare no mujijisi wake. Asi kudari mujiji akajija ngo zvaakamboposa, ovangisira kuti atevejere mujijisi wake, mujiji uwu angazokwanisa kuitisa nane. Ngo njira yakaezana, kudari tikashandisa zvatinojija mu Bhaibheri no kueja kuitisa nane, tinozokwanisa kamare kutevejera muezaniso wa Jesu.—Verenganyi Nduyo 119:59, 60.

17-18. Kudari tikatevejera muezaniso wo kujiramba wa Jesu, tinozobesereka kudini?

¹⁷ Cido cedu cokuda kubesera vamweni, cinozoita kuti vamweni vade kuitavo zvondhozvo. Mukuru umweni anodanijwa Timi, wakati: “Mu ungano yedu tino hama jakawanda jiciri majaha jinovangisira maningi ku divi ro umwari, ijona jakaguma pakugajwa inga vabeseri vo ungano. Majaha amweni ainga acakaterera kamare, asi akaguma pa kuva vabeseri vo ungano. Izvo zvakaitika ngokuti ivona vakavona kuti vamweni vainga no cido co kuda kubesera, vodavo kuvatevejera. Hama iji jiri kubesera pa ungano yedu no kubesera maningi vakuru.”

¹⁸ Tiri kupona munyika yakazara ngo vandhu vanojikuja. Asi vandhu va Jehovha vakasiyana no vandhu ava. Itusu tiri kubesereka maningi ngo mujimu wo kujiramba wa Jesu. Tasunga kamare kutevejera muezaniso wake. Wari, atikwanisi kutevejera mudanyu ja Jesu munjira yakaperera, asi tingakwanisa “kutevera soka jake.” (1 Pedhru 2:21) Kudari tikatevejera Jesu ngo kuva no mujimu wo kujiramba, tinozodakara ngokuti tinonga tecidakajisa Jehovha.