1. Aapiya yaJehova ohaya ulike ombepo ya tya ngiini ngele tashi ya piilonga ye?

OMBIIMBELI oya hunganeka kutya, aapiya yaKalunga “otaye ki igandja nehalo ewanawa” ye mu longele taya wilikwa kuJesus. (Eps. 110:3, NW) Ehunganeko ndyoka otali gwanithwa kunena. Omumvo kehe, aapiya yaJehova aalaadhi ohaya longo oowili omamiliyona miilonga yokuuvitha. Ihaya futwa sho taya longo iilonga mbyoka, ihe ohaye shi ningi nehalo ewanawa. Ohaya longitha wo ethimbo lyawo ya kwathele ooitaali ooyakwawo uuna ye na ompumbwe. Ohaye ya tsu omukumo noku ya kwathela wo ya kale ye na eitaalo lya kola. Aakuluntugongalo naayakuligongalo ohaya longitha ethimbo lyawo olindji sho tayi ilongekidhile iitopolwa yokugongala naasho taya talele po aamwatate naamwameme, opo ye ya tse omukumo. Mbela omolwashike aapiya yaJehova haya longo iilonga ayihe mbyono? Omolwaashoka oye hole Jehova nosho wo aantu ooyakwawo. — Mat. 22:37-39.

2. Ngaashi sha popiwa mAaroma 15:1-3, Jesus okwe tu tulila po oshiholelwa sha shike?

² Jesus okwa tula po oshiholelwa sha dhenga mbanda shokukala a pititha komeho oompumbwe dhayalwe. Ohatu kambadhala aluhe ngaashi tatu vulu tu landule oshinkoti she. (Lesha Aaroma 15:1-3.) Ngele otwe shi ningi, otashi ke tu etela uuwanawa. Jesus okwa ti: “Okugandja oku na elago ku vule okutaamba.” — Iil. 20:35.

3. Oshike tatu ka kundathana moshitopolwa shika?

³ Moshitopolwa shika, otatu ka kundathana iinima yimwe mbyoka Jesus a li a ningi opo a kwathele yalwe, notatu ka tala wo nkene tatu vulu okulandula oshiholelwa she. Otatu ka kundathana  ishewe shoka tashi vulu oku tu kwathela opo tu kale tu na ehalo lyokuyakula yalwe.

4. Jesus okwa li a ulike ngiini kutya okwa pititha komeho oompumbwe dhayalwe?

⁴Jesus okwa li ha kwathele yalwe nuuna a vulwa. Jesus okwa li i inyenge ngiini sho ongundu yaantu ya li ye ya kuye kooha dhondundu ndjoka yi li popepi naKapernaum? Otashi vulika a li a vulwa, oshoka uusiku awuhe okwa li ta galikana. Ihe sho a mono ongundu yaantu, okwa li e etela ohenda oohepele ndhoka dha li mokati kawo naamboka taya ehama. Ka li owala a aludha aavu ihe okwa li wo a gandja oshipopiwa tashi tsu omukumo, shoka haku tiwa Euvitho lyokOndundu. — Luk. 6:12-20.

5. Omitse dhomagumbo ohadhi landula ngiini oshiholelwa shaJesus shokuulika ohole nokuli nuuna dha vulwa?

⁵Nkene omitse dhomagumbo hadhi holele Jesus. Natu tye andola omusamane ngoka e li omutse gwegumbo okwa zimbuka kiilonga a vulwa noonkondo. Nonando okwa li a hala okuundulila komeho Elongelokalunga lyUukwanegumbo, okwa galikana Jehova e mu pe oonkondo, opo a vule oku li kwatela komeho. Opo nduno, Jehova okwa yamukula egalikano lye noya konakona pamwe ye li uukwanegumbo ngaashi shito. Ongulohi ndjoka aanona oyi ilongo oshinima sha simana shono kutya, aavali yawo oya pititha lela komeho okulongela Jehova.

6. Gandja oshiholelwa shankene Jesus a li i iyamba a longithe ethimbo lye a kwathele yalwe.

⁶Jesus okwa li ha longitha ethimbo lye a kwathele yalwe. Mbela Jesus okwa li e uvite ngiini sho a uvu kutya kuume ke, Johannes Omuninginithi, okwa dhipagwa? Oku na okukala a li a yemata noonkondo. Ombiimbeli oya ti: ‘Sho u uvu kombinga yeso lyaJohannes, okwa zi po mpoka e li mowato nokwa yi e ki ikalele muuwike.’ (Mat. 14:10-13) Oshi shi okuuviwa ko kutya omolwashike a li a hala okwiikalela. Aantu yamwe oye hole okwiikalela uuna ya nika oluhodhi. Ihe Jesus ka li ta vulu okwiikalela, oshoka manga inaa thika kehala hoka a li ta yi, okwa adha ko ongundu yaantu ya thika ko nale. Mbela okwa li i inyenge ngiini? Okwa mono kutya oya pumbwa ekwatho ‘nokwa li e ya uvitile olukeno.’ Opo  ihe, okwa “tameke oku ya longa iinima oyindji.” — Mark. 6:31-34; Luk. 9:10, 11.

7-8. Gandja oshiholelwa shoka tashi ulike kutya aakuluntugongalo ohaya holele Jesus uuna gumwe a pumbwa ekwatho megongalo.

⁷Nkene aakuluntugongalo aanahole haya holele Jesus. Ohatu pandula noonkondo iilonga yaakuluntugongalo mbyoka haya longo pehala lyetu. Aamwatate naamwameme oyendji megongalo ihaya kala ye shi iilonga ayihe mbyoka hayi longwa kaakuluntugongalo. Pashiholelwa, ngele gumwe megongalo okwa pumbwa epango lyopaunamiti meendelelo, aakuluntugongalo mboka ye li mOkomitiye yOkukwatathana nIipangelo ohaye mu kwathele meendelelo. Olundji oonkalo ndhono ohadhi holoka po mokati kuusiku. Ihe molwaashoka aakuluntugongalo oye hole aamwatate naamwameme, olukeno ohalu ya inyengitha pamwe naanegumbo lyawo, ya kwathele yalwe uuna ye li moonkalo oondhigu.

⁸ Aakuluntugongalo ohaya kwathele wo mokutunga Iinyanga yUukwaniilwa, omatungo galwe gehangano nosho wo mokugandja iikwatha kwaamboka ya dhengwa kiiponga yopaunshitwe. Ohaya longitha wo ethimbo lyawo olindji ye tu longe, ye tu tse omukumo noku tu kwathela. Aamwatate ayehe mboka nosho wo aanegumbo lyawo, oya gwana lela okupandulwa. Jehova na kale pamwe nayo omolwombepo yawo yeiyambo. Ngaashi owala aantu ayehe, aakuluntugongalo nayo oya pumbwa okukala ye na ondjele. Kaye na okukala haya longitha ethimbo olindji unene miinima ya pamba egongalo, yo taya kala kaaye na ethimbo lyokusila oshimpwiyu aanegumbo lyawo.

9. Shi ikolelela kAafilippi 2:4, 5, Aakriste ayehe oye na okukokeka uukwatya wuni?

⁹ Lesha Aafilippi 2:4, 5. Nonando katu shi aakuluntugongalo, atuheni otatu vulu okuholela Jesus mokukala tu na ombepo yokwiiyamba. Ombiimbeli otayi ti kutya Jesus okwa li a “zala olupe lwomupika.” (Fil. 2:7) Oshike tatu ilongo movelise ndjoka? Omupika nenge omupiya oha ningi ngaashi ta vulu a nyanyudhe mwene gwe, opo a kale e mu hokwa. Molwaashoka otu li aapiya yaJehova nohatu yakula aamwatate naamwameme, kapu na omalimbililo kutya otwa hala okulongithwa kuJehova pakuudha mokukwathela ooitaali oyakwetu. Natu ka kundathaneni omaetopo ngoka taga vulu oku tu kwathela.

10. Omapulo geni tatu vulu okwiipula?

¹⁰Konakona omaukwatya goye. Ipula omapulo taga landula: ‘Mbela ohandi kala ngaa nda halelela okuninga omaiyambo ndi kwathele yalwe? Pashiholelwa, ohandi inyenga ngiini ngele onda pulwa ndi ka talele po omumwatate omukokele ngoka ha zi megumbo lyaakulupe nenge ndi faalele omumwameme omukokele kokugongala? Mbela ohandi iyamba ngaa nehalo ewanawa ndi ka kwathele okwoopaleka ehala lyoshigongi nenge okwoopalekulula Oshinyanga shUukwaniilwa?’ Sho twi iyapulile Jehova, otwe mu uvanekela kutya otatu ka longitha ethimbo lyetu niiniwe yetu tu mu longele. Onkene, ngele otwa kala hatu kwathele yalwe, otatu ke mu nyanyudha. Oshike tatu ka ninga po, ngele otwa mono kutya otwa pumbwa okuninga omalunduluko?

11. Ongiini egalikano tali vulu oku tu kwathela tu kokeke ombepo yeiyambo?

¹¹Galikana kuJehova wa mana mo. Natu tye andola owa ndhindhilika kutya owa pumbwa okuninga elunduluko wu kale wu na ombepo yeiyambo, ihe ku na naanaa oonkondo dhoku shi ninga. Monkalo ndjono, galikana kuJehova wa mana mo. Kambadhala wu mu lombwele oshili kombinga yankene wu uvite, e to mu pula e ku pe ‘ehalo noonkondo, opo wu tsakanithe elalakano lye.’ — Fil. 2:13.

12. Aamwatate aagundjuka mboka ya ninginithwa otaya vulu ngiini okukwathela mehangano lyaJehova?

¹² Ngele owu li omumwatate omugundjuka nowa ninginithwa, galikana Jehova e ku pe ombepo yokukala wa halelela okukwathela aamwatate naamwameme megongalo lyeni. Miilongo yimwe omu na aakuluntugongalo oyendji okuyelekanitha naayakuligongalo. Ihe oyendji yomaayakuligongalo mboka kaye shi aagundjuka. Sho ehangano lyaJehova tali ende tali tamunuka mo, otwa pumbwa aamwatate oyendji aagundjuka, opo ya kwathele oshigwana shaKalunga. Ngele owu na ehalo lyoku ka kwathela kehe pamwe mpoka pu na ompumbwe, nena oto ka kala wa nyanyukwa. Omolwashike mbela? Molwaashoka oto ka nyanyudha Jehova, oto ki iningila edhina ewanawa noto ka kala wu na enyanyu ndyoka hali zi mokukwathela yalwe.

13-14. Oonkatu dhini tu na okukatuka, opo tu kwathele aamwatate naamwameme? (Tala ethano lyokombanda.)

¹³Kala ho tala kutya oolye ya pumbwa ekwatho. Omuyapostoli Paulus okwa li a kumagidha Aahebeli a ti: “Inamu dhimbwa okulonga uuwanawa nokukwathathana, oshoka omayambo ga tya ngeyi oga hokiwa kuKalunga.” (Heb. 13:16) Paulus okwa li e ya pe omayele omawanawa shili. Nziya konima sho Aakriste muJudea ya yakula ontumwafo ndjono, oya li ya lombwelwa kutya “naa tembukile koondundu.” (Mat. 24:16) Onkee ano, oya li ye na okuthiga po omagumbo gawo, oongeshefa dhawo nosho wo aakwanezimo yawo mboka ihaaya longele Jehova. Pethimbo ndyono  oya li ya pumbwa lela okukwathelathana. Andola oya adhikile haya tula miilonga omayele gaPaulus gokukala haya kwathelathana, nena ando osha kala oshipu kuyo okwiigilila onkalo ompe moka yi iyadha.

¹⁴ Aamwatate naamwameme haaluhe taye ke tu lombwela shoka ya pumbwa. Pashiholelwa, omumwatate ngoka a silwa omukadhi otashi vulika a kale a pumbwa iikulya, olefa nenge ekwatho miinima yilwe yomegumbo. Otashi vulika kee tu pule ekwatho, oshoka ota dhiladhila kutya ngele okwe shi ningi, ote tu tsike omutenge. Ote ke shi pandula noonkondo ngele otwa katuka onkatu tu mu kwathele, nonando ine tu pula. Katu na nando okudhiladhila kutya yalwe otaye ke mu kwathela nenge ngele okwa pumbwa ekwatho ote ke tu lombwela. Ipula to ti: ‘Andola ongame nda li monkalo ndjono, ekwatho lini tandi kala nda pumbwa?’

15. Oshike tu na okuninga, ngele otwa hala okukwathela yalwe?

¹⁵Kala ho popiwa nangoye nuupu. Otashi vulika wu shi aamwatate naamwameme megongalo lyeni mboka haya kwathele aluhe yalwe. Ihaye tu ningitha tu kale twa fa tatu ya tsike omutenge. Ihe otu shi shi kutya ohaya kala ya halelela oku tu kwathela uuna tu na ompumbwe. Natse otwa hala wo okukala twe ya fa. Omumwatate Alan, ngoka e li omukuluntugongalo gwomimvo 45 okwa li a hala okukala ha popiwa naye nuupu. Sho a dhiladhila muule koshiholelwa shaJesus okwa ti: “Nonando Jesus okwa li ha kala i ipyakidhila, aantu yomapipi agehe oya li haya kala ye mu mangulukila nokaya li haya kala ya tila oku mu pula ekwatho. Oya li ye shi kutya oku na ko nasha lela nayo. Onda halelela okuholela iikala yaJesus, mokukala handi popiwa nangame nuupu, omunahole nondi na ko nasha nayalwe.”  

16. Ongiini okutula miilonga oohapu ndhoka dhi li mEpisalomi 119:59, 60 taku vulu oku tu kwathela tu landule oshiholelwa shaJesus?

 ¹⁶ Katu na okuteka omukumo ngele itatu vulu okuholela Jesus thiluthilu. (Jak. 3:2) Omulongwa iha vulu okuholela naanaa thiluthilu omulongi gwe. Ihe omulongwa ote ke enda ta hwepopala ngele okwa kala ti ilongo komapuko ge nokuninga ngaashi ta vulu a holele omulongi gwe. Sha faathana, ngele otwa kala hatu tula miilonga shoka tatu ilongo mEkonakonombiimbeli lyetu lyopaumwene, nokukambadhala twa mana mo tu opaleke omapuko getu, otatu ka vula okulandula thiluthilu oshiholelwa shoka Jesus e tu tulila po. — Lesha Episalomi 119:59, 60.

17-18. Uuwanawa wuni tatu ka mona ngele ohatu holele ombepo yaJesus yeiyambo?

¹⁷ Ngele ohatu kwathele yalwe, nayo otaye tu holela. Omukuluntugongalo gwedhina Tim okwa ti: ‘Megongalo lyetu omu na aamwatate aagundjuka lela mboka ya ninga ehumokomeho noya langekwa po ye li aayakuligongalo. Oshike she ya inyengitha? Ombepo yeiyambo ndjoka ya mono kuyalwe. Aamwatate mboka aagundjuka oye li ekwatho enene megongalo nohaya ambidhidha aakuluntugongalo.’

¹⁸ Aantu oyendji muuyuni oyi ihole unene yo yene. Ihe oshigwana shaJehova osha yooloka ko kaantu mboka. Jesus okwe tu tulila po oshiholelwa oshiwanawa, nohatu kambadhala tu mu holele. Itatu vulu oku mu holela thiluthilu, ihe otatu vulu ‘okulandula ondjila ndjoka a li e yi ende.’ (1 Pet. 2:21) Ngele otwa ningi ngaashi tatu vulu tu holele ombepo yaJesus yeiyambo, natse otatu ka kala twa nyanyukwa, oshoka otu shi kutya Jehova okwe tu hokwa.