1. ¿Tlenon kichiuaj itekipanojkauan toTajtsin?

MELAK youejkauj, Biblia yokijtojka ika akin kitekichiuiliaj toTajtsin “notemakaskej ika nochi inyojlo” para kitekichiuiliskej ijkon ken Jesús kimijliskia (Sal. 110:3). Yejuin teotlajtojli inochiujtika ipan yejuin tonaltin. Sejse xiuitl itekipanojkauan toTajtsin ika nochi inyojlo tenojnotsaj miyek horas niman xtlaj kintlaxtlauiliaj. Noijki kixelouaj tiempo para kinpaleuiskej, kinyolchikauaskej niman kinchikauiliskej intlaneltokil imikniuan. Tokniuan tlayekankej niman tlapaleuijkej kixelouaj tiempo niman ijkon kiyektlaliskej tlen nopanoltis ipan tlanechikojli niman kominyolchikauaj tokniuan. ¿Tleka kichiuaj nochi yejuin? Pampa kitlasojtlaj Jehová niman kintlasojtlaj tlaltikpakchanejkej (Mat. 22:37-39).

2. Itech tlen kijtoua Romanos 15:1-3, ¿tlenon otechmachti Jesús?

² Jesús xsan itech otlanemili, yejua nochipa okitak kenon kinpaleuis oksekimej. Niman akin tikchiuaj ken Cristo,  tokojtiliaj tikchiuaskej ijkon ken yejua (xpoua Romanos 15:1-3). Melak techpaleuis tla ijkon tikchiuaj. Jesús okijto: “Más paki yejuan kitemaka xken on yejuan kiselia” (Hech. 20:35).

3. ¿Tlenon tikitaskej ipan yejuin tlamachtijli?

³ Ipan yejuin tlamachtijli tikitaskej kenon Jesús okinpaleui oksekimej niman kenon uelis tikchiuaskej ijkon ken yejua. Noijki tikitaskej tlenon uelis tikchiuaskej niman ijkon más tiknekiskej tikinpaleuiskej oksekimej.

4. ¿Kenon okiteititi Jesús ika xsan itech tlanemiliaya?

⁴Jesús okinpaleui oksekimej maski siaujtoya. San matontlanemilikan itech tlen Jesús okichiuj ijkuak miyekej tlaltikpakchanejkej okitatoj ipan se tepetl tlen onkatka nisiuj Capernaúm. Jesús melak siaujtoya pampa kichiujtoya teoyotl nochi yeuajli. San ika, ijkuak okimitak yejon tlaltikpakchanejkej, okimikneli niman okinpajti akin kualouayaj. Yejua xsan okinpajti noijki okinyolchikauj ika se kualtsin tlamachtijli, tlen noixmati ken Tlamachtijli ipan tepetl (Luc. 6:12-20).

5. ¿Kenon akin kinyekanaj inchanejkauan kichiuaj ijkon ken Jesús maski siaujtokej?

⁵¿Kenon akin kinyekanaj inchanejkauan kichiuaj ijkon ken Jesús? Matikonnemilikan ika se tajtli yotekit nochi tonajli niman ijkuak ajsi ichan melak yosiauj. Ipan yejon yeuajli noneki kiueyichiuas toTajtsin iuan ichanejkauan. Yejua kinemilia kimijlis ichanejkauan ika xuelis nomachtiskej ipan yejon tonajli, san ika, kitlajtlanilia Jehová makipaleui. Jehová kipaleuiya niman nochimej ichanejkauan nomachtiaj ijkon ken nochipa kichiuaj. Ipan yejon yeuajli, ikoneuan uelij itlaj tlen melak ueyi kijtosneki: ika intajuan nochipa nokojtiliaj kichiuaskej tlen Jehová techtlajtlanilia.

6. Xkijto tlenon ipan onochiuj Jesús ijkuak kinekiya san iselti nemis.

⁶Jesús okinpaleui oksekimej maski kinekiya san iselti nemis. San matikonnemilikan kenon onomachili Jesús ijkuak okimat ika Juan teapolaktijketl okimiktijkej. Yejua  melak onajman pampa iamigo katka. Biblia kijtoua: “Ijkuak Jesús ijkon okimat, onejkuanij ompa niman oyaj iselti ipan barco kampaka xakaj nemi” (Mat. 14:10-13). Yejua kinekiya san iselti nemis pampa melak noyolkokojtoya. Sekimej, ijkuak melak noyolajmanaj kinekij san inselti nemiskej. San ika, Jesús xueliskia san iselti nemis pampa miyekej san kichiatoyaj kampa yejua oajsik. ¿Tlenon okichiuj? Xsan itech otlanemili niman “sanoyej okinmiknelij” akin ompa nemiyaj. Okitak ika nonekiya kinchikauilis intlaneltokil niman ijkon okichiuj, “opeu kinmachtia miyek tlajtlamach” (Mar. 6:31-34; Luc. 9:10, 11).

7, 8. Xkijto kenon tlayekankej kinpaleuiyaj tokniuan ijkon ken Jesús okichiuj.

⁷¿Kenon tlayekankej tetlasojtlaj ijkon ken Jesús? ¿Xmelak ika tiktlasojkamatij nochi tlen tlayekankej kichiuaj topampa? Timiyekej xtikmatij nochi tekitl tlen tlayekankej kichiuaj. Ijkuak se tokniuj kineki makipaleuikan ipan hospital, tokniuan akin nemij ipan Comités de Enlace con los Hospitales nimantsin konpaleuiyaj. Ijkon kichiuaj maski melak itlayoua. Yejuin tlayekankej niman inchanejkauan xsan intech tlanemiliaj, yejuamej kitaj kenon kinpaleuiskej imikniuan.

⁸ Tlayekankej noijki tlapaleuiyaj kampa kinchijchiuaj Kaltin kampa tosentlaliaj niman noijki tlapaleuiyaj kampa tlaixpoliui. Niman xsan yejon, yejuamej noijki noneki kinmachtiskej, kinpaleuiskej niman kinyolchikauaskej tokniuan akin nemij ipan tlanechikojli. Noneki matikintlasojkamachilikan nochi tlen kichiuaj yejuin tlayekankej niman inchanejkauan. ¡Jehová makinteochiua  ipampa intekiyo! Tlayekankej noneki kuajli kichiuaskej intekiyo ipan tlanechikojli, san ika, noijki noneki kinpaleuiskej inchanejkauan machikaujto intlaneltokil. Yejuin itlaj tlen nochimej akin tikchiuaj ken Cristo, noneki tikchiuaskej.

9. Itech tlen kijtoua Filipenses 2:4, 5, ¿kenon uelis titlanemiliskej ijkon ken Cristo?

⁹ (Xpoua Filipenses 2:4, 5). Maski xtinochimej titlayekankej, tinochimej uelis titlapaleuiskej ijkon Jesús okichiuj. Biblia kijtoua ika Jesús “onochiu ken sen esclavo” (Filip. 2:7). ¿Tlenon techmachtia yejuin? Se tlakeuajli nochipa kita kenon kiyolpaktis iteko. Pampa tejuamej tiitlakeualuan Jehová niman tikintekichiuiliaj tokniuan, tiknekij más kuajli tiktekichiuiliskej toTajtsin niman tokniuan. Matikitakan kenon uelis ijkon tikchiuaskej.

10. ¿Tlenon uelis totlajtoltiskej?

¹⁰Kuajli xkita tla kuajli ken titlanemilia. Xmotlajtolti yejuin: “¿Niknektika nikinpaleuis oksekimej? ¿Tlenon nikchiuaskia tla nechijliskiaj maniktlajpaloti se tokniuj akin iueuentsin noso nechijliskiaj manijkuika ipan tlanechikojli se tokniuj akin ilamajtsin? ¿Nimantsin nikneki nitlapaleuis ijkuak nochipaua kampa tikpiyaj toueyitlanechikol noso ipan Kajli kampa tosentlaliaj?”. Ijkuak otosentemakakej itech Jehová, otikijlikej ika tikmakaskiaj nochi totiempo niman nochi tlen tikpiyaj. Yejua ika, yejua melak yolpaki ijkuak kita ika tikinpaleuiyaj tokniuan. San ika ¿tlenon uelis tikchiuaskej tla tikitaj ika xmás tiknekij titepaleuiskej?

11. ¿Tlenon techpaleuis tla xmás ipan toyojlo kisa tikinpaleuiskej oksekimej?

¹¹Xnotsa Jehová ika nochi moyojlo. Tla tikita ika xmás ipan moyojlo kisa tikinpaleuis oksekimej, xkijli Jehová. Ika nochi moyojlo xkijli kenon timomachilia. Niman xtlajtlanili mamitspaleui pampa yejua kichiua xneki niman xchiua tlen yejua kineki (Filip. 2:13).

12. ¿Kenon uelis tlapaleuiskej telpokamej akin yonoapolaktijkej?

¹² ¿Titelpochtli niman yotimoapolakti? Kuakon, xtlajtlanili Jehová mamitspaleui niman ijkon más tiknekis titlapaleuis ipan tlanechikojli. Ipan seki tlanechikoltin nemij miyekej tlayekankej, san ika, xmás nemij tlapaleuijkej. Niman miyekej tlapaleuijkej iuejueyimej. Pampa ikalpan Jehová ueyixtiuj noneki oksekimej tokniuan telpokamej akin kinpaleuiskej tlayekankej makitlajpiyakan ikalpan Jehová. Tla tejua tontlapaleuiya kampa más noneki, melak tiyolpakis pampa tikyolpaktis Jehová. Niman tokniuan kitaskej ika tiknektika titlapaleuis niman noijki ika moyojlo timomachilis pampa tikinpaleuijtika oksekimej.

13, 14. ¿Kenon uelis tikinpaleuiskej tokniuan? (Xkita tlaixkopinajli tlen onka ixpan yejuin revista).

¹³Xkita kenon uelis tikinpaleuis oksekimej. Apóstol Pablo okimijli Hebreos: “Maka xkelkauakan para nenkichiuaskej on tlen kuajli niman nenkinpaleuiskej oksekimej ika on tlen nenkipiyaj, pampa on yejua uentli yejuan kipaktia Dios” (Heb. 13:16). ¡Melak okinpaleui tlen okimijli! Pampa sakin, tokniuan de Judea okikajteujkej inkal, tlen kinemakayaj niman inchanejkauan akin xkitekichiuiliayaj toTajtsin niman ocholojkej kampa tepemej (Mat. 24:16). Ipan yejon tonaltin, tokniuan ononek melak nopaleuiskej.  Tla tokniuan nopaleuiayaj ijkon ken Pablo okimijlika, noijki ijkon kichiuaskiaj kampa onnochantiskiaj.

¹⁴ Kanaj tokniuan xtechijliskej tlenon kinpoloua. Matontlanemilikan itech se tokniuj akin yomik isiuauj. ¿Uelis tikontlamakaskej, tikuikaskej kampa nonekis yas noso uelis tikonpaleuiskej ichan? Kanaj yejua xtlaj techijlis pampa pinaui. San ika, tla tejuamej tikpaleuiya, yejua melak kitlasojkamatis. Maka matiknemilikan ika yakaj okse konpaleuis noso ika yejua techijlis tla itlaj kipoloua. Matotlajtoltikan: “Tla nejua ijkon nopan nochiujtoskia, ¿kenon nikuelitaskia manechpaleuikan?”.

15. ¿Tlenon noneki tikchiuaskej tla tiknekij tikinpaleuiskej oksekimej?

¹⁵Nochimej makitakan ika tiknektika titepaleuis. Kanaj ipan totlanechikol nemij tokniuan tlakamej niman siuamej akin nochipa kinektokej tepaleuiskej. Yejuamej xtechititiaj tla tikintekikotonaj niman kuajli tikmatstokej ika yejuamej nochipa techpaleuiskej niman tejuamej noijki tiknekij ijkon tikchiuaskej. Tokniuj Alan akin tlayekanketl niman kipiya 45 xiuitl kineki ijkon kichiuas. Yejua tlanemilia itech tlen Jesús okichiuj, niman kijtoua: “Jesús kipiaya miyek tekitl, maski ijkon miyekej kinekiyaj iuan nemiskej niman kitlajtlaniliayaj makinpaleui. Yejuamej kimatstoyaj ika Jesús kinekiya kinpaleuis. Nejua nikneki nikchiuas ijkon ken Jesús. Nikneki ika oksekimej makitakan ika uelis nouan tlajtoskej, ika nitetlasojtla niman ika niknektika nitepaleuis”.

16. ¿Kenon techpaleuiya Salmo 119:59, 60 matikchiuakan ijkon ken Jesús?

¹⁶ Xnoneki toyolkokoskej tla tikitaj ika xueli tikchiuaj nochi tlen Jesús okichiuj  (Sant. 3:2). Yakaj akin nomachtia xkeman uelis kitlanis imaestro, san ika, tla ijkuak nopopoloua nokojtilia kiyektlalis tlen xkuajli okichiuj niman nokojtilia kichiuas ijkon ken imaestro, yejua más kuajli kichiujtias itekiyo. Noijki ijkon, tla tejuamej tikchiuaj tlen tomachtiaj ipan Biblia niman tokojtiliaj tikyektlaliskej tlen xkuajli tikchiuaj, uelis tikchiuaskej ijkon ken Jesús okichiuj (xpoua Salmo 119:59, 60).

17, 18. ¿Kenon techpaleuis tla tikinpaleuiyaj oksekimej ijkon ken Jesús okichiuj?

¹⁷ Ijkuak tejuamej titepaleuiyaj, oksekimej noijki kinekij ijkon kichiuaskej. Se tlayekanketl akin itoka Tim, kijtoua: “Ipan totlanechikol nemij miyekej telpokamej akin más yokichikaujkej intlaneltokil niman yonochiujkej tlapaleuijkej”. Yejuamej ijkon okichiujkej pampa okitakej kenon oksekimej kinektokej tlapaleuiskej. Tlen yejuamej kichiuaj kipaleuiya tlanechikojli niman noijki melak kinpaleuiya tlayekankej.

¹⁸ Ipan yejuin tlaltikpaktli, miyekej san intech tlanemiliaj, san ika, akin tiktekichiuiliaj Jehová xijkon tikchiuaj. Tiknekij titepaleuiskej ijkon ken Jesús okichiuj. Maski titlajtlakolejkej, uelis tokojtiliskej tikchiuaskej ijkon ken Jesús (1 Ped. 2:21). Tla tokojtiliaj tikinpaleuiskej oksekimej ijkon ken Jesús okichiuj, tiyolpakiskej pampa tikmatstoskej ika tikyolpaktijtokej Jehová.