1. Hadia mbua-bua niforomaʼö nono mbanua Yehowa?

 IʼOTARAI mböröta, no ifaʼeleʼö Sura Niʼamoniʼö wa ’aoha gölö nono mbanua Yehowa’ ba wamosumange yaʼia hegöi ba woloʼö fanuturu lala nibeʼe Nononia. (Si. 110:3) No alua wamaʼeleʼö andrö iadaʼa. Ero röfi, owölö-ölö nono mbanua Yehowa ba wanuriaigö, ba töra satu miliar za ginötö niʼogunaʼöra ba wamalua daʼö. Lafalua daʼö si fao faʼaoha gölö ba lö lagazi ira. Baero daʼö, latolo ndra talifusöda ba wangaʼasogö soguna ba mboto hegöi ba wamati. Faoma göi lafarou dödö nawöra. Ira satua sokubaloi hegöi ira enoni, oya laʼogunaʼö ginötö ba wamaʼanö soguna ba gangowuloa, ba lakubaloi göi ndra talifusöda ba mbanua niha Keriso. Hana wa omasi nono mbanua Yehowa wamalua fefu daʼö? Börö me laʼomasiʼö Yehowa hegöi awöra niha.—Mat. 22:37-39.

2. Simane nisura ba Roma 15:1-3, hadia duma-duma nibeʼe Yesu khöda?

² No ibeʼe duma-duma si sökhi sibai Yesu ba wangofönaiʼö soguna ba niha böʼö. Tatu manö, omasi ita taforege ba woloʼö duma-duma nibeʼenia. (Baso Roma 15:1-3.) Na tafalua daʼö, oya mbua nitemada. Imane Yesu, ”Ohahau dödö ba wameʼe moroi ba wanema.”—Hal. 20:35.

3. Hadia nitutunöda ba artikel daʼa?

³ Ba artikel daʼa, tatutunö hewisa wangoromaʼö Yesu faʼaoha gölö ba wanolo niha tanö böʼö ba hewisa göi woloʼöda duma-dumania.  Tatutunö göi hewisa lalada ba wondrouʼö amuata faʼaoha gölö.

4. Hewisa wangofönaiʼö Yesu soguna ba niha böʼö?

⁴ Aoha gölö Yesu ba wanolo niha böʼö hewaʼae na no marase ia. Samuza inötö, tohare niha sato ba wamalukhaisi yaʼia ba gahe hili, te ahatö ba Gafanauma. Me luo daʼö, börö me awena sibai mangandrö Yesu sara wongi waʼara, tatu marase sibai ia. Hizaʼi, me iʼila niha sato andrö, ahakhö sibai dödönia ira. Aboto ba dödönia wa ato ba gotaluara niha si tosasa hegöi niha sofökhö. Iʼanemaiʼö ifadöhö niha sofökhö. Baero daʼö, ifaʼema göi huhuo si sökhi sibai si möi famarou dödö niha sato, yaʼia daʼö Huhuo ba Hili.—Luk. 6:12-20.

5. Hewisa högö yomo ba nomo ba woloʼö duma-duma Yesu ba wangoromaʼö faʼaoha gölö?

⁵ Lala högö yomo ba nomo ba woloʼö duma-duma Yesu. Khalaigö atö duma-duma andre: Me no aefa ilau mohalöwö si samösa ira matua si tobali högö yomo ba nomo, erege sibai dödönia. Ba wamobörö, tumbu ba dödönia wa lö ifalua Wamahaʼö zi Sambua Omo bongi daʼö. Hizaʼi, iʼandrö waʼabölö moroi khö Yehowa. Aefa daʼö, ibeʼe khönia waʼabölö Yehowa ba wamalua Famahaʼö zi Sambua Omo simane si toʼölö. Ba zi bongi daʼö, aboto ba dödö ndraonora wa abölö laʼofönaiʼö wamosumange Yehowa ira satuara moroi ba danö böʼö fefu, ba tobali famahaʼö si sökhi khöra daʼö.

6. Hewisa wanehegö Yesu inötönia ba wanolo niha böʼö?

⁶ Itehegö ginötönia Yesu ba wanolo niha böʼö. Hadia tola ökhalaigö hewisa dödö Yesu me irongo wa no labunu Yohane Samayagö Idanö? Tatu abu sibai dödönia. Imane Sura Niʼamoniʼö, ”Me irongo duria andrö Yesu, mofanö ia moroi ba daʼö itörö dundraha, möi ia ba zi lö niha-niha ha yaʼia.” (Mat. 14:10-13) Aboto ba dödöda hadia mbörö wa möi Yesu ba nahia si lö niha-niha. Ato göi ba gotaluada zamalua simane daʼö na mate niha niʼomasiʼöda. Hizaʼi, lö inötö Yesu ha yaʼi-yaʼia. Me ofeta ia ba nahia si möi ia, no ato niha sombaloi yaʼia ba daʼö. Hadia nifalua Yesu? ”Ahakhö dödönia” ira börö me iʼangeragö hadia zoguna khöra. Aboto ba dödönia wa moguna iʼabölöʼö ira ba wamati, ba iʼanemaiʼö ibeʼe zoguna khöra andrö. Sindruhunia, ”oya ifahaʼö ira” tenga ha maʼifu.—Mrk. 6:31-34; Luk. 9:10, 11.

7-8. Hewisa lala ndra satua sokubaloi ba woloʼö duma-duma Yesu ba wangoromaʼö faʼaoha gölö?

 ⁷ Lala ndra satua sokubaloi ba woloʼö duma-duma Yesu. Tatu taʼandrö sibai saohagölö khö ndra satua sokubaloi börö me aoha gölöra wangofönaiʼö soguna khöda! Te ato ndra talifusöda ba mbanua niha Keriso si lö mangila hadia manö halöwö nifalua ndra satua sokubaloi. Duma-dumania, ira talifusöda sohalöwö ba Panitia Penghubung Rumah Sakit, no lahenaigö ira wameʼe fanolo khö ndra talifusöda na so hadia ia zalua. Sasesenia, alua daʼö ba zi talu mbongi. Hewaʼae simanö, omasi ndra satua sokubaloi andrö ba wanolo ira talifusöda si so abula dödö börö me laʼomasiʼö ira. Aoha gölöra hegöi ösi nomora ba wangofönaiʼö soguna khö ndra talifusöra moroi ba zoguna khöra samösa.

⁸ Fao göi ndra satua sokubaloi ba wanolo niha si göna bencana alam hegöi ba wamasindro Nahia Gangowuloa mazui tomosa tanö böʼö niʼokhögö organisasi. Ba mbanua niha Keriso, oya laʼogunaʼö ginötö ba wamahaʼö hegöi ba wangaʼaroʼö yaʼita. Sinangea na taʼandrö saohagölö khöra hegöi ba nösi nomora. Hasambalö ifahowuʼö Yehowa waʼaoha gölö si no laforomaʼö! Tatu manö, simane yaʼita, moguna göi lafalua noro dödöra tanö böʼö ira satua sokubaloi. Tebai lahorigö ginötöra ha ba wamalua halöwö soguna ba mbanua niha Keriso irege lö saʼae inötöra ba nösi nomora.

9. Simane nisura ba Wilifi 2:4, 5, hadia lala wangera-ngera si lö tola löʼö laʼokhögö ira niha Keriso?

⁹ Baso Wilifi 2:4, 5. Sindruhu sa, ato ba gotaluada zi tenga satua sokubaloi. Hizaʼi, fefu ita tola taʼoʼö duma-duma waʼaoha gölö niforomaʼö  Yesu. Itutunö Sura Niʼamoniʼö wa ”iröi dadaomania hegöi niʼokhögönia, ifagölösi ia simane sawuyu”. (Fil. 2:7) Angeragö hadia geluahania daʼö. Samösa zawuyu mazui sohalöwö, lö tebulö iʼalui lala ba wangomusoiʼö tödö zokhö yaʼia. Tola tawaʼö wa yaʼita andre no sawuyu Yehowa ba sangai halöwö soguna khö ndra talifusöda. Börö daʼö, datanehegö wanuturu lala andre enaʼö itugu moguna ita khö Yehowa hegöi ira talifusöda.

10. Hadia manö wanofu-nofu sinangea taʼangeragö?

¹⁰ Fareso ndraʼugö samösa. Angeragö wanofu-nofu andre: ’Hadia aoha gölögu ba wameʼe inötö hegöi faʼabölögu ba wanolo niha böʼö? Duma-dumania, na laʼandrö khögu ba wamalukhaisi talifusöda si so ba panti jompo mazui ba wamaondragö talifusöda si no alawa döfi ba weʼamöi ba gangowuloa, hadia omasido ufalua daʼö? Mazui, na moguna zohalöwö ba wangehaogö Nahia Gangowuloa hegöi nahia gangowuloa ba zi sambua regional, hadia omasido ulului halöwö andrö?’ Ba ginötö talulu waʼaurida khö Yehowa, no tafabuʼu khönia wa hasambalö taʼogunaʼö fefu niʼokhögöda ba wamosumange yaʼia. Omasi ia na taʼogunaʼö ginötö, faʼabölö, hegöi okhötada ba wanolo niha böʼö. Tatu omuso dödö Yehowa na tafalua daʼö si fao faʼaoha gölö. Hizaʼi, na taʼila wa ambö nasa taforomaʼö waʼaoha gölö, hadia zinangea tafalua?

11. Hewisa wa tola möi fanoloda wangandrö enaʼö so khöda waʼaoha gölö?

¹¹ Angandrö soroi ba dödö khö Yehowa. Te aboto ba dödömö wa moguna öforege enaʼö so khöu waʼaoha gölö, hizaʼi lö khöu faʼedöna ba wamalua yaʼia. Na simanö, angandrö khö Yehowa soroi ba dödö. Böi biniʼö khönia hadia nirasoimö, ba andrö khönia enaʼö ibeʼe khöu ”waʼedöna ba faʼabölö ba wamalua somasi ia”.—Fil. 2:13.

12. Hana wa moguna ba organisasi Yehowa ndra talifusöda si bohou ebua si no tebayagö idanö?

¹² Ira talifusöma si bohou ebua si no tebayagö idanö, miʼandrö khö Yehowa enaʼö ibeʼe khömi waʼedöna ba wamalua halöwö soguna khö ndra talifusöda ba mbanua niha Keriso. Ba zi hauga soi, abölö ato ndra satua sokubaloi moroi khö ndra enoni, ba ato moroi ba gotalua ndra enoni si tenga saʼae si bohou ebua. Baero daʼö, börö me itugu tedou organisasi Yehowa, moguna latolo ndra satua sokubaloi ira si bohou ebua ba wangai halöwö soguna khö ndra talifusöda ba mbanua niha Keriso. Na aoha gölömi ba wangai halöwö gofu hezo so lafataro ami, hasambalö mirasoi waʼomuso dödö. Hadia mbörö? Börö me omuso dödö Yehowa, miʼokhögö döi si sökhi föna ndra talifusöda, ba ohahau dödömi me tola mitolo niha böʼö.

13-14. Hadia zinangea tafalua ba wanolo ira talifusöda? (Faigi gambara ba guli majalah.)

¹³ Angeragö zoguna ba niha böʼö. Iʼamenesi niha Keriso si so ba Yudea Faulo, ”Böi olifu ami wamalua si sökhi ba niha ba faoma mitolo nawömi, börö me omasi Lowalangi zumange simane daʼö.” (Heb. 13:16) Tefaudu sibai mene-menenia andrö! Lö ara me no latema zura nibeʼe Waulo, lö tola löʼö laröi nomora, halöwöra, hegöi ösi nomora si tenga si sara lala wamati ba lalau ’moloi ba hili’. (Mat. 24:16) Ba ginötö simane daʼö, tatu moguna faoma latolo nawöra. Na no lafalua ba zilalö mene-mene Waulo enaʼö faoma latolo nawöra, tatu aoha khöra wamalua daʼö ba ginötö larugi nahia si bohou.

¹⁴ Lö ahori lafatunö khöda ira talifusöda hadia manö zoguna khöra. Khalaigö atö duma-duma andre: So samösa dalifusöda ira matua sabu tödö börö me bohou mate woʼomonia. Tola manö moguna khö dalifusöda andrö  wanolo ba wohenaigö ö, ba weʼamöi ba zi sambua nahia, mazui ba wamalua halöwö yomo ba nomo. Hizaʼi, te lö omasi ia ifatunö khöda börö me ataʼu ia na akao ita. Hewaʼae simanö, tatu iʼandrö sibai saohagölö khöda na tatolo ia fatua lö niʼandrönia khöda. Böi so ba wangera-ngerada wa no latolo ia niha böʼö mazui tawaʼö wa ifatunö sa dania khöda na moguna khönia wanolo. Moguna tasofu khöda samösa, ’Na alua khögu zimane salua khönia, hadia wanolo soguna khögu?’

15. Hadia zinangea tafalua enaʼö tola taforomaʼö waʼaoha gölö simane nifalua Yesu?

¹⁵ Yatobali ndraʼugö niha si fahuwu. Ba mbanua niha Keriso, tatu so ndra talifusöda si lö tebulö manolo niha böʼö. Faduhu dödöda wa hasambalö latolo ita ba ginötö waʼatosasa, ba lö irai so ba dödöra wa no akao ira tabeʼe. Tatu omasi ita tafalua zimane daʼö. Itutunö si samösa satua sokubaloi si 45 fakhe sotöi Alan wa omasi ia tobali niha si fahuwu. Imane, ”Oya sibai halöwö Yesu. Hewaʼae simanö, ohahau dödö ndraono hegöi satua na so ira ba zingania, ba lö alawö-lawö ira ba wangandrö tolo khönia. Aboto ba dödöra wa sindruhu-ndruhu iʼameʼegö tödö ira. Omasido uʼoʼö duma-duma nibeʼe Yesu, ba uforege enaʼö laʼila niha wa uʼameʼegö tödö ira, fahuwu ndraʼo ba niha, ba ohahau dödöra fariawö khögu.”

16. Na taʼoʼö mene-mene si so ba Zinunö 119:59, 60, hana wa itugu fakhili gamuatada khö Yesu?

¹⁶ Na lö moʼahonoa woloʼöda duma-duma nibeʼe Yesu, böi ide-ide dödöda. (Yak. 3:2) Na itoto geu mazui kara si samösa niha sawena mamomaha yaʼia, tola manö lö fagölö sibai nifazökhinia ba nifazökhi zamahaʼö yaʼia, si no atua-tua ba wamalua daʼö. Hizaʼi, na lö tebulö ifahaʼö ia ba iforege ba woloʼö samahaʼö yaʼia, tola manö itugu sökhi wamaluania halöwö  andrö. Simanö göi, na tafalua hadia zi no tafahaʼö ita ba Zura Niʼamoniʼö ba lö tebulö taforege ba wangehaogö amuatada, itugu fakhili gamuatada khö Yesu.—Baso Zinunö 119:59, 60.

17-18. Hadia mbuania na taʼoʼö duma-duma Yesu sangoromaʼö faʼaoha gölö?

¹⁷ Na taforomaʼö waʼaoha gölö, tola terou dödö niha böʼö ba wamalua daʼö. Imane si samösa satua sokubaloi sotöi Tim, ”So ösa ndra talifusöda si bohou ebua sangai halöwö tobali enoni. Terou dödöra wangai halöwö simane daʼö börö me laʼila waʼaterou dödö niha böʼö ba wamalua halöwö khö Yehowa. Ira talifusöda si bohou ebua andre, moguna sibai ira ba mbanua niha Keriso ba sindruhu-ndruhu tobali ira fanolo khö ndra satua sokubaloi.”

¹⁸ Ato niha ba gulidanö andre ha tana khöra laʼalui. Hizaʼi, faböʼö sibai nono mbanua Yehowa. Tofakha ba dödöda waʼaoha gölö niforomaʼö Yesu, ba omasi ita taʼoʼö nifaluania andrö. Hewaʼae na lö moʼahonoa woloʼöda duma-duma nibeʼe Yesu, tola ’tahaogö wanara lahenia’. (1 Fe. 2:21) Na taforege ba woloʼö duma-duma nibeʼe Yesu, hasambalö tasöndra waʼomuso dödö börö me tola taʼomusoiʼö dödö Yehowa.