1. Abandu ba Yehova bawite omubere wahi mubuya?

KERA, eBiblia moyabugha embere yiti abandu b’oMungu ‘bakasyayiherera’ okw’anza lyabo ib’ibene-bene omo mubírí wa Yehova omw’ikwama obusondoli bwa Yesu. (Esy. 110:3) Kwenene obuminyereri obo bunemubererera munabwire. Obuli mwaka, abaghombe ba Yehova ab’omuhwa bakalabaya amaghana w’amamilioni w’esyosaha sy’omo mubírí w’eritulira. Sibelihawa esyofranga busana n’erikola omubírí oyo, bakakolagho omw’anza lyabo. Kandi bakayihiriraho n’endambi y’eriwatikya abalikyabo eribaha ebyo balaghireko, eribasikya emitima, n’eriwatya obwikirirya bwabo. Abasyakulu b’endeko n’abaghombe bawatikya bakalabaya esyosaha nyingyi omwiteghekania ebitswe by’emihindano n’erilenderera abaghala n’abali babo busana n’eribasikya mitima. Ekikabakuna erikola ebyosi ebyo niki? Ni busana n’olwanzo​—banzire Yehova kandi banzire abandu.​—Mat. 22:37-39.

2. Ngoko kisakirwe omo Abanya Roma 15:1-3, Yesu mwatusighira eky’erileberyako kyahi?

² Yesu mwatusighira eky’erileberyako ekyuwene omw’ihira ebyo abandi balaghireko by’embere sy’ebiwe. Tukayikasa ngoko twangatoka tutoke eribya ng’aye. (Soma Abanya Roma 15:1-3.) Twamakola tutya itukendibana endundi nene. Yesu mwabugha ati: “Erihitya likaleta obutseme kwilaba erihabwa.”​—Emib. 20:35.

3. Tukendighaki omo mwatsi ono?

³ Omo mwatsi ono, tukendilebya emyatsi milebe eyo Yesu akola eriwatikya abandi kandi tukendilangira ngoko twangakwama eky’erileberyako kiwe. Kandi tukendikania okw’iminya ngoko twangakulya kundu eriyisunza lyetu ly’erikolera abandi.

4. Yesu mwalabya eby’abandi by’embere kwilaba ebiwe ati?

⁴Yesu mwawatikya abandi nibya n’omughulu abya aluhire. Ulengekanaye oko ebyo Yesu akola omughulu abandu bangyi bamuhikira oko lutambi lw’ekitwa, alinga hakuhi n’eKapernaumu. Omo kiro ekyosi ekyo bwabya ibwabirikya Yesu inianemusaba. Syangabula eribya iniabya iniabiriluha kutsibu, aliwe abere alangira ekikumula, mwakwira abera n’abakoni ababya omo kati kabo b’obulighe. Mwabalamya kandi mwabalabirya omughuma w’oko mikania y’abandu bosi eyikasubaya omutima w’omonda owaminyikere kulenga emikania yosi​—owasibwe m’oMukania w’oko Kitwa.​—Luka 6:12-20.

5. Emitwe y’ebihanda bak’igha bati eky’erileberyako kya Yesu eky’erikangania olwanzo omughulu baluhire?

⁵Emitwe y’ekihanda bak’igha eky’erileberyako kya Yesu kyo bati. Ulengekanaye oko eky’erileberyako kino: Enyuma sy’erilabya omusibo wosi w’oko mubírí, tata mughuma w’ekihanda amasuba eka iniabiriluha kutsibu. Anganabya inialwe anzire ati Eriramya ly’Eka ly’omo righolo eryo sirikoleke, aliwe amasaba Yehova y’amaka atoke erisondola endegheka eyo. Yehova amasubirya oko musabe wiwe, neryo tata am’igha haghuma n’ekihanda kiwe ngoko bakanakola obuli yenga. Abana bam’igha esomo y’omughaso omo righolo eryo, ni bughambu, oko babuti babo, eriramya ni ry’omughaso kulenga ekindi kindu kyosi-kyosi.

6. Ulete eky’erileberyako ekikakanganaya ngoko Yesu mwakolesya endambi yiwe busana n’eriwatikya abandi.

⁶Yesu abya akalabya endambi eyo anganzire eribya iyuwene yo haghuma n’abandi. Terilengekania Yesu nga mwayowa ati omughulu owa ngoko omwira wiwe yo Yoane Mubatisya babirimwita. Yesu syangabula eribya imwakwa obulighe bo kutsibu. EBiblia ikabugha yiti, “omugulu Yesu owa omwatsi oyo, mwaluaho omo bwato, mwaya iyowene ehandi ahate bandu.” (Mat. 14:10-13) Twanganaminya ekyaleka inianza eribya iyuwene. Abandu balebe bakanza erilirira ahate abandu. Aliwe Yesu, mwatatoka eribya iyuwene. Ekikumula ky’abandu bangyi mokyamutangirira eyo asonda eriyabya iyuwene. Nikwa Yesu mwakolaki? Mwalengekania oko biyitawa by’ekikumula, neryo “mwakwirabo bulige.” Yesu mwaminya ngoko babya balaghire oko buwatikya n’erisikibwa mutima  erilua oko Mungu, neryo Yesu mwatsuka eribawatikya aho n’aho. Kwenene, “mwatsuka erikangiriryabo emyatsi mingyi [aliwe, butsira mike].”​—Mar 6:31-34; Luka 9:10, 11.

7-8. Ulete eky’erileberyako ekikakanganaya ngoko abasyakulu b’olwanzo bak’igha emibere ya Yesu omughulu omundu mulebe omo ndeko alaghire oko buwatikya.

⁷Ngoko abasyakulu b’olwanzo bak’igha eky’erileberyako kya Yesu. Tukasima kutsibu busana n’omubírí owo abasyakulu betu b’olwanzo bakatukolera! Abangyi b’oko baghala n’abali betu omo ndeko sibasi bingyi oko mubírí owo basyakulu bakakola. Eky’erileberyako, omughulu hakabya omukoni w’eriwatikibwa luba, abasyakulu abakakola omo Katunga Akakakola omo Bughuma n’oLupitali bakanguha eriwatikya abaghala n’abalikyabo. Emyatsi ya lubaluba eyiri ng’eyo kangyi-kangyi yikahika omo kati-kati k’ekiro! Neryo busana abasyakulu banzwa abo haghuma n’ebihanda byabo bakakwira omughala kutse mwali wetu oyuli omo buligho y’obulighe, bakahira endundi y’abaghala babo Bakristo y’embere kwilaba eyabo.

⁸ Kandi abasyakulu b’endeko bakawatikaya n’oko buhimbe bw’eBisenge by’oBwami n’eyindi myanya y’eriramiryamo n’omo buwatikya b’omughulu w’ebitsinduli. Kandi bakalabaya endambi yabo nene omw’itukangirirya, eritusikya mutima, n’erituwatikya. Abaghala betu abosi abo n’ebihanda byabo batolere itwabasima. Kisi Yehova abye n’omutima owo bakakanganaya! Kwenene, abasyakulu b’endeko litolere ibabya n’obulingirirania ng’obuli mundu wosi. Sibatolere erilabya esyosaha nyingyi omw’ikola emyatsi y’endeko neryo ikyaleka ibabula endambi y’eritsomana ebiyitawa by’ebihanda byabo.

9. Ngoko Abanya Filipi 2:4, 5 ikabugha, ni mubere wahi owo itwe Bakristo bosi tutolere itwakulya?

⁹ Soma Abanya Filipi 2:4, 5. Aliwe itwe bosi twangan’igha eky’erileberyako kya Yesu eky’erihira ebiyitawa by’abandi by’embere oko byetu, butsitra abasyakulu basa. EBiblia yikabugha yiti “mwayiyira ng’omugombe.” (Flp. 2:7) Ulengekanaye oko ekyo twang’igha omo risako eryo. Omukobe oyusikibwe, kutse omughombe, anganasondekania ehyanya hy’eritsemesyamo omukama wiwe. Kundi tulibakobe ba Yehova kandi kusangwa tukakolera abaghala betu, twanzire erikola bingyi busana na Yehova n’abalikyetu. Wanganakola utya omw’ikolesya amahano awakwamire.

10. Ni mabulyo wahi awo twangayibulya?

¹⁰Uyiteghereraye emibere yaghu. Uyibulaye amabulyo ng’ano: ‘Ninayiteghekenie erikolesya endambi n’akaghala kaghe eriwatikya abandi? Eky’erileberyako, nangakolaki bamabinyisaba eriyabana mughala wetu oyukekeluhire omo nyumba eyikatsungirawamo abakekeluhire kutse eritwala mwali wetu mukekulu y’oko mihindano? Ngananguha eriyawatikya omughulu hali obwagha bw’abakayanzira eriyerya ekibugha ky’emihindano minene-minene kutse erisugha eKisenge ky’oBwami?’ Omughulu twayiherera oko Yehova, motwamulagha tuti tukasyakolesaya ebyosi ebyo tuwiteko busana n’erimukolera. Anzire itwakolesya endambi yetu, akaghala, n’ebindu byetu busana n’eriwatikya abandi. Neryo akatsema kutsibu omughulu tukayanzira erikola tutya. Ibwa twamalangira tuti hane omwatsi mulebe owatolere ituwaniagho, twangakolaki?

11. Omusabe angatuwatikya ati erikulya omubere w’eriyanzira eriwatikya abandi?

¹¹Usabe Yehova erilua oko mutima. Tubughe tuti wamalangira ngoko utolere eryuwania emibere yaghu y’eriyiherera, aliwe iwayowa nga ukataluka erikola ebyo wanzire erikola. Oko mwatsi oyo, usabe Yehova erilua oko mutima. Ubye w’ekwenene. Ubwire Yehova ngoko ukayowa kandi umusabe uti akuhe ‘[eriyisunza n’amaka] w’erikola ebikamutsemesaya.’​—Flp. 2:13.

12. Abaghala betu balwana ababatisibwe bangawatikya endondeka yo bati?

¹² Wamabya iwuli mulwana, mughala wetu oyubatisibwe, usabe Yehova akuwatikaye erikulya omubere w’eriyisunza erikola bingyi omw’iwatikya abaghala n’abali betu b’omo ndeko. Omo bihugho bilebe, muli abasyakulu b’endeko bangyi kulenga abaghombe bawatikya, kandi abangyi b’omo baghombe bawatikya abo bamabikula kutse sibakiri balwana. Ngoko endondeka yinemulola embere erikula, tulaghire oko baghala betu bangyi balwana eriwatikya abasyakulu b’endeko eriteya abandu ba Yehova. Wamabya iwuyisunzire erikolera omo nzira yosi eyo ulaghirweko, iwukasyabana obutseme. Busanaki? Kundi iwukendisyatsemesya Yehova, abaghala betu ibakendilangira ngoko uli n’omutima w’eriyanzira eriwatikya abandi, kandi iwukasyabana obutseme obo eriwatikya abandi bukaleta.

13-14. Twangakolaki tutoke eriwatikya abaghala n’abali betu? (Lebaya epitsa eyiri oko kijalada.)

¹³Ubye ukayiteghererya ndeke kandi uminye omughulu omundu amalagha oko buwatikya. Omukwenda Paulo mwabwira Abakristo ababya eYudea ati: “Simwibirirawe erikola ebibuya nʼeriwatikania, kusangwa ebi biringʼamahere awakatsemesaya oMungu.” (Ebr. 13:16) Eryo ryabya rihano eritolere! Mughulu muke enyuma sy’eripokera ebaruha eyo, aBakristo abo mobasighania amanyumba wabo, emibírí yabo, n’abatunga babo ababya isibikirirye, neryo mobatsuka “erisagira oko bitwa.” (Mat. 24:16) Oko ndambi eyo, eriwatikania lyabya ly’omughaso munene okw’ibo. Bamabya  imobatsuka eribya bakakolesya erihano lya Paulo ery’erisangira haghuma ebyo babya bawiteko, erikolesya ebindu bike by’omo maisa wabo mahya-mahya lyangabolobireko.

¹⁴ Abaghala n’abali betu sibetubwira ebiro byosi nga balaghire oko kindu kilebe. Eky’erileberyako, kwamuhwa omukali w’omughala wetu anganabya iniabirihola. Mughala wetu alaghire okw’iwatikibwa n’ebyalya, erihekwa omo mutoka, kutse eriwatikibwa oko mibírí y’omo nyumba? Anganaghana eritusaba obuwatikya busana n’erisagha ati alinga akenditukenderya. Aliwe anganasima kutsibu twamabimuwatikya nibya embere atusabe obuwatikya. Siritolere erilengekania tuti oghundi mundu akendimuwatikya kutse tuti obuli kiro akasyabya akatubwira ebyo alaghireko. Uyibulaye, ‘Ingye namabibya omo maligho awalimo, ni buwatikya bwahi obo nangatsemera erihabwa?’

15. Twangakolaki twamanza eriwatikya abandi?

¹⁵Ubye mundu oyo abandi bakasaba obuwatikya bweghu-bweghu. Ahate eritika-tika unasi omo ndeko yenyu mw’abaghala n’abali betu abayiteghekenie eriwatikya abandi mughulu wosi. Sibalileka itwalengekania nga tukabakenderaya. Tunasi ngoko twanganayiketerabo tuti omughulu hakasyabya obwagha bakasyatsemera erituwatikya, kandi twanzire itwabya ng’abo! Alan, omusyakulu w’endeko ow’emyaka 45, anzire eribya oyo abandi bakanza erisaba obuwatikya. Alan, enyuma sy’erilengekania oko eky’erileberyako kya Yesu akabugha atya: “Yesu abya n’ebingyi by’erikola, aliwe abandu b’olubu losi babya bakayitunda hakuhi naye kandi ibakayowa ndeke erimusaba obuwatikya. Mobaminya ngoko abya abatsomene. Nanzire omo mutima waghe wosi eribya nga Yesu n’eriminywa m’omundu oyo abandi bakanza erisaba obuwatikya, ow’omutima w’olwanzo, kandi oyutsomene abandi.”

16. Erikolesya erisako ly’ Esyonyimbo 119:59, 60 lyangatuwatikya liti erikwama eky’erileberyako kya Yesu kyo ndeke?

 ¹⁶ Situtolere eribunika mutima twamataluka erigha eky’erileberyako kya Yesu ky’omo nzira yihika-hikene. (Yak. 3:2) Omukolo oyukigha omubírí mulebe syangalua akatokagho kulenga omukangirirya wiwe. Aliwe omughulu akalola embere erighira esomo y’omo makosa wiwe n’eriyikasa erikwama emikolere y’omukangirirya wiwe yo ndeke-ndeke, omukolo oyo iniakendilola embere eryuwania obutoki bwiwe. Omo nzira ngumerera, twamabikolesya ebyo tuk’igha omughulu tukayighisaya eBiblia itw’ibene-bene, n’eriyitsinga omw’iyikasa eryuwania emibere yetu, itukendikwama eky’erileberyako kya Yesu kyo ndeke kutsibu.​—Soma Esyonyimbo 119:59, 60.

17-18. Ni ndundi syahi syo tukasyabana twamab’igha omubere wa Yesu ow’eriwatikya abandi?

¹⁷ Omughulu tukabya n’omutima w’eryanza eriwatikya, abandi nabo bakakunawa erikola batya. Omusyakulu w’endeko mughuma oyukahulawamo Tim akabugha ati: “Tuwite abaghala betu balwana ababiribya baghombe bawatikya​—abaghuma ibakine balwana kutsibu. Ekikaleka kighuma ni busana ibakalangira ngoko abandi bakayiherera eriwatikya, neryo babya banzire eribya ng’ibo. Abaghala betu balwana abo bakawatikaya endeko yetu kandi bakaha abasyakulu b’endeko b’obuwatikya bunene.”

¹⁸ Tuli omo kihugho ekyoswiremo obuhemu. Aliwe abandu ba Yehova ibo sibali batya n’ahake. Omubere wa Yesu w’eriwatikya abandi abiritubindula, kandi tuyisoghire erikwama eky’erileberyako kiwe. Sitwangatoka erikwama olughobe lwiwe l’omo nzira eyihikahikene, aliwe twanganakwama ‘olugobe [lwiwe lo hakuhi-hakuhi].’ (1 Pet. 2:21) Twamakola ngoko twangatoka erigha eky’erileberyako kya Yesu, itukendisyabana obutseme kundi tukatsemesaya Yehova.