1. Kansi ni maganizo aweme otyani ŵalinawo ŵanthu a Yehova?

 MU NTHAWE zakuvuli, Baibolo inenelatu kuti ŵanthu a Mulungu “azalipeleke mofunishisha” potumikila Yehova komasoti pokonkheja malangizo a Mwana wake. (Sal. 110:3) Ulosi wamene uyu ukwanilishiwa ŵano masiku. Chaka chilichonse, atumiki akhama a Yehova opeleka maola mamiliyoni anyinji pa ntchito yolalikila. Ove olipiliwalini pa ntchito yamene iyi, koma oikata chifukwa cha kufuna kwawo. Ove okatishilasoti ntchito nthawe yawo poyavya Akhilisitu ayawo mwakuthupi, mwamaganizo komasoti mwauzimu. Abale a maudindo otola nthawe ikulu kuti akonzekele mbali za misonkhano komasoti kunyungila abale na alongo kuti aŵalimbikise. Kansi n’chinji chuŵachitisha kukata ntchito zonse zamene izi? Chifukwa chakuti ove okonda Yehova—komasoti okonda ŵanthu.—Mt. 22:37-39.

2. Mokatijana na lemba ya Aroma 15:1-3, kansi n’chisanzo chotyani chechiwonesha Yesu?

² Yesu ewonesha kuti enzesamalila ngako vosoŵa va ayakine kupambana vake. Sewo nase tufunika kuchita vonse vatingakwanishe pokonkheja chisanzo chake. (Ŵelengani Aroma 15:1-3.) Keno tuchita vamene ivi tingankhale na vokonkhapo viweme. Yesu enena kuti: “Kupasa kuleta chisangalalo chikulu kupambana kulondela.”—Mac. 20:35.

3. Kansi tikambilane chinji mu nkhani ino?

³ Mu nkhani ino, tikambilanesoti vinthu viyakine vechichita Yesu kuti ayavye ayakine komasoti tiwone mwatingamukonkhejele. Tiphunzilesoti mwatingakulishile chifuno chasu kuti tikochita vinyinji potumikila ayakine.

4. Kansi Yesu eika pasogolo vofuna va ayakine kupambana vake mu njila yotyani?

⁴ Yesu enzeyavya ayakine olo kuti enzenkhala woŵewa. Ganizilani vechichita Yesu, ŵanthu anyinji pechiwela kuli yove mmbali mwa lupili, payakine kufupi na ku Kaperenao. Yesu echezela usiku wonse opemphela. Vuwoneka kuti yove enze eŵewa ngakosoti, koma pechiwona gulu ya ŵanthu, ekhuzika muntima mwake ndipo emvwila chisoni ŵanthu osauka komasoti olwala amene enze pakati pawo. Yove aliyeŵapojeke tyala, koma elaŵilasoti imozi mwa nkhani zolimbikisa ngako—yamene yuziŵika kuti Ulaliki wapa Lupili.—Lk. 6:12-20.

5. Kansi mitu ya mabanja yukonkheja tyani chisanzo cha Yesu powonesha chikondi olo kuti onkhala oŵeŵa?

⁵ Mwamene mitu ya mabanja mwayukonkhejela chisanzo cha Yesu. Ganizilani chisanzo ichi: Pavuli pakuti wakata ntchito nsiku yonse, tata ofwika kung’anda woŵeŵa ngako. Chifukwa cha vamene ivi, yove onyalanyaza kuti achitishe Kulambila kwa pa Banja nchingulo, koma pavuli pake yove osenga kwa Yehova kuti amupase mphamvu kuti akwanishe kuchitisha Kulambila kwa pa Banja. Yehova oyankha pemphelo yake ndipo tata ophunzila na banja yake monga ni mwakuchitila sondo iliyonse. Ndipo ŵana ophunzila chinthu chofunika ngako nchingulo wamene uyo, poziŵa kuti makolo ŵawo owona kulambila Yehova kunkhala chinthu chofunika ngako.

6. Pelekani chisanzo cha mwamene Yesu mwenzekatishilila ntchito nthawe yake kuti ayavye ayakine.

⁶ Yesu enzefwana nthawe yotandala na ŵanthu ayakine olo kuti nthawe ziyakine enzefuna kunkhala kwayeka. Kansi muganiza kuti Yesu echimvwa tyani pechimvwa kuti nshamwali wake Yohane M’batizi wapaiwa? Vuwoneka kuti Yesu echimvwa chisoni ngako. Baibolo yunena kuti: “Yesu pechimvwa [vokhuza imfwa ya Yohane], efumako kwamene uko na bote noluta ku malo kuliye ŵanthu kuti akankhale payeka.” (Mt. 14:10-13) Tingakwanishe kumvwisha chifukwa chake yove efuna kunkhala kwayeka. Ŵanthu ayakine okonda kulila ali paŵeka. Koma viliyekwanishike kuti Yesu ankhale payeka. Gulu ikulu ya ŵanthu ifwika ku malo amene awo kwamene kwenzeve ŵanthu, Yesu akaliyefwikako. Kansi Yesu echita tyani? Yove eganizila vosoŵa va ŵanthu amene awo, ndipo “eŵamvwila chisoni.” Yesu eziŵa kuti ŵanthu amene  awo enzefunikila thandizo na chitonthojo chofumila kwa Mulungu, tetyo mokulumija yove eyamba kuŵayavya. Pa chifukwa chamene ichi, “yove eyamba kuŵaphunzisa vinthu vinyinji.”—Mk. 6:31-34; Lk. 9:10, 11.

7-8. Pelekani chisanzo chuwonesha kuti akulu achikondi okonkheja Yesu keno munthu muyakine mumpingo ofunikila thandizo.

⁷ Mwamene akulu achikondi mwakukonkhejela Yesu. Sewo tuŵatembeja ngako akulu chifukwa cha ntchito ikulu yakukata pakati pasu! Abale na alongo anyinji mumpingo, oziŵalini vokhuza ntchito zonse zakunkhala nazo akulu amene aŵa. Mwachisanzo, pakachitika vuto ya mwazizizi, abale a m’Komiti Yolaŵila na a Zachipatala, oluta mokulumija kuyathandiza Akhilisitu ayawo. Mavuto a mwazizizi amene aŵa, nthawe ziyakine ochitika pakati pa usiku! Koma chifukwa chomvwila chisoni m’bale olo mulongo wawo wamene wakumana na mavuto, akulu okondewa amene aŵa pamozi na mabanja ŵawo, oika pasogolo vofuna va Akhilisitu ayawo kupambana vawo.

⁸ Akulu okatasoti ntchito yomanga Ng’anda za Ufumu na malo ayakine, komasoti kuyavya pakachitika masoka. Ndipo tingakwanishe kulaŵila vinyinji vokhuza nthawe ikulu yakukatishila ntchito akulu pofuna kutilangiza mumpingo, kutilimbikisa na kutiyavya. Abale onse amene aŵa pamozi na mabanja ŵawo tufunika kuŵatembeja. Ndipo Yehova apitilije kuŵadalisa chifukwa cha ntima wakuwonesha! Kulaŵila chendi, monga ni ŵanthu ayakine onse, akulu ofunika kuchita vinthu mwachikatikati. Ove ofunikalini kunkhala ngako bize na ntchito za pampingo mpaka kufwika posoŵa nthawe yakuti asamalile vosoŵa va mabanja ŵawo.

9. Mokatijana na Afilipi 2:4, 5, kansi ni maganizo otyani aweme ŵakufunikila kukulisha Akhilisitu onse?

⁹ Ŵelengani Afilipi 2:4, 5. N’chendi kuti ni  tonselini amene nise akulu, koma olo n’tetyo, tonse tufunika kukonkheja chisanzo cha Yesu noika pasogolo vofuna va ayakine kupambana vasu. Baibolo yunena kuti yove ‘enkhala monga ni kapolo.’ (Afil. 2:7) Ganizilani vatingaphunzilepo pa mawu amene aŵa. Kapolo wantengo wapatali oyeja-yeja kuchita vinthu vingakondweleshe abwana ŵake. Pakuti sewo nise akapolo a Yehova ndipo tutumikila abale ŵasu, tufuna kukatishiliwa ntchito ngako na Yehova komasoti na abale ŵasu. Mwewo mungachite vamene ivi, poganizila mfundo izi zokonkhapo.

10. Kansi ni makonsho otyani ŵatingalikonshe?

¹⁰ Mukoganizila vokhuza maganizo ŵanu. Likonsheni makonsho monga akuti: ‘Kansi nine wokonzeka kukatishila ntchito nthawe na mphamvu zangu poyavya ayakine? Mwachisanzo, kansi nuchita tyani keno nasengewa kuti nikanyungile m’bale wachikulile wamene okwanishalini kufuma pang’anda olo keno nasengewa kuti nikatakuleko mulongo wachikulile kuluta naye kumisonkano? Kansi nukulumija kupeleka thandizo keno pofunikila ŵanthu angalipeleke kuwamya malo ochitila misonkhano yachigawo olo pa ntchito yowamyasoti Ng’anda ya Ufumu?’ Petilipeleka kwa Yehova, timulonjeza kuti tizakatishile ntchito vinthu vasu vatili navo pomutumikila. Yove ofuna kuti tikokatishila ntchito nthawe yasu, mphamvu zasu—komasoti vinthu vatili navo—kuti tiyavye ayakine. Tetyo, yove okondwela ngakosoti keno tulipeleka pochita vamene ivi. Keno tawona kuti pali vatufunika kuchinja pa nkhani yamene iyi, kansi tingachite tyani?

11. Kansi pemphelo ingatiyavye tyani kuti tikochita vinyinji poyavya ayakine?

¹¹ Mukopemphela kwa Yehova mofumila pansi pantima. Tiyelekezele kuti mwaziŵa kuti pali mbali ziyakine zamufunikila kuchinja, koma mufunalini kuchinja pa nkhani yamene iyo. Vikankhala tetyo, mukopemphela kwa Yehova mofumila pansi pa ntima. Mukomuuja vonse va muntima mwanu. Mukomuuja mwamumvwila muntima mwanu, ndipo mukomusenga kuti “akuyavyeni kuti muchite vinthu vakukonda yove.”—Afil. 2:13.

12. Kansi abale achilumbwana obatiziwa angayavye tyani mumpingo wawo?

¹² Keno nimwe m’bale wachilumbwana wobatiziwa, mukomusenga Yehova kuti akuyavyeni kunkhala na chifuno chochita vinyinji poyavya abale na alongo a mumpingo mwanu. M’vyalo viyakine muli akulu anyinji kumbana atumiki othandiza, ndipo anyinji mwa atumiki othandiza amene awo ni achilumbwanalini. Gulu ya Yehova payukulila-kulila, pofunikila abale achilumbwana anyinji kuti akoyavya akulu posamalila abale na alongo mumpingo. Keno mungankhale ofunishisha kutumikila kufunikila thandizo, mwewo munkhale wosangalala. Ndaŵa yanji? Ndaŵa yakuti mukondweleshe Yehova, munkhale na mbili iweme ndipo munkhale wosangalala poziŵa kuti muyavyako ayanu.

13-14. Kansi n’chinji chatingachite kuti tikoyavya abale ŵasu na alongo? (Onani chiphunzi chapachikuto.)

¹³ Mukonkhala tchelu nowona keno pali ofunikila thandizo. Ntumwi Paulo euja Akhilisitu aku Yudeya kuti: “Osaluŵa kuchita viweme noyaŵana vinthu na ayakine, pakuti nsembe zoteti Mulungu okondwela nazo.” (Ahe. 13:16) Amene aŵa enze malangizo aweme ngako! Papita nthawe itontho pavuli pakuti alondela kalata yamene iyi, Akhilisitu aku Yudeya enzefunikila kusiya mang’anda ŵawo, mabizinesi ŵawo komasoti achibale ŵawo osakhulupilila ndipo enzefunikila “kuthaŵila ku malupili.” (Mt. 24:16) Pa nthawe yamene iyi, penzeve kukayikila kuti chinthu chofunika ngako kuli ŵanthu amene aŵa chenze kuyavyana muyake na muyake. Ivi vikaliyechitika, kuti ove enze ekatishila ntchito malangizo ŵechipeleka Paulo akuti akoyaŵana vinthu valinavo na ayawo, sembe vinkhala vosavuta kudjaila moyo wanyowani.

¹⁴ Abale ŵasu komasoti alongo, payakine ni  nthawe zonselini pangatiuje vinthu vakufunikila pa moyo wawo. Mwachisanzo, tyani ponena za m’bale wamene nkazi wake emwalila. Kansi m’bale wasu wamene uyo ofunikila thandizo pa nkhani ya chakulya, thilansipoti olo pa ntchito za pang’anda? Yove payakine angasengelini thandizo chifukwa choyopa kuti angativutishe. Koma yove angatembeje ngakosoti keno tingamuyavye olo kuti akaliyetisenga thandizo. Tufunikalini kuganiza kuti amuyavye munthu muyakine olo kuganiza kuti nthawe zonse akotiuja akafuna thandizo. Likonsheni kuti, ‘Kuti nakumana na vuto yamene iyi ni newo, kansi sembe nafuna kulondela thandizo yotyani?’

15. Kansi tufunika kuchita chinji kuti tikonkhala ofunishisha kuyavya ayakine?

¹⁵ Mukochita vinthu mu njila yakuti vikonkhala vosavuta ayakine kukusengani thandizo. Tukaikilalini kuti muziŵako abale na alongo a mumpingo mwanu amene onkhala okonzeka nthawe zonse kuyavya ayawo. Ove olimvwalini kuti tuŵavutisha olo patontho. Tuziŵa kuti nthawe zonse ove onkhala ofunishisha kutiyavya, ndipo nase tufunishisha kunkhala monga ni ove! Nkulu muyakine wa vyaka vam’ma 40 zina yake Alan, ofunishisha kuti ŵanthu akomasuka naye. Poganizila chisanzo cha Yesu, Alan enena kuti: “Yesu enzenkhala bize, koma ŵanthu a misinkhu yosiyana-siyana enzeluta kuli yove ndipo enzenkhala omasuka kumusenga thandizo. Ove enzeziŵa kuti Yesu ni munthu ngaye-ngaye wamene angaŵakonde. Nufuna kunkhala monga ni Yesu, komasoti kuziŵika monga munthu womasuka na ŵanthu, nshamwali muweme komasoti wachikondi.”

16. Kansi kukatishila ntchito lemba ya Salimo 119:59, 60 kungatiyavye tyani kukonkheja chisanzo cha Yesu mosamala ngako?

¹⁶ Tufunikalini kutaya ntima keno takangiwa kuchita ndendende monga mwenzechitila Yesu. (Yak. 3:2) Mwana wa sikulu angakwanishelini kuchita ndendende monga ni mwakuchitila  aticha ŵake. Koma keno yove oyeja-yeja kuphunzilapo kanthu pa vophoniya vake mulimonse mwangakwanishile nokonkheja chisanzo cha aticha ŵake, yove angapitilije kuchinja. Molingana na vamene ivi, keno sewo tuchita vinthu mokatijana na vatuphunzila pa phunzilo ya Baibolo ya paseka, nochita vonse vatingakwanishe kuti tiwamye vala vatuphoniya, tingakwanishe kukonkheja mosamala ngako chisanzo chechitisiyila Yesu.—Ŵelengani Salimo 119:59, 60.

17-18. Keno tukonkheja ntima wolipeleka wa Yesu, kansi tifwane madaliso otyani?

¹⁷ Keno tunkhala ofunishisha kuyavya ayakine, ŵanthu ayakine onkhala ofunishishasoti kuchita vamene ivo. Nkulu muyakine zina yake Tim, enena kuti: “Abale ayakine achilumbwana—enkhala atumiki othandiza. Chifukwa chimozi chichitisha kuti ayenelele, n’chakuti ewona kulipeleka kwenzechita ayakine poyavya ayawo—ndipo nawo enzefuna kunkhala monga ni ove. Abale achilumbwana amene aŵa oyavya mumpigo wasu komasoti ochita vinyinji poyavya akulu.”

¹⁸ Tunkhala m’chalo chamene ŵanthu anyinji ni olikonda, koma ŵanthu a Yehova ni osiyanilatu na ŵanthu aku chalo. Talimbikisiwa ngako na ntima wolipeleka wa Yesu ndipo nise osimikijila kufumila pansi pa ntima kukonkheja chisanzo chake. N’chendi kuti tingakwanishelini kukonkheja maluwayo ŵake ndendende, koma tingakwanishe ‘kukonkheja maluwayo ŵake mosamala ngako.’ (1 Pet. 2:21) Keno tuchita vonse vatingakwanishe kuti tikokonkheja ntima wolipeleka wa Yesu, nase tinkhale osangalala ngako chifukwa choziŵa kuti tukondwelesha Yehova.