1. Re bona moya ofe o mobotse gare ga batho ba Modimo?

 NAKONG e fetilego Beibele e ile ya bolela e sa le pele gore batho ba Modimo ba be ‘ba tla ithaopela’ go hlankela Jehofa ba hlahla ke Jesu. (Ps. 110:3) Boporofeta bjo bo a phethagala lehono. Ngwaga o mongwe le o mongwe bahlanka ba Jehofa ba fetša diiri tše dimilione ba ruta batho ba bangwe ka Beibele. Ba dira seo ka go rata le ge ba sa patelwe. Ba kgothatša bana babo bona ba bangwe, ba tiiša tumelo ya bona e bile ba ba thuša ka dilo tšeo ba di hlokago. Bagolo le bahlanka ba bodiredi ba fetša nako e ntši ba lokišeletša diboka le go etela bana babo bona le dikgaetšedi gore ba ba kgothatše. Ke ka baka la’ng bahlanka ba Jehofa ba dira mošomo o ka moka? Ke ka gobane ba rata Jehofa le batho ba bangwe.—Mat. 22:37-39.

2. Go ya ka Baroma 15:1-3, Jesu o re beetše mohlala ofe?

² Jesu o re beetše mohlala o mobotse wa go etiša batho ba bangwe pele. Re leka go dira sohle seo re ka se kgonago gore re mo ekiše. (Bala Baroma 15:1-3.) Bao ba mo ekišago ba tlo hwetša dilo tše dibotse. Jesu o itše: “Go na le lethabo le legolo go neeng go feta go amogeleng.”—Dit. 20:35.

3. Re tlo ithuta ka’ng sehlogong se?

³ Sehlogong se re tlo bona tše dingwe tša dilo tšeo Jesu a di dirilego go thuša ba bangwe le gore re ka ekiša mohlala wa gagwe bjang. Re tlo bona le gore re ka dira eng gore re oketše tsela yeo re thušago ba bangwe ka yona.

4. Jesu o ile a etiša batho ba bangwe pele bjang?

⁴ Jesu o ile a thuša batho ba bangwe le ge a be a lapile. Nagana ka seo Jesu a se dirilego ge batho ba bantši ba be ba etla go yena thabeng kgauswi le Kaperenaume. Jesu o feditše bošego ka moka a rapela. O swanetše go ba a be a lapile kudu, eupša ge a bona lešaba leo o ile a kwela bohloko kudu batho bao ba hlakago le bao ba babjago. Ga se a ba fodiša feela, eupša o ile a ba nea le polelo yeo e kgothatšago kudu yeo e tsebjago e le Thuto ya Thabeng.—Luka 6:12-20.

5. Dihlogo tša malapa di ekiša bjang mohlala wa Jesu wa go bontšha ba bangwe lerato le ge ba lapile?

⁵ Dihlogo tša malapa di ekiša Jesu. Nagana ka mohlala wo: Ka morago ga gore tate a šome ka thata letšatši ka moka o boa ka gae a lapile kudu. Mohlomongwe o nyaka go se sware borapedi bja lapa bošegong bjoo, eupša o kgopela Jehofa gore a mo fe matla a go bo swara. Jehofa o araba thapelo ya gagwe gomme ba ba le borapedi bja lapa. Bana ba ithuta thuto e bohlokwa go batswadi ba bona gore ga go na selo se bohlokwa go feta go hlankela Jehofa.

6. Nea mohlala wa kamoo Jesu a ilego a diriša nako ya gagwe go thuša ba bangwe.

⁶ Jesu o be a kgona go fa batho ba bangwe nako ya gagwe le ge a be a e hloka. Nagana gore Jesu o ile a ikwa bjang ge a ekwa gore mogwera wa gagwe Johane Mokolobetši o bolailwe? Se se ka ba se ile sa mo kweša bohloko kudu. Beibele e re: “Eitše ge Jesu a ekwa se [lehu la Johane Mokolobetši] a tloga moo ka sekepe a ya lefelong le le lego lekatana gore a be noši.” (Mat. 14:10-13) Re a kwešiša gore ke ka baka la eng a be a nyaka go ba a nnoši. Batho ba bangwe ba nyaka go dula ba nnoši ge ba nyamile. Eupša Jesu ga se a kgona go ba a nnoši. Lešaba le ile la fihla moo a bego a eya gona le pele a ka fihla. Jesu o ile a re’ng? O ile a etiša dinyakwa tša bona pele gomme ‘a ba šokela’. Jesu o be a bona gore ba hloka thušo le khomotšo yeo e tšwago go  Modimo gomme a ba thuša. O ile a thoma go ba “ruta dilo tše dintši.”—Mar. 6:31-34; Luka 9:10, 11.

7-8. Nea mohlala wo o bontšhago kamoo bagolo ka phuthegong ba ekišago Jesu ge yo mongwe ka phuthegong a hloka thušo.

⁷ Bagolo ba ekiša mohlala wa Jesu. Re leboga kudu nako yeo bagolo ba e fetšago ba re thuša! Bana babo rena le dikgaetšedi ka phuthegong ga ba tsebe mošomo ka moka wo bagolo ba o dirago. Ka mohlala ge Mokriste yo mongwe a le sepetlele, ditho tša Komiti ya go Dira Kwano le Dipetlele ba kitimela moo gore ba ye ba mo thuše. Ka dinako tše dingwe seo se direga gare ga bošego! Ka ge bagolo ba rata bana babo rena bao le dikgaetšedi le malapa a bona, ba ba etiša pele.

⁸ Bagolo ba thuša gape ka go aga Diholo tša Mmušo le meago e mengwe ya mokgatlo le go thuša modirong wa tlhakodišo. Le gona be fetša nako e nngwe e ntši kudu ba thuša phuthego ka go e hlahla, go e kgothatša le go e thekga. Re swanetše go reta bana babo rena ba le malapa a bona. Eka Jehofa a ka šegofatša moya wa bona wa go ikgafa. Eupša bagolo ba swanetše go lekalekanya dilo, ga se ba swanela go dira mošomo o montši ka phuthegong moo ba sa hlwego ba hlokomela malapa a bona.

9. Go ya ka Bafilipi 2:4, 5, Bakriste ka moka ba swanetše go dira’ng?

⁹ Bala Bafilipi 2:4, 5. Ga se bagolo feela bao ba swanetšego go ekiša mohlala wa Jesu wa go etiša ba bangwe pele. Ka  moka ga rena re ka kgona. Beibele e re o ile “a ba ka sebopego sa mohlanka.” (Bafil. 2:7) Re ka ithuta’ng temaneng ye. Lekgoba le nyaka go kgahla mong wa lona. Ka ge re le makgoba a Jehofa e bile re hlankela bana babo rena, re nyaka gore Jehofa le bana babo rena ba re diriše. Re ka dira seo bjang? A re boneng dintlha tšeo di latelago.

10. Re ka ipotšiša dipotšišo dife?

¹⁰ Itlhahlobe. Ipotšiše dipotšišo tša go swana le gore: ‘Na ke ikemišeditše go diriša nako ya ka gore ke thuše batho ba bangwe? Ke tlo dira’ng ge e ba nka kgopelwa gore ke etele ngwanabo rena yo a tšofetšego lefelong leo go dulago batšofadi, goba ka kgopelwa gore ke iše kgaetšedi yo a tšofetšego dibokeng? Na ke ikemišeditše go ithaopa gore ke ye ke hlwekiše lefelo la kopano goba gore ke hlokomele Holo ya Mmušo?’ Jehofa o a thaba ge re diriša nako ya rena le dilo tšeo re nago le tšona go mo hlankela le go thuša ba bangwe. Ge re bona gore go a hlokagala gore re dire diphetogo re ka dira’ng?

11. Thapelo e ka re thuša bjang gore re rate go thuša batho ba bangwe?

¹¹ Rapela Jehofa go tšwa pelong. A re re mohlomongwe go na le mo o nyakago go dira tšwelopele gona, eupša ga o na le matla a go dira bjalo. Ge e ba go le bjalo, rapela Jehofa go tšwa pelong. Mmotše dilo ka moka. Botša Jehofa ka mo o ikwago ka gona, o mo kgopele gore a go nee ‘kganyogo le matla a gore o dire dilo tšohle tšeo o di ratago.’—Bafil. 2:13.

12. Bana babo rena ba bafsa ba ka thuša bjang diphuthego tša gabo bona?

¹² Ge e ba o le ngwanabo rena wa mofsa, kgopela Jehofa gore a go thuše go dira mo go oketšegilego ka phuthegong. Dinageng tše dingwe go na le bagolo ba bantši go feta bahlanka ba bodiredi mola e le gore bahlanka bao ba bodiredi e šetše e le ba bagolo. Ge mokgatlo wa Modimo o dutše o gola, re hloka bana babo rena ba bafsa gore ba hlokomela bana babo rena le dikgaetšedi ka phuthegong. Ge e ba o ithaopela go thuša moo go hlokagalago thušo o tlo thaba. Ka baka la’ng? Ka gobane o tlo thabiša Jehofa le gona bana babo rena le dikgaetšedi ba tlo bona gore o rata go thuša le wena o tlo thaba ka ge o thuša ba bangwe.

13-14. Re ka dira’ng go thuša bana babo rena le dikgaetšedi? (Bona seswantšho sa letlakala la ka ntle.)

¹³ Tseba ge bana beno ba hloka thušo. Moapostola Paulo o ile a botša Bakriste bao ba dulago Judea gore: “Le se ke la lebala go dira botse le go abelana le ba bangwe dilo tšeo le nago le tšona, gobane Modimo o kgahlišwa ke dihlabelo tše bjalo.” (Baheb. 13:16) Yeo e be e le keletšo e botse! Ka morago ga go amogela lengwalo leo, Bakriste bao ba lego Judea ba ile ba swanelwa ke go tlogela magae a bona, dikgwebo tša bona le batho ba gabo bona bao e sego Bakriste gomme ‘ba thoma go tšhabela dithabeng.’ (Mat. 24:16) Ka nako yeo go be go le bohlokwa kudu gore ba thušane. Ge e ba ba be ba diriša keletšo ya Paulo ya gore ba abelane dilo tšeo ba bego ba na le tšona, go be go tlo ba bonolo gore ba kgotsofalele dilo tšeo ba nago le tšona magaeng a bona a mafsa.

¹⁴ Ga se ka mehla bana babo rena le dikgaetšedi ba ka re tsebišago ge ba hloka se sengwe. Ka mohlala, ngwanabo rena a  ka hlokofalelwa ke mosadi. Na ngwanabo rena o hloka thušo ka dijo, dinamelwa goba mešomo ya ka gae? A ka no se bolele selo ka ge a tšhaba gore o tlo re imetša. Eupša a ka leboga kudu ge a ka bona re mo thuša le pele a ka re kgopela. Ga se ra swanela go nagana gore batho ba bangwe ba tla mo thuša goba o tla re botša ge a hloka thušo. Ipotšiše gore: “Ge nka be ke le boemong bjo ke be nka thabela go thušwa ka eng?”

15. Re swanetše go dira’ng ge re nyaka go thuša batho ba bangwe?

¹⁵ Batamelega. Ga go pelaelo gore o tseba bana babo rena le dikgaetšedi ka phuthegong ya geno bao ba dulago ba ikemišeditše go thuša ba bangwe. Ga ba re dire gore re ikwe eka re a ba imetša. Re a tseba gore ba dula ba ikemišeditše go re thuša ge re hloka thušo, le gona re nyaka go swana le bona! Mogolo yo a bitšwago Alan yo a lego mengwageng ya bo 40 o re o nyaka go batamelega. O boletše gape le ka mohlala wa Jesu gore: “Jesu o be a dula a swaregile, eupša batho ba bagolo le ba banyenyane ba be ba sa tšhabe go mo kgopela thušo. Ba be ba mo tseba e le monna yo a dulago a tshwenyegile ka bona. Ke nyaka go swana le Jesu ke tsebjwe ka go batamelega le go tshwenyega ka batho ba bangwe.”

16. Psalme 119:59, 60 e ka re thuša bjang go ekiša mohlala wa Jesu?

¹⁶ Ga se ra swanela go nyama ge re palelwa ke go ekiša Jesu Kriste gabotse. (Jak. 3:2) Morutwana a ka se swane le morutiši ka mo go feletšego. Eupša ge a dula a ithuta diphošong tša gagwe o tlo kgona go dira diphetogo ke moka a ekiša morutiši wa gagwe. Ka mo go swanago ge e ba re diriša seo re ithutago sona ge  re bala Beibele le go dira sohle seo re se kgonago go ithuta diphošong tša rena, re tlo kgona go ekiša mohlala wa Jesu Kriste.—Bala Psalme 119:59, 60.

17-18. Re tlo holega bjang ge re ekiša mohlala wa Jesu wa go etiša ba bangwe pele?

¹⁷ Ge re ikemišeditše go thuša, ba bangwe le bona ba tlo nyaka go re ekiša. Mogolo yo a bitšwago Tim o re: “Re na le bana babo rena ba bafsa bao ba kgethilwego gore e be bahlanka ba bodiredi, ba bangwe e sa le ba banyenyane. Eupša ba kgethilwe ka gobane ba ekiša batho bao ba bego ba rata go thuša ba bangwe. Bana babo rena ba ba bafsa ba thuša phuthego e bile ba thekga le bagolo.”

¹⁸ Batho ba bantši lehono ba inaganela ba nnoši. Eupša bahlanka ba Jehofa ga ba swane le bona. Re rata mohlala wa Jesu wa go etiša ba bangwe pele e bile re ikemišeditše go o latela. Le ge re ka se kgone go dira dilo ka tsela yeo a bego a di dira ka yona, eupša re ka latela “dikgato tša gagwe kgaufsi.” (1 Pet. 2:21) Ge re ka dira sohle seo re ka se kgonago gore re latele mohlala wa Jesu wa go etiša ba bangwe pele, re tlo thaba ka gobane re tla be re kgahliša Jehofa.