1. Abaheereza ba Yehova baine miteekateekyere ki emirungi?

IRA munonga, Baibuli ekagira ngu abaheereza ba Ruhanga bakaba nibaija ‘kwehayo beekundiire’ kuheereza Yehova barikwebemberwa Omwana we. (Zab. 110:3) Obunabi obwo buriyo nibuhikiirira hati. Buri mwaka, abaheereza ba Yehova nibamara obukaikuru bw’eshaaha barikubuurira. Ekyo nibakikora beekundiire kandi aha nshohoza yaabo. Kandi nibamara obwire obundi barikuhwera Abakristaayo bagyenzi baabo omu by’omubiri, omu nyehurira, n’omu by’omwoyo. Ab’eishe-emwe abaine obujunaanizibwa nibamara obwire bwingi barikuteebekanisa ebicweka by’enteerane, kandi barikuriisa n’obusyo bwa Ruhanga. Niki ekirikubahiga kukora ebi byona? Ni rukundo ei bainiire Yehova n’abataahi.—Mat. 22:37-39.

2. Nk’oku kiri omu Abarooma 15:1-3, Yesu akataho ky’okureeberaho ki?

² Yesu akataho eky’okureeberaho kirungi arikwebembeza eby’abandi okukira ebye. Nituteeraho munonga kumutooreza. (Shoma Abarooma 15:1-3.) Abarikuteeraho kutwaza nkawe nibagasirwa munonga. Yesu akagira ati: “[Okuha nikureeta okushemererwa] okukira okuheebwa.”—Byak. 20:35.

3. Nituza kushwijuma ki omu kicweka eki?

³ Omu kicweka eki, nituza kureeba bimwe aha bi Yesu yaayefeerereize kubaasa kuheereza abandi, n’oku turikubaasa kumutooreza. Kandi nituza n’okureeba oku turikubaasa kwongyera aha kyetengo kyaitu eky’okuheereza abandi.

4. Yesu akeebembeza ata eby’abandi okukira ebye?

⁴Yesu akaba naayehayo ahabw’abandi n’obu yaabaire aba aruhire. Teekateeka aha ku yaatwarize obu abantu baingi baamushaga aha rushozi, obundi haihi na Kaperenaumu. Yesu akaba amazire ekiro kyona naashaba. Akaba aruhire munonga, kwonka ku yaareebire abantu baingi, akagirira esaasi abooro n’abarwaire omuribo. Tarabatambiire kyonka, beitu akabaha na rumwe aha mbazo ezirikugumya munonga oririkwetwa Orubazo Rw’aha Rushozi.—Luk. 6:12-20.

5. Emitwe y’amaka nibabaasa kugira bata omutima gw’okwefeerereza nka Yesu baaba baruhire?

⁵Oku emitwe y’amaka barikutooreza Yesu. Teekateeka ahari eki: Bwanyima y’okukora eizooba ryona, omutwe gw’eka yaahika omu ka aruhire ahwaireyo. N’obu araabe naayenda kushazamu Okuramya kw’Eka okw’omwabazyo ogwo, ayeshengyereza Yehova kumuha amaani g’okukwebembera. Yehova agarukamu okushaba kwe, kandi kubaho nka butoosha. Abaana beega eishomo rikuru omwabazyo ogwo, ngu abazaire baabo nibeebembeza eby’omwoyo okukira ekindi kintu kyona.

6. Ha eky’okureeberaho ekirikworeka oku Yesu yaayefeerereize obwire bwe kuhwera abandi.

⁶Yesu akeefeerereza obwire bwe kuhwera abandi. Noobaasa kuteekateeka oku Yesu yaayehuriire bwanyima y’okumanya ngu baita munywani we Yohaana Omubatiza? Aine kuba yaagizire obusaasi bwingi. Baibuli neegira eti: ‘Yesu ku yaahuriire, [eby’okufa kwa Yohaana] yaarugayo, yaagyendera omu bwato, yaaza omu ihamba kwehereera.’ (Mat. 14:10-13) Nitubaasa kwetegyereza ahabw’enki yaabaire naayenda kuba wenka. Bamwe ahariitwe nitukunda kuganya turi twenka. Kwonka tikwo, kyabaire ahari Yesu. Abantu baingi bakahika omu mwanya ogwo ogwehereire atakahikireyo. Akatwaza ata? Akateekateeka aha mbeera yaabo, kandi “yaabagirira esaasi.” Akaba naabaasa kwetegyereza ngu nibenda kuruhuurwa omu by’omwoyo, kandi ahonaaho agira eki yaakora kubahwera. Nangwa, ‘akatandika kubeegyesa [ti bintu bikye, kureka] bingi.’—Mak. 6:31-34; Luk. 9:10, 11.

7-8. Ha eky’okureeberaho ekirikworeka oku abareeberezi abarikufayo barikutooreza Yesu haaba hariho oine kuhwerwa.

 ⁷Oku abareeberezi barikutooreza Yesu. Nitusiima munonga ebi abareeberezi baitu abatarikweyendeza barikukora ahabwaitu! Ebirikukira obwingi ebi barikukora tibirikureebwa ekibiina kyona. Nk’eky’okureeberaho, abareeberezi abari aha kakiiko k’eby’obujanjabi, ahonaaho nibarahuka kuhwera ab’eishe-emwe abarikuba nibaza kujanjabwa. Embeera nk’ezi nizikira kubaho nyekiro omu itumbi! Abareeberezi aba ahabw’okusaasibwa ab’eishe-emwe nari banyaanyabo abaine amaganya, n’ab’amaka gaabo, nibeebembeza ebya bagyenzi baabo omu mwanya gw’ebyabo.

⁸ Kandi abareeberezi nibeejumba omu kwombeka Ebyombeko by’Obukama n’endiijo myanya, n’omu kuhwera abahikirweho ebihikiirizi. Kandi nitumanya ngu abareeberezi nibamara obwire bwingi barikwegyesa kandi barikugumya abandi omu kibiina. Abareeberezi aba boona n’ab’amaka gaabo twine kubasiima twihire aha mutima. Nitushaba ngu Yehova abahe emigisha ahabw’okwefeerereza kwabo! Buzima, abareeberezi nabo baine kuba abaringaaniza. Tibashemereire kwemarira munonga aha mirimo y’ekibiina bakeebwa kufayo aha b’amaka gaabo.

9. Kurugiirira aha Abafilipi 2:4, 5, Abakristaayo boona baine kuteeraho kugira miteekateekyere ki?

⁹ Shoma Abafilipi 2:4, 5. N’amazima, twena tituri bareeberezi, kwonka nitubaasa kwegyera ahari Yesu omutwarize gw’okwefeerereza. Baibuli neegira ngu ‘akaikiriza kuhinduka nk’omuhuuku.’ (Fil. 2:7) Teekateeka aha makuru g’ebigambo ebyo. Omuhuuku nari omuheereza, naasherura oburyo bw’okushemeza  mukama we. Nk’omuhuuku wa Yehova kandi orikuheereza beene sho, hatariho kubangaanisa nooba nooyenda kwongyera kuba ow’omugasho ahari Yehova n’ab’eishe-emwe bagyenzi baawe. Noobaasa kukikora orikushwijuma obuhabuzi oburikukurataho.

10. Nitubaasa kwebuuza bibuuzo ki?

¹⁰Shwijuma emiteekateekyere yaawe. Yebuuze ebibuuzo nk’ebi: ‘Nyeteekateekire kwefeerereza kirikwingana ki kuhwera abandi? Nk’eky’okureeberaho, nintwaza nta, naashabwa kutaayaayira ow’eishe-emwe omu irwariro ry’okureeberera abakaikwire, nari kuhwera munyaanyazi-itwe okaikwire kuza omu nteerane? Nimba nyeteekateekire kuhwera omu kuboneza omwanya gw’oruteerane oruhango nari Ekyombeko ky’Obukama?’ Nitushemeza Yehova twayefeerereza obwire bwaitu, amaani, n’ebintu byaitu kwehayo kuhwera abandi. Twareeba ngu nikyetengyesa kuhinduramu twine kukora ki?

11. Okushaba nikutuhwera kuta kugira omutima gw’okwefeerereza?

¹¹Shaba Yehova kuruga aha mutima. Ka tugire ngu nikikwetengyesa kugira empinduka ezi waakora, kwonka otaine muhimbo gw’okuzikora, shaba Yehova oyihire aha mutima. Ba ow’amazima. Gambira Yehova oku orikwehurira, kandi mushabe kukuha ekyetengo n’amaani g’okukora.—Fil. 2:13.

12. Omunyeeto obatiziibwe naabaasa kuhikiiriza bujunaanizibwa ki?

¹² Ku oraabe ori omunyeeto obatiziibwe, shaba Yehova kukuhwera kugira ekihika ky’okwongyera aha buheereza bwawe omu kibiina. Omu mahanga agamwe, nibaba baine abareeberezi baingi kukira abaheereza, kandi baingi aha baheereza abo bari omu myaka ya rwa gati nari n’okukiraho. Ahabw’ekibiina kuguma nikihanguha, nitwenda ab’eishe-emwe bato kureeberera abaheereza ba Yehova. Ku oraabe oyeteekateekire kuheereza omu muringo gwona ogurikwetengyesa, noija kushemererwa. Ahabw’enki? Ahakuba noija kushemeza Yehova, noija kugira eiziina rirungi, kandi noija kutunga okumarwa okurikuruga omu kuhwera abandi.

13-14. Nitubaasa kukora ki kuhwera Abakristaayo bagyenzi baitu? (Reeba ekishushani ekiri aha kipampagare.)

¹³Fayo kumanya ebyetengo by’abandi. Entumwa Paulo akahiga Abaheburaayo ati: ‘Mutarireka kukorera abantu ebirungi, n’okukwatanisa omu bi mwine, ahakuba ebitambo nk’ebyo nibyo birikushemeza Ruhanga.’ (Heb. 13:16) Obwo bukaba buri obuhabuzi burungi! Omu bwire bukye baherize kutunga ebaruha egyo, Abakristaayo omuri Buyudaaya bakaba baine kutsigaho amaka gaabo, eby’obushuubuzi n’abanyabuzaare abatari mu mazima, reero “bahungire aha nshozi.” (Mat. 24:16) Omu bwire obwo, kikaba kiri kikuru kuhwerahwerana ahonaaho. Enyima ku baraabe baabaire nibakuratira obuhabuzi bwa Paulo obw’okuhwerahwerana, kikaba nikiija kuborobera kuhwera bagyenzi baabo omu mbeera nsya egi.

¹⁴ Ab’eishe-emwe na banyaanyazi-itwe obumwe nibabaasa kutatugambira ebi bakyenire. Nk’eky’okureeberaho, ow’eishe-mwe naabaasa kuba ariyo naaganya ahabw’okufeerwa omukazi we. Mbwenu shi naayenda ow’okumuhwera omu kuteeka, omu by’engyenda, nari kukora emirimo y’aha ka? Naabaasa kutiina kushaba obuhwezi ahabw’okutenda kuteganisa abandi. Kwonka naabaasa kushemererwa haagira owaayehabura kumuhwera. Titushemereire kuteekateeka ngu buri kimwe nikiza kutereera, nari ngu ku araabe aine eki arikwenda naija kutumanyisa. Yebuuze oti:  ‘Ku ogire ngu niinye ndi omu mbeera nk’egyo, nkaayenzire kuhwerwa nta?’

15. Twine kukora ki, twaba nitwenda kuhwera abandi?

¹⁵Ba oyorobi kuhikwaho. Hatariho kubangaanisa noomanya ab’eishe-emwe na banyaanyako omu kibiina kyanyu abarikukira kuba beeteekateekire kuhwera abandi. Tibarikutureetera kuteekateeka ngu nitubarutsya. Nituba nitubaasa kubagiramu obwesigye ngu nibaija kutuhwera kyayetengyesa, kandi naitwe tukaayenzire kubatooreza! Alan, omureeberezi ori omu myaka ya 40, naaba naayenda ngu abandi booroberwe kumuhikaho. Alan arikuteekateeka aha ky’okureeberaho kya Yesu naagira ati: “Yesu akaba aine bingi by’okukora, kwonka abantu b’emyaka yoona bakaba nibakunda kuba haihi nawe, kandi bakaba nibooroberwa kumushaba obuhwezi. Bakaba nibamanya ngu naabafaho, kandi ngu buzima naabaasa kubahwera. Niinyenda kutooreza Yesu n’omutima gwangye gwona, kandi nkaba omuntu oyorobi kuhikwaho, kandi orikufayo aha bandi.”

16. Okugyendera aha biri omu Zaaburi 119:59, 60 nikituhwera kita kuteeraho kutooreza Yesu?

¹⁶ Titwine kuhwamu amaani twaremwa kutooreza Yesu omu muringo oguhikiriire. (Yak. 3:2) Orikwega kuhuuga ebishushani tarikubaasa kukora ekihuugirwe ekirikushushanira kimwe n’eky’omwegyesa we. Kwonka omwegi yaayegyera aha nshobe ze kandi akateeraho kutooreza gye omwegyesa we nk’oku kirikubaasika, naaboneza okuhuuga kwe. Nikyo kimwe, twata omu nkora ebi twegire omu kweyegyesa Baibuli, tukakora n’amaani kutereeza enshobe zaitu, nitwija kuba abasinguzi omu kukuratira eky’okureeberaho eki Yesu yaatutsigiire.—Shoma Zaaburi 119:59, 60.

17-18. Twagira omutima gw’okwefeerereza nka Yesu, nihaija kurugamu birungi ki?

¹⁷ Twaba twine omutima gw’okwefeerereza, nikiija kuhiga n’abandi kugugira. Omureeberezi orikwetwa Tim naagira ati: “Twine ab’eishe-emwe bato abatunguukire bakaba abaheereza nangwa n’abandi bakiri bato munonga. Kandi kimwe ekibahweraire, n’okureeba abandi abaine omutima gw’okwefeerereza. Okwefeerereza kwabo nikugasira ekibiina kyaitu, kandi eki nikibaasisa n’abareeberezi kutunga obushagiki burikumara.”

¹⁸ Nitutuura omu nsi eijwiremu okweyendeza. Kwonka abaheereza ba Yehova n’ab’omutaano. Twena nitukwatwaho okwefeerereza kwa Yesu, kandi tumaririire kumutooreza. Titurikubaasa kukuratira ebiribatiro bye omu muringo oguhikiriire, kwonka nitubaasa kugyendera haihi nabyo. (1 Pet. 2:21) Twakora ekirikubaasika kugira omutima gw’okwefeerereza nk’ogwa Yesu, nitwija kushemererwa ahabw’okusiimwa Yehova.