1. Kodi ni bzinthu bziponi bzabwino kwene-kwene bzomwe wanthu wa Yahova akucita?

 MAGOLE mazinji m’mbuyomu, Bibliya likhadalewa kale kuti wanthu wa Mulungu “an’dzabzipereka mwakufunisisa” pa basa la Yahova mwakutsogoleredwa na Mwana wace. (Salimo 110:3) Bzomwe polofesiyayi idalewa bzikucitikadi ntsiku zino. Gole liri-lentse, atumiki wa Yahova ambamala maora mazinji akucita basa lakupalizira. Iwo ambacita basa limweri mwakucita kufuna okha ndipo ambatambira lini kobiri. Iwo ambapambula nthawe kuti athandize abale wawo mwa kuwapasambo bzomwe akufunikira, kuwalimbikisa na kulimbisa cikhulupiro cawo kwa Yahova. Akulu na atumiki wakuthandiza ambamala maora mazinji akukonzekera mitsonkhano na kuzungira abale na mpfumakazi kuti awalimbikise. Thangwe ranyi wanthu wa Yahova ambacita basa lentseli? Iwo ambacita bzentsebzi thangwe rakuti ambafuna Yahova na anzawo.—Mateu 22:37-39.

2. Mwakubverana na Aroma 15:1-3, kodi ifepano tingatewezere tani Jezu?

² Jezu adalatiza kuti akhafuna kwene-kwene kuthandiza wanthu kusiyana na kucita bzomwe akhafuna. Ifepano tikucita nyongo kuti timutewezere. (Werengani Aroma 15:1-3.) Tikacita bzimwebzi, bzinthu bzin’dzatifambira bwino. Jezu adati: “Kupasa kumbabweresa cikondweso cikulu kuposa kutambira.”—Mabasa 20:35.

3. Kodi tin’pfunza ciyani mu nkhani ino?

³ Mu nkhani ino, tin’pfunza bzomwe Jezu adacita kuti athandize wanthu na bzomwe tingacite kuti timutewezere. Ndipo tin’pfunzambo bzomwe tingacite kuti tifunisise kumbathandiza anzathu.

4. Kodi Jezu adalatiza tani kuti akhaikha bzomwe wanthu akhafuna pa mbuto yakuyamba?

⁴ Jezu adathandiza wanthu napo pomwe akhadaneta. Kumbukirani  kuti Jezu adabva tani pomwe wanthu adabwera kuna iye pa phiri lomwe, bzikuwoneka kuti, likhali pafupi na mzinda wa Kafarnau. Jezu adaphuphudza akupemba. Bzikuwoneka kuti akhadaneta kwene-kwene, tsono pomwe adawona wanthuwo, iye adawabvera ntsisi thangwe akhali wakusauka ndipo pinango winango akhaduwala. Iye alibe kundolimbisa omwe akhaduwala koma adafotokozera wentse nkhani yakulimbikisa kwene-kwene, kuposa nkhani zentse, yomwe imbacemeredwa kuti Nkhani ya pa Phiri.—Luka 6:12-20.

5. Kodi misolo ya mabanja ikutewezera tani Jezu pakulatiza lufoyi napo pomwe aneta?

⁵ Bzomwe misolo ya mabanja ikucita pakutewezera Jezu. Tiyezezere tenepa: Pai acoka ku basa ndipo afika pamui adaneta kwene-kwene. Pinango akukumbuka kuleka kucita Kunamata kwa pa Banja komwe ambacita ntsiku imweyo, tsono iye akupemba kwa Yahova kuti amupase mphanvu kuti atsogolere pfunzirolo. Yahova akutawira mpembo wace ndipo iwo akucita Kunamata kwa pa Banja komwe ambakucita sumana zentse. Wana wawo apfunza cinthu cakufunika kwene-kwene usiku bumwebu cakuti abereki wawo ambawona kuti kutumikira Yahova ni cinthu cakufunika kwene-kwene pa moyo wawo kuposa cinthu ciri-centse.

6. Fotokozani cinthu comwe cikulatiza kuti Jezu akhaphatisa basa nthawe yomwe angadakhala yekha kuti athandize wanthu.

⁶ Jezu akhaceza na wanthu napo pa nthawe yomwe akhafuna kukhala payekha. Kodi mukukumbuka kuti Jezu adabva tani pomwe adabva kuti xamwali wace, Juwau Batista, aphedwa? Bzimwebzi bzidamuwawa kwene-kwene Jezu. Bibliya limbalewa kuti: “Pomwe adabva bzimwebzi [bzakuti Juwau wafa], Jezu adacoka kumweko na mwadiya aciyenda kwa yekha-yekha.” (Mateu 14:10-13) Ifepano tikukwanisa kubvesesa kuti thangwe ranyi Jezu akhafuna kukhala kwa yekha. Azinji wa ifepano timbafuna kukhala patekha tikafedwa. Tsono Jezu alibe kukwanisa kucita bzimwebzo. Mthithi ukulu wa wanthu udafikiratu komwe iye akhayendako pomwe iye akhanati kufika. Kodi Jezu adacita ciyani? Iye adakumbukira bzomwe wanthuwo akhafuna ndipo “adawabvera ntsisi.” Jezu adazindikira kuti wanthuwo akhafuna kuthandizidwa na kutsangalazidwa na mafala ya Mulungu ndipopa iye adayambiratu kucita bzimwebzo. “Iye adayamba kuwapfunzisa [sikuti bzinthu bzakucepa,  koma] bzinthu bzizinji.”—Marko 6:31-34; Luka 9:10, 11.

7-8. Kodi akulu wa gwere wa lufoyi ambatewezera tani Jezu pomwe m’bale ayai mpfumakazi akufunikira thandizo?

⁷ Bzomwe akulu wa gwere akucita pakutewezera Jezu. Ifepano timbatenda kwene-kwene basa likulu lomwe akulu ambacita kuti atithandize! Abale na mpfumakazi zizinji ambadziwa lini basa lentse lomwe akulu ambacita. Abale omwe ambacita mbali ya Komiti Yakucezerana na Nyumba za Ulapi ambayenda mwakamfulumize kukathandiza abale na mpfumakazi omwe akufuna kuthandizidwa. Ndipo nthawe zinango iwo ambacita bzimwebzi kati ya usiku! Bzikuwonekeratu kuti akulu wa gwere amwewa pabodzi na mabanja yawo ambaikha bzomwe abale wawo wacikristau akufuna pa mbuto yakuyamba thangwe ra ntsisi zomwe iwo anazo kuna abalewo pa nthawe ya mabvuto.

⁸ Akulu ambathandizirambo basa lakumanga Nyumba za Umambo na nyumba zinango za gulu lathu na kuthandizambo pakacitika malengwa ya pantsi. Ndipo iwo ambamalambo nthawe izinji akupfunzisa na kulimbikisa gwere. Ifepano tin’funika kumbatenda na mtima wentse abale wentsewa na mabanja yawo. Ndipo tikufunisisa kuti Yahova apitirize kuwatsogolera! Tsono, akulu an’funikambo kumbacita bzinthu mwacikati-kati ninga munthu ali-wentse. Iwo an’funika lini kumala nthawe izinji akucita mabasa ya gwere mpaka kutazira kupereka kwa mabanja yawo bzomwe yakufunikira.

9. Mwakubverana na Afilipi 2:4, 5, kodi ni nzeru ziponi zomwe Akristau wentse an’funika kukhala nazo?

⁹ Werengani Afilipi 2:4, 5. N’cadidi kuti bzingakwanisike lini kuti tentse tikhale akulu  wa gwere, koma tentse tingatewezere Jezu mwa kumbaikha pa mbuto yakuyamba bzomwe winango ambafuna. Bibliya limbalewa kuti iye “adakhala ninga kapolo.” (Afilipi 2:7) Kumbukirani bzomwe tingapfunze na mafala yamweya. Kapolo wabwino ayai nyabasa ambacita ciri-centse kuti mbuya wace akomedwe naye. Pakuti ifepano ndife akapolo wa Yahova ndipo timbatumikira abale wathu, tikufunisisa kuti tikhale wakufunika kwene-kwene kwa Yahovayo na kuna abale wathuwo. Imwepo mungacite bzimwebzi mwa kumbacita bzomwe bzikufotokozedwa mu ndime zikubwerazi.

10. Kodi ni mibvunzo iponi yomwe tingabzicite?

¹⁰ Kumbukirani bzomwe mumbacita. Tingabzibvunze kuti: ‘Kodi ndine wakukonzeka kuphatisa basa nthawe na mphanvu zangu kuti ndithandize wanthu winango? Kodi ningacite ciyani ndikakumbiridwa kuti ndikawone m’bale wacikulire ayai kuti ndikatenge mpfumakazi yacikulire kuti ndiyende nayo ku mitsonkhano? Kodi nimbabzipereka kuti ndicitembo basa la kupsaira pa mbuto yakucitira mitsonkhano mikulu-mikulu ayai basa lakukonza bzinthu bzomwe bzadzongeka pa Nyumba ya Umambo?’ Pomwe tidabzipereka kwa Yahova tidamuuza kuti tin’dzaphatisa basa bzentse bzomwe tinabzo kuti timutumikire. Ndipopa iye ambakomedwa akawona kuti tikuphatisa basa mphanvu, nthawe na bzinthu bzomwe tinabzo kuti tithandize anzathu. Tsono tikawona kuti tin’funika kucinja momwe timbacitira bzinthu, kodi n’ciyani comwe tin’funika kucita?

11. Kodi mpembo ungatithandize tani kuti timbafunisise kuthandiza anzathu?

¹¹ Pembani kwa Yahova na mtima wentse. Tiyezezere kuti mwazindikira kuti mun’funika kucinja cinthu cinango, tsono bzikukunesani kucita bzimwebzo. Kodi n’ciyani comwe mun’funika kucita? Pembani kwa Yahova na mtima wentse. Muuzeni Yahova kuti mukubva tani ndipo mukumbireni kuti akupaseni “mphanvu na cikhumbo kuti mucite bzomwe iye akufuna.”—Afilipi 2:13.

12. Kodi m’bale wakubatizidwa angathandize tani gwere?

¹² Penu ndimwe tswaka lakubatizidwa, kumbirani Yahova kuti akuthandizeni kumbafunisisa kuthandiza abale wa m’gwere mwanu. M’madziko manango muna akulu azinji kuposa atumiki wakuthandiza ndipo azinji wa atumiki wakuthandizawo mbakulu-akulu. Pakuti gulu la Yahova likupitiriza kukula, pakufunika maswaka mazinji kuti yathandize akulu wa gwere kunyang’anira wanthu wa Yahova. Ifepano tikabzipereka kuti ticite basa liri-lentse lomwe likufunika, tin’dzakomedwa kwene-kwene. Thangwe ranyi? Thangwe Yahova an’dzakomedwa nafe, tin’dzakhala na mbiri yabwino ndipo tin’dzakondwa thangwe ra kuthandiza anzathu.

13-14. Kodi n’ciyani comwe tingacite kuti tithandize abale na mpfumakazi zathu? (Onani cithunzi-thunzi ca pa tsamba lakuyamba.)

¹³ Khalani tceru kuti muwone omwe angafunikire kuthandizidwa. Mpostolo Paulo adauza Akristau wa ku Djudeya kuti: “Lekani kuyebwa kucita bzabwino na kugawana na anzanu bzomwe munabzo, pakuti Mulungu ambakomedwa na ntsembe zimwezi.” (Ahebereu 13:16) Yamweya yakhali malango yabwino kwene-kwene! Pomwe padapita nthawe pang’ono kucokera pomwe adatambira tsambali, Akristau wa ku Djudeyawo akhafunika kusiya nyumba zawo, malonda yawo na adzinza wawo omwe akhali lini Akristau acithawira “ku mapiri.” (Mateu 24:16) Bzikuwonekeratu padeca kuti pa nthawe imweyi bzikhali bzakufunika kwene-kwene kumbathandizana. Penu iwo adaphatisa basa mafala ya mpostolo Pauloya, yakuti ambagawane bzinthu bzomwe anabzo, bzidakhala bzakusaya kunesa kuzolowera moyo upsa omwe adakhala nawo.

 ¹⁴ Ni nthawe lini zentse pomwe abale na mpfumakazi zathu angatiuze kuti akufuna thandizo. Tiyezezere kuti m’bale asaikidwa mkazace. Kodi tingamuthandize m’baleyu mwa kumuphikira cakudya, kuyenda naye kukaceza ku mbuto inango ayai kumucitira mabasa yanango ya pa mui? Pinango iye angatikumbire lini kuti timucitire cinthu cinango, thangwe ra kugopa kuti an’tipasa basa. Tsono iye angakomedwe kwene-kwene ifepano tikamuthandiza napo kuti alibe kutikumbira. Mpsabwino lini kukumbuka kuti alipo munthu munango omwe animuthandiza ayai kuti iye an’tiuza akafuna kuthandizidwa. Bzibvunzeni kuti: ‘Ningadakhala ndine pano, ningadafuna kuti wanthu andicitire n’ciyani?’

15. Kodi tin’funika kucita ciyani penu tikufuna kuthandiza anzathu?

¹⁵ Khalani wakufikirika. Imwepo mumbadziwa kuti mu gwere mwanu muna abale na mpfumakazi omwe nthawe zentse ambafuna kuthandiza anzawo. Iwo ambakumbuka lini kuti tikuwapasa basa. Ifepano timbadziwa kuti iwo nthawe zentse ambafuna kutithandiza ndipo tingadafuna kukhalambo ninga iwo! Mkulu wa gwere omwe ana magole 45 wakucemeredwa Alan ambafuna kukhala wakufikirika. Pakukumbukira bzomwe Jezu adacita, Alan adati: “Jezu akhana bzizinji bzakucita, tsono wanthu wa misinkhu yentse akhakhala wakutsudzuka kumufenderera na kumukumbira kuti awathandize. Iwo akhadziwa kuti iye akhacita nawo thupo. Ndikufuna kutewezera Jezu nakuti nimbadziwike kuti ndine munthu wakufikirika, wakutsudzuka kuceza na wanthu na wakudeka mtima.”

16. Kodi kuphatisa basa mafala ya pa Salimo 119:59, 60 kungatithandize tani kutewezera Jezu bwino-bwino?

¹⁶ Tin’funika lini kuwofoka tikatazira kutewezera Jezu bwino-bwino. (Tiyago 3:2) Nyakupfunza angakwanise lini kutewezera bwino-bwino mpfunzisi wace omwe adamupfunzisa basa linango. Tsono akambapfunza na bzomwe  aphonya na kumbacita nyongo yakutewezera mpfunzisi waceyo, nyakupfunzayo an’dzakhala na luso kwene-kwene. Mpsibodzi-bodzimbo na ifepano, tikambaphatisa basa bzomwe tapfunza pa pfunziro la Bibliya la patekha, na kucita nyongo kuti ticinje makhalidwe yathu, ifepano tin’dzakwanisa kutewezera makhalidwe yabwino ya Jezu.—Werengani Salimo 119:59, 60.

17-18. Kodi n’ciyani cin’dzacitika tikambatewezera Jezu mwa kumbathandiza anzathu?

¹⁷ Tikambakhala wakukonzeka kuthandiza anzathu timbacitisa kuti wanthu winango afune kucitambo bzibodzi-bodzibzo. Mkulu wa gwere wakucemeredwa Tim adati: “Maswaka mazinji yakwanisa kuyenda patsogolo mwauzimu yacithemera kukhala atumiki wakuthandiza napo kuti winango wa iwo akali ang’ono. Cibodzi mwa bzinthu bzomwe bzawathandiza ni kuwona mtima wakufuna kuthandiza wanthu omwe akulu akhaulatiza ndipo adafuna kuwatewezera. Abale amwewa ambathandiza kwene-kwene gwere lathu ndipo ambathandizambo kwene-kwene akulu.”

¹⁸ Tikukhala mu dziko lomwe wanthu ambandobzifuna okha. Tsono wanthu wa Yahova mbakusiyana na wanthu amwewa. Ifepano takomedwa kudziwa kuti Jezu akhafunisisa kuthandiza wanthu ndipo tikufunisisa kumutewezera. N’cadidi kuti tingakwanise lini kutewera bwino-bwinoletu nzayo za Jezu, koma tingakwanise kutewera “nzayo zace mwakukhulupirika.” (1 Pedru 2:21) Tikacita ciri-centse kuti titewezere Jezu mwa kumbathandiza anzathu, ifepano tin’dzakomedwa kwene-kwene thangwe ra kudziwa kuti tikukondwesa Yahova.