1. Amunu le elap dogo na pya nɛɛ Jɛhova ɛrɛ a?

 NYƆƆNYƆƆ sɔ̄ akii adumɛ, Baibol bee kɔ sere kɛ̄ kɔ pya nɛɛ Bari “gaa le su loo wa nɛ bu yɔrɔ” bu esiatam Jɛhova kɛ̄bah leredee a aabah ye Nwiīnɛɛdam. (Yɔɔ 110:3) Bu kaka, lo mɔmanudɛɛ̄ aa dooa gbɔ̄mɛɛ̄ anii’ee. Bu ziī ziī zua, pya nɛɛ Jɛhova aa su gbɛnɛ-edo miliɔn awa zuema ue, e ba su mɛm daā lo ama. Ba su loo nɛ lo edoo wo, e a naa wee lu ekpɛ wa kpugi. Ba sunage sɔ̄ kuādɛɛ̄loo nu alu ebɛɛ̄ pya wa wuga bu yira, bu namloo, bu ekɛɛrɛ le bu edɔɔ̄. Pya wuga nɛɛdam alu etubobaloo aa su gbɛnɛ-edo sɔ̄ tɛ̄ma nyɔɔ pya nu elu enɔ bie enɔānu sa sinage loo pya wa wuga bu yira lo eyere wa mɛm loo. Ena a wa zū kɔ ba a si dɛ̄dɛɛ̄ tam ama ani? Ɛɛ wereloo, lo a le wereloo ba ɛrɛ kumaloo Jɛhova le pya nɛɛ le aba le.—Mat 22:37-39.

2. Dookɛ̄ alu ebaatɛ̄ doo bu Pya Rom 15:1-3, amunu edoba na Jizɔs bee i sere kɛ̄ nɛ a?

² Jizɔs bee sere le edoba kɛ̄ lo esu nu eleeloo pya dɔɔ̄na nua gbɛnɛ loo alɛ. I aa piiga kumakɛ̄ i ekpo toora doo lo enɔ ye edoba. (Buū Pya Rom 15:1-3.) Pya a nɔ ye edoba e’ɛrɛ biī nɛ wa loo. Jizɔs bee kɔ: “Lu le eenyɔɔ lo enɛ ee susu.”—Doonu 20:35.

3. Ena i nɔ bu ekobee ue ama a?

 ³ Bu ekobee ue ama, i gaa le tɛɛ̄ nyɔɔ pio nu Jizɔs bee doo lo eyerebah nɛ pya dɔɔ̄na, sa i kɔnia kɛ̄ i dap nɔ ye edoba doo. E i nɔnage kɛ̄ i dap nyimɛ i taɛ lo esitam nɛ pya dɔɔ̄na doo.

4. Bu mɛ sīdee na Jizɔs bee su nu alu ebɛɛ̄ pya dɔɔ̄na nua gbɛnɛ loo alɛ ani?

⁴ Jizɔs bee su loo nɛ kere sɔ̄ loo ye ebee ɔ. Naa kɛɛrɛ nu Jizɔs bee doo sɔ̄ gbɛnɛ eku nɛɛ bee ye zɔ̄ŋia bie kpaɛ egu, naadaba bie kɛ̄ a waɛloo Kapanaum. Jizɔs ebee su yubeloo edɛɛ̄ yeā kara lɛɛ a gae lu lo sɔ̄. E lo ama kura kɔ loo ye ebee dap ɔ, kerewo, sɔ̄ a bee muɛ lo gbɛnɛ eku nɛɛ, a bee ɛrɛ toesaɛ̄ loo pya kporo le pya nu aa bee dumɛ a wa le yɛɛ. A bee wa bo sa nɛ ziī ekɔaue taɛkɛ̄ a zū nɛɛ, lo a ee ɛrɛgeba ekɔaue ebee lu enɛ, lo a le Ekɔaue nyɔɔ Egu.—Luk 6:12-20.

5. Bu mɛ sīdee na pya alu tɛ bee tɔ aa nɔ edoba Jizɔs sɔ̄ loo wa ɔ a?

⁵ Kɛ̄ pya tɛ bee tɔ aa nɔ Jizɔs doo. Naa su edoba kɔ: Nɛɛ alu tɛ bee tɔ aa uwe tam sa loo ye e’ɔa kaāna. Kereadoo a bee gbī elɛɛ Enɔānu Butɔ kɛ̄ lo uunɛ, a bara Jɛhova kɔ a nɛe ye mɛm esu seā lo enɔānu. E Jɛhova dā ye kara sa a sere lo enɔānu dookɛ̄ a wee doo. Pya wa miɔŋɔ bee nɔ ziī gbɛnɛ nu a kuī lo uunɛ, e lo nu na kɔ, nu bu edɔɔ̄ lu nu a kuīloo wa tɛ le ka ee dɛ̄dɛɛ̄ nu bu dum.

6. Naa nɛ edoba a tɔgɛ kɛ̄ Jizɔs bee su sɔ̄ ebee seea yeābah nɛ pya dɔɔ̄na doo.

⁶ Jizɔs bee su sɔ̄ ebee seeā yeābah nɛ pya dɔɔ̄na. O dapge kɛɛrɛ kɛ̄ a bee tɔɔ̄loo Jizɔs doo sɔ̄ a bee dā kɔ ba efɛa ye gbo Jɔn Nɛɛ Limaā Nɛɛ ni? Jizɔs bee ɛrɛ gbɛnɛ ekiɛ̄nu. Baibol kɔ: “Sɔ̄ Jizɔs edaā [kɔ elua efɛ Jɔn], a zuura loo ye nɛ dumɛ aa a kɛ̄ ama bu fah, kii bu kpo-sagara-wii, lo etɔɔ̄ kɛ̄ alu kee.” (Mat 14:10-13) I dap dābeeloo nu anua a bee gbī etɔɔ̄ kɛ̄ alu aba ɛɛ. A wee nia gbɛnɛ-edo ii lo etɔɔ̄ kɛ̄ alu aba ii sɔ̄ i yaa baāŋa. Kerewo, a naa bee waɛ kɔ Jizɔs a le aba ɛɛ. Lɛɛ alɛ gae ina lo kɛ̄, gbɛnɛ-edo nɛɛ ebee ye dasī ina kɛ̄ a bee gbī etɔɔ̄ aba  ɛɛ ama. Jizɔs bee doo dogo doodoo wa ni? A bee kɛɛrɛbu loo ebɛɛ̄ gbɛnɛ eku nɛɛ a, e a “ɛrɛ gbɛnɛ ekiɛ̄nu” wa nyɔɔ. Jizɔs bee muɛ kɔ ba gbī yerebah le egbɔ̄nyiɛ a aabah Bari, e a bee nwaabah wa yerebah nɛ. Bu kaka, naa bee wa tɔgɛ kunɛ nwīepooloo nu, mɛ “a tɔgɛ wa nu gbɛnɛ.”—Maak 6:31-34; Luk 9:10, 11.

7-8. Naa nɛ edoba a tɔgɛ kɛ̄ pya kanɛɛ nɔ Jizɔs sɔ̄ alu ebɛɛ̄ doo.

⁷ Kɛ̄ pya kanɛɛ a ɛrɛ wereloo nɔ Jizɔs doo. Bu i ɛɛ kaāna loo tam pya kanɛɛ ba su loo nɛ aa si nyɔɔ ili! Pio nɛɛ a le bu bɔŋanaloo naa suā gbɛnɛ-edo tam ba aa si ama. Bu edoba, sɔ̄ nu bugia yɔ ziī pya i wuga bu bɔŋanaloo, pya Hospital Liaison Committee wee nwaabah teera si wee yerebah wa nɛ. Gbɛnɛ-edo sɔ̄ lo ama wee sira taɛ pie edɛɛ̄! Mɛ nyɔɔbee toesaɛ̄ ba ɛrɛ loo pya wa wuga nɛɛdam le nɛɛwa lo ba le bu taāŋa, pya kanɛɛ le wa butɔ wee su nu alu ebɛɛ̄ pya wa wuga bu yira nua gbɛnɛ loo alaba.

⁸ Pya kanɛɛ ɛrɛnagebah bu wuwu pya i Tɔ Nɔnu Buɛ̄-mɛnɛ le pya dɔɔ̄na tɔ gbaānage loo sisi tam lo eyerebah nɛ pya nɛɛ bugia siranu siraloo. E pya kanɛɛ su gbɛnɛkpo awa i tɔŋɛnu, i yeā mɛm loo, sa i yeābah nɛ. A lee kɔ i kaɛgɛ dɛ̄dɛɛ̄ pya wuga nɛɛdam ama le pya wa butɔ kaāna. I bara kɔ Jɛhova a nɛ leelee pya wuga ama nyɔɔ wa epiaga! Kerewo, a bɔnage loo kɔ pya kanɛɛ a kuūnadɛɛ̄ dookɛ̄ pya dɔɔ̄na le doo. A naa lee kɔ ba a su gbɛnɛ-edo sɔ̄ siātam bɔŋanaloo mmɛ kɛ̄ ba naa ɛrɛna sɔ̄ nɛ nu alu ebɛɛ̄ pya wa butɔ.

9. Dookɛ̄ Pya Filipai 2:4, 5 kɔ doo, amunu elap dogo na a bɔloo kɔ Pya Nɛɛ Kraist a ɛrɛ a?

⁹ Buū Pya Filipai 2:4, 5. Kɛādoo, naale dɛ̄dɛɛ̄ ii na i lu pya kanɛɛ a, mɛ dɛ̄dɛɛ̄ ii dap nɔ kɛ̄ Jizɔs bee ɛrɛ edɔɔ̄ suloo waāna zɔɔ doo. Baibol kɔ ‘a bee su ye loo nua zooro.’ (Fil 2:7) Naa kɛɛrɛ nu i dap nɔ aāloo ue ama. Kaāna zooro, ale nɛɛ tam wee su dee a ye kpaānɛ daānu enia ye tɛtɔ. Doodoo nɛɛ alu zooro Jɛhova le nɛɛ aa si tam nɛ pya wuga, baɛbaɛ beenyiɛ naale loo kɔ o gbī esitam nɛ Jɛhova sa sinage tam nɛ pya wuga bu bɔŋanaloo. O dap doo wo tɛ̄maloo ekɛɛrɛbu pio lɛra ekɛɛrɛ elu enɛ ama.

10. Pya amunu ebip na i dap bip aba ii a?

¹⁰ Ɛp o elap dogo. Bip aba ɔɔ kɔ: ‘M wee kpɛ̄nageloo esu loo nɛ lo edoo nu elee loo pya dɔɔ̄na ni? Bu edoba, m doo dogo doodoo wa lo alu ekɔ m siloo ziī wuga nɛɛdam e’ana a le tɔpie, ale aara ziī wuga nɛɛwa e’ana kuma enɔānu ni? M wee nwaagebah suloo nɛ sɔ̄ alu ebɛɛ̄ lo eyerebah kwakɛ̄ a wee lu etɔɔ̄ ɛrɛ kɔnvɛnsɔn ale kwaloo Tɔ Nɔnu Buɛ̄-mɛnɛ ni?’ Bu Jɛhova ɛɛ kaāna sɔ̄ i nɛ i sɔ̄ le pya nu i ɛrɛ bu sīdee wiibu naale loo lo eyerebah nɛ pya dɔɔ̄na, lo alu nu i bee yiga kɔ i dooe sɔ̄ i bee ye kiīloo nɛ. Lo i muɛ kɔ alu ebɛɛ̄ kɔ i kwabaloo kɛ̄ i yerebah nɛ pya dɔɔ̄na doo, ena i dap doo ani?

11. Bu mɛ sīdee na kara dap i yerebah nɛ kɔ i ɛrɛ edɔɔ̄ suloo waāna zɔɔ a?

¹¹ Biibahkɛ̄ yere kara nɛ Jɛhova. Naa su kɔ o muɛ kɔ alu ebɛɛ̄ kɔ o suloo nɛ, mɛ o sikɛ̄ muɛ kɔ oo ɛrɛ taɛ lo edoo wo. Lo a sira doo wo, kɔ nɛ Jɛhova bu kara. Kɔ taɛ kɛ̄ a a leloo doo ye nɛ. Kɔ nɛ Jɛhova kɛ̄ nu a tɔɔ̄loo doo sa ye bara kɔ a nɛ a ‘taɛ le ekpo lo esu daā.’—Fil 2:13.

12. Bu mɛ sīdee na wuga nɛɛdam a lege zege dap yerebah nɛ bɔŋanaloo a?

¹² Lo o lu zege wuga nɛɛdam eliamaā, bara Jɛhova kɔ a yereebah a nɛ kɔ o ɛrɛ taɛ lo eyerebah nɛ pya wuga bu bɔŋanaloo. Bu pio bɔŋanaloo a le siga edo, buā pya kanɛɛ eenyɔɔ buā pya yerebahtam, e pio pya yerebahtam ama naa lena zege ale ba e’ina gaa ana. Kuma sɔ̄ bɔŋanaloo aa nyim yiiloo a, i ɛrɛ ebɛɛ̄ loo gbɛnɛ-edo pya nɛɛdam ba lege zege lokwa ba dap yerebah nɛ pya kanɛɛ lo ekuūdɛɛ̄loo pya wuga a le bu bɔŋanaloo. Lo o su loo nɛ lo esitam ɛrɛgeba kɛ̄ ebɛɛ̄ le, o gaa le ɛrɛ kaāna ɛɛbu. Ena anua a? Nu anua na bee dodoo wo enia Jɛhova, edoo kɔ o ɛrɛ le bee sa doonage kɔ o ɛrɛ ziīnɛloo a aaloo yeyerebah nɛ pya dɔɔ̄na.

13-14. Ena i dap doo lo eyerebah nɛ pya i wuga nɛɛdam le nɛɛwa sɔ̄ ba le bu taāŋa a? (Ɛp foto a le nyɔɔ eko.)

¹³ Suā sɔ̄ pya dɔɔ̄na gbī yerebah. Nɛɛ lɛɛratam Pɔɔl bee zuurabahtɔ̄ pya Hibru kɔ: “Bui aa aaloo edoo lenu sa ponia nu bui ɛrɛ, nyɔnɛbee dua wɔp zɔɔ ama lu nu a nia Bari.” (Hib 13:16) A bee le kaāna le zuurabahtɔ̄! Sɔ̄ sɔ̄ naa binia aā sɔ̄ ba bee ɛrɛ kpa ama, Pya Nɛɛ Kraist a bee le Judia bee lɛɛbaloo wa tɔ, gbora, le pya wa manamana lo ba naa yira sa “teera kii nyɔɔ gbɛnɛkpokɛ̄.” (Mat 24:16) A bee lu ebɛɛ̄ kaāna kɔ ba a yerebah nɛ ziī lo sɔ̄. Lo ba bee le gaa ponia pya nu ba ɛrɛ dookɛ̄ Pɔɔl bee wa kɔ nɛ doo lɛɛ a gae lu lo sɔ̄, ebee wa  waɛbah kɔ ba a nyaana baloo nu dookɛ̄ wa kɛ̄tɔɔ̄ nyaa doo.

¹⁴ Naale dɛ̄dɛɛ̄ sɔ̄ na pya i wuga nɛɛdam le nɛɛwa edap kɔ pya nu a wa bɛɛ̄ i nɛ a. Bu edoba, naa su kɔ ziī wuga nɛɛwa u bie ye dam. Ekɔ lo wuga nɛɛdam ɛrɛ ebɛɛ̄ loo nuede, nɛɛ e’ɔp ye siā kiā ale nɛɛ eyerebah ye nɛ loo pio tam butɔ ni? Pio sɔ̄, a naale egbī ekɔ lɔgɔ nu i nɛ, nyɔɔbee a dap kɛɛrɛ kɔ a naa lee kɔ a nɛe taāŋa lɔgɔ nɛɛ. Kerewo, bu ye e’ɛɛ kaāna lo i su loo nɛ lo eyerebah ye nɛ kere a naa dasī i bip. Naa lee kɔ i kɛɛrɛ kɔ pya dɔɔ̄na edap ye doo nɛ, ale kɔ lo nɛɛ a le bu ebɛɛ̄ ewee kɔ pya nu alu ye ebɛɛ̄ i nɛ dɛ̄dɛɛ̄ sɔ̄. Bip aba ɔɔ kɔ: ‘Lo m bee lebu dua kɛ̄tɔɔ̄ ama, ena ebee mɛ nia kɔ ba a doo mɛ nɛ a?’

15. Ena i doo lo i gbī eyerebah nɛ pya dɔɔ̄na a?

¹⁵ Lu nɛɛ a waɛ eyiiloo. Baɛbaɛ beenyiɛ naale loo kɔ o suāloo pya wuga nɛɛdam le nɛɛwa a le bu o bɔŋanaloo lo ba kpɛ̄naloo eyerebah nɛ pya dɔɔ̄na dɛ̄dɛɛ̄ sɔ̄. Ba naa wee doo kɔ a tɔɔ̄ i loo kɔ i aa wa nɛe taāŋa. I suā kɔ i dabe wa dɛɛa nyɔɔ sɔ̄ i ɛrɛ ebɛɛ̄, e i gbī enɔ wa! Ziī nɛɛ kanɛɛ a kura Alan lo elua 45 zua, bee gbī elu nɛɛ a waɛ eyiiloo. Sɔ̄ a kɛɛrɛ nu akiiloo edoba Jizɔs, a bee kɔ: “Jizɔs bee ɛrɛ gbɛnɛ-edo nu edoo a ye le bah, kerewo, dɛ̄dɛɛ̄ nɛɛ bee ye dap yiiloo sa gbī yerebah ye aābah. Ba bee ye ɛp nua nɛɛ a wa kuūdɛɛ̄loo kaāna. M gbī enɔ elap dogo Jizɔs ama leere sa lu nɛɛ a waɛ eyiiloo, lu fɛgɛ sa kuūdɛɛ̄loo pya dɔɔ̄na.”

16. Le-yɔɔ 119:59, 60 dap i yerebah nɛ kɔ i nɔ edoba Jizɔs doodoo wa?

¹⁶ Loo i aa ɔ lo ii dap nɔ Jizɔs bu sīdee a mma. (Jem 3:2) Nɛɛ a lege aa nɔ kɛ̄  etɔ̄nu doo siile edap para tɔ̄nu bee ye nɛɛ tɔgɛnu. Mɛ lo a nɔ nu aāloo pya lo a naa bee dap tɔ̄ leere sa piiga lo enɔ ye tɛtɔ dookɛ̄ a dap doo, a gaa le nyim kiisī sa para tɔ̄nu. Bu aba lo sīdee, lo i doo pya nu i nɔ aābu enɔānu Baibol nyɔɔ i loo sa piiga kuma kɛ̄ i dap doo lo ekwabaloo ɛrɛgeba pɔrɔ elap i ɛrɛ, i gaa le kiisī leere bu nɔnɔ edoba Jizɔs.—Buū Yɔɔ 119:59, 60.

17-18. Pya amunu biī na i ɛrɛ lo i nɔ kɛ̄ Jizɔs bee ɛrɛ elap dogo suloo wɔma zɔɔ doo a?

¹⁷ Sɔ̄ i su loo nɛ lo eyerebah nɛ pya dɔɔ̄na, dap zū pya dɔɔ̄na kɔ ba a doonage wo. Ziī nɛɛ kanɛɛ a kura Tim kɔ: “I ɛrɛ pio pya wuga nɛɛdam a le zege lo ba enyima kiisī sa elua etubo wa baloo nua pya yerebahtam, kereadoo pio aba lege zege kaāna, nyɔnɛbee ba bee muɛ kɛ̄ pya dɔɔ̄na kpɛ̄naloo esuloo nɛ doo sa ba nɔ wa edoba. Pya wuga nɛɛdam ama aa yerebah nɛ i bɔŋanaloo sa yerekpotɛ̄ pya kanɛɛ kaāna.”

¹⁸ I tɔɔ̄ bu nyɔuwe wiibu mma. Kerewo, pya nɛɛ Jɛhova lu kee. Kɛ̄ Jizɔs bee ɛrɛ edɔɔ̄ suloo wɔma zɔɔ doo tɔa i loo kaāna, e i biaɛfii lo enɔ ye edoba. Alu kaka kɔ ii le edap ye nɔ bu sīdee a mmana, mɛ i dap “nyɔɔnɛ ye elap tɔ kiā.” (1 Pit 2:21) Kuma sɔ̄ i aa piiga lo enɔ kɛ̄ Jizɔs bee suloo nɛ lo eyerebah nɛ pya dɔɔ̄na doo a, i ɛrɛnage ɛɛbu dookɛ̄ alɛ bee doo, nyɔɔbee i aa doo nu a nia Jɛhova.