1. Цӕмӕй ӕй бӕрӕг, Йегови адӕн алли гъуддаги дӕр архайунмӕ цӕттӕ ке ’нцӕ?

 БИБЛИЙ хъӕбӕр раги финст ӕрцудӕй, Хуцауи адӕн «цӕттӕй ке лӕудзӕнцӕ», цӕмӕй Йеговӕн лӕггадӕ кӕнонцӕ ӕма син ӕ Фурт ба разамунд ке дӕтдзӕй (Пс. 110:3). Ӕма еци пахампарадӕ куд ӕнхӕст кӕнуй, уой мах абони нӕхе цӕститӕй уинӕн. Йегови еузӕрдон лӕггадгӕнгутӕ зингзӕрдӕй хуарз хабар фегъосун кӕнунцӕ, ӕма еци гъуддагбӕл алли анз дӕр милиуангай сахӕттӕ бахарз кӕнунцӕ. Еци гъуддаги архайунцӕ барвӕндонӕй ӕма син федгӕ дӕр неке кӕнуй. Удта ма сӕ рӕстӕг нӕ февгъау кӕнунцӕ, цӕмӕй хуӕртӕ ӕма ӕнсувӕртӕн аллихузи ӕнхус кӕнонцӕ – кӕмӕн гъуддагӕй, кӕмӕн ӕ нифс бафедар кӕнунцӕ, кӕмӕн ба е ’ууӕндундзийнадӕ. Уомӕй уӕлдай ма ӕнсувӕрти хъӕбӕр берӕ рӕстӕг фӕгъгъӕуй харз кӕнун, цӕмӕй сӕ ихӕслӕвӕрдтӕ бацӕттӕ кӕнонцӕ кенӕ ба цӕмӕй хуӕртӕ ӕма ӕнсувӕрти бабӕрӕг кӕнонцӕ ӕма сӕ бафедар кӕнонцӕ. Мадта нӕ ӕгас еци гъуддӕгтӕмӕ ци разӕнгард кӕнуй? Уарзондзийнадӕ. Мах уарзӕн Йегови ӕма адӕни (Матф. 22:37–39).

2. Цӕхуӕн гъуддаги нӕ фӕндуй Киристей фӕнзун? (Ромӕгтӕмӕ 15:1–3).

² Фиццагидӕр иннети мӕтӕ кӕнун куд гъӕуй, уомӕй нин фӕнзуйнаг ӕй Киристе. Ӕма мах дӕр фӕндуй, нӕ бон цӕйбӕрцӕбӕл ӕй, уойбӕрцӕбӕл ӕй фӕнзун. (Бакӕсӕ Ромӕгтӕмӕ 15:1–3.) Ӕма уотӕ ку архайӕн, уӕд е нӕхецӕн дӕр пайда ӕрхӕсдзӕй, уомӕн ӕма Киристе загъта: «Райсунӕй раттун амондгундӕр гъуддаг ӕй» (Гъуд. 20:35).

3. Аци статьяй цӕмӕ ӕркӕсдзиан?

³ Аци статьяй ӕркӕсдзиан, Киристе уодуӕлдаййӕй ке архайдта, е цӕмӕй бӕрӕг адтӕй, ӕма ӕй нӕ бон куд ӕй фӕнзун,  уомӕ. Уомӕй уӕлдай ма радзубанди кӕндзиан, ци нин банхус кӕндзӕй, цӕмӕй нӕ фӕндӕуа иннетӕн уодуӕлдаййӕй лӕггадӕ кӕнун.

4. Киристе ӕхебӕл ке нӕ аурста, е цӕхуӕн хабарӕй ӕй бӕрӕг?

⁴ Йесо хъӕбӕр фӕллад ку фӕууидӕ, уӕддӕр ӕхебӕл нӕ аурста. Гъӕйдӕ расагъӕс кӕнӕн, Киристе ӕхе куд бадардта, хъӕбӕр берӕ адӕн имӕ ку ’рбацудӕй, уӕд. Еци хабар, ӕвӕдзи, адтӕй Капернауммӕ хӕстӕг. Уой размӕ Киристе ӕгас ӕхсӕвӕ Йеговӕмӕ ковгӕ фӕккодта, ӕма хъӕбӕр фӕллад адтайдӕ. Фал уойбӕрцӕ адӕн ке ӕрӕмбурд ӕй ӕма сӕ астӕу берӕ мӕгуртӕ ӕма сӕйгитӕ ке адтӕй, уой ку фӕууидта, уӕд син хъӕбӕр ӕртӕрегъӕд кодта. Гъема сӕйгити исдзӕбӕх кодта. Уомӕй уӕлдай ма сӕ Йесо ахур кӕнун райдӕдта, удта син радзурдта ӕ зундгонддӕр радзубандитӕй сӕ еу (Лук. 6:12–20).

5. Бийнонти хестӕрти бон куд ӕй Киристей фӕнзун, хъӕбӕр фӕллад ку фӕуунцӕ, уӕд дӕр?

⁵ Бийнонти хестӕрти бон куд ӕй Киристей фӕнзун? Гъӕйдӕ нӕ цӕститӕбӕл рауайун кӕнӕн, беретӕн зонгӕ ка уодзӕй, уӕхӕн уавӕр. Кусти фӕсте фидӕ хӕдзарӕмӕ ӕрбацудӕй ӕма ӕ фур фӕлладӕй ӕ къӕхтӕбӕл туххӕй лӕууй. Еци изӕр ба сӕмӕ гъӕуама бийнонти ахур уа. Хъӕбӕр ӕй фӕндуй сӕ ахур ӕндӕр бонмӕ рахӕссун, фал уӕддӕр Йеговӕмӕ искувта ӕма си хъауритӕ ракурдта. Йеговӕ дӕр ин ӕ кувд фегъуста ӕма сӕ бийнонти ахур, куд бадзубанди кодтонцӕ, уотӕ рацудӕй. Еци изӕр сувӕллӕнттӕ дӕр еу ӕхсидзгӕ гъуди балӕдӕрдтӕнцӕ: сӕ ниййергутӕн Йегови гъуддӕгтӕй сӕйрагдӕр царди неци ес.

6. Киристей хебарӕй рарветун ци рӕстӕг фӕндадтӕй, уой иннетӕн ке нӕ бавгъау кодта, е цӕхуӕн хабарӕй ӕй бӕрӕг?

⁶ Киристе иннетӕн ӕ рӕстӕг не ’вгъау кодта. Дӕ цӕститӕбӕл рауайун кӕнӕ, Йесойӕн куд зин адтӕй, ку ’й фегъуста, ӕ хуарз ӕмбал Аргъауӕг Иоанни ке рамардтонцӕ, уой. Еци хабарбӕл хъӕбӕр маст кодта, гъема «хебарӕ рауӕнмӕ рандӕ ’й» (Матф. 14:10–13). Фӕндадтӕй ’й еунӕгӕй байзайун. Ӕма е дессаг дӕр нӕй, махӕй дӕр беретӕ ӕ бунати, уотӕ бакодтайуонцӕ. Фал ин си неци рауадӕй. Еци хебарӕ рауӕни туххӕй хъӕбӕр берӕ адӕн базудтонцӕ, ӕма Киристе уордӕмӕ нӕма бахъӕрдтӕй, уотемӕй етӕ ӕ разӕй уоми фӕцӕнцӕ. Цума Киристе уомӕ цӕхуӕн  цӕстӕй ракастӕй? Е алкӕддӕр сагъӕс кодта, иннетӕн куд хуӕздӕр уа, уобӕл. Гъема сӕбӕл бацийнӕ кодта. Е ӕй уидта, ӕнхус ӕма уодӕнцойнӕ гъӕуагӕ ке ’нцӕ, ӕма син райдӕдта берӕ цидӕртӕ амонун. Дӕ гъос ӕрдарай, еу цалдӕр гъудий нӕ, фал берӕ цидӕртӕ (Мар. 6:31–34; Лук. 9:10, 11).

7, 8. Хестӕр нӕлгоймӕгтӕ дӕр Киристей хузӕн ке фӕййархайунцӕ, е цӕхуӕн гъуддӕгтӕй фӕууй бӕрӕг?

⁷ Хестӕр нӕлгоймӕгти бон куд ӕй Киристей фӕнзун? Нӕ хъазар хестӕр нӕлгоймӕгтӕ, Хуцау уи исарази уӕд, уӕ уодуӕлдай лӕггади туххӕй! Ӕмбурди хуӕртӕ ӕма ӕнсувӕртӕй ӕй беретӕ зонгӕ дӕр нӕ фӕккӕнунцӕ, ӕцӕгӕй уин цӕйбӕрцӕ гъуддӕгтӕ фӕууй, уой. Зӕгъӕн, сӕйгӕдӕнтти хӕццӕ ка ӕмгуст кӕнуй, еци хестӕр нӕлгоймӕгтӕ ӕй ку базонунцӕ, хуӕртӕ ӕма ӕнсувӕртӕй кедӕр ӕнхус ке гъӕуй, уӕд се ’гас гъуддӕгтӕ дӕр ниууадзунцӕ, цӕмӕй сӕмӕ фӕккӕсонцӕ. Арӕх уӕхӕн ӕнхус ӕхсӕвигӕнтти дӕр багъӕуй. Хестӕр нӕлгоймӕгтӕ, удта сӕ бийнонтӕ хуӕртӕ ӕма ӕнсувӕрти берӕ уарзунцӕ, удта син сӕ зин лӕдӕрунцӕ ӕма син уомӕ гӕсгӕ сӕ рӕстӕг нӕ февгъау кӕнунцӕ.

⁸ Уомӕй уӕлдай ма хестӕр нӕлгоймӕгтӕ фӕййархайунцӕ нӕ организаций аллихузи арӕзтадон гъуддӕгти, удта ӕрдзон бӕллӕхти ка бахауй, уонӕн дӕр фенхус кӕнунцӕ. Ду ба ибӕл ескӕд сагъӕс кодтай, уе ’мбурди хестӕр нӕлгоймӕгти цӕйбӕрцӕ рӕстӕг бахарз кӕнун фӕгъгъӕуй, цӕмӕй иннети ахур кӕнонцӕ ӕма сӕ федар кӕнонцӕ? Хестӕр нӕлгоймӕгтӕ, сумахӕн дӕр ӕма уӕ бийнонтӕн дӕр устур арфӕ кӕнӕн! Йеговӕ уин уӕ уодуӕлдай лӕггадӕ хуарздзийнӕдтӕй бафедӕт! Иннердиги ба хестӕр нӕлгоймӕгтӕ гъӕуама сӕ ихӕстӕмӕ раст цӕстӕй кӕсонцӕ. Раст н’ адтайдӕ ӕмбурди ихӕстӕбӕл гъе уойбӕрцӕ рӕстӕг харз кӕнун, цӕмӕй сӕ бийнойнӕгтӕ ӕма сӕ сувӕллӕнттӕ иронхуати уонцӕ.

9. Филиппӕгтӕмӕ 2:4, 5 финст дзурдтӕмӕ гӕсгӕ ӕгас киристӕнттӕмӕ дӕр цӕхуӕн зундахаст гъӕуама уа?

⁹ Бакӕсӕ Филиппӕгтӕмӕ 2:4, 5. Нӕ фулдӕр хестӕр нӕлгоймӕгтӕй нӕ лӕггадӕ кӕнӕн, фал Киристей фӕнзун ӕма иннетӕн уодуӕлдаййӕй лӕггадӕ кӕнун алли киристонӕн дӕр ӕ ихӕс ӕй. Библий финст ӕй, Йесо «цагъари хузӕн» ке иссӕй (Фил. 2:7). Гъӕйдӕ аци загъдбӕл лӕмбунӕгдӕр расагъӕс кӕнӕн. Хуарз цагъар кенӕ лӕггадгӕнӕг фӕссагъӕс кӕнуй, цӕмӕй ӕ хецауи зӕрдӕ естӕмӕй барохс кӕна. Мах ба ан Йегови цагъартӕ, удта, зӕгъӕн ес, ӕма хуӕртӕ ӕма ӕнсувӕртӕн лӕггадгӕнгутӕ. Уӕхӕн хецӕуттӕн естӕмӕй балӕггадӕ кӕнун ба нӕхецӕн дӕр ӕхцӕуӕн фӕууй. Гъӕйдӕ ӕркӕсӕн, еци гъуддаги нин ци банхус кӕндзӕй, уомӕ.

10. Дӕ бон цӕхуӕн фарстатӕбӕл ӕй расагъӕс кӕнун?

¹⁰ Расагъӕс кӕнӕ, цӕхуӕн зундахаст дин ес, уобӕл. Дӕхемӕ уӕхӕн фарстатӕ раттӕ: «Иннетӕн мӕ рӕстӕг ӕма мӕ хъауритӕ нӕ февгъӕу кӕнун? Зӕгъӕн, уотӕ мин ку зӕгъонцӕ, цӕмӕй каргун ӕнсувӕри бабӕрӕг кӕнон кенӕ ба каргун хуӕри ӕмбурдтӕмӕ ласун ке гъӕуй, уӕд исарази уодзӕн? Паддзахади залмӕ базелунмӕ, удта конгресси разӕй кенӕ конгресси фӕсте бафснайунмӕ мин лигъстӕ кӕнун фӕгъгъӕуй?» Мах нӕ цард Йеговӕн иснивонд кодтан ӕма ин дзурд равардтан, уой фӕндон ӕнхӕст кӕнунӕй сӕйрагдӕр нин ке неци уодзӕнӕй. Йегови ба фӕндуй, цӕмӕй нӕ рӕстӕг, нӕ хъауритӕ ӕма нӕ фӕрӕзтӕ иннетӕн ма ’вгъау кӕнӕн. Уотӕ ку фӕййархайӕн, уӕд ин хъӕбӕр ӕхцӕуӕн фӕууй.

11. Цӕмӕй дӕ иннетӕн лӕггадӕ кӕнун фӕндӕуа, уой туххӕй ковун цӕмӕн гъӕуй?

¹¹ Йеговӕмӕ зӕрдибунӕй ковӕ. Зӕгъӕн, ба ’й лӕдӕрдтӕ, цидӕр дӕ раййевун ке гъӕуй, фал дӕ ӕййевун ба неци уотӕ фӕндуй. Уӕхӕн уавӕри Йеговӕмӕ зӕрдибунӕй ковӕ, маци си римӕхса ӕма алцидӕр куд ӕй, уой радзорӕ. Корӕ си, цӕмӕй дӕ «фӕндгӕ дӕр кӕна ӕма архайгӕ дӕр кӕнай» (Фил. 2:13).

12. Ӕригон донаргъуд ӕнсувӕрти бон куд ӕй ӕмбурдӕн ӕнхус кӕнун?

¹² Кӕд ӕригон ӕма донаргъуд ӕнсувӕр дӕ, уӕд Йеговӕй корӕ, цӕмӕй дӕ фӕндӕуа ӕмбурдӕн фулдӕр лӕггадӕ кӕнун. Еуӕй-еу ӕмбурдти хестӕр нӕлгоймӕгтӕ кӕстӕреуӕггӕнӕг ӕнсувӕртӕй фулдӕр фӕуунцӕ. Еци кӕстӕреуӕггӕнӕг ӕнсувӕртӕй ба беретӕ ӕригон нӕбал фӕуунцӕ. Уомӕй уӕлдай ма Йегови организацимӕ берӕ нӕуӕг адӕн ӕрбацӕуй. Е ба уобӕл дзорӕг ӕй, ӕма ӕригон ӕнсувӕрти ӕнхус никки хъӕбӕрдӕр гъӕуй. Кӕд ду дӕр ӕмбурди аллихузи ихӕстӕ ӕнхӕст кӕнунмӕ цӕттӕ дӕ, уӕд амондгундӕр уодзӕнӕ. Цӕмӕн ес уотӕ зӕгъӕн? Уомӕн ӕма уотемӕй Йегови зӕрдӕ рохс кӕндзӕнӕ, дӕхецӕн хуарз ном искӕндзӕнӕ ӕма, иннетӕн ке ӕнхус кӕнис, е дин устур цийнӕ хӕсдзӕй.

13, 14. Нӕ бон куд ӕй хуӕртӕ ӕма ӕнсувӕртӕн гъуддагӕй ӕнхус кӕнун? (Кӕсӕ хузӕмӕ ӕндаг цъарӕбӕл.)

¹³ Ескӕмӕн банхус кӕнунмӕ рӕвдзӕ уо. Нӕ эри 61 анзи апостол Павел Иуди цӕрӕг киристӕнттӕмӕ ниффинста: «Ма иронх кӕнтӕ хуарздзийнадӕ кӕнун ӕма уӕмӕ ци ес, уомӕй иннетӕн хай кӕнун, уомӕн ӕма уӕхӕн нивӕндтӕ Хуцауӕн ӕхцӕуӕн ӕнцӕ» (Дзиуит. 13:16). Еци унаффӕ ӕ афони адтӕй. Уомӕн ӕма цалдӕр анзей фӕсте, кӕмӕ финста, еци хуӕртӕ ӕма ӕнсувӕрти гъудӕй сӕ хӕдзӕрттӕ, сӕ куститӕ, удта сӕ хеуӕнтти ниууадзун ӕма хуӕнхтӕмӕ ледзун (Матф. 24:16). Уоми ба ӕнӕ кӕрӕдзей ӕнхусӕй нӕ бафӕразтайуонцӕ. Мадта Павели унаффӕмӕ гӕсгӕ уайтагъд архайун ка райдӕдта ӕма сӕмӕ ци ес, уомӕй иннетӕн ка хай кодта, уонӕн ӕнцондӕр адтӕй, нӕуӕг уавӕртӕбӕл исахур ун.

¹⁴ Хуӕртӕ ӕма ӕнсувӕрти ӕнхус ке фӕгъгъӕуй, уой сӕхуӕдтӕ алкӕд нӕ фӕззӕгъунцӕ. Зӕгъӕн, ӕнсувӕрӕн ӕ бийнойнаг рамардӕй. Уӕд имӕ цума фӕккӕсун нецӕмӕй  гъӕудзӕй? Зӕгъӕн, хуӕруйнаг искӕнун, ескумӕ фӕлласун кенӕ ба хӕдзари ӕндӕр хабӕрттӕ ракӕнун. Ка ’й зонуй, ӕхуӕдӕг нин маци зӕгъа, уомӕн ӕма ’й нӕ фӕндуй иннети тухсун кӕнун. Фал имӕ не ’нхуси къох нӕхе зӕрдтӕй ку бадарӕн, уӕд ни хъӕбӕр боз уодзӕй. Раст н’ адтайдӕ уотӕ сагъӕс кӕнун: «Ести уодзӕй. Ӕнхус ӕй ку гъӕуа, уӕд ӕрбадзордзӕй». Дӕхе бафӕрсӕ: «Мӕн ба уой бунати цӕхуӕн ӕнхус гъудайдӕ?»

15. Уодуӕлдай адӕймаг цӕхуӕн гъӕуама уа?

¹⁵ Ӕнцон бацӕуӕн кӕмӕ фӕууй, уӕхӕн адӕймагӕй дӕ зонӕнтӕ. Дӕу ӕмбурди дӕр, ӕвӕдзи, ес уӕхӕн хуӕртӕ ӕма ӕнсувӕртӕ, цийфӕнди уавӕри дӕр ӕма цийфӕнди афони дӕр банхус кӕнунмӕ цӕттӕ ка фӕууй. Удта сӕхе дӕр уотӕ некӕд фӕддарунцӕ, цума сӕ хъӕбӕр батухсун кодтай. Уӕхӕн хуӕртӕ ӕма ӕнсувӕртӕбӕл цийфӕнди гъуддаги дӕр нӕ бон ӕй нӕ зӕрдӕ бадарун. Ке ни нӕ фӕндадтайдӕ, цӕмӕй нин ӕмбурди уӕхӕн ном уа? 40 анземӕй фулдӕр кӕбӕл цӕуй, еу уӕхӕн хестӕр нӕлгоймаг Алан дӕр архайуй, цӕмӕй ин ӕмбурди уӕхӕн ном уа. Киристей цӕветтонбӕл сагъӕс кӕнгӕй уӕхӕн хатдзӕгмӕ ӕрцудӕй: «Йесойӕн алкӕддӕр берӕ гъуддӕгтӕ фӕууидӕ. Еунӕг уӕгъдӕ минут дӕр ин некӕд адтӕй. Фал имӕ уӕддӕр цийфӕнди кари адӕн дӕр сӕхе ивазтонцӕ ӕма си ӕнхус ракорунмӕ не ’фсӕрми кодтонцӕ. Етӕ ’й зудтонцӕ, Киристе алкӕддӕр банхус кӕнунмӕ цӕттӕ ке фӕууй. Ӕма мӕн дӕр фӕндуй, цӕмӕй мӕ уӕхӕн адӕймагӕй зононцӕ. Цӕмӕй алкӕмӕндӕр мӕ хӕццӕ ӕнцон уа ӕма ми ӕнхус ракорунмӕ ма ’фсӕрми кӕнонцӕ».

16. Псалом 119:59, 60 финст уагӕвӕрд нин куд банхус кӕндзӕй Киристей никки хуӕздӕр фӕнзунмӕ?

¹⁶ Киристей фӕнзун нин ӕнхӕстӕй ке нӕ уайуй, уой туххӕй нӕ нӕ къохтӕ уадзун нӕ гъӕуй (Иак. 3:2). Зӕгъӕн, адӕймаг райдӕдта фӕндурбӕл ахур кӕнун. Фиццӕгти ин, ка ’й зонуй, нӕ уайдзӕй ӕ ахургӕнӕги хузӕн  рӕсугъд ӕма зӕрдӕмӕдзӕугӕ цагъд кӕнун. Фал ӕ ахургӕнӕгмӕ кӕсгӕй минкъийгай ахур кӕндзӕй ӕма еу афони е дӕр исдӕсни уодзӕй. Мадта махӕй дӕр ӕнгъезуй уотӕ зӕгъун. Библи ӕртасгӕй ци базонӕн, уомӕй царди ку пайда кӕнӕн ӕма ку архайӕн, цӕмӕй нӕ гъӕндзийнӕдтӕй исуӕгъдӕ уӕн, уӕд зӕгъӕн уодзӕй, ӕма Киристей къахвӕдтӕбӕл цӕудзиан. (Бакӕсӕ Псалом 119:59, 60.)

17, 18. Киристей хузӕн уодуӕлдай ку уӕн, уӕд нин е ци пайда ӕрхӕсдзӕй?

¹⁷ Уодуӕлдай адӕймаг ӕ гъуддӕгтӕй иннети дӕр уотӕ архайунмӕ разӕнгард кӕнуй. Еу хестӕр нӕлгоймаг Тим радзурдта: «Фӕстаг рӕстӕг не ’мбурди цалдӕр ӕригон ӕнсувӕри сӕхебӕл хъӕбӕр исхуӕстӕнцӕ, ӕма сӕ кӕстӕреуӕггӕнӕг ӕнсувӕртӕй иснисан кодтонцӕ. Сӕ еуетӕ ма бустӕги ӕригон адтӕнцӕ. Еци гъуддӕгтӕмӕ сӕ баразӕнгард кодтонцӕ уодуӕлдай хуӕртӕ ӕма ӕнсувӕрти цӕветтонтӕ. Еци лӕхъуӕнтӕ ӕмбурдӕн банхус кӕнунмӕ алкӕддӕр цӕттӕ фӕуунцӕ ӕма уомӕй хестӕр нӕлгоймӕгтӕн устур ӕнхус фӕуунцӕ».

¹⁸ Аци дуйней алкедӕр ӕхе сагъӕс кӕнуй. Фал Йегови лӕггадгӕнгутӕй ба уотӕ зӕгъӕн нӕййес. Киристе алкӕддӕр куд уодуӕлдайӕй архайдта, мах дӕр фӕндуй уотӕ архайун. Ӕма ин кӕд нӕ бон нӕй ӕ цӕветтон ӕнхӕстӕй фӕнзун, уӕддӕр нӕ бон ӕй архайун, цӕмӕй ин ӕ «къахвӕдтӕ» хуӕздӕрӕй-хуӕздӕр ӕргъӕвӕн (1 Пет. 2:21). Мадта Киристей хузӕн иннетӕн балӕггадӕ кӕнунмӕ алкӕддӕр цӕттӕ ку уӕн, уӕд ни Йеговӕ сӕрустур уодзӕй. Йеговӕ ни арази ке ӕй, уой зонгӕй ба ӕцӕг амондгун уодзиан!