1. Kiko Yehova su sirbidónan ta hasi debí na amor?

HOPI tempu pasá, Beibel a bisa ku Dios su sirbidónan “lo pone [nan] mes disponibel” pa sirbié bou di guia di su Yu. (Sal. 110:3) I sin duda e profesia ei ta kumpliendo awe. Tur aña, Yehova su sirbidónan boluntariamente ta prediká pa miónes di ora riba nan propio gastu. Ademas, nan ta saka tempu pa yuda nan rumannan emoshonalmente, spiritualmente i tambe na maneranan práktiko. Anto ansianonan i sirbidónan ministerial ta hinka hopi tempu pa prepará nan partinan i pa pastoriá e rumannan. Kiko ta pone ku Yehova su sirbidónan ta traha asina duru? Amor, tantu pa Yehova komo pa nan próhimo.—Mat. 22:37-39.

2. Segun Romanonan 15:1-3, kiko Hesus a hasi?

² Hesus semper a pone nesesidat di otro promé ku esnan di su mes. Anto nos ta hasi tur nos esfuerso pa sigui su pasonan. (Lesa Romanonan 15:1-3.) Si nos hasi esei, nos lo tin bon resultado. Hesus a bisa: “Tin mas felisidat den duna ku den risibí.”—Echo. 20:35.

3. Kiko nos lo trata den e artíkulo akí?

³ Den e artíkulo akí, nos lo bai wak kiko ta tur e kosnan ku Hesus tabata dispuesto di hasi pa yuda otro hende i kon nos tambe por hasi meskos kuné. Tambe nos lo bai wak kiko nos tin ku hasi pa nos haña mas gana di yuda otro hende.

4. Kon Hesus a pone nesesidat di otro hende promé ku esnan di su mes?

⁴Hesus a yuda otro hende asta ora e tabata kansá. Tabatin un biaha ku Hesus a pasa henter anochi ta hasi orashon, pues lo el a keda morto kansá. Pero su manisé, un multitut di hende a bin serka dje na pia di un seru, probablemente serka di Kapernaum. Kon bo ta kere Hesus a reakshoná? Ora el a mira e multitut, el a haña duele dje hendenan pober i esnan ku tabata malu. E no a djis kura nan so, pero tambe el a duna e Sermon Riba Seru. E mihó diskurso ku un hende a yega di tende.—Luk. 6:12-20.

5. Splika kon kabesnan di famia ta imitá Hesus ora nan ta kansá.

⁵E manera ku kabesnan di famia ta hasi meskos ku Hesus. Djis imaginá lo siguiente: Despues di un dia pisá na trabou, un kabes di famia ta yega kas morto kansá. E anochi ei nan tin Adorashon Komo Famia. Aunke e tin masha gana di skùif e, e ta roga Yehova pa dun’é forsa. Yehova ta kontestá su orashon i nan ta tene nan adorashon di famia manera kustumber. E anochi ei, e yunan ta siña un lès masha importante: Pa nan mayornan, kosnan spiritual ta bin promé ku tur kos.

6. Kon Hesus a mustra ku e tabata kla pa duna di su tempu pa yuda otro hende?

⁶Hesus tabata kla pa duna di su tempu pa yuda otro hende. Tabatin un biaha ku kisas Hesus tabata masha tristu mes. Dikon? El a kaba di haña notisia ku nan a kita kabes di su amigu Huan Boutista. Beibel ta bisa: “Ora Hesus a tende esaki, el a bai for di einan den un boto na un lugá solitario pa e por tabata su so.” (Mat. 14:10-13) Ta di komprondé dikon e tabata ke ta su so. Hopi di nos tambe lo a hasi meskos. Pero e no a haña ni e chèns pa ta su so. Un multitut a yega na e lugá solitario promé ku e mes a yega. Kiko Hesus a hasi? El a mira e nesesidat di e multitut ei i “el a haña duele di nan.” E por a mira ku nan tabatin mester di yudansa i konsuelo for di Dios. P’esei,  mesora el a kuminsá yuda nan. De echo, “el a kuminsá siña nan” no djis un par di kos, pero “hopi kos.”—Mar. 6:31-34; Luk. 9:10, 11.

7-8. Splika kon ansianonan ta imitá Hesus ora ku un ruman tin mester di yudansa.

⁷Ansianonan ta kla pa duna di nan tempu meskos ku Hesus. Nos ta masha gradisidu pa tur e trabounan ku e ansianonan ta hasi pa nos. Hopi biaha nos no sa mes di tur e trabounan ku nan ta hasi. Por ehèmpel, ora un ruman tin un emergensia médiko, ansianonan ku ta forma parti di e Komité di Kontakto ku Hospital mesora ta sali bai yud’é. Anto hopi biaha esei ta pasa meimei di anochi. Amor ta pone ku e ansianonan ei i nan famia ta pone nesesidat di nan rumannan promé ku esnan di nan mes.

⁸ Anto ansianonan ta hasi yen di otro kos tambe. Nan ta yuda ora tin desaster natural i den konstrukshon di Salònnan di Reino i di otro edifisio di e organisashon. I no papia mes di e kantidat di ora ku nan ta pasa ta instruí, animá i yuda nos. E rumannan akí huntu ku nan famia meresé nos elogio i Yehova su bendishon pa nan esfuerso! Pero, ansianonan mester tene kuenta pa e tempu ku nan ta pasa riba asignashon teokrátiko no ta pone nan neglishá nan famia.

9. Segun Filipensenan 2:4 i 5, ki mentalidat tur kristian mester tin?

⁹ Lesa Filipensenan 2:4, 5. Ta bèrdat ku no ta nos tur ta ansiano. Pero, nos  tur por imitá Hesus. Beibel ta bisa ku el “a tuma un kondishon di esklabo.” (Flp. 2:7) Wak kiko e palabranan ei ta siña bo. Un bon esklabo òf sirbidó lo buska tur manera pa hasi su doño kontentu. Komo ku bo ta esklabo di Yehova i sirbidó di bo rumannan, lo bo ke buska tur manera pa ta mas útil pa Yehova i pa bo rumannan. E siguiente sugerensianan lo por yuda bo logra esei.

10. Ki pregunta nos por hasi nos mes?

¹⁰Analisá ki tipo di hende bo ta. Hasi bo mes e siguiente preguntanan: ‘Kon dispuesto mi ta pa yuda otro hende? Por ehèmpel, kiko lo mi hasi si pidi mi bishitá un ruman di edat ku ta den un kas di kuido òf pa busk’é pa reunion? Ora ku pidi boluntario pa hasi e lugá di kongreso limpi òf pa hasi mantenshon na Salòn, mi ta kla pa duna mi nòmber?’ Dia nos a dediká nos mes na Yehova, nos a primintié ku nos lo usa tur loke nos tin pa sirbié. E ta keda masha kontentu ora e mira nos usa nos forsa, tempu i kosnan material pa yuda nos rumannan. Awor, kiko bo tin ku hasi si b’a mira ku tin kos ku bo tin ku traha ariba?

11. Dikon orashon lo yuda nos haña mas gana di yuda otro hende?

¹¹Papia habrí ku Yehova. Ban bisa b’a ripará ku bo tin ku traha riba algun kos, pero bo no ta sinti gana pa hasié. Den e kaso ei, aserká Yehova den orashon. Anto sea onesto kuné. Bis’é kon bo ta sinti bo, i pidié pa duna bo “tantu e deseo komo e poder pa hasi tur loke ta agrad’é.”—Flp. 2:13.

12. Kon ruman hòmber yòn por yuda den nan kongregashon?

¹² Si bo ta un ruman hòmber yòn, pidi Yehova duna bo e deseo pa hasi mas pa bo rumannan. Den algun pais, tin mas ansiano ku sirbidó ministerial. I hopi di e sirbidónan ministerial no ta dje yòn ei mas. Segun ku e organisashon ta sigui krese, nos mester di mas ruman hòmber yòn pa yuda e ansianonan kuida Yehova su tou. Si bo ta dispuesto na yuda ku ki’ ku ta ku nan pidi bo hasi, lo bo ta felis. Dikon? Pasobra lo bo hasi Yehova kontentu, lo bo haña un bon reputashon i lo bo disfrutá di e goso ku ta bin ora bo yuda otro hende.

13-14. Kiko nos por hasi pa yuda nos rumannan? (Wak e plachi riba portada.)

¹³Sea atento na e nesesidatnan di otro hende. Apòstel Pablo a bisa e kristiannan ku tabata biba na Hudea: “No lubidá di hasi bon i di kompartí loke boso tin ku otro hende, pasobra e tipo di sakrifisionan ei ta agradá Dios.” (Heb. 13:16) E konseho ei tabata nèt na ora! Poko despues ku nan a haña e karta ei, nan mester a hui fo’i Hudea i “bai den seru.” Nan a laga tur kos: kas, negoshi i famia ku no tabata kristian. (Mat. 24:16) Durante e periodo ei, tabata masha importante pa nan a yuda otro. Si ya fo’i Hudea nan a sigui e konseho di Pablo, nan lo a krea e kustumber di kompartí ku otro. Esei lo a yuda nan adaptá mas fásil na nan bida nobo.

¹⁴ No ta tur biaha nos rumannan lo bisa nos kiko nan mester. Por ehèmpel, imaginá ku un ruman hòmber ta tur kibrá debí ku su esposa a fayesé. Bo ta kere lo e keda kontentu si bo trese algu di kome p’e, yud’é ku transpòrt òf ku algun kos rònt di kas? Kisas, e no ta dùrf  pidi yudansa pasó e no ke ta un karga pa niun hende. Pero, si bo mes tuma e inisiativa i dun’é e yudansa ku e mester, lo e keda masha kontentu. No pensa ku ya kaba tin ruman ta yudand’é ni ku lo e laga bo sa si e mester di kualke kos. Puntra bo mes: ‘Si ami tabata den su sapatu, ki yudansa ami lo keda kontentu kuné?’

15. Kiko nos mester hasi si nos ke yuda otro hende?

¹⁵Sea aserkabel. Nos tur tin ruman den nos kongregashon ku semper ta kla pa yuda tur hende. Nan nunka ta laga bo sinti ku bo ta molestiá nan. Semper bo por konta ku nan. I nos lo ke ta meskos ku nan. Alan, un ansiano ku tin 45 aña, ke ta aserkabel. El a bisa: “Hesus tabata un persona hopi okupá. Pero, hende di tur edat tabata sinti nan kómodo kuné i nan no tabatin miedu pa pidié yudansa. Nan a sinti ku Hesus tabata ègt interesá den nan. Anto di kurason, mi ke ta meskos ku Hesus. Mi ke ta aserkabel, kariñoso i kla pa yuda hende.”

16. Kon Salmo 119:59 i 60 ta yuda nos imitá Hesus?

¹⁶ Nos no mester sinti nos malu si nos no por imitá Hesus perfektamente. (Sant. 3:2) Imaginá ku un hende ku ke siña bira un pintor ta purba di pinta un kuadro di un pintor renombrá. Ni maske kuantu e purba, lo e no por pinta e kuadro ei perfektamente. Pero, segun ku e ta siña di su propio fayonan i ta hasi esfuerso pa imitá e pintor lo mihó ku e por, lo e mehorá. Asina tambe, si nos apliká loke nos ta siña for di nos estudio personal i hasi esfuerso pa korigí nos fayonan, nos lo ta hasiendo  esfuerso pa imitá Hesus.—Lesa Salmo 119:59, 60.

17-18. Ki benefisionan nos lo haña si nos pone nesesidat di otro promé ku esnan di nos mes?

¹⁷ Ora nos ta dispuesto pa yuda otro hende, esei por pone ku otronan tambe lo ke hasi meskos. Un ansiano ku yama Tim a bisa: “Algun hóben di nos kongregashon a bira sirbidó ministerial, i tin di nan ta hopi yòn. Un motibu pakiko nan a logra esei tabata pasó nan a mira kon dispuesto e otro rumannan tabata pa yuda, i nan tambe kier a hasi meskos. E hóbennan akí ta di gran yudansa pa tantu e ansianonan komo e kongregashon.”

¹⁸ Hende awendia ta masha egoista. Pero, e pueblo di Yehova ta kompletamente diferente. Hesus semper tabata kla pa yuda otro hende, i nos ke ta determiná pa hasi meskos kuné. Ta bèrdat ku nos no por sigui su pasonan perfektamente. Pero, nos por “sigui su pasonan fielmente” sí. (1 Ped. 2:21) Si nos hasi nos esfuerso pa hasi meskos ku Hesus i pone nesesidat di otro promé ku esnan di nos mes, nos lo sinti e goso di tin Yehova su aprobashon.