1. Waut vonne Enstalunk haben Jehova siene Deena?

 DE Schreft säd aul lang trigj verut, daut Gott siene Deena am friewellich deenen wudden un sikj von sienen Sän leiden loten (Psa. 110:3). Dise Profezeiunk erfelt sikj vondoag dän Dach gaunz krakjt. Jehova siene flietje Deena sent jieda Joa millionende Stund em Prädichtdeenst. Dee woaren doafäa nich mol betolt; dee doonen daut friewellich. Dee nämen sikj uk Tiet, om äare Gloowesbreeda em tieteljen un em jeisteljen to halpen un dee Moot tootospräakjen. De Eltestasch un Deenstaumthelpa sent uk stundenlank doamet drock, sikj fa Poats enne Toopkomes reedtomoaken un de Breeda to besieekjen un dee opptomuntren. Wuarom doonen dee daut? Ut Leew fa Jehova un fa de Menschen (Mat. 22:37-39).

2. Waut fa een Biespel wia Jesus no Reema 15:1-3 no?

² Jesus wees, daut hee dolla om aundre todoonen wia aus om sikj selfst. Daut es een sea goodet Biespel fa ons, un wie wellen am soo goot aus mäajlich nodoonen (läs Reema 15:1-3). Wan wie daut doonen, dan woa wie daut beläwen, waut Jesus säd: “Jäwen es seelja [ooda moakt schaftja] aus nämen” (Apj. 20:35).

3. Waut woa wie en disen Artikjel derchgonen?

³ En disen Artikjel woa wie eenjet derchgonen, waut Jesus  deed, om aundre to halpen un woo wie am nodoonen kjennen. Un wie woaren uk seenen, waut wie doonen kjennen, daut wie aundre noch dolla halpen wellen.

4. Waut wees, daut Jesus dolla om aundre todoonen wia aus om sikj selfst?

⁴ Jesus holp aundre, wan hee uk meed wia. Waut deed Jesus, aus doa eene Häad Menschen no am kjeemen un met am toop sennen wullen opp dän Boajch, waut dicht bie Kapernaum wia? Jesus haud de Nacht äwa jebät. Hee mott sea meed jewast sennen, oba aus hee de Häad sach, jaumad am daut äwa de Oame un Kranke, waut doa mank wieren. Hee heeld nich bloos de Kranke, oba hilt uk eene Räd, waut ons bat vondoag dän Dach soo väl Moot jeft aus kjeene aundre. Daut wia de Boajchprädicht (Luk. 6:12-20).

5. Woo kaun een Famieljenhaupt wiesen, daut hee dolla om aundre todoonen es aus om sikj selfst soo aus Jesus?

⁵ Woo een Famieljenhaupt Jesus nodoonen kaun. See wie mol een Biespel. Een Voda haft dän gaunzen Dach jeschauft un kjemt meed no Hus. Am wudd jankren daut Famieljenstudium auftosajen, waut see fa dän Owent jeplont haben, oba hee bät Jehova om Help, daut hee daut doawäajen derchfieren kaun. Jehova horcht no sien Jebäd un see kjennen daut Famieljenstudium haben soo aus jieda Wäakj. De Kjinja lieren dän Owent waut gaunz besondret, un daut es, daut fa de Elren daut jeistelje daut ieeschte kjemt.

6. Aun waut fa een Biespel es to seenen, daut Jesus sikj wellich Tiet neem fa aundre?

⁶ Jesus brukt wellich siene Tiet fa aundre. Denkj mol han, woo Jesus sikj mott jefeelt haben, aus hee enwort, daut sien Frint, Johanes de Deepa, wia dootjemoakt worden. Jesus mott sennen sea truarich jewast. De Bibel sajcht: “Aus Jesus daut hieed, [daut Johanes doot wia,] reisd hee wieda un fua en een Boot no eene eensome Städ” (Mat. 14:10-13). Wie kjennen daut vestonen, wuarom hee auleen sennen wull. Väle jleichen auleen to sennen, wan see truaren. Oba fa Jesus wia daut nich mäajlich. Eene groote  Häad Menschen kjeemen no de eensome Städ, noch ea hee bat doa wia. Waut deed Jesus dan? Hee docht doaräwa no, waut de Menschen fäld, “un am jaumad daut äwa an”. Hee kunn seenen, daut dee Help un Troost brukten von Gott. Un fuaz “funk hee wada aun, an [een deel] to lieren” (Mar. 6:31-34; Luk. 9:10-11).

7-8. Waut wiest, daut leeftolje Eltestasch Jesus nodoonen, wan doa een Nootfaul oppkjemt?

⁷ Woo leeftolje Eltestasch Jesus nodoonen kjennen. Wie räakjnen daut sea väl, waut de Eltestasch fa ons doonen, onen aun sikj to denkjen. Een deel Breeda un Sestren von de Vesaumlunk weeten daut nich mol, waut dee aules doonen. Wan daut biejlikj eenen Nootfaul jeft, dan sent de Breeda vom Hospitol-Vemedlungs-Kommitee haustich reed, de aundre Breeda to halpen. Foaken kjemt soon Nootfaul medden enne Nacht opp! Dan sent soone feine Eltestasch met äare Famieljes toop reed, de Breeda un Sestren to halpen. Doaderch daut see Metleet haben, sent dee dolla om dee todoonen aus om sikj selfst.

⁸ De Eltestasch schaufen uk met, wan doa Vesaumlungshiesa ooda aundre Jebieda jebut woaren ooda wan doa wua een Owwada jewast es. Un dee nämen sikj uk väle Stund Tiet toom en onse Vesaumlunk lieren un ons Moot toospräakjen. Aul dise Breeda un äare Famieljes haben daut vedeent jeloft to woaren. Mucht Jehova sien Jeist dee fa wieda halpen! Oba de Eltestasch motten krakjt soo aus de aundre uk utjejlikjt sennen. Dee sellen nich soo väl Tiet met Vesaumlungssachen to doonen haben, daut see nich mea Tiet fa äare Famielje haben.

9. Waut vonne Enstalunk sellen aule Christen haben no Filippa 2:4-5 no?

⁹ Läs Filippa 2:4-5. Wie sent je nich aules Eltestasch. Oba wie kjennen aula Jesus nodoonen un dolla om aundre todoonen sennen aus om ons selfst. De Bibel sajcht: “[Jesus] neem eene Jestault aun aus een Kjnajcht” (Filip. 2:7). Waut lia wie von dit? Een gooda Kjnajcht, ooda Deena, sitt emma doano, woo hee sienen Wieet jefaulen kaun. Aus Kjnajchts von Jehova well wie secha noch mea fa am doonen un wie wellen secha uk noch mea fa onse Breeda doonen. Well wie mol seenen, woo wie daut kjennen.

10. Äwa waut vonne Froagen sell wie nodenkjen?

¹⁰ Denkj äwa diene Enstalunk no. Äwalaj mol: “Woo wellich jäw ekj von miene Tiet un Krauft, om aundre to halpen? Waut doo ekj, wan se mie froagen, aus ekj well eenen elren Brooda besieekjen, waut tus jefläacht mott ooda eene elre Sesta met no de Toopkomes nämen? Sie ekj wellich reed mettohalpen, wan daut aun friewelje Oabeida fält toom bie eene Kongress-Städ waut reinmoaken ooda bie een Vesaumlungshus waut repäaren?” Jehova freit sikj, wan wie onse Tiet, Krauft un daut tietelje friewellich brucken toom aundre halpen. Daut hab je wie am bie onse Doop vesproaken. Waut kjenn wie doonen, wan wie seenen, daut wie ons en daut noch vebätren motten?

11. Woo kaun daut Jebäd ons halpen, daut wie wellen mea fa aundre doonen?

¹¹ Bäd iernstlich to Jehova. Saj wie mol, du woascht en, daut du die en jewesse Stekjen wurscht vebätren sellen, oba die jankat daut goanich. Dan bäd iernstlich to Jehova. Sie opprechtich un saj am krakjt, woo du die feelst. Froag am, aus hee die halpen well met “daut wellen un daut foadich moaken” (Filip. 2:13).

12. Woo kaun een junga Brooda de Vesaumlunk halpen?

¹² Wan du een junga Brooda best, dan froag Jehova, daut hee die dän Wensch jeft, mea fa de Breeda un Sestren to doonen. En eenje Lenda jeft daut mea Eltestasch aus Deenstaumthelpa, un väle von dee sent aul nich mea junk. Wiels de Organisazion emma jrata woat, fält daut aun mea junge Breeda, waut de Eltestasch halpen, sikj om de Breeda un Sestren to kjemren. Du woascht schaftich sennen, wan du reed best doa mettohalpen wua daut fält. Wuarom? Wiels Jehova jleicht daut, un du woascht die eenen gooden Nomen moaken un die freien, daut du aundre hast kunt halpen.

13-14. Waut kjenn wie doonen toom onse Breeda halpen? (See daut Bilt oppe väaschte Sied.)

¹³ Sie oppmoakjsom, wan aundre Help fält. Paulus säd to de Christen en Judäa: “Vejät nich goodet to doonen un aundre mettohalpen. Daut sent Opfa, dee Gott jefaulen” (Heb. 13:16). Daut wia sea gooda Rot! Wiels nich lang nodäm, aus see disen Breef jekjräajen hauden, musten see äare Hiesa un Jeschafta un äa Frintschoft, waut nich Jehova deend, veloten, un aunfangen “en de Boaj nenn [to] flichten” (Mat. 24:16). En dise Tiet wia daut sea needich, daut see sikj unjarenaunda halpen deeden. Wan see Paulus sienen Rot ea aul nokjeemen un sikj unjarenaunda holpen, dan es dee daut secha leichta jewast, wan see nu weinja hauden.

¹⁴ Veleicht sajen onse Breeda un Sestren ons daut nich emma, wan an Help fält. Saj wie mol, eene Sesta stoaft un hinjalat äaren Maun, waut truat. Wudd disen Brooda Help fälen toom Äten reedmoaken, wua  hanfoaren ooda daut Hus besorjen? Veleicht frajcht hee nich no Help, wäajen hee kjeenem baudren well. Oba hee wudd daut secha sea väl räakjnen, wan wie am halpen deeden, onen daut hee doano fruach. Wie sellen nich denkjen, daut dän aul wäa halpen woat ooda daut hee ons aul doano froagen woat, wan dän daut fält. Oba du wurscht kjennen äwalajen: “Wan ekj en soone Loag wia, wudd ekj daut dan nich uk väl räakjnen, wan aundre mie halpen wudden?”

15. Waut mott wie doonen, wan wie aundre halpen wellen?

¹⁵ Moak aundre daut leicht, die no Help to froagen. Gaunz secha kjanst du Breeda un Sestren von diene Vesaumlunk, waut emma reed sent toom halpen. Dee jäwen ons kjeenmol daut Jefeel, daut wie an baudren. Wie brucken uk kjeenmol doarom duaren, aus dee ons halpen woaren, wan doa een Nootfaul oppkjemt! Wie wudden daut uk jleichen soo to sennen aus dee. Alan es een Eltesta enne 40 un well, daut aundre daut leicht es, am no Help to froagen. Hee docht äwa Jesus sien Biespel no un sajcht: “Jesus haud emma väl to doonen, un doch wuagen de Menschen sikj am emma no Help to froagen, endoont, waut fa een Ella dee hauden. Dee wisten, daut hee werkjlich om an bekjemmat wia. Ekj well uk soo jesonnen sennen aus Jesus un doafäa bekaunt sennen, daut ekj leeftolich sie un emma halpen well.”

16. Woo kaun Psalm 119:59-60 ons halpen Jesus noch bäta notodoonen?

¹⁶ Wie sellen nich mootloos woaren, wan wie Jesus nich volkomen nodoonen kjennen (Jak. 3:2). Een Schiela es nich bäta aus sien Liera. Oba wan hee von siene Fäla lieet un dän Liera prooft soo goot aus mäajlich notodoonen, dan woat de Schiela emma  bäta woaren. Krakjt soo es daut bie ons. Wan wie daut nokomen, waut wie bie ons perseeneljet Bibelstudium jelieet haben un ons emma proowen to vebätren, dan woa wie Jesus emma krakjta nodoonen kjennen (läs Psalm 119:59-60).

17-18. Woo woat ons daut toom gooden sennen, wan wie Jesus nodoonen?

¹⁷ Wan wie dolla om aundre todoonen sent aus om ons selfst, dan woaren aundre ons secha nodoonen. Een Eltesta, waut Tim heet, sajcht: “Eenje Breeda wieren noch mau sea junk, aus dee Deenstaumthelpa worden. Eent, wuarom dee daut deeden, wia, wiels dee sagen, woo aundre wellich reed wieren to halpen, un dee wullen soo sennen aus dee. Dise junge Breeda sent eene Help fa de Vesaumlunk un kjennen de Eltestasch dolla unjastetten.”

¹⁸ Wie läwen en eene Welt, wua väl Menschen bloos nosikj sent. Oba Jehova siene Deena sent aundasch. Wie haben jelieet, daut Jesus emma dolla om aundre todoonen wia aus om sikj selfst, un wie sent ons eenich am notodoonen. Wie kjennen am nich volkomen nodoonen, oba wie kjennen “en siene Footspoaren gonen” (1. Pet. 2:21). Wan wie soo jesonnen sennen aus Jesus, dan woa wie schaftich sennen, wiels Jehova met ons tofräd es.