1. Ko nchani chinkuwonesa kuti atumiki wa Yahova ni wodzipereka?

 MAGOLE yazinji kumbuyo, Baibolo yenze idalewa kale kuti wanthu wa Mulungu ‘adzadzipereke mofunisisa’ pa basa ya Yahova motsogolerewa na Mwana wake. (Sal. 110:3) Ulosi moyu unkukwanirisika maninge ntsiku zino. Gole iliyose, atumiki wa Yahova wodzipereka amala maola yazinji pa basa yolalikira. Iwo achita vimwevi mwa kufuna kwawo ndipo alipiriwalini chinthu. Iwo amala pomwe nthawe itali ankuthandiza abale wawo mwakuthupi na kuwathandiza kukonda Yahova. Akulu na atumiki wothandiza amala maola yazinji ankukonzekera nkhani kuti akalimbikise abale na alongo wawo. Koma ndawa chani iwo ankudzipereka pa basa mweyi? Ni ndawa yakuti akonda maninge Yahova na anzawo.—Mat. 22:37-39.

2. Mobverana na Aroma 15:1-3, ko Yesu adatisiyira chitsanzo chiponi?

² Yesu adatipasa chitsanzo chabwino maninge pankhani yoikha vofuna va anango pamalo yoyamba. Ndipo isembo tinkuyesesa kutewedzera chitsanzo chake. (Lewengani Aroma 15:1-3.) Ndipo wanthu womwe ankuyesesa kumutewedzera achagumana madaliso yazinji. Yesu adati: ‘Kupasa kubweresa chimwemwe chikulu maninge kuposha kutambira.’—Mac. 20:35.

3. Ko tikambirane chani munkhani ino?

³ Munkhani ino tikambirane momwe Yesu adadziperekera pakuthandiza anango ndipo tiwone mwatingatewedzerere chitsanzo chake. Tikambirane pomwe vatingachite kuti timbakhale ofunisisa maninge kuthandiza anango.

4. Ko Yesu adawonesa tani kuti ankuikha vofuna va anango pamalo yoyamba?

⁴ Yesu angadzipereka maninge olo akhale woneta. Ndowonani vomwe iye adachita pomwe gulu ya wanthu idabwera kudzagumana naye pafupi na phiri ya Kaperenao. Nthawe mwiyi nkuti Yesu wachezera usiku wose akupemphera. Ndipo ni vodziwikiratu kuti wenze adaneta maninge. Koma padawona gulu ya wanthu, adawabvera chifundo ndipo adayamba kupolesa wodwala. Iye sikuti adondopolesa chabe wodwala, koma adachita ulaliki wolimbikisa womwe udziwika kuti Ulaliki Wapaphiri.—Luka 6:12-20.

5. Ko amuna womwe ni misolo ya banja ankutewedzera tani chitsanzo cha Yesu podiya akhale woneta?

⁵ Momwe misolo ya banja yankutewedzerera Yesu. Ganizirani chochitika ichi: Mwamuna yemwe ni msolo wa banja ankufika pamuyi ali woneta maninge. Olo kuti iye ankuchita ulesi kuchitisa pfunziro ya banja, ankupemphera kwa Yahova kuti amupase mphanvu kuti akwanise kuchitisa pfunziro. Yahova ankudawira pemphero yake ndipo pfunziro inkufamba bwino ninge nthawe zose. Pamwapo wana ankutengapo pfunziro yabwino maninge yakuti, kwa azibereki wawo, kutumikira Yahova ni kofunika maninge kuposha chilichose.

6. Fotokozani vomwe Yesu adachita pakuphatisa basa nthawe yake pakuthandiza anango.

⁶ Yesu wenze wosaumira pakuphatisa basa nthawe yake. Ndoganizani momwe Yesu adabvera padabva kuti Yohane M’batizi wagwatiwa msolo. Ni vosachita kubvunza kuti wenze wokwinyirira maninge. Baibolo ilewa kuti: ‘Padabva kuti Yohane wafa, adapakira barko nkuyenda kwayekha.’ (Mat. 14:10-13) Venze vobvekadi kuti iye akakhale kwayekha. Wanthu anango akakhala na chisoni, achawona kuti viri bwino kukalilira kwawokha. Koma kwa Yesu venze vosakwanisika. Ndawa yakuti akanati kufika kumalo kwangayenda, chigulu cha wanthu ndicho chidayamba kufika kumuko. Ko Yesu adachita chani? Iye adayamba kuganizira vofuna va wanthu mwawa ndipo ‘adawachitira chifundo.’ Yesu adazindikira kuti wanthu mwawa angadekana kulimbikisiwa na Mulungu. Ndipomwapa iye ‘adayamba  kuwapfunzisa, [osati vinthu ving’onong’ono, koma] vinthu vizinji.’—Maliko 6:31-34; Luka 9:10, 11.

7-8. Fotokozani momwe akulu wachikondi ankutewedzerera Yesu pakuthandiza anango pakafunika thandizo.

⁷ Momwe akulu wachikondi ankutewedzerera Yesu. Tinkutembeja maninge basa yomwe akulu wodzipereka mwawa ankuchita kuti atilimbikise. Basa zinango zomwe akulu achaphata ni zosawonekera kwa wanthu anango mumpingu. Mwakulinganiza, munthu akadwala mwadzidzidzi, abale womwe ali mu Komiti Yoyankhulana na wa Kushipitali, achayenda kukathandiza abale wawo. Ndipo nthawe zinango adziwisiwa pakati pa usiku kuti m’bale panango mulongo wadwala! Koma ndawa yochitira chifundo abale na alongo wawo, abale wachikondi mwawa achaikha vofuna va abale wawo pamalo yoyamba.

⁸ Akulu mwawa ni wodzipereka pomwe pa basa yomanga Nyumba za Ufumu na kuthandiza pakachitika ngozi zachilengedwe. Ndipo iwo achaphatisa basa nthawe yawo pakutilimbikisa na kutipfunzisa. Abale mwawa pabodzi na mabanja yawo achadekana kutembejewa maninge. Yahova awadalise ndawa yodzipereka pothandiza anango. Koma ninge mwaviriri kwa munthu aliyese, akulu nawombo achadekana kumbachita vinthu mwachikatikati. Iwo achadekanalini kumbamala nthawe itali ankuphata basa za mumpingu nkusiya mabanja yawo yakubonera.

9. Mobverana na Afilipi 2:4, 5, ko Mkhrisitu achadekana kuyesesa kukulisa shungu iponi?

⁹ Lewengani Afilipi 2:4, 5. Ni shuwadi kuti sikuti tose ndise akulu. Koma tose tingapfunzirepo  kanthu pa chitsanzo cha Yesu pankhani yothandiza anango. Baibolo ifotokoza kuti iye mpakana adafika ‘pakukhala ninge kapolo.’ (Afil. 2:7) Ndoganizani vomwe tingapfunzirepo pavesi mweyi. Kapolo panango kuti mtumiki, achita khama maninge kuti akondwerese abwana wake. Ninge kapolo wa Yahova panango kuti munthu wotumikira abale wanu, tinashuwa kuti munashungu yakuti Yahova na abale wanu akuphatiseni basa maninge. Imwepo mungachite vimwevi mwa kuganizira mpfundo izi.

10. Ko tingadzibvunze mibvunzo yaponi?

¹⁰ Dzidziweni bwino. Yesani kudzibvunza mibvunzo ninge aya: ‘Ko inepano ndine wokonzeka kuphatisa basa nthawe na mphanvu zangu pakuthandiza anango? Ko achiti anikumbira kuti nikathandize m’bale panango mulongo wachikulire basa zapamuyi pake panango kumutenga pakuyenda kumisonkhano ningabvume? Ko peno angafune wanthu wodzipereka kuti akachenese pamalo ya nsonkhano panango kukonzakonza Nyumba ya Ufumu ningayenderetu nthawe mweyo?’ Yahova achakhala wokondwa maninge tikambadzipereka pabasa iliyose yatingapasiwe. Vikateno tingawonese kuti ndise wofunisisa kuthandiza anango. Ko tikawona mbali yomwe tichadekana kuchinja tingachite tani?

11. Ko pemphero ingatithandize tani kukulisa shungu yothandiza anango?

¹¹ Mumbapemphere kwa Yahova mwakhama. Panango imwepo mwawona mbali zomwe munkufunika kuchinja, koma kuti vikwanisike muchadekana kukhala na volinga vabwino. Peno nteno, yesani kumukumbira Yahova kuti akuthandizeni. Mumbamuuze mosabisa chinthu. Mbamuuzani momwe munkubvera ndipo mukumbireni kuti akupaseni ‘shungu na mphanvu kuti muchitepo kanthu.’—Afil. 2:13.

12. Ko abale wachilumbwana wobatizika angachite tani kuti achite vizinji pampingu wawo?

¹² Peno imwepo ndimwe m’bale wachilumbwana wobatizika, mukumbireni Yahova kuti akuthandizeni kukhala na shungu yakuti muchite vizinji mumpingu mwanu. M’madziko yanango, akulu ndiwo azinji kuposha atumiki wothandiza ndipo atumiki wothandiza mwawo ni wachikulire osati alumbwana. Pomwe mipingu yankuwanda, tinkufuna abale wachilumbwana azinji kuti aphatisiwe basa mugulu ya Yahova. Peno imwepo ndimwe wofunisisa kukatumikira kulikose kwamungatumiziwe, dziwani kuti mudzakondwe maninge. Ndawa chani viri tene? Ndawa yakuti mudzakondwerese Yahova ndipo mudzakhale na mbiri yabwino. Dziwani kuti mudzakondwedi na moyo ndawa yothandiza anango.

13-14. Nchani chatingachite kuti tikwanise kuthandiza abale na alongo wathu? (Onani foto ya pakhava.)

¹³ Mumbakhale tcheru nkuwona yemwe ankufunika thandizo. Mtumi Paulo adalangiza Aheberi kuti: ‘Ayi kuyebwa kuchita vabwino na kugawana vinthu na anango, ndawa yakuti Mulungu akondwa na ntsembe zatene.’ (Aheb. 13:16) Malangizo mwaya yenze yothandiza maninge. Ndawa yakuti kanthawe pang’ono padandoti atambira malangizo mwaya, Akhrisitu wa ku Yuda angadekana kusiya manyumba yawo, mabizi na azibale wosakhulupirira ‘nkuthawira kumapiri.’ (Mat. 24:16) Panthawe mweyi pakuti enze alibe vinthu vizinji, ni vowonekeratu kuti angadekana kumbathandizana. Peno iwo adakayatengera siriyasi malangizo ya Paulo, vidakathandiza kuti ambakathandizane kumalo yomwe athawira.

¹⁴ Abale na alongo wathu anango akondalini kufotokoza kuti ankufuna kuthandiziwa. Mwakulinganiza, mulongo yemwe adaferewa  mwamuna angambawoneserelini kuti andokhalira kulira mwamuna wake. Tingadzibvunze kuti: Ko m’bale panango mulongo moyu angafunike kumupasako chakudya? Kumutakuza vinthu, kumuphatirako basa zapamuyi panango kumugumanirako vovala? Nthawe zinango angafotokozelini pakugopa kuti angakhale ntolo ukulu kwa isepano. Koma angatembeje maninge peno tingayambe ndise kumuthandiza pa vomwe ankusowa. Osati timbadikhire kuti munthu achite kutiuza kuti ankufuna thandizo. Tingadzibvunze kuti: ‘Ko adakati inepano nili pabvuto mweyi, sembe nafuna kuti wanthu anithandize tani?’

15. Nchani chatingachite kuti timbakhale wodzipereka pothandiza anango?

¹⁵ Mumbakhale wofikika. Tinashuwa kuti imwepo munkudziwa abale na alongo wa mumpingu mwanu womwe nthawe zose ni okonzeka kuthandiza anzawo. Tikambakhala nawo, iwo atichtisalini kuwona ninge tinkuwapanikiza. Tikhala otsimikiza kuti nthawe zose tikafunika thandizo ni okonzeka kuthandiza, ndipo tinkufunambo kukhala ninge iwo. Nkulu munango dzina yake Alan wa magole ya m’ma 40 ankufunambo kukhala wofikika. Poganizira chitsanzo cha Yesu, Alan adati: ‘Ni shuwadi kuti Yesu angakhala wopanikizika, koma wanthu wamisinkhu yose angamasuka kumufendera kuti akumbire thandizo. Iwo ambamuwona kuti ni munthu munzawo yemwe awaikhira nzeru. Ninkufunisisa kutewedzera chitsanzo cha Yesu cha kukhala wofikika na kukhala wokonzeka kuthandiza anango.’

16. Ko lemba ya Salimo 119:59, 60 ingatithandize tani kutewedzera chitsanzo cha Yesu mosamala?

¹⁶ Osati timbakwinyirire maninge tikawona kuti tinkukwanisalini kutewedzera Yesu bwinobwino. (Yak. 3:2) Munthu yemwe ankupfunzira, angakwaniselini kutewedzera ticha  wake mosaphonyesako chinthu. Koma iye angambapfunzire na vophonya vake na kuyesesa kutewedzera ticha wake momwe angakwanisire. Akachita teno, iye angakwanise kupita patsogolo. Isembo pakuti tidadziwa kuchokera m’Baibolo momwe tingatewedzerere chitsanzo cha Yesu, tingachite bwino kumbamutewedzera momwe tingakwanisire.—Lewengani Salimo 119:59, 60.

17-18. Ko tingaphindule tani tikambayesesa kutewedzera Yesu pankhani yodzipereka pothandiza anango?

¹⁷ Tikambadzipereka kuthandiza anzathu, anango angatengerembo. Nkulu munango dzina yake Tim adalewa kuti: ‘Mumpingu mwathu azinji adakhala atumiki wothandiza ndawa yakuti ambawona chitsanzo cha anango ndipo ambafunisisa kutengerambo. Khama yawo pakuthandiza anango idachitisa kuti vinthu vimbafambe bwino mumpingu ndipo akulu ambapepukiwako.’

¹⁸ Tinkukhala mudziko yomwe wanthu azinji ni wodzikonda. Koma atumiki wa Yahova atengerakolini makhalidwe mwaya. Iwo ni wofunisisa maninge kutengera khalidwe ya Yesu yodzipereka pakuthandiza anango. Ni shuwadi kuti tingakwaniselini kutewedzera Yesu mosaphonyesako chinthu, koma tingakwanise ‘kumutewedzera mosamala maninge.’ (1 Pet. 2:21) Tikambachita vose vatingakwanise kuti titewedzere chitsanzo cha Yesu pankhani yothandiza anango, tidzakhale wobvumizika pamaso pa Yahova.