مطالعے دا مضمون 9
یسوع وانگوں دُوجیاں لئی قربانیاں دَوو
لین نالوں دین وچ بوہتی خوشی مِلدی اے۔—اعمال 20:35
گیت نمبر 75: میں حاضر آں، مینوں گھل!
مضمون تے اِک نظر *
1. یہوواہ دے بندے کیہڑے کیہڑے کم کردے نیں تے کیوں؟
بائبل چ پہلاں توں ای دَس دِتا گیا سی کہ یہوواہ دے بندے اوہدی خدمت کرن لئی خوشی نال اپنے آپ نُوں پیش کرن گے تے اوہ اِنج یسوع دی رہنمائی چ کرن گے۔ (زبور 110:3) ایہہ پیشینگوئی اَج پوری ہو رہی اے۔ ہر سال یہوواہ دے بندے بڑے جوش تے لگن نال کروڑاں گھنٹے مُنادی کردے نیں۔ اوہ ایہہ کم خوشی خوشی تے اپنے خرچے تے کردے نیں۔ اوہ اپنے ہم ایماناں دی مدد کرن، اوہناں دا حوصلہ ودھان تے اوہناں دے ایمان نُوں مضبوط کرن لئی وی وقت کڈھدے نیں۔ بزرگ تے خادم عبادتاں لئی حصے تیار کرن تے بھین بھراواں دا حوصلہ ودھان لئی کئی کئی گھنٹے محنت کردے نیں۔ خدا دے بندے ایہہ سب کجھ کیوں کردے نیں؟ کیونکہ اوہ یہوواہ تے لوکاں نال محبت کردے نیں۔—متی 22:37-39۔
2. رومیوں 15:1-3 دے مطابق یسوع مسیح نے ساڈے لئی کیہڑی ودھیا مثال قائم کیتی؟
2 یسوع مسیح ہمیشاں اپنے توں پہلاں دُوجیاں دے بھلے بارے سوچدا سی تے اَسی اوہدے نقشِقدم تے چلن دی پوری کوشش کرنے آں۔ (رومیوں 15:1-3 نُوں پڑھو۔) جیہڑے لوک یسوع مسیح دی مثال تے عمل کردے نیں اوہناں نُوں بڑے فائدے ہوندے نیں۔ یسوع مسیح نے کہیا: لین نالوں دین وچ بوہتی خوشی مِلدی اے۔—اعمال 20:35۔
3. ایس مضمون چ اَسی کیہڑیاں گلاں تے غور کراں گے؟
3 ایس مضمون چ اَسی ویکھاں گے کہ یسوع نے دُوجیاں دی مدد کرن لئی کیہڑیاں قربانیاں دِتیاں تے اَسی اوہدی مثال تے کیویں عمل کر سکنے آں۔ اَسی ایہہ وی ویکھاں گے کہ اَسی دُوجیاں دی مدد کرن دی خواہش نُوں کیویں ودھا سکنے آں۔
یسوع وانگوں بنو
یسوع بوہت تھکیا ہویا سی پر جدوں لوکاں دی بِھیڑ اوہدے کول آئی تے اوہنے کیہہ کیتا؟ (پیراگراف 4 نُوں ویکھو۔)
4. یسوع نے ایہہ کیویں ظاہر کیتا کہ اوہنوں اپنے نالوں دُوجیاں دی بوہتی فکر سی؟
4 یسوع نے اوہدوں وی دُوجیاں دی مدد کیتی جدوں اوہ بوہت تھکیا ہویا سی۔ کیہہ توانوں یاد اے کہ اوہدوں یسوع نے کیہہ کیتا جدوں لوکاں دی اِک بِھیڑ اوس پہاڑ تے اوہنوں مِلن آئی جیہڑا شاید کفرنحوم دے نیڑے سی۔ یسوع بوہت تھکیا ہویا سی کیونکہ اوہ ساری رات دُعا کردا رہیا سی۔ پر جدوں اوہنے بِھیڑ چ غریب تے بیمار لوکاں نُوں ویکھیا تے اوہنوں اوہناں تے ترس آیا۔ اوہنے نہ صرف بیماراں نُوں ٹھیک کیتا سگوں اِک بوہت شاندار تقریر وی دِتی۔ ایس تقریر نُوں پہاڑی وعظ دے ناں توں جانیا جاندا اے۔—لُوقا 6:12-20۔
اَسی یسوع وانگوں دُوجیاں لئی قربانیاں کیویں دے سکنے آں؟ (پیراگراف 5 نُوں ویکھو۔)
5. گھر دے سربراہ تھکے ہون دے باوجود یسوع وانگوں قربانیاں کیویں دے سکدے نیں؟
5 گھر دے سربراہ یسوع دی مثال تے کیویں عمل کرے رہے نیں؟ ذرا ایس مثال بارے سوچو: پورا دن کم کرن توں بعد گھر دا اِک سربراہ تھک ٹُٹ کے گھر آندا۔ تھکے ہون دی وجہ توں اوس شام خاندانی عبادت کرن تے اوہدا دل نئیں کردا۔ پر فیر اوہ دُعا چ یہوواہ کولوں طاقت منگدا اے تاکہ اوہ اوس شام اپنے گھر والیاں نال خاندانی عبادت کر سکے۔ یہوواہ اوہدی دُعا دا جواب دیندا اے تے اوہ طے کیتے ہوئے وقت تے خاندانی عبادت کردا اے۔ اِنج اوہدے بچے ایہہ خاص گل سکھدے نیں کہ اوہدے ماں پیو لئی یہوواہ دی عبادت سب توں اہم اے۔
6. اِک مثال دے ذریعے دَسو کہ یسوع نے دُوجیاں دی مدد کرن لئی اوہناں نُوں اپنا وقت کیویں دِتا۔
6 یسوع نے اوہدوں وی دُوجیاں نُوں خوشی نال اپنا وقت دِتا جدوں اوہ کلّا رہنا چاہندا سی۔ ذرا سوچو کہ یسوع اوہدوں کیہو جیہا محسوس کر رہیا سی جدوں اوہنوں پتہ لگیا کہ اوہدے دوست یوحنا بپتسمہ دین والے نُوں قتل کر دِتا گیا اے۔ بےشک اوہ بوہت زیادہ دُکھی سی۔ بائبل چ دَسیا گیا اے کہ یوحنا دی موت دی خبر سُن کے یسوع اِک کشتی چ بیٹھ کے اِک ویران جگہ وَل گیا تاکہ کلّے وقت گزار سکے۔ (متی 14:10-13) اَسی سمجھ سکنے آں کہ ایہو جہے وقت چ اوہ کلّا کیوں رہنا چاہندا سی۔ ظاہر اے کہ جدوں اَسی دُکھی ہنے آں تے ساڈا کسے نُوں وی مِلن تے دل نئیں کردا۔ پر یسوع نُوں تھوڑی دیر لئی وی کلّے رہن دا موقع نئیں ملیا۔ اِک وڈی بِھیڑ یسوع توں پہلاں ای اوس ویران جگہ تے پونچ گئی جِتھے یسوع جا رہیا سی۔ لوکاں نُوں ویکھ کے یسوع نے کیہہ کیتا؟ اوہنے اوہناں دِیاں ضرورتاں بارے سوچیا تے اوہنوں اوہناں تے بڑا ترس آیا۔ اوہ ایہہ جان دا سی کہ اوہناں لوکاں نُوں مدد تے خدا وَلّوں تسلی دی کِنّی زیادہ لوڑ اے۔ ایس لئی اوہنے فوراً اوہناں دی مدد کرن لگ پیا۔ اوہ اوہناں نُوں تھوڑیاں نئیں سگوں بوہت ساریاں گلاں سکھان لگ پیا۔—مرقس 6:31-34؛ لُوقا 9:10، 11۔
7، 8. اِک مثال دے کے دَسو کہ بزرگ اوہدوں یسوع دی مثال تے کیویں عمل کردے نیں جدوں کلیسیا چ کسے نُوں مدد دی لوڑ ہوندی اے۔
7 کلیسیا دے بزرگ یسوع دی مثال تے کیویں عمل کردے نیں؟ اَسی اوہناں قربانیاں دی دلوں قدر کرنے آں جیہڑیاں بزرگ ساڈے لئی دیندے نیں۔ بزرگ کلیسیا لئی بوہت سارے ایہو جہے کم کردے نیں جنہاں بارے زیادہتر بھین بھراواں نُوں پتہ وی نئیں ہوندا۔ مثال لئی، جدوں علاج دے حوالے نال کسے بھین بھرا نُوں فوراً مدد دی ضرورت ہوندی اے تے ہسپتال رابطہ کمیٹی چ خدمت کرن والے بزرگ فوراً اوہناں دی مدد کرن لئی پونچ جاندے نیں۔ اکثر ایہو جہے مسئلے اَدھی رات نُوں ہوندے نیں۔ ایہناں بزرگاں نُوں اپنے بھین بھراواں دی دلوں فکر ہوندی اے۔ ایس لئی اوہ تے اوہناں دے گھر والے اپنے نالوں زیادہ اپنے ہم ایماناں بارے سوچدے نیں۔
8 بزرگ یہوواہ دی عبادت لئی استمال ہون والیاں عمارتاں نُوں بنان تے آفت دا شکار ہون والے بھین بھراواں دی مدد کرن چ وی حصہ لیندے نیں۔ ایناں ای نئیں، اوہ اپنی کلیسیا دے بھین بھراواں نُوں تلیم دین تے اوہناں دا حوصلہ ودھان لئی وی وقت کڈھدے نیں۔ایہہ سارے بھرا تے اوہناں دے گھر والے واقعی تعریف دے لائق نیں۔ ساڈی دُعا اے کہ یہوواہ اوہناں دی مدد کرن دی خواہش نُوں قائم رکھے۔ ظاہری گل اے کہ دُوجے بھین بھراواں وانگوں بزرگاں نُوں وی اپنیاں ذمےداریاں نبھاندے ویلے سمجھداری نال کم لینا چاہی دا اے۔ اوہناں نُوں کلیسیا دِیاں ذمےداریاں نبھان چ ایناں وقت نئیں لا دینا چاہی دا کہ اوہناں کول اپنے گھر والیاں دِیاں ضرورتاں نُوں پورا کرن لئی وقت ای نہ بچے۔
اَسی دُوجیاں لئی قربانیاں دین دی خواہش کیویں پیدا کر سکنے آں؟
9. فِلپّیوں 2:4، 5 دے مطابق ہر مسیحی نُوں کیہو جہی سوچ رکھنی چاہی دی اے؟
9 فِلپّیوں 2:4، 5 نُوں پڑھو۔ ایہہ سچ اے کہ اَسی سارے کلیسیا چ بزرگ نئیں آں۔ پر اَسی سارے یسوع وانگوں اپنے فائدے توں پہلاں دُوجیاں دے فائدے بارے سوچ سکنے آں۔ بائبل چ دَسیا گیا اے کہ یسوع غلام وانگوں بن گیا۔ (فِلپّیوں 2:7) صرف بزرگاں نُوں ای نئیں سگوں سانوں ساریاں نُوں یسوع وانگوں اپنے توں زیادہ دُوجیاں دے فائدے بارے سوچنا چاہی دا اے۔ ساڈے لئی ایس گل نُوں سمجھنا بوہت ضروری اے۔ اِک چنگا غلام یاں نوکر اپنے مالک نُوں خوش کرن دے موقعے لبھدا رہندا اے۔ اَسی یہوواہ دے غلام تے اپنے بھین بھراواں دے خادم آں۔ ایس لئی اَسی یہوواہ تے اپنے بھین بھراواں دے زیادہ توں زیادہ کم آنا چاہنے آں۔ آؤ، کجھ طریقیاں تے غور کرئیے کہ اَسی اِنج کیویں کر سکنے آں۔
10. اَسی اپنے آپ کولوں کیہو جہے سوال پچھ سکنے آں؟
10 اپنا جائزہ لوو۔ اپنے آپ کولوں ایہہ سوال پچھو: ”کیہہ میں دُوجیاں لئی قربانیاں دین لئی تیار رہنا واں؟ مثال لئی، جے مینوں اِک وڈیرے بھرا نُوں مِلن لئی کہیا جاندا اے جیہڑا اِک ایہو جہے اِدارے چ رہ رہیا اے جِتھے وڈیرے لوکاں دی دیکھبھال کیتی جاندی اے تے میں کیہہ کرنا واں؟ یاں فیر میں اوہدوں کیہہ کرنا واں جدوں مینوں کسے وڈیری بھین نُوں عبادت تے لجان لئی کہیا جاندا اے؟ کیہہ میں اوہدوں مدد لئی فوراً تیار ہو جانا واں جدوں عبادتگاہ یاں کنونشن ہال دی صفائی لئی رضاکاراں دی ضرورت ہوندی اے؟ جدوں اَسی اپنی زندگی یہوواہ دے ناں کیتی سی تے اَسی اوہدے نال وعدہ کیتا سی کہ اَسی اپنا سب کجھ اوہدی خدمت تے دُوجیاں دی مدد کرن لئی استمال کراں گے۔ جدوں اَسی اِنج کرنے آں تے اوہ بوہت خوش ہوندا اے۔ پر جے سانوں لگدا اے کہ سانوں اپنے چ کجھ تبدیلیاں کرن دی لوڑ اے تے اَسی کیہہ کر سکنے آں؟
11. دُعا دے ذریعے ساڈے چ دُوجیاں لئی قربانیاں دین دی خواہش کیویں پیدا ہوندی اے؟
11 دل کھول کے یہوواہ توں دُعا کرو۔ فرض کرو کہ توانوں محسوس ہوندا اے کہ توانوں اپنی شخصیت چ کوئی بہتری لیان دی ضرورت اے پر تواڈے چ اِنج کرن دی خواہش نئیں اے۔ جے ایہہ گل اے تے دل کھول کے یہوواہ توں دُعا کرو۔ اوہنوں دَسو کہ تُسی کیہہ محسوس کر رہے او تے اوہدے توں اِلتجا کرو کہ اوہ تواڈے چ بہتری لیان دی خواہش تے طاقت پیدا کرے۔—فِلپّیوں 2:13۔
12. نوجوان بپتسمہ یافتہ بھرا کیویں مدد کر سکدے نیں؟
12 جے تُسی اِک نوجوان تے بپتسمہ یافتہ بھرا او تے یہوواہ توں دُعا کرو کہ اوہ تواڈے دل وچ کلیسیا دے ہور کم آن دی خواہش پیدا کرے۔ کجھ کلیسیاواں چ بزرگ زیادہ تے خادم گھٹ ہوندے نیں تے اوہناں خادماں وچوں زیادہتر اینے جوان نئیں ہوندے یاں وڈیرے ہوندے نیں۔ جیویں جیویں یہوواہ دے بندیاں دی تعداد ودھدی جا رہی اے، سانوں ہور زیادہ نوجوان بھراواں دی ضرورت اے تاکہ اوہ کلیسیا دے بھین بھراواں دی دیکھبھال کرن چ بزرگاں دی مدد کر سکن۔ جے تُسی ہر طریقے نال بھین بھراواں دی مدد کرن لئی تیار رہوو گے تے توانوں بوہت خوشی ملے گی۔ کیونکہ اِنج یہوواہ تواڈے توں خوش ہوئے گا، لوک تواڈیاں خوبیاں نُوں ویکھ سکن گے تے دُوجیاں دے کم آ کے توانوں دلی سکون ملے گا۔
یہودیہ چ رہن والے مسیحی اپنی جان بچان لئی شہر پیلا چلے گئے جیہڑا دریا اُردن دے دُوجے پاسے سی۔ جیہڑے مسیحی ایس شہر چ پہلاں پونچے سن اوہ اپنے اوہناں ہمایماناں نُوں کھان پین دِیاں چیزاں ونڈ رہے نیں جیہڑے بعد چ پونچے سن۔ (پیراگراف نمبر 13 نُوں ویکھو۔)
13، 14. اَسی اپنے بھین بھراواں دی مدد کرن لئی کیہہ کر سکنے آں؟(پہلے صفحے دی تصویر نُوں ویکھو۔)
13 دھیان دَوو کے کِنہوں کس طرحاں دی مدد دی ضرورت اے۔ پولُس رسول نے یہودیہ چ رہن والے مسیحیاں نُوں ایہہ مشورہ دِتا: بھلائی کرنا تے اپنیاں چیزاں دُوجیاں نال وَنڈنا نہ بھلو کیونکہ خدا ایہو جہیاں قربانیاں پسند کردا اے۔ (عبرانیوں 13:16) ایہہ مشورہ اوہناں مسیحیاں دے بڑے کم آیا۔ پولُس دا ایہہ خط مِلن دے کجھ عرصے بعد یہودیہ دے مسیحیاں نُوں اپنے گھر بار، کاروبار تے غیر ایمان رشتےداراں نُوں چھڈ کے پہاڑاں تے بھجنا پیا۔ (متی 24:16) ایس مشکل وقت چ اِک دُوجے دی مدد کرنا واقعی بڑا ضروری سی۔ جے اوہ ایہدے توں پہلاں وی پولُس دے مشورے تے عمل کر رہے سن تے اوہناں لئی نویں حالات دے مطابق ڈھلنا زیادہ اسان ہویا ہوئے گا۔
14 ہو سکدا اے کہ ساڈے بھین بھرا سانوں ہمیشاں ایہہ نہ دَسن کہ اوہناں نُوں کیہڑی چیز دی لوڑ اے۔ مثال لئی، جے اِک بھرا دی بیوی فوت ہو جاندی اے تے ایہہ اوہدے لئی بوہت ای اوکھا ویلا ہوئے گا۔ شاید اوہنوں کھانا بنان، کِتے آن جان تے گھر دے کماں چ مدد دی ضرورت پووے۔ شاید اوہ ایس لئی ساڈے کولوں مدد نہ منگے کیونکہ اوہ سانوں پریشان نئیں کرنا چاہندا۔ پر جے اَسی اوہدے کہے بغیر ای اوہدی مدد کراں گے تے اوہنوں بوہت چنگا لگے گا۔ سانوں ایہہ نئیں سوچنا چاہی دا کہ اوہدیاں ضرورتاں کسے نہ کسے طریقے نال پوریاں ہو ای جان گیاں یاں اوہنوں آپ ساڈے کولوں مدد منگنی چاہی دی اے۔ سگوں اپنے آپ کولوں پچھو: ”جے میں اوہدی جگہ ہوندا تے مینوں کیہڑی چیز دی لوڑ ہوندی؟“
15. جے اَسی دُوجیاں دی مدد کرنا چاہنے آں تے سانوں کیہہ کرنا چاہی دا اے؟
15 ایہو جہے بنو کہ دُوجے بغیر جھجکے تواڈے کولوں مدد منگن۔ بےشک تُسی اپنی کلیسیا چ بوہت سارے ایہو جہے بھین بھراواں نُوں جان دے ہووو گے جیہڑے ہمیشاں دُوجیاں دی مدد کرن لئی تیار رہندے نیں۔ اوہناں نُوں ویکھ کے کدی اِنج نئیں لگدا کہ اوہناں کولوں مدد منگ کے اَسی اوہناں نُوں پریشان کر رہے آں۔ سانوں پتہ ہوندا اے کہ سانوں جدوں وی مدد دی لوڑ ہوئے گی تے اوہ پچھے نئیں ہٹن گے۔ سانوں وی اوہناں وانگوں بننا چاہی دا اے۔ ذرا بھرا ایلن دی مثال تے غور کرو۔ اوہ کلیسیا چ اِک بزرگ اے تے اوہدی عمر 45 سال اے۔ اوہ چاہندا اے کہ بھین بھرا بغیر جھجکے اوہدے کولوں مدد منگن۔ یسوع مسیح دی مثال دا حوالہ دیندے ہوئیاں بھرا ایلن نے کہیا:”یسوع بوہت مصروف رہندا سی۔ پر ایہدے باوجود ہر عمر دے لوک اوہدے کول آندے سن تے جھجکے بغیر اوہدے کولوں مدد منگدے سن۔ اوہ ویکھ سکدے سن کہ یسوع نُوں اوہناں دی کِنّی فکر سی۔ میری دلی خواہش اے کہ میں یسوع وانگوں بناں تے اوہ میرے بارے محسوس کرن کہ میں اوہناں نُوں بڑا پیار تے اوہناں دی بڑی فکر کرنا واں نالے اوہ بغیر جھجکے میرے نال گل کر سکن۔“
16. زبور 119:59، 60 توں سانوں یسوع دی مثال تے عمل کرن چ مدد کیویں مِلدی اے؟
16 جے اَسی پوری طرحاں یسوع دی مثال تے عمل نئیں کر پاندے تے سانوں مایوس نئیں ہونا چاہی دا۔ (یعقوب 3:2) اِک شاگرد اپنے استاد نالوں بہتر نئیں ہوندا۔ اوہ اپنیاں غلطیاں توں سکھدا اے تے اپنے استاد وانگوں بنن دی پوری کوشش کردا اے۔ اِنج اوہ اپنے چ بہتری لیاندا رہندا اے۔ ایسے طرحاں جے اَسی اوہناں گلاں تے عمل کردے رہنے آں جیہڑیاں اَسی بائبل چوں سکھنے آں تے اپنیاں غلطیاں نُوں سدُھارن دی پوری کوشش کرنے آں تے اِنج اَسی چنگی طرحاں یسوع دی مثال تے عمل کر رہے ہوواں گے۔—زبور 119:59، 60 نُوں پڑھو۔
دُوجیاں لئی قربانیاں دین دے کیہہ فائدے ہوندے نیں؟
جدوں کلیسیا دے بزرگ یسوع وانگوں دُوجیاں لئی قربانیاں دیندے نیں تے اوہ نوجواناں لئی چنگی مثال قائم کردے نیں۔ (پیراگراف 17 نُوں ویکھو۔) *
17، 18. جے اَسی وی یسوع وانگوں دُوجیاں لئی قربانیاں دواں گے تے ایہدے کیہہ فائدے ہون گے؟
17 جدوں اَسی خوشی نال دُوجیاں لئی قربانیاں دینے آں تے ایہدے توں اوہناں دے دل چ وی دُوجیاں لئی قربانیاں دین دی خواہش پیدا ہوندی اے۔ ٹم ناں دا اِک بزرگ کہندا اے: ”ساڈی کلیسیا چ بوہت سارے نوجوان خادم نیں تے ایہناں چوں کجھ تے بوہت چھوٹی عمر چ ای خادم بن گئے سن۔ ایہدی وجہ ایہہ سی کہ اوہ وی دُوجیاں وانگوں اپنے بھین بھراواں دی مدد کرنا چاہندے سن۔ایہناں نوجوان بھراواں دے جذبے دی وجہ توں کلیسیا نُوں بوہت فائدہ ہویا اے تے ایہدے توں بزرگاں نُوں وی بوہت مدد ملی اے۔“
18 اَسی اِک ایہو جہی دُنیا چ رہ رہے آں جِتھے زیادہتر لوک خودغرض نیں۔ پر یہوواہ دے بندے اوہناں لوکاں ورگے بالکل نئیں نیں۔ یسوع چ دُوجیاں لئی قربانیاں دین دی جیہڑی خواہش سی، اوہنے ساڈے دلاں نُوں چُھو لیا اے۔ ساڈا پکا ارادہ اے کہ اَسی وی یسوع وانگوں بناں گے۔ اَسی پوری طرحاں تے یسوع وانگوں نئیں بن سکدے پر اَسی اوہدی مثال تے چلن دی پوری کوشش کر سکنے آں۔ (1-پطرس 2:21) جے اَسی یسوع دی مثال تے عمل کرن دی پوری کوشش کراں گے تے سانوں بوہت خوشی ملے گی کیونکہ اِنج کر کے اَسی یہوواہ نُوں خوش کر رہے ہوواں گے۔
گیت نمبر 13: مسیح دی ودھیا مثال
^ یسوع مسیح ہمیشاں اپنے نئیں سگوں دُوجیاں دے فائدے بارے سوچدا سی۔ ایس مضمون چ اَسی غور کراں گے کہ اَسی کِنہاں طریقیاں نال یسوع مسیح دی مثال تے عمل کر سکنے آں۔اَسی ایہہ وی سکھاں گے کہ یسوع وانگوں دُوجیاں لئی قربانیاں دے کے سانوں کیہڑے فائدے ہوندے نیں۔
^ تصویر دی وضاحت: ڈینیایل ناں دا اِک نوجوان ویکھ رہیا اے کہ دو بزرگ اوہدے ابو نُوں ہسپتال چ مِلن لئی آئے نیں۔ بزرگاں دی مدد دا ڈینیایل تے بڑا گُوڑھا اثر ہویا۔ ایہدے توں اوہدے دل چ وی ایہہ خواہش پیدا ہوئی کہ اوہ کلیسیا چ دُوجیاں دی مدد کرے۔ اِک ہور نوجوان جدا ناں بینی اے ویکھ رہیا اے کہ ڈینیایل دُوجیاں دا کِنّاں خیال رکھ رہیا اے۔ ڈینیایل دی مثال توں بینی دے دل چ ایہہ خواہش پیدا ہوئی کہ اوہ عبادتگاہ دی صفائی چ دُوجیاں دی مدد کرے۔
