1. ¿Imakunatam Diosta serviqkunaqa sunqumanta ruwachkanku?

 BIBLIAM ñawpaqmantaraq willakurqaña Jehova Diosta serviqkuna Jesusta qatipakuspanku tukuy imapi yanapakunankumanta (Sal. 110:3). Chay willakusqanmi kunan cumplikuchkan. Sapa watam Diosta serviqkunaqa millonnintin horakuna mana imallapaq Jehova Diosmanta willakunku. Iñiqmasinkutapas tiempochakuspam yanapaykunku imapas necesitasqankupi, imapas llakinkupi chaynataq Diosta serviyninkupipas. Iñiqkunapi punta apaqkunawan yanapaqninkunapas tiempochakunkum huñunakuykunapi yachachinankupaqwan iñiqmasinkuta watukunankupaq. ¿Imanasqataq tukuy chaykunata ruwanku? Jehova Diostawan runamasinkuta kuyasqankuraykum (Mat. 22:37-39).

2. Romanos 15:1-3 nisqanman hinaqa, ¿Jesuspa imayna kasqantam qatipakunanchik?

² Jesusqa manam kikinpa munasqallantachu ruwarqa, aswanqa runamasinpa allinninpaq kaqkunatam. Chaymi Diosta serviqkunapas payta qatipakunapaq kallpanchakunchik (leey Romanos 15:1-3). Chayta ruwaspaqa Jesuspa nisqanman hinam tarikusun. Paymi nirqa: “Imapas quqmi aswan kusisqaqa imapas chaskiqmantaqa”, nispa (Hech. 20:35).

3. ¿Imamantam kay yachachikuypi yachasun?

³ Kay yachachikuypim yachasun hukkunarayku Jesus  imakunata ruwasqanmanta hinaspa payta imaynata qatipakunamanta. Yachasuntaqmi hukkunata yanapanapaq imakunata ruwanamantapas.

4. ¿Imaynatam Jesusqa hukkunapa allinninta maskarqa?

⁴ Jesusqa pisipasqa kaspanpas hukkunatam yanaparqa. Piensarisun urqupi Jesus kachkaptin achkallaña runakuna Jesusman asuykusqanpi. Ichapas chayqa karqa Capernaum llaqtapa hichpanpi. Jesusqa tukuy tuta taytanta mañakusqanraykum pisipasqa kachkarqa. Chaywanpas payqa wakchakunata hinaspa unquqkunata qawaykuspanmi llakipayariykurqa. Chaypiqa manamá hampiyllachu-hampirqa, aswanqa runakunamanmi sumaqta yachachirqa. Chaytam yachanchik Jesuspa ancha riqsisqa yachachikuyninwan (Luc. 6:12-20).

5. ¿Imaynatam familiapi taytakuna Jesusta qatipakunku pisipasqa kaspankupas?

⁵ ¿Imaynatam taytakuna Jesusta qatipakunku? Piensarisun tukuy punchaw llamkasqanmanta wasinman pisipasqa kutiykuq taytapi. Chay tutam familianwan Diosta yupaychananku tupan. Pisipasqa kasqanrayku huk punchawpaq saqiyta munaspanpas Jehova Diostam mañakun kallpata qunanpaq. Chaymi Jehova Dios yanapaptin familianwan kuska chay tuta estudianku, chaywanmi warmankunapas yachanku Diosta serviyninku imamantapas puntapi kasqanta.

6. ¿Imatam Jesusqa ruwarqa sapallan kayta munaspanpas?

⁶ Jesusqa hukkunata yanapananpaqmi tiempochakurqa. Jesusqa mayna llakisqachá tarikurqa amistadnin bautizaq Juanta wañurachiptinkuqa. Bibliam nin: “Chayta yacharuspanmi Jesusqa sapallan kayta munaspan botepi pasakurqa mana runapa kasqanman”, nispa (Mat. 14:10-13). Wakin runamasinchikkunaqa, ayllunku wañukuptinqa sapallanku kaytam munanku. Jesus sapallan kayta munaptinpas achkallaña runakunam  risqan lawpi suyachkarqaku. ¿Imatam Jesusqa ruwarqa? Achkallaña kasqankuta qawaykuspanmi llakipayarikurqa. Arí, Diosmanta yachayta necesitasqankuta qawaspanmi tukuy imamanta yachachiyta qallaykurqa (Mar. 6:31-34; Luc. 9:10, 11).

7, 8. ¿Imaynatam punta apaqkuna Jesusta qatipakunmanku pipas yanapanata necesitaptin?

⁷ ¿Imaynatam iñiqkunapi punta apaqkuna Jesusta qatipakunku? Ñuqanchikrayku punta apaqkunapa tukuy ruwasqankumantam anchata agradecekunchik. Manam paykunapa lliw imapas ruwasqankutachu yachanchik. Pipas qunqaymanta unquruptinqa chaypi yanapakuq punta apaqkunam chaylla yanapanku, chawpi tuta kaptinpas chaytam ruwanku. Arí, paykunaqa familiankupiwan kuska kuyakuq hinaspa llakipayakuq kasqankuraykum iñiqmasinkunapa allinninta puntapi churanku.

⁸ Punta apaqkunaqa yanapakunkutaqmi huñunakunanchik wasikunata ruwaypiwan edificiokunata ruwaypipas chaynataq imapas pasaruptin iñiqmasinchikkunata yanapaypipas. Chaywanpas tiempochakunkuraqmi yachachinankupaq hinaspa iñiqmasinchikkunata kallpanchanankupaq. Tukuy chaykuna ruwasqankumantam punta apaqkunatawan familiankutaqa alabaykunanchik. Jehova Diosyá paykunataqa bendecichun. Chaywanpas punta apaqkunaqa lliw iñiqkuna hinam kananku ima ruwaypipas. Manam Dios serviyninkupi imapas ruwayninkuman qukuruspachu familiankuta saqirunanku.

9. Filipenses 2:4, 5 nisqanman hinaqa, ¿imaynam llapallan iñiqkuna kananchik?

⁹ (Leey Filipenses 2:4, 5). Mana punta apaq kaspapas llapallanchikmi Jesusta qatipakuspa yanapakuyta atichwan. Bibliam Jesusmanta niwanchik ‘serviq hina rikurirusqanmanta’ (Filip. 2:7). ¿Imatam yachachwan chayna nisqanmanta? Allin serviqqa patronnintam ima ruwasqanwanpas kusichiyta munan. Ñuqanchikpas Diospa serviqnin kasqanchikraykum Diosta servinanchikpaq hinaspa iñiqmasinchikkunata yanapananchikpaq kallpanchakunanchik. Chayta imayna ruwanamantayá qatiqninpi yachaykusun.

10. ¿Imakunatam nikunanchik?

¹⁰ Imayna kasqanchikpim yuyaymanananchik. Nikunanchikmi: “¿Listochu kachkani hukkunata yanapanaypaq? ¿Ima niymantaq yuyaq iñiqmasinchikta watukunaypaq utaq huñunakuykunaman pusanaypaq niwaptinku? ¿Chayllachu yanapakuni huñunakusqayku localta limpiaypi utaq huñunakusqayku wasita allichaypi?”, nispa. Diostam prometekurqanchik kallpanchikwan, tiemponchikwan, imapas kapuqninchikwan servinapaq. Chayraykum Jehova Diosqa kusikun mana imallapaq hukkunata yanapaptinchikqa. Ichaqa, ¿imatam ruwachwan imapipas kallpanchakunanchikmanta cuentata qukuspaqa?

11. ¿Imaynatam Jehova Diosta mañakuy yanapawanchik pitapas yanapanapaq?

¹¹ Jehova Diostam tukuy sunquwan mañakunanchik. Imapipas kallpanchakunanchikmanta cuentata qukuspaqa Diosta tukuy sunquwan mañakuspam imam kaqta willakunanchik. Ninanchiktaqmi paypa munayninta ruwananchikpaqpas chaynataq atiyninta quwananchikpaqpas (Filip. 2:13).

12. ¿Imaynatam bautizasqa musukuna yanapakunmanku?

¹² Bautizasqa musu kaspaykiqa Diostayá mañakuy iñiqmasinchikkunata astawan yanapanaykipaq. Huklawkunapiqa iñiqkunapi punta apaqkunam aswan achka kanku paykunapa yanapaqninkunamantaqa. Wakinpiqa yanapaqninkunapas mayorkunañam kanku. Diospa serviqninkuna hinalla yapakusqanraykum punta apaqkunapa yanapaqnin musukuna astawan necesitakuchkan. Yanapakunaykipaq tantiakuspaykiqa Jehova Diostam kusichinki. Qampas kusisqataqmi kanki hukkunata yanapasqaykiwan.

13, 14. ¿Imatam ruwachwan iñiqmasinchikkunata yanapanapaq? (Qaway qaranpi kaq dibujota).

¹³ Necesitaqkunata yanapanapaqmi listo kananchik. Apostol Pablom iñiqmasinkunaman kaynata qillqarqa: “Allin ruwaytawan kapuqnikichikwan yanapanakuytaqa amayá qunqaychikchu. Chay ruwasqaykichikqa Diospa munasqanman hinam, yaqapas animalta wañuchispa qusqaykichik hina”, nispa (Heb. 13:16). ¡Chayna nisqanqa anchatachá iñiqkunataqa kallpancharqa! Chay carta qillqasqanta chaskirusqanku qipallatam Judea llaqtayuq iñiqkunaqa urqukunaman ayqikurqaku wasinkuta, negocionkuta, Diosta mana serviq familiankuta saqispanku (Mat. 24:16). Chaypi  yanapanakuyninkuqa mayna allinchá karqa. Imapipas yanapanakunankupaq Pablopa nisqanta kasukusqankuraykuchá facillla karqa huklawpipas amañayninkuqa.

¹⁴ Wakinpiqa manam iñiqmasinchikkunaqa willawasunchu imapas necesitasqankutaqa. Viudo iñiqmasinchikqa ichapas mana willawasunchu imapas necesitasqanmantaqa. Chaywanpas yanapaykuptinchikqa anchatam agradecekunqa. Manam ninanchikchu: “Pipas yanapaykunqachiki, utaq imatapas necesitaspanqa willakunqachiki”, nispaqa. Aswanqa nikunanchikmi: “Pay hina tarikuspayqa, ¿imapi yanapaykuwanankutataq munayman?”, nispa.

15. ¿Imatam ruwananchik hukkunata yanapayta munaspaqa?

¹⁵ Listollam kananchik pitapas yanapaykunapaq. Huñunakusqanchikpiqa kanmi qaripas utaq warmipas hukkunata yanapaykuy munaq. Paykunaqa yanapawanchik manam obligasqa hinachu. Aswanqa yanapawananchikpaqmi listo kachkanku. Chaymi paykunata qatipakuyta munanchik. Chayna kananpaqmi tantiakururqa punta apaq iñiqmasinchik Adan, paymi Jesusmanta kaynata nin: “Jesusqa ruwayniyuq runam karqa, chaywanpas lliw runakunam paywan kayta munaqku. Manataqmi pinqakuqkuchu imapipas yanapaykunanpaq niytaqa. Yacharqakum Jesusqa paykunamanta preocupakusqanta. Ñuqapas Jesus hina kuyakuq hinaspa yanapakuq kaytam munani”, nispa.

16. ¿Imaynatam Salmos 119:59, 60 nisqan yanapawanchik Jesusta allintapuni qatipakunapaq?

¹⁶ Manam hukmanyananchikchu tukuy  imapi Jesus hina mana kaspanchikqa (Sant. 3:2). Dibujokunata ruwananpaq estudiaqqa manam yachachiqnin hinapuni dibujaytaqa atinmanchu. Chaywanpas, pantasqankunamanta yachaspanqa yachachiqnin hina kananpaqmi kallpanchakunqa. Ñuqanchikpas sapallanchikpi bibliata estudiaspanchik chayman hina pantasqanchikkunata corregikunapaq kallpanchakuspaqa Jesustam allintapuni qatipakusun (leey Salmos 119:59, 60).

17, 18. ¿Imanasqataq ancha allin Jesuspa yanapakuq kasqanta qatipakuyninchikqa?

¹⁷ Yanapakuq kaptinchikqa hukkunapas chayna kaytam munanqaku. Punta apaq iñiqmasinchik Tinmi nin: “Huñunakusqaykupi achka musukunam hukkunapa yanapakusqankuta qawaspanku kunanqa ñuqaykupa yanapaqniykuña kachkanku. Chayna kasqankuqa allintam yanapawanku punta apaqkunatapas chaynataq lliw iñiqkunatapas”, nispa.

¹⁸ Yaqa llapallan runakunam kikillankupaq munaq kanku. Jehova Diosta serviqkunam ichaqa mana chaynachu kanchik. Ñuqanchikqa Jesuspa yanapakuq kasqantam qatipakuyta munanchik. Lliwpi pay hina mana kaspapas ‘allintapunim qatipakuyta’ atichwan (1 Ped. 2:21). Chaynaqa, Jesusta qatipakunapaq kallpanchakuspaqa Jehova Diosta kusichisqanchikraykum kusisqa kasun.