1. ¿Imakunatan wakin hermanonchiskuna ruwashanku?

 BIBLIAQA willaranñan Jehová Diosta serviq runakunaqa paykunallamanta tukuy sonqowan Diosta servinankuta (Sal. 110:3). Chayqa kay tiempopin junt’akushan. Sapa watanmi Jehová Diosta serviqkunaqa mana qolqellapaq askha horakunata Diosmanta willanku. Chaymantapas tiempotan t’aqallankutaq imachus necesitasqankupi juj hermanokunata yanapanankupaq. Iñiq t’aqapi umalliqkunapas yanapakuq kamachikunapas askha horakunatan preparakunku juñunakuykunapi yachachinankupaq, hermanokunata visitanankupaq ima. ¿Imaraykun chayta ruwanku? Jehová Diostapas hermanonchiskunatapas munakusqankuraykun (Mat. 22:37-39).

2. Romanos 15:1-3 nisqan jina, ¿imakunatan Jesús jina ruwasunman?

² Señorninchis Jesusqa jujkunaq allinnintan ñaupaqtaqa maskharan. Chhayna kananchispaqmi llapanchispas kallpachakunanchis (leey Romanos 15:1-3). Sichus Jesús jina kananchispaq kallpachakusunchis chayqa kusisqan kasunchis. Jesusmi niran: “Qoypin aswan kusikuyqa kan, manan chaskiypichu”, nispa (Hech. 20:35).

3. ¿Imakunamantan kay yachachikuypi yachasun?

³ ¿Imakunatan Jesús ruwaran jujkunata yanapananpaq? ¿Imatan noqanchispas Jesús jina ruwasunman? Chaykunamantan kay yachachikuypi yachasun. Yachallasuntaqmi imakunatas ruwananchis jujkunata astawan yanapananchispaq chaytapas.

4. ¿Imatan Jesús ruwaran askha runakunata rikuspa?

⁴ Jesusqa jujkunatan yanaparan sayk’usqaña kasharan chaypas. Juj kutinmi Jesusqa orqota riran Diosmanta mañakuq, chay orqomanmi askha runakuna rillarankutaq. Jesusqa sayk’usqachá kasharan tutantin Diosmanta mañakusqan qhepamanqa. Ichaqa, ¿imatan ruwaran askha runakunata rikuspa? Payqa wajcha runakunatan khuyapayaran, chaymi onqosqa runakunatapas qhaliyachiran. Chaymantapas Jehová Diosmantan yachachiran (Luc. 6:12-20).

5. ¿Imaynatan familianta umalliq hermano rikuchinman Jesús jina kasqanta?

⁵ Familianta umalliq qosakunaqa Jesús jinan kananku. Mayninpiqa yaqapaschá familianta umalliq hermanoqa ch’isiyaq llank’asqanmanta sayk’usqa wasinman chayapunman. Jinaspa sayk’usqa kaspa manaña familiantin Diosta adorananku horata ruwayta munanmanñachu. Chhaynapi tarikuspaqa Diospa kallpantan mañakunan chay horapi familiantin Diosta adoranankupaq. Chayta rikuspan wawankunaqa reparanqaku tayta-mamankupaqqa Jehová Diosta yupaychay aswan importante kasqanta.

6. ¿Imatan Jesús ruwaran llakisqaña tarikusharan chaypas?

⁶ Jesusqa tiempotan t’aqaran jujkunawan kananpaq. Juj kutinmi Jesusman willaranku bautizaq Juanta wañuchipusqankuta. Chayta yachaspan Jesusqa sinchitapuni llakikuran. Biblian nin: “Chayta uyarispan Jesusqa sapallan kananpaq ch’inneq ladoman botepi ripuran”, nispa (Mat. 14:10-13). Jesusqa sapallanmi kayta munaran, chaymi juj ladoman riran. Ichaqa chay ladopipas askha runakunan payta suyasharanku. ¿Imatan Jesús ruwaran askha runakunata rikuspa? Llakisqaña kasharan chaypas chay runakunatan khuyapayaran. Payqa repararanmi chay runakuna kallpachanata necesitasqankuta. Chaymi “paykunaman yachachiyta qallariran” (Mar. 6:31-34; Luc. 9:10, 11).

7, 8. ¿Imakunata ruwaspan umalliqkuna rikuchinku Jesús jina kasqankuta?

 ⁷ Iñiq t’aqapi umalliqkunaqa Jesús jinan kananku. Umalliqkunaqa imaymanatan ruwanku hermanonchiskuna allin kanankupaq. Wakinninchisqa manan llapa ruwasqankutachu yachanchis. Mayqen hermanopas accidentakuqtinqa umalliqkunan usqhaylla hospitalman rinku imachus necesitasqanpi hermanota yanapanankupaq. Mayninpiqa kuska tutata imaraqmi hermanota yanapaq rinku. Umalliqkunapas esposankupas munakuq khuyapayakuq kasqankuraykun hermanonchiskunaq allinninta ñaupaqta maskhanku.

⁸ Chaymantapas iñiq t’aqapi umalliqkunaqa juñunakunanchis wasikunata jatarichiypi llakipi tarikuq hermanonchiskunata yanapaypin yanapakullankutaq. Ichaqa manan chaykunallatachu ruwanku. Paykunaqa tiempotan t’aqallankutaq Diosmanta willanankupaq, juñunakuykunapi yachachinankupaq, hermanonchiskunata kallpachanankupaq ima. Chaymi paykunatapas esposankutapas “gracias” ninanchis. Ichaqa umalliqkunaqa manan chaykunata ruwanallankupaqchu tiempotaqa t’aqananku, t’aqanallankutaqmi familiankuwan kanankupaq imachus necesitasqankutapas qonankupaq.

9. Filipenses 2:4, 5 nisqan jina, ¿imayna kananchispaqmi kallpachakunanchis?

⁹(Leey Filipenses 2:4, 5). Wakinninchisqa manapaschá umalliqchu kanchis, chaywanpas atisunmanmi Jesús jina hermanonchiskuna  yanapayta. Jesusqa juj “kamachi jinan” jujkunata yanaparan (Filip. 2:7). ¿Imatan chaymanta yachasunman? Allin kamachiqa allintan imatapas ruwan patronnin kusisqa kananpaq. Noqanchispas Jehová Diospa kamachinkunan kanchis, chaymi tukuy atisqanchista ruwananchis hermanonchiskunata yanapananchispaq kallpachananchispaq ima. Chaykunata ruwaspan Jehová Diosta kusichisun. ¿Imaynatan jujkunata yanapasunman? Chaypaq tawamanta yachasunchis.

10. ¿Ima tapuykunapin piensananchis?

¹⁰ Imaynachus kasqanchistan allinta qhawarikunanchis. Chaypaqqa kay tapuykunapi piensay: “¿Atiymanchu jujkunata yanapayta? ¿Kasukunichu kuraq hermanota juñunakuyman pusanaypaq otaq wasinta rinaypaq niwaqtinku? ¿Yanapakunichu juñukunanchis wasita pichaypi allichaypipas?”, nispa. Manaraq bautizakushaspaqa Diosmanmi prometekuranchis tukuy tiemponchiswan, tukuy kallpanchiswan, tukuy kaqninchiskunapiwan payta servinanchispaq. Chaymi kallpachakunanchis hermanokunata yanapananchispaq. Ichaqa, ¿imaynatan hermanonchiskunata yanapasunman?

11. ¿Imata ruwananchispaqmi Diospa yanapayninta mañakunanchis?

¹¹ Jehová Diosmanta Mañakusun. Sichus iñiq t’aqapi imatapas ruwananchispaq kallpachakunanchisraq kashan chayqa Jehová Diospa yanapaynintan mañakunanchis. Jehová Diosmanqa willakunanchismi imaynachus kashasqanchista, jinan Jehová Diosqa “munayninta ruwananchispaq atiyta qowasunchis” (Filip. 2:13).

12. ¿Imata ruwanankupaqmi kallpachakunanku wayna hermanokuna?

¹² Sichus waynallaraq kashanki chayqa Jehová Diosmanta mañakuy iñiq t’aqapi astawan yanapakunaykipaq. Wakin iñiq t’aqakunapiqa askhan umalliqkuna kanku, yanapakuq kamachikunan ichaqa pisilla kanku. Kay tiempopiqa Jehová Diospa llaqtanmi astawan yapakushan, chaymi wayna hermanokuna necesitakun umalliqkunata yanapanankupaq. Chayrayku waynakuna kallpachakuychis astawan iñiq t’aqapi yanapakunaykichispaq. Chayta ruwaspan Jehová Diosta kusichinkichis qankunapas kusisqan kankichis.

13, 14. ¿Imatan ruwananchis hermanonchiskunata yanapananchispaq? (Qhaway tapanpi kaq dibujota).

¹³ Jujkunata imachus necesitasqankupi yanapasun. Apóstol Pabloqa Hebreo iñiq t’aqapi cristianokunatan kallpacharan paykunapura yanapanakunankupaq. Paymi niran: “Aman qonqankichischu allin kaqkuna ruwaytaqa ni imachus kaqniykichiswan jujkunata yanapaytapas, chhayna sacrificiokunan Diostaqa anchata kusichin”, nispa (Heb. 13:16). Pabloq kallpachasqanqa ancha allinpunin karan. Paykunaqa chay carta chaskisqanku qhepallamanmi wasinkuta, llank’anankuta, mana iñiq familiankuta ima saqespa orqokunaman ayqekuranku (Mat. 24:16). Apóstol Pabloqa munaranmi paykunapura yanapanakunankuta, chhaynapi juj llaqtamanpas facil-llata yachakunankupaq.

¹⁴ Kay tiempopi wakin hermanonchiskunaqa p’enqakunkun imachus necesitasqankuta jujkunaman willakuyta. Chaypaq juj viudo hermanonchispi piensasun. Payqa yaqapaschá imaymanapi yanapanata  necesitashanman, ichaqa hermanokunata mana llakichiyta munaspan mana willakunmanchu. Sichus kallpachakusunchis chhaynapi tarikuq hermanonchiskunata yanapananchispaq chayqa kusisqan kanqaku. Noqanchisqa manan hermanonchiskunaq imachus necesitasqankuta willawananchistaraqchu suyananchis, aswanpas liston kashananchis paykunata yanapananchispaq. Chaymi tapukunanchis: “¿Imaynatan munayman chhaynapi tarikuqtiy yanapawanankuta?”, nispa.

15. ¿Imata ruwananchispaqmi llapanchispas kallpachakunanchis?

¹⁵ Sumaq sonqo kasun. Iñiq t’aqanchispiqa kanpunin sumaq sonqo munakuq hermanonchiskuna. Paykunaqa kallpachakunkun iñiq t’aqapi llapa hermanokunata yanapanankupaq. Chhayna kananchispaqmi llapanchispas kallpachakunanchis. Hermanonchis Alanpas chhayna kananpaqmi kallpachakushan. Paymi nin: “Noqaqa Jesús jinan munakuq sumaq sonqo kayta munani. Imaymana ruwanayoqña Jesús karan chaypas tiempotan t’aqaran qatikuqninkunata yanapananpaq, chhaynapin paykunaqa sut’ita reparaqku paykunamanta Jesús llakikusqanta”, nispa.

16. ¿Imaynatan Salmos 119:59, 60 textokuna yanapawasunman Jesús jina kananchispaq?

¹⁶ Manapaschá Jesús jinachu imatapas allinta ruwasunchis, ichaqa manan chaywanqa pisikallpayananchischu (Sant. 3:2). Kaypi piensasunchis. Dibujayta yachaq estudianteqa manan jayk’aqpas profesornin jinaqa dibujanmanchu. Ichaqa tukuy atisqantachus kallpachakunqa profesornin jina kananpaq chayqa dibujasqanqa munaymi lloqsinqa. Chhaynatan noqanchispas  kallpachakunanchis Bibliapi yachasqanchisman jina imatapas ruwananchispaq. Chaymi yanapawasun Jesús jina kananchispaq (leey Salmos 119:59, 60).

17, 18. ¿Imaraykun kallpachakunanchis Jesús jina jujkunata yanapananchispaq?

¹⁷ Hermanonchiskunata yanapananchispaq kallpachakusunchis chayqa jujkunapas chayta rikuspan kallpachakunqaku juj hermanokunata yanapanankupaq. Tim hermanonchismi nin: “Iñiq t’aqaykupiqa askha wayna hermanokunan iñiyninkupi wiñarispa yanapakuq kamachi jina umalliqkunata yanapakushanku. Paykunataqa jujkunaq ejemplonmi allinta yanapashan”, nispa.

¹⁸ Jehová Diosta mana serviq runakunaqa paykunallapin piensanku. Noqanchisqa manan paykuna jinachu kananchis, aswanpas kallpachakunanchismi Jesús jina jujkunata yanapananchispaq. Manaña Jesús jinachu imatapas ruwasun chaypas atisunmanmi “yupinta qatikuyta” (1 Ped. 2:21). Chhaynaqa kallpachakusun Jesús jina imatapas ruwananchispaq. Chayta ruwaspan Jehová Diosta kusichisun noqanchispas kusisqan kasun.