1. Eaa te tu meitaki te ka kiteaia i roto i te iti tangata o Iehova?

KUA totou te Pipiria, e ka “puareinga roa to [te Atua] ra au tangata” i te tavini ia Iehova i raro ake i te aratakianga a tana Tamaiti. (Sala. 110:3) Te akatupuia nei teia totou i teia tuatau. I te au mataiti, e akapou ana te au tavini maroiroi o Iehova, e anere mirioni ua atu ora i roto i te angaanga tutu aere. Ka rave puareinga ua ratou i te reira e kare e tutaki. Ka tauturu katoa ratou i to ratou au taeake i te pae kopapa, i te pae manako ngakau e i te pae vaerua. E akapou ana te aronga pakari e te au tavini tauturu i te taime no te oronga i te au ako i ko i te au uipaanga e te akamaroiroi i te au taeake. Eaa ratou i rave ei i teia angaanga? Ko te aroa—aroa no Iehova e te aroa no te tangata tupu.—Mata. 22:37-39.

2. Eaa te akaraanga ta Iesu i akanoo i roto ia Roma 15:1-3?

² Kua akanoo a Iesu i te akaraanga meitaki na te tukuanga i te anoano o tetai ke na mua ake i tona uaorai. Te tauta nei tatou kia aite mei iaia rai. (E tatau ia Roma 15:1-3.) Me rave tatou i te reira, ka puapingaia tatou. Karanga a Iesu: “E mea meitaki i te oronga atu i te rave mai.”—Anga. 20:35.

3. Eaa ta tatou ka uriuri i roto i teia atikara?

³ I roto i teia atikara, ka uriuri tatou i tetai au apinga ta Iesu i rave no te tauturu i tetai ke, e akapeea tatou me aru  i tona akaraanga. Ka uriuri katoa tatou akapeea me akamaata atu i to tatou inangaro kia tauturu i tetai ke.

4. Akapeea a Iesu te tuku anga i te anoano o tetai ke na mua ake i tona uaorai?

⁴Kua tauturu a Iesu i tetai ke noatu tona roiroi. Akamanako ana i ta Iesu i rave te aere anga mai tetai urupu maata i te akarongo kiaia i runga i te maunga i Kaperenauma. Kua pure ana aia i tera po katoa. E penei kua roiroi tikai aia, inara te kite anga aia i te urupu tangata, kua tangi aroa aia i te aronga putaua e te maki. Kare aia i akaora ua ia ratou mei te maki, mari ra kua oronga katoa i tetai akoanga puapinga rava atu—te Ako i runga i te Maunga.—Luka 6:12-20.

5. Akapeea te au upoko ngutuare me aru i to Iesu tu akaatinga noatu to ratou roiroi?

⁵Akapeea te au upoko ngutuare me aru ia Iesu. Akamanako ana i teia: Kua oki mai tetai upoko ngutuare ki te kainga mei te angaanga e kua roiroi aia. Penei ka timataia aia kia kore e rave i ta ratou Akamorianga Ngutuare tei akanooia no tera aiai. Inara kua pure aia kia Iehova no te maroiroi. Kua pau mai a Iehova i tana pure, e kua rave rai i ta ratou apii tei matauia. Ka kite mai te tamariki i tetai apiianga puapinga, koia ko te akamorianga ia Iehova te mea puapinga rava atu ki to ratou nga metua.

6. Akapeea a Iesu i te akaatinga anga i tona taime no te tauturu i tetai ke?

⁶Akapou a Iesu i tona taime no tetai ke. Akamanako ana i to Iesu tu te akarongo anga aia e kua tamateia a Ioane Bapetizo. Kua taitaia tikai aia. Karanga te Pipiria: “E kite akerā Iesu [e kua tamateia a Ioane], aere poiri atura aia ki runga i tetai pai, riro atura ki tetai ngai motutaa.” (Mata. 14:10-13) Ka mārama tatou i te tumu i inangaro ei aia i te noo e koia anake ua. E inangaro ana tetai pae tangata i te aue ko ratou anake ua. Inara kare i rauka ia Iesu i te rave i te reira. Kua tae mai tetai urupu tangata ki te ngai tana i aere. Eaa tana i rave? Kua akamanako aia i ta te tangata i inangaro, e  kua “tangi atura ia ratou.” Kua kite aia e te anoano maata ra ratou i te tauturu e te akapumaana no ko i te Atua, no reira kua oronga viviki atu aia i te reira. Te tika, “kua apii atura aia ia ratou i te au tuatua e manganui.”—Mare. 6:31-34; Luka 9:10, 11.

7-8. Akapeea te aronga pakari me aru ia Iesu me ka anoano tetai taeake i te tauturu?

⁷Akapeea te aronga pakari me aru ia Iesu. Ka akaperepere maata tatou i te angaanga ta te aronga pakari e rave ra no tatou. Kare te putuputuanga e kite i te maata anga o te angaanga ta ratou e rave ra. Ei akaraanga, me tupu tetai maki ki tetai taeake me kore tuaine, ka viviki te au taeake i runga i te Kumiti Are Maki i te tauturu ia ratou. Te maata anga o te taime, e tupu ana teia i te roa anga po! No to ratou tu tangi aroa no te au taeake e te au tuaine tei rokoia e te maki, ka tuku teia aronga pakari e to ratou ngutuare tangata i te anoano o te au taeake na mua ake i to ratou.

⁸ E piri katoa ana te aronga pakari ki roto i te angaanga pātu Are Uipaanga Patireia, e pera te au angaanga tauturu tumatetenga. E akapou maata katoa ana ratou i te taime no te apii, te akamaroiroi, e te tauturu ia tatou. Ka anoanoia tatou kia akameitaki i teia au taeake e to ratou ngutuare tangata. Kia akameitaki katoa mai a Iehova ia ratou! Noatu ra, ka anoanoia te aronga pakari kia akaari i te tu tau. Auraka ratou e akapou ua i te taime no te au angaanga a te putuputuanga, mari ra, kia akono katoa i to ratou ngutuare tangata.

9. Ia Philipi 2:4, 5, eaa te tu ka anoanoia te au Kerititiano kia akaari?

⁹ E tatau ia Philipi 2:4, 5. Kare tatou pouroa i te aronga pakari, inara ka rauka rai ia tatou i te aru i to Iesu tu akaatinga. Karanga te Pipiria e kua “tuku ke atura ra aia i tona uaorai tu, e kua rave i to te tavini.” (Phili. 2:7) E apiianga puapinga to roto i teia irava. Ka tauta tetai tavini meitaki i te akamareka i tona pu. Ei tavini no Iehova e no to tatou au taeake, kare e ekoko e ka inangaro tatou i te tavini maata atu Iaia e te au taeake. Ka rauka ia koe i te rave i te reira na te aru anga i teia au ravenga.

10. Eaa te au uianga kia ui koe kia koe uaorai?

¹⁰Akamanako i toou uaorai tu. E ui i teia au uianga kia koe uaorai: ‘Ka akaatinga ainei au i toku taime no te tauturu i tetai ke? Ei akaraanga, eaa taku ka rave me patiia mai au kia atoro i tetai taeake i ko i te are no te aronga ruaine, me kore kia apai i tetai tuaine pakarikari ki te au uipaanga? Ka puareinga ainei au i te tauturu i te tāmā i te au ngai no te uruoaanga e te akono i te Are Uipaanga Patireia?’ Ka mareka a Iehova me akaatinga tatou i to tatou taime e te apinga no te tauturu i tetai ke. Me e ngai tetai ka anoanoia kia akameitakiia mai, eaa ta tatou ka rave?

11. Akapeea te pure me tauturu ia tatou kia akaari i te tu akaatinga?

¹¹Pure akatenga kia Iehova. Penei kua kite mai koe e ka anoanoia kia akameitaki mai i toou tu, inara kare oou maroiroi no te rave i te reira. Me tupu teia, e pure akatenga kia Iehova. E akakite i te tika. E akakite kia Iehova i toou manako e te pati kiaia kia oronga mai i “te inangaro e te rave, mei tana i anoano ra.”—Phili. 2:13.

12. Akapeea tetai taeake mapu kua papetitoia me tauturu i te putuputuanga?

¹² Me e taeake mapu koe e kua papetitoia, e pati i ta Iehova tauturu kia akatupu i te inangaro no te tavini maata atu i roto i te putuputuanga. I tetai au enua, e maata atu te aronga pakari i te au tavini tauturu, e kare teia au tavini tauturu i te au mapu. I teia akaaerenga e tupu atura, ka anoano maataia te au taeake mapu no te tauturu i te akono i to Iehova iti tangata. Me ka inangaro koe i te tavini i tetai ua atu ngai ka anoanoia, ka mataora koe. Eaa te tumu? No te mea te akamareka ra koe ia Iehova, ka rauka tetai ingoa meitaki noou, e ka rekareka koe i te tauturu i tetai ke.

13-14. Eaa ta tatou ka rave no te tauturu i te au taeake e te au tuaine? (Akara i te tutu i te kapi mua.)

¹³Kia kite me ka anoano tetai ke i te tauturu. Akamaroiroi te apotetoro ko Paulo i te au Kerititiano i Iudea: “Kareka te takinga-meitaki e te oronga, eiaa rava ïa e akatopaia: te pereperekavana ra oki te Atua i te reira atinga.” (Ebe. 13:16) E akamaroiroianga meitaki te reira! Kare i roa i muri mai, kua akaruke teia au Kerititiano i to ratou ngutuare, ta ratou au pitiniti e te kopu tangata kare i te Kerititiano e kua “oro ratou ki te maunga.” (Mata. 24:16) I te reira atianga, kare e ekoko e mea puapinga kia tauturu ratou i tetai e tetai. Naringa ratou i taangaanga takere i ta Paulo akamaroiroi kia tauturu i tetai e tetai, ka māmā ake ia ratou i te akatano ki to ratou oraanga ou.

 ¹⁴ Kare to tatou au taeake e te au tuaine e akakite mai me ka anoano ratou i te tauturu. Ei akaraanga, penei kua mate te vaine a tetai taeake. Ka anoano ainei aia i tetai tauturu no te tunu kai, kia apai iaia ki tetai ngai, e no te au angaanga o te ngutuare? Penei kare aia e pati mai i te tauturu no te mea kare aia e inangaro kia tamanamanata ia tatou. Inara ka mataora aia me tauturu tatou iaia i mua ake ka pati mai ei aia i te reira. Auraka tatou e manako e na tetai ke e tauturu iaia, me kore ka pati mai aia i te tauturu me anoanoia te reira. E ui kia koe uaorai, ‘Eaa taku ka inangaro i tetai ke kia rave me tei roto au i tera turanga?’

15. Eaa ta tatou ka rave me ka inangaro tatou i te tauturu i tetai ke?

¹⁵Akaari i te tu oaoa. Kare e ekoko kua kite koe i tetai au taeake e te au tuaine i roto i taau putuputuanga tei puareinga ua i te tauturu i tetai ke. Kare rava ratou e akakite mai e te tamanamanata ra tatou ia ratou. Kua papa ua ratou i te tauturu mai, e ka inangaro tatou kia aite mei ia ratou rai. Kua inangaro a Alan, e tangata pakari e 40 tuma ona mataiti, i te akaari i te tu oaoa. Karanga a Alan no runga i to Iesu akaraanga: “Noatu e maata ta Iesu angaanga, kua akavaitata atu te au tu tangata kiaia e kare ratou i emiemi i te pati i tana tauturu. Kua kite ratou iaia ei tangata akono. Ka inangaro au kia aite mei ia Iesu rai, kia kiteaia mai au ei tangata meitaki, oaoa e te maru.”

16. Akapeea a Salamo 119:59, 60 me tauturu ia tatou kia aru vaitata i to Iesu akaraanga?

¹⁶ Auraka tatou e taitaia me kare e rauka ia tatou i te aru meitaki ia Iesu. (Iako. 3:2) Kare e rauka i tetai tangata apii i te aru meitaki i te angaanga a tona  puapii. Inara me ka apii aia mei tona au tarevake e te tauta i te aru vaitata i te akaraanga o tona puapii, ka meitaki atu aia. Mei te reira rai, me rave tatou i ta tatou i apii mai mei ta tatou uaorai apii Pipiria, e te tauta i te akatikatika i to tatou tarevake, ka rauka ia tatou i te aru vaitata i te akaraanga ta Iesu i akaruke mai.—E tatau ia Salamo 119:59, 60.

17-18. Eaa te puapinga ka rauka mai me aru tatou i to Iesu tu akaatinga?

¹⁷ Me akaari tatou i te tu akaatinga, ka akakeu te reira i tetai ke kia pera katoa. Karanga tetai tangata pakari ko Tim: “Kua ikiia tetai au taeake mapu i roto i ta matou putuputuanga ei au tavini tauturu, no te mea kua akaari ratou i te tu akaatinga ta ratou i kite mai mei tetai ke. Kua tauturu teia au taeake mapu i te putuputuanga e kua turu katoa i te aronga pakari.”

¹⁸ E maata te tangata i teia tuatau te manako ua ra ia ratou uaorai. Inara e tuke te iti tangata o Iehova. Kua akakeuia to tatou ngakau e te vaerua akaatinga o Iesu e ka inangaro tatou i te aru i tona akaraanga. Kare e rauka ia tatou i te aru meitaki i tana i rave, inara ka rauka ia tatou i te “aru [vaitata] i tona takainga vaevae.” (1 Pete. 2:21) Me tauta tatou i te aru i to Iesu tu akaatinga, ka kite katoa tatou i te rekareka no te mea te akamareka ra tatou ia Iehova.