1. Саво шукар стави сикавела е Јеховаскоро народо?

БУТ време англедер, и Библија пророкујнѓа кај е Девлескоро народо „спремно ка нудинел пе“ те служинел е Јеховаске тело е Исусескоро водство (Пс. 110:3). Адава пророштво исполнинела пе баш авдиве. Секова берш е Јеховаскере сведокија накхавена милиоња саатија ко проповедибе. Ола керена адава доброволно ко пло трошако. Исто аѓаар одвојнена време те шај те поддржинен пумаре пхрален ко физичко, ко емоционално хем ко духовно поглед. О именујме пхраља накхавена бут време те спреминен пе башо точке со иси лен ко состанокија хем те посетинена е пхрален хем е пхењен те шај те охрабринен лен. Соске керена са акава? Ола тане поттикниме таро мангипе — мангипе спрема о Јехова хем спрема о пашутне (Мат. 22:37-39).

2. Спрема Римјаните 15:1-3, саво пример денѓа амен о Исус?

² О Исус денѓа амен бут шужо пример аѓаар со чхивѓа е јаверенгере потребе англедер пле. Амен даја амендар са те шај те џа пало лескоро пример. (Читин Римјаните 15:1-3.) Ако постапинаја аѓаар ка овен амен баре берекетија. О Исус вакерѓа: „Повише иси бахталипе кеда дела пе него кеда лела пе“.

3. Со ка дикха ки акаја статија?

³ Ки акаја статија ка дикха несаве таро жртве со керѓа лен  о Исус те шај те служинел е јаверенге хем сар шај амен те џа пало лескоро пример. Исто аѓаар, ка дикха сар шај те бајрара амари желба те служина е јаверенге.

4. Сар о Исус чхивѓа е јаверенгере потребе англедер пле потребе?

⁴О Исус жртвујнѓа пе е јаверенге чак кеда сине уморно. Размислин со керѓа о Исус кеда дикхља буте манушен со але те дикхен ле ки планина паше узо Капернаум. Ов сигурно сине бут уморно адалеске со молинѓа пе цело рат. Ама кеда дикхља адале баре мноштво жалинѓа е чоролен хем е насвален со сине машкар ленде. Хем на само со сасљарѓа лен, него исто аѓаар икерѓа ленге јекх таро најохрабрувачка говорија — и Проповед ки гора (Лука 6:12-20).

5. Сар о фамилијарна поглаварија сикавена сар е Исусескоро самопожртвувано стави кеда тане уморна?

⁵Сар џана о поглаварија пало е Исусескоро пример? Замислин туке акаја ситуација: Јекх поглавари авела песке кхере бут уморно тари бути. Иако леске пхаро те икерел и фамилијарно рат, ов сепак молинела е Јехова те дел ле сила. О Јехова одговоринела ки лескири молитва аѓаар со дела ле сила хем ов проучинела пле фамилијаја сар секова курко. Сар резултати, адаја рат о чхаве сикљона јекх важно поука — кај ленгере родителенге, о духовна буќа тане ко прво тхан.

6. Вакер пример сар о Исус жртвујнѓа пло време те шај те поможинел е јаверенге?

⁶О Исус одвојнѓа време е јаверенге чак кеда ваљани сине те овел коркори. Шај ли те замислине туке сар осетинѓа пе о Исус кеда дознајнѓа кај лескоро амал, о Јован Крстител, сине мудардо? Ов сигурно сине бут тажно. И Библија вакерела: „Кеда шунѓа [кај о Јован муло], о Исус гело чамцоја ко јекх пусто тхан те шај те овел коркори“ (Мат. 14:10-13). Шај те хаљова соске мангља те овел коркори. Несаве мангена те овен коркори кеда тугујнена. Ама о Исус нашти сине те керел адава соске јекх баро мноштво ресља ко адава тхан англедер ов те ресел атхе. Со керѓа о Исус? Ов размислинѓа башо е манушенгере потребе  хем „пело леске жал“ баши ленде. Ов халило кај о мануша сине духовно бокхале хем ваљани сине ленге утеха, адалеске о Исус сине спремно одма те поможинел ленге. Уствари „ов почминѓа те сикавел лен [на само башо некобор буќа него] башо бут буќа“ (Мар. 6:31-34; Лука 9:10, 11).

7-8. Вакер јекх пример со сикавела сар о старешине џана пало е Исусескоро пример кеда некаске таро собрание ваљани помош.

⁷Сар џана о старешине пало е Исусескоро пример? Амен бут ценинаја адава со керена о самопожртвувана старешине баши аменде! Бут таро буќа со керена лен, о јавера таро собрание ни на дикхена. На пример, кеда иси јекх медицинско итно случај, о пхраља таро Одбор башо контакт машкар о докторија хем о пациентија одма поможинена е пхраленге хем е пхењенге. Бут пути асавке итна случаија овена ки екваш и рат! Ама адалеске сој тане сочувствителна спрема пумаре пхраља хем пхења со накхена таро пхаро периоди акала љубезна старешине, заедно пумаре фамилиенцар, чхивена е јаверенгере потребе англедер пумаре.

⁸ Исто аѓаар, о старешине поможинена кеда градинена пе дворане хем јавера објектија хем кеда иси природна катастрофе. Освен адава, жртвујнена бут таро пумаро време те шај те сикавен амен хем те охрабринен амен. Са акала пхраља хем ленгере фамилие заслужинена јекх искрено пофалба. О Јехова сигурно ка дел лен берекети адалеске со сикавена асавко стави! Џанѓола пе, сар са о јавера, о старешине да ваљани те овен урамнотежена. Ола на ваљани те накхавен добором бут време ко теократска активностија со нане те овел лен време башо пумаре фамилие.

9. Спрема Филипјаните 2:4, 5, саво стави ваљани те развинен са о христијања?

⁹ Читин Филипјаните 2:4, 5. Џанѓола пе, акава на важинела само е старешиненге него сарине ваљани те ова самопожртвувана сар о Исус. И Библија вакерела кај ов „уло сар робо“ (Фил. 2:7). Размислин башо адава со шај те сикљова таро акала лафија. Јекх верно робо или слуга ка родел прилике те угодинел пле господареске. Адалеске со сием е Јеховаскере робија хем служинаја амаре пхраленге сигурно мангаја панда повише те ова ленге корисна — хем е Јеховаске хем е пхраленге. Те дикха некобор предлогија сар шај те кера адава.

10. Со шај те пуча амен?

¹⁰Испитин тло стави. Пуч тут: „Кобор сиум спремно те жртвујнав мло време хем мли сила те шај те поможинав е јаверенге? На пример, со би керава сине ако некој пучела ман дали шај те посетинав јекхе попхуре пхрале со живинела коркори или ко доми? Или те ингарав јекхе попхуре пхења ко состанокија? Дали сиум спремно те поможинав кеда иси потреба таро доброволција те чистинел пе јекх конгресно сала или те одржинел пе и дворана?“ Кеда денѓем лафи е Јеховаске кај ка служина леске, амен ветинѓем леске кај ка да ле са адава со иси амен ки служба баши лесте. Адалеске ов тано бахтало кеда спремно трошинаја амаро време, сила хем материјална средствија те шај те поможина е јаверенге. Ама со шај те кера ако дикхаја кај ваљани те кера бути ко акава?

11. Сар шај и молитва те поможинел амен те развина јекх самопожртвувано стави?

¹¹Молин тут е Јеховаске таро вило. Шај приметинѓан кај ваљани панда повише те развине о самопожртвувано стави, ама на сиан спремно те кере о потребна промене. Ако тано аѓаар молин тут е Јеховаске таро вило хем ов искрено. Вакер е Јеховаске сар осетинеа тут хем роде лестар те дел тут хем и „желба хем и сила те кере адава со ов мангела“ (Фил. 2:13).

12. Сар шај о терне пхраља те поможинен ко собрание?

¹² Ако сиан јекх терно пхрал, роде е Јеховастар те поможинел туке те развине желба панда повише те поможине ко собрание. Ко несаве пхувја иси повише старешине него слуга-помошникија хем бут таро адала слуга-помошникија нане терне. Адалеске со са повише џене авена ки е Јеховаскири организација, иси потреба таро терне пхраља со ка поможинен е старешиненге те грижинен пе е пхраленге хем е пхењенге. Ка ове бут бахтало ако сиан спремно те кере секоја задача со ка добине ла. Соске? Аѓаар ка кере е Јехова бахтало, ка овел тут шукар анав англо јавера хем ка ове задоволно адалеске со поможинеа е јаверен.

13-14. Сар шај те поможина амаре пхраленге хем пхењенге? (Дикх и слика тари насловно страна.)

¹³Приметин кеда е јаверенге ваљани помош. О Павле вакерѓа е Евреенге: „Ма бистрен те керен шукарипе хем одвојнен адава со иси тумен е јаверенцар соске асавке жртве мангела о Девел“ (Евр. 13:16). Адава сине корисно совет соске пало несаво време откеда добинѓе акава писмо о христијања тари Јудеја ваљани сине те мукхен пумаре кхера, пумари бути хем е фамилија кола со на сине христијања хем „те нашен ко планине“ (Мат. 24:16). Ко адава периоди бут сине важно те поможинен пе јекх јекхеа. Ако англедер више применинена сине е Павлескоро совет те делинен е јаверенцар адава со иси лен, сигурно ка овел ленге сине полокхо те навикнинен пе ко неве околностија.

 ¹⁴ Амаре пхраља хем пхења шај нане секогаш те вакерен аменге кеда ваљани ленге нешто. На пример, шај јекхе пхралескири ромни мули. Дали шај те поможина леске аѓаар со ка готвина леске? Дали ваљани леске превоз или помош околу о кхер? Шај нане те вакерел аменге ништо адалеске со на мангела те досадинел амен. Ама бут ка ценинел ако амен џаја те поможина леске бизо ов те пучел амен. На ваљани те очекујна кај некој јавер ка поможинел леске или кај ов секогаш ка вакерел аменге со ваљани леске. Пуч тут: „Ако ме аракхљовава сине ки лескири ситуација, сар би мангава сине о јавера те поможинен манге?“

15. Со ваљани те кера ако мангаја те поможина е јаверенге?

¹⁵Ов пристапливо. Сигурно пенџареа пхрален хем пхењен таро тло собрание со секогаш тане спремна те поможинен е јаверенге. Ола никогаш на керена те осетина амен сар ка пхене досадинаја лен. Џанаја кај ола тане спремна секогаш те поможинен аменге кеда ка ваљанел аменге, хем амен би мангаја те ова сар ленде. О Алан, јекх старешина со иси ле 45 берш, мангела те овел пристапливо. Кеда размислинела башо е Исусескоро пример, о Алан вакерела: „О Исус сине бут зафатимо, ама ов привлечинела сине хем е тернен хем е пхурен хем ола на дарана сине те роден лестар помош. Ола дикхле ки лесте сар некој со чаче грижинела пе баши ленге. Ме да мангава те овав сар о Исус хем о јавера те пенџарен ман сар некој сој тано пристапливо, љубезно хем со грижинела пе е јаверенге“.

16. Сар адава со ка применина о лафија таро Псалм 119:59, 60, шај те поможинел аменге пошукар те џа пало е Исусескоро пример?

¹⁶ На ваљани те обесхрабрина амен ако нашти совршено те џа пало е Исусескоро  пример (Јак. 3:2). Јекх ученико со сикљовела те цртинел нашти те овел добором шукар сар пло професори. Ама ако сикљовела таро пле грешке хем трудинела пе те керел о буќа исто сар со керела лескоро професори ов ка подобринел пе. Слично, ако применинаја адава со сикљоваја тари Библија хем трудинаја амен те ова пошукар, тегани ка шај успешно те џа пало е Исусескоро пример. (Читин Псалм 119:59, 60.)

17-18. Сави корист ка овел амен ако сикаваја сар е Исусескоро самопожртвувано стави?

¹⁷ Амаро самопожртвувано стави шај те поттикнинел е јаверен да те керен о исто. Јекх старешина со викинела пе Тим вакерела: „Несаве пхраља сој тане бут терне уле слуга-помошникија. Јекх причина соске напредујнѓе тани адаја со дикхле кај о јавера тане самопожртвувана. Акала терне пхраља поможинена хем ко собрание хем е старешиненге“.

¹⁸ Живинаја ко јекх свето коте сој тано нормално те овел пе себично. Ама е Јеховаскоро народо разликујнела пе. Е Исусескоро самопожртвувано стави влијајнѓа упри аменде хем адалеске сием одлучна те џа пало лескоро пример. Џанѓола пе, амен нашти совршено те џа пало е Исусескоро пример, ама ваљани те трудина амен кобор со шај „те џа пало лескере чекорија“ (1. Пет. 2:21). Ако џаја пало е Исусескоро пример хем сикаваја сар лескоро самопожртвувано стави, тегани ка ова бахтале соске џанаја кај кераја е Јеховаскири волја.