1. Savo šukar stavi sikavela e Jehovaskoro narodo?

BUT vreme angleder, i Biblija prorokujngja kaj e Devleskoro narodo „spremno ka nudinel pe“ te služinel e Jehovaske telo e Isuseskoro vodstvo (Ps. 110:3). Adava proroštvo ispolninela pe baš avdive. Sekova berš e Jehovaskere svedokija nakhavena milionja saatija ko propovedibe. Ola kerena adava dobrovolno ko plo trošako. Isto agjaar odvojnena vreme te šaj te poddržinen pumare phralen ko fizičko, ko emocionalno hem ko duhovno pogled. O imenujme phralja nakhavena but vreme te spreminen pe bašo točke so isi len ko sostanokija hem te posetinena e phralen hem e phenjen te šaj te ohrabrinen len. Soske kerena sa akava? Ola tane pottiknime taro mangipe — mangipe sprema o Jehova hem sprema o pašutne (Mat. 22:37-39).

2. Sprema Rimjanite 15:1-3, savo primer dengja amen o Isus?

² O Isus dengja amen but šužo primer agjaar so čhivgja e javerengere potrebe angleder ple. Amen daja amendar sa te šaj te dža palo leskoro primer. (Čitin Rimjanite 15:1-3.) Ako postapinaja agjaar ka oven amen bare bereketija. O Isus vakergja: „Poviše isi bahtalipe keda dela pe nego keda lela pe“.

3. So ka dikha ki akaja statija?

³ Ki akaja statija ka dikha nesave taro žrtve so kergja len  o Isus te šaj te služinel e javerenge hem sar šaj amen te dža palo leskoro primer. Isto agjaar, ka dikha sar šaj te bajrara amari želba te služina e javerenge.

4. Sar o Isus čhivgja e javerengere potrebe angleder ple potrebe?

⁴O Isus žrtvujngja pe e javerenge čak keda sine umorno. Razmislin so kergja o Isus keda dikhlja bute manušen so ale te dikhen le ki planina paše uzo Kapernaum. Ov sigurno sine but umorno adaleske so molingja pe celo rat. Ama keda dikhlja adale bare mnoštvo žalingja e čorolen hem e nasvalen so sine maškar lende. Hem na samo so sasljargja len, nego isto agjaar ikergja lenge jekh taro najohrabruvačka govorija — i Propoved ki gora (Luka 6:12-20).

5. Sar o familijarna poglavarija sikavena sar e Isuseskoro samopožrtvuvano stavi keda tane umorna?

⁵Sar džana o poglavarija palo e Isuseskoro primer? Zamislin tuke akaja situacija: Jekh poglavari avela peske khere but umorno tari buti. Iako leske pharo te ikerel i familijarno rat, ov sepak molinela e Jehova te del le sila. O Jehova odgovorinela ki leskiri molitva agjaar so dela le sila hem ov proučinela ple familijaja sar sekova kurko. Sar rezultati, adaja rat o čhave sikljona jekh važno pouka — kaj lengere roditelenge, o duhovna bukja tane ko prvo than.

6. Vaker primer sar o Isus žrtvujngja plo vreme te šaj te pomožinel e javerenge?

⁶O Isus odvojngja vreme e javerenge čak keda valjani sine te ovel korkori. Šaj li te zamisline tuke sar osetingja pe o Isus keda doznajngja kaj leskoro amal, o Jovan Krstitel, sine mudardo? Ov sigurno sine but tažno. I Biblija vakerela: „Keda šungja [kaj o Jovan mulo], o Isus gelo čamcoja ko jekh pusto than te šaj te ovel korkori“ (Mat. 14:10-13). Šaj te haljova soske manglja te ovel korkori. Nesave mangena te oven korkori keda tugujnena. Ama o Isus našti sine te kerel adava soske jekh baro mnoštvo reslja ko adava than angleder ov te resel athe. So kergja o Isus? Ov razmislingja bašo e manušengere potrebe  hem „pelo leske žal“ baši lende. Ov halilo kaj o manuša sine duhovno bokhale hem valjani sine lenge uteha, adaleske o Isus sine spremno odma te pomožinel lenge. Ustvari „ov počmingja te sikavel len [na samo bašo nekobor bukja nego] bašo but bukja“ (Mar. 6:31-34; Luka 9:10, 11).

7-8. Vaker jekh primer so sikavela sar o starešine džana palo e Isuseskoro primer keda nekaske taro sobranie valjani pomoš.

⁷Sar džana o starešine palo e Isuseskoro primer? Amen but ceninaja adava so kerena o samopožrtvuvana starešine baši amende! But taro bukja so kerena len, o javera taro sobranie ni na dikhena. Na primer, keda isi jekh medicinsko itno slučaj, o phralja taro Odbor bašo kontakt maškar o doktorija hem o pacientija odma pomožinena e phralenge hem e phenjenge. But puti asavke itna slučaija ovena ki ekvaš i rat! Ama adaleske soj tane sočuvstvitelna sprema pumare phralja hem phenja so nakhena taro pharo periodi akala ljubezna starešine, zaedno pumare familiencar, čhivena e javerengere potrebe angleder pumare.

⁸ Isto agjaar, o starešine pomožinena keda gradinena pe dvorane hem javera objektija hem keda isi prirodna katastrofe. Osven adava, žrtvujnena but taro pumaro vreme te šaj te sikaven amen hem te ohrabrinen amen. Sa akala phralja hem lengere familie zaslužinena jekh iskreno pofalba. O Jehova sigurno ka del len bereketi adaleske so sikavena asavko stavi! Džangjola pe, sar sa o javera, o starešine da valjani te oven uramnotežena. Ola na valjani te nakhaven doborom but vreme ko teokratska aktivnostija so nane te ovel len vreme bašo pumare familie.

9. Sprema Filipjanite 2:4, 5, savo stavi valjani te razvinen sa o hristijanja?

⁹ Čitin Filipjanite 2:4, 5. Džangjola pe, akava na važinela samo e starešinenge nego sarine valjani te ova samopožrtvuvana sar o Isus. I Biblija vakerela kaj ov „ulo sar robo“ (Fil. 2:7). Razmislin bašo adava so šaj te sikljova taro akala lafija. Jekh verno robo ili sluga ka rodel prilike te ugodinel ple gospodareske. Adaleske so siem e Jehovaskere robija hem služinaja amare phralenge sigurno mangaja panda poviše te ova lenge korisna — hem e Jehovaske hem e phralenge. Te dikha nekobor predlogija sar šaj te kera adava.

10. So šaj te puča amen?

¹⁰Ispitin tlo stavi. Puč tut: „Kobor sium spremno te žrtvujnav mlo vreme hem mli sila te šaj te pomožinav e javerenge? Na primer, so bi kerava sine ako nekoj pučela man dali šaj te posetinav jekhe pophure phrale so živinela korkori ili ko domi? Ili te ingarav jekhe pophure phenja ko sostanokija? Dali sium spremno te pomožinav keda isi potreba taro dobrovolcija te čistinel pe jekh kongresno sala ili te održinel pe i dvorana?“ Keda dengjem lafi e Jehovaske kaj ka služina leske, amen vetingjem leske kaj ka da le sa adava so isi amen ki služba baši leste. Adaleske ov tano bahtalo keda spremno trošinaja amaro vreme, sila hem materijalna sredstvija te šaj te pomožina e javerenge. Ama so šaj te kera ako dikhaja kaj valjani te kera buti ko akava?

11. Sar šaj i molitva te pomožinel amen te razvina jekh samopožrtvuvano stavi?

¹¹Molin tut e Jehovaske taro vilo. Šaj primetingjan kaj valjani panda poviše te razvine o samopožrtvuvano stavi, ama na sian spremno te kere o potrebna promene. Ako tano agjaar molin tut e Jehovaske taro vilo hem ov iskreno. Vaker e Jehovaske sar osetinea tut hem rode lestar te del tut hem i „želba hem i sila te kere adava so ov mangela“ (Fil. 2:13).

12. Sar šaj o terne phralja te pomožinen ko sobranie?

¹² Ako sian jekh terno phral, rode e Jehovastar te pomožinel tuke te razvine želba panda poviše te pomožine ko sobranie. Ko nesave phuvja isi poviše starešine nego sluga-pomošnikija hem but taro adala sluga-pomošnikija nane terne. Adaleske so sa poviše džene avena ki e Jehovaskiri organizacija, isi potreba taro terne phralja so ka pomožinen e starešinenge te grižinen pe e phralenge hem e phenjenge. Ka ove but bahtalo ako sian spremno te kere sekoja zadača so ka dobine la. Soske? Agjaar ka kere e Jehova bahtalo, ka ovel tut šukar anav anglo javera hem ka ove zadovolno adaleske so pomožinea e javeren.

13-14. Sar šaj te pomožina amare phralenge hem phenjenge? (Dikh i slika tari naslovno strana.)

¹³Primetin keda e javerenge valjani pomoš. O Pavle vakergja e Evreenge: „Ma bistren te keren šukaripe hem odvojnen adava so isi tumen e javerencar soske asavke žrtve mangela o Devel“ (Evr. 13:16). Adava sine korisno sovet soske palo nesavo vreme otkeda dobingje akava pismo o hristijanja tari Judeja valjani sine te mukhen pumare khera, pumari buti hem e familija kola so na sine hristijanja hem „te našen ko planine“ (Mat. 24:16). Ko adava periodi but sine važno te pomožinen pe jekh jekhea. Ako angleder više primeninena sine e Pavleskoro sovet te delinen e javerencar adava so isi len, sigurno ka ovel lenge sine polokho te navikninen pe ko neve okolnostija.

 ¹⁴ Amare phralja hem phenja šaj nane sekogaš te vakeren amenge keda valjani lenge nešto. Na primer, šaj jekhe phraleskiri romni muli. Dali šaj te pomožina leske agjaar so ka gotvina leske? Dali valjani leske prevoz ili pomoš okolu o kher? Šaj nane te vakerel amenge ništo adaleske so na mangela te dosadinel amen. Ama but ka ceninel ako amen džaja te pomožina leske bizo ov te pučel amen. Na valjani te očekujna kaj nekoj javer ka pomožinel leske ili kaj ov sekogaš ka vakerel amenge so valjani leske. Puč tut: „Ako me arakhljovava sine ki leskiri situacija, sar bi mangava sine o javera te pomožinen mange?“

15. So valjani te kera ako mangaja te pomožina e javerenge?

¹⁵Ov pristaplivo. Sigurno pendžarea phralen hem phenjen taro tlo sobranie so sekogaš tane spremna te pomožinen e javerenge. Ola nikogaš na kerena te osetina amen sar ka phene dosadinaja len. Džanaja kaj ola tane spremna sekogaš te pomožinen amenge keda ka valjanel amenge, hem amen bi mangaja te ova sar lende. O Alan, jekh starešina so isi le 45 berš, mangela te ovel pristaplivo. Keda razmislinela bašo e Isuseskoro primer, o Alan vakerela: „O Isus sine but zafatimo, ama ov privlečinela sine hem e ternen hem e phuren hem ola na darana sine te roden lestar pomoš. Ola dikhle ki leste sar nekoj so čače grižinela pe baši lenge. Me da mangava te ovav sar o Isus hem o javera te pendžaren man sar nekoj soj tano pristaplivo, ljubezno hem so grižinela pe e javerenge“.

16. Sar adava so ka primenina o lafija taro Psalm 119:59, 60, šaj te pomožinel amenge pošukar te dža palo e Isuseskoro primer?

¹⁶ Na valjani te obeshrabrina amen ako našti sovršeno te dža palo e Isuseskoro  primer (Jak. 3:2). Jekh učeniko so sikljovela te crtinel našti te ovel doborom šukar sar plo profesori. Ama ako sikljovela taro ple greške hem trudinela pe te kerel o bukja isto sar so kerela leskoro profesori ov ka podobrinel pe. Slično, ako primeninaja adava so sikljovaja tari Biblija hem trudinaja amen te ova pošukar, tegani ka šaj uspešno te dža palo e Isuseskoro primer. (Čitin Psalm 119:59, 60.)

17-18. Savi korist ka ovel amen ako sikavaja sar e Isuseskoro samopožrtvuvano stavi?

¹⁷ Amaro samopožrtvuvano stavi šaj te pottikninel e javeren da te keren o isto. Jekh starešina so vikinela pe Tim vakerela: „Nesave phralja soj tane but terne ule sluga-pomošnikija. Jekh pričina soske napredujngje tani adaja so dikhle kaj o javera tane samopožrtvuvana. Akala terne phralja pomožinena hem ko sobranie hem e starešinenge“.

¹⁸ Živinaja ko jekh sveto kote soj tano normalno te ovel pe sebično. Ama e Jehovaskoro narodo razlikujnela pe. E Isuseskoro samopožrtvuvano stavi vlijajngja upri amende hem adaleske siem odlučna te dža palo leskoro primer. Džangjola pe, amen našti sovršeno te dža palo e Isuseskoro primer, ama valjani te trudina amen kobor so šaj „te dža palo leskere čekorija“ (1. Pet. 2:21). Ako džaja palo e Isuseskoro primer hem sikavaja sar leskoro samopožrtvuvano stavi, tegani ka ova bahtale soske džanaja kaj keraja e Jehovaskiri volja.