1. So avdije ćerela e Jehovaso narodo?

 BERŠENCAR angleder ki Biblija hine pisimo so e Jehovaso narodo spremno ka služini olese hem so oleso Ćhavo ka vodini len (Ps. 110:3). Odova proročanstvo ispunini pe avdije. Svako berš, e Jehovase verna sluge milionija satija propovedinena i šukar vest. On odova ćerena sose mangena hem na lena pare odolese. On tane spremna te pomožinen pe phralenđe, te ohrabrinen len hem te pomožinen len te ovel len pana pobari vera ko Jehova. O starešine hem o sluge pomoćnikija odvojinena but vreme te pripreminen pe aso sastankija hem te đan ko phralja hem ko phenja te ohrabrinen len. Sose ćerena sa odova? Odolese so mangena e Jehova hem e manušen (Mat. 22:37-39).

2. Premalo Rimljanima 15:1-3, kova primer aćhavđa amenđe o Isus?

² O Isus tano but baro primer sose pobuter brininđa pe averendar nego pestar. Amen daja sa amendar te ova sar oleste. (Čitin Rimljanima 15:1-3.) Okola kola ćerena odova so o Isus ćerđa ka ovel len bare blagoslovija. O Isus phenđa: „Pobuter isi bahtalipe ked dela pe nego ked lela pe“ (Dela 20:35).

3. Sostar ka vaćera ko akava članko?

³ Ko akava članko, ka dikha so o Isus ćerđa te pomožini averenđe hem sar šaj amen te ova sar oleste. Isto ađahar, ka dikha sar šaj te ovel amen pana pobari želja te pomožina averenđe.

4. Sar o Isus mothovđa so pobuter brininđa pe averendar nego pestar?

⁴ O Isus odvojinđa vreme e manušenđe, iako hine but umorno. Razmislin so ćerđa ked o narodo alo koro leste ked hine ki gora, paše uzo Kapernaum. Sebepi so celo rat  molinđa pe e Jehovase, ov hine but umorno. Ama, ked dikhlja e manušen, ov sažalinđa pe upro okola so hine ćorore hem naborme. Ov na samo so saćarđa len, već hem ićerđa jekh govor kova but ohrabrinđa len, kova tano penđardo sar Propoved ki gora (Luka 6:12-20).

5. Sar o poglavari ki porodica šaj te mothovi soj tano sar o Isus ked tano umorno?

⁵ Sar o poglavari ki porodica mothovi soj tano sar o Isus? Zamislin akija situacija: Palo odova so celo dive ćerđa buti, ov avela ćhere hem but tano umorno. Odija rat valjani te ovel len porodično proučibe hem šaj avela lese ki godi te proučinen aver rat. Ama, ov molini pe e Jehovase te del le snaga. O Jehova odgovorini ki olesi molitva hem ov proučini pe porodicaja sar so odova ćerela svako kurko. Odija rat o ćhave sikljona jekh but važno buti: Olenge roditeljenđe tano najvažno te služinen e Jehovase.

6. Vaćer jekh primer kova mothovi so o Isus hine spremno te ovel averencar.

⁶ Čak hem ked manglja te ovel kokri, o Isus hine spremno te ovel averencar. Šaj li te zamisline sar hine e Isusese ked šunđa so oleso amal, o Jovan Krstitelj, hine mudardo? E Isusese sigurno hine but pharo. I Biblija phenela so ked „šunđa odova čamcoja đelo ko jekh pusto than te ovel kokri“ (Mat. 14:10-13). Nane amenđe pharo te haljova sose manglja te ovel kokri. But amendar mangena te oven kokri ked neko merela lendar. Ama, o Isus naštine te ovel kokri. O manuša angleder oleste već reslje ko odova than. So o Isus ćerđa ked dikhlja len? Ov razmislinđa ando odova so valjani odole manušenđe hem „sažalinđa pe upro lende.“ Ov haljilo so valjani lenđe pomoć hem uteha ando Devel hem dinđa sa pestar te pomožini lenđe. Odolese, o Isus „počminđa te sikavi len ando but buća“ (Mar. 6:31-34; Luka 9:10, 11).

7-8. Sar o starešine mothovena soj tane sar o Isus ked nekase valjani pomoć? Vaćer jekh primer.

⁷ Sar amare starešine mothovena soj tane sar o Isus? Amen but ceninaja odova so  ćerena amare starešine. But phralja hem phenja ni na đanena so o starešine sa ćerena. Na primer, ked nekase valjani hitno medicinsko pomoć, o phralja kola ćerena ko Odbor aso odnosija e bolnicencar dena sa pestar te pomožinen e phralenđe hem e phenjenđe. But putija odova ovela kasno raćate. Sebepi so haljona kobor tano olenđe pharo, amare starešine hem olenge porodice, ćhivena pe phralenge hem pe phenjenge potrebe ko prvo than.

⁸ Uzo odova, amare starešine pomožinena hem ked gradinena pe amare dvorane ja avera objektija ja ked ovena disave prirodna katastrofe. Isto ađahar, on odvojinena vreme te sikaven hem te ohrabrinen e phralen hem e phenjen. Sa akala phralja hem olenge porodice zaslužinena jekh bari pohvala. O Jehova nek blagoslovini len aso sa odova so ćerena. Naravno, sar sa avera hem o starešine valjani te oven razumna. Iako valjani lenđe vreme te ćeren sa odola buća ki Jehovasi organizacija, on ipak valjani te odvojinen vreme hem pe porodicaće.

9. Premalo Filipljanima 2:4, 5, kastar valjani te sikljova sar te ova samopožrtvovana?

⁹ Čitin Filipljanima 2:4, 5. Sare amen valjani te sikljova te ova samopožrtvovana sar o Isus, a na samo o starešine. Ki Biblija pisini so o Isus „ulo sar robo“ (Fil. 2:7). Razmislin so značinena akala lafija. Jekh šukar robo ja sluga, dela sa pestar oleso gospodari te ovel zadovoljno oleja.  Odolese so hijam e Jehovase robija hem so služinaja amare phralenđe, amen mangaja pana pobuter te ćera e Jehovase hem te pomožina amare phralenđe. Akana ka dikha sar šaj te ćera odova.

10. So valjani te puća amen?

¹⁰ Razmislin kokri tutar. Puć tut: „Da li hijum spremno te dav sa mandar te pomožinav averenđe? So bi ćerava ako bi o phralja phenena manđe te đav te posetinav jekhe phure phrale ko staračko dom ja te pomožinav jekha phure phenjaće te avel ko sastankija? Da li hijum spremno te čistinav o than kuri ka ićeri pe o kongres ja te pomožinav ked ćerela pe diso ki dvorana?“ Ked predajinđam amaro životi e Jehovase, amen phenđam lese so ka da sa so isi amen te služina olese. Ov mangela te da amaro vreme, amari snaga hem amare materijalna buća te pomožina averenđe. Odolese, ov tano bahtalo ked dikhela so ćeraja odova. So šaj te ćera ako dikhaja so diso valjani te menjina koro amende?

11. Sar šaj i molitva te pomožini tuće te ove pana pobuter samopožrtvovano?

¹¹ Ando vilo molin tut e Jehovase. Šaj haljiljan so valjani te ove pana pobuter samopožrtvovano, ama nane tut želja te menjine tut. Tegani, phrav to vilo e Jehovase. Phen lese sar osetineja tut hem rode olestar te del tut hem „želja hem snaga te ćere odova soj tano pali olesi volja“ (Fil. 2:13).

12. Sar šaj jekh terno hem krstimo phral te pomožini ki skupština?

¹² Ako hijan terno hem krstimo phral, molin tut e Jehovase te pomožini tut te ovel tut pana pobari želja te pomožine ki skupština. Ko disave phuvja, isi pobuter starešine nego sluge pomoćnikija hem but phralja kola služinena sar sluge pomoćnikija tane but phure. Odolese so ki amari organizacija avena sa pobuter manuša, valjani amenđe sa pobuter terne phralja te pomožinen e starešinenđe te brininen pe ando Devleso narodo. Ako hijan spremno te služine ko bilo kova način, ka ove bahtalo. Sose? Odolese so o Jehova ka ovel zadovoljno tuvaja, ka ove penđardo sar neko koj tano spremno te pomožini averenđe hem ka ove bahtalo so šaj te ćere odova.

13-14. So šaj te ćera te šaj te pomožina amare phralese ja phenjaće? (Dikh i slika kotar naslovno strana.)

¹³ Dikh sar šaj te pomožine averenđe. O apostol Pavle e hrišćanenđe kola živinđe ki Judeja, phenđa: „Ma bistren te ćeren šukaripe hem te delinen averencar odova so isi tumen, odolese so asavke žrtvencar ugodini pe e Devlese“ (Jevr. 13:16). Odova hine but šukar savet, sose hari palo odova so dobinđe akava savet, o hrišćanija ki Judeja morandilje te mukhen po ćher, pi buti, pe rođakonen hem „te našen ko gore“ (Mat. 24:16). Tegani hine but važno te pomožinen jekh jekhese. Ako angleder sikljilje sar te ićeren pe ko Pavleso savet, te delinen averencar odova so hine len, tegani hine lenđe polokho te živinen ko odova nevo than, iako na hine len but buća.

¹⁴ Amare phralja hem phenja šaj na ka phenen amenđe uvek so valjani lenđe. Zamislin so mulji amare phralesi romni. Šaj amare phralese valjani diso hajbase, te pomožina lese diso ko ćher ja šaj valjani lese prevoz. Ov šaj na mangela te pućel amen te pomožina lese sose mislini so ka  smetini amenđe. Ama, ki aver strana ov ka ovel zahvalno ako ka pomožina lese diso, iako na rodinđa amendar pomoć. Na valjani te mislina so neko aver ka pomožini lese ja so ov uvek ka phenel amenđe ked valjani lese diso. Puć tut: „Ako bi me ovava ki olesi situacija, sar bi me mangava neko te pomožini man?“

15. So valjani te ćera ako mangaja te pomožina averenđe?

¹⁵ De sa tutar averenđe te ovel lokho te roden tutar pomoć. Sigurno ki ti skupština isi phralja hem phenja kola tane uvek spremna te pomožinen averenđe. On niked na ka ćeren te osetina amen neprijatno sose rodinđam olendar pomoć. Amen đanaja so on tane uvek spremna te pomožinen amenđe hem amen bi mangaja te ova sar olende. O Alan, jekh starešina kova isi le 45 berš, dela sa pestar averenđe te ovel lokho te roden pomoć olestar. Ked razmislini ando Isuseso primer, ov phenela: „O Isus hine le but buti, ama hem o phure hem o terne manglje le hem na darandilje te pućen le te pomožini lenđe. On đanđe so ov ćaće brinini pe olendar. Mangava hem me sar o Isus te ovav saosećajno, te brininav man averendar hem averenđe te ovel lokho te roden mandar pomoć.“

16. Sar odova so ićeraja amen ko odova so pisini ko Psalam 119:59, 60 šaj te pomožini amen te ova sar o Isus?

¹⁶ Amen na valjani te obeshrabrina amen ako disavo puti našti te ova sar o Isus (Jak. 3:2). Jekh učeniko kova sikljola te crtini našti te crtini odobor šukar sar po učitelj. Ama, ako sikljola ando pe greške hem ako dela sa pestar te crtini sar po učitelj,  sar đala o vreme ka ovel sa pošukar. Isto ađahar, ked ićeraja amen ko odova so sikljovaja ando amaro lično proučibe, ked daja sa amendar te menjina amen, pana pobuter ka ova sar o Isus. (Čitin Psalam 119:59, 60.)

17-18. Kola blagoslovija ka ovel amen ako hijam samopožrtvovana sar o Isus?

¹⁷ Ked avera ka dikhen sar amen pomožinaja averenđe hem on ka mangen te ćeren odova. Jekh starešina kova vićini pe Tim, phenela: „Disave phralja kola tane but terne ulje sluge pomoćnikija. Jekh razlog sose ćerđe odova tano sose dikhlje so avera hine spremna te pomožinen hem manglje te oven sar olende. Akala terne phralja dena sa pestar te pomožinen ko odova so valjani e skupštinaće hem but pomožinena e starešinenđe.“

¹⁸ Živinaja ko sveto kuri o manuša dikhena samo kokri pes. Ama, maškaro Jehovaso narodo nane ađahar. O Isus hine samopožrtvovano hem amen mangaja te ova sar oleste. Naravno amen našti savršeno te đa palo olese korakija, ama šaj te da sa amendar te oponašina le (1. Petr. 2:21). Ked daja sa amendar te ova samopožrtvovana sar ov, amen hijam bahtale sose đanaja so ked ćeraja odova amen radujinaja e Jehova.