1. Sostar den penghi zor le slujitori le Iehovasche te cheren mai but anda aver?

 BUTE timpoia mai anglal, i Biblia phendea că o poporo le Devlesco „va camela anda ilo” te slujil le Iehovasche tela i îndrumarea lesche Șiaveschi. (Ps. 110:3) Dichiol-pe mișto că cadai profeția pherel-pe aghies. Ande fiesavo bărș, le slujitori le Iehovasche zeloso, cheren andi lucrarea de predicare milioanea ore. Von ci cheren cadaia caște aven pochinde, tha anda codoia că von camen anda ilo te cheren cadai buchi. Sa cadea, von cheren penghe timpo te ajutin penghe phralen te aven-le so trebul-le, te zuriaren-le, te aven pașa lende hai te ajutin-le te bariaren penghi iubirea anda o Iehova. Le phure hai le slujitori auxiliari den but ore anda pengo timpo caște pregătin teme andal întruniri hai te jian ca le phrala caște zuriaren-le. Sostar cheren sea le slujitori le Iehovasche cadai buchi? Anda codoia că iubin le Iehovas hai lenghe pașardes. (Mat. 22:37-39)

2. Cadea sar phenel-pe ando Romani 15:1-3, so exemplo mechlea amenghe o Isus?

² O Isus șiutea o miștimos averengo po iechto than. Vi amen camas te das amari zor te cheras sa cadea sar o Isus. (Citisar Romani 15:1-3.) Codola cai len-pe pala lesco exemplo va avela-le but miștimata. O Isus phendea: „Si mai but fericirea te des sar te primis”. (Fap. 20:35)

3. So va dichaia mai dur?

³ Mai dur, va avela te dichas chichiva buchia cai o Isus cărdea-le caște șiol o miștimos averengo mai opral sar lesco hai sar daisaras te cheras vi amen sa cadea. Mai but, va avela te dichas so daisaras te cheras caște camas te cheras mai but buchia anda aver.

4. Sar șiutea o Isus o miștimos averengo mai opral sar lesco?

⁴ O Isus șiutea o miștimos averengo po iechto than, vi cana sas-lo chino. Te gândisaras-ame so cărdea o Isus cana but manușa avile leste po plain, cai, sas pașă catar o Capernaum. Sea i riat cai nachlea, o Isus manglea-pe le Iehovasche hai sas-lo chino. Tha, cana dichlea le bute manușen cai sas ciore hai nasfale, cărdilea lesche mila lendar hai sas-lo duchado anda lende, cadea că camlea te ajutil-le hai sastiardea-le. Mai but, vo vi zuriardea le manușen, hai încărdea i mai șucar predica cai sas phendi vroiechdata: i Predica pa o plain. (Luca 6:12-20)

5. Sar len-pe pala o exemplo le Isusosco le șăre la familiache cana sile chine?

⁵ Sar len-pe pala o exemplo le Isusosco codola cai sile șăre la familiache. Te gândisaras-ame că, pala iech pharo ghies ca i buchi, iech șăro la familiaco arăsăl chăre zurales chino. Daștil te pachial că avelas mai mișto te na încărel i închinarea andi familia ande codoi riat. Tha manghel-pe zurales le Iehovasche te del-les zuralimos te încărel o studio andi familia. O Iehova del-les răspunso ca lesco manglimos hai încărel i închinarea, cadea sar ande fiesavo curco. Ande codoi riat, le șiave sichion vareso zurales importanto, că lenghe dada, șion po iechto than le buchia spiritualo.

6. Den iech exemplo cai sicavel că o Isus cărdea pesche timpo te sicavel averen.

⁶ O Isus cărdea pesche timpo anda aver chiar cana camlea te avel corcoro. Te gândisaras-ame chichi de duchado sas o Isus cana așundea că lesco amal, o Ioan Botezătorii, sas-lo mudardo. I Biblia phenel: „Cana așundea cadaia [că o Ioan mulea], o Isus tiliardea othar pi barca ande iech than mai țârdino, caște avel corcoro”. (Mat. 14:10-13) Amen hachiaras sostar camlea te avel corcoro. Daștil-pe că vi amen, cana merel amenghe varecon drago, țârdas-ame ande iech than dur catar averenghe iacha caște rovas. Tha o Isus ci daisardea te cherel cadai buchi. Le but manușa arăsle ande codo than țârdino angla leste. So cărdea o Isus? Vo gândisardea-pe codole ciore manușende hai „cărdilea lesche mila lendar”. Cana o Isus dichlea lenghe phagărde ile hai chichi de perade sas-le cadal manușa, vo camlea te ajutil-le sigo hai zuriardea-le. Mai but, vo „începosardea te sicavel-le but buchia”, na numai chichiva. (Mar. 6:31-34; Luca 9:10, 11)

7, 8. Den iech exemplo cai sicavel sar len-pe le phure iubitori pala o exemplo le Isusosco.

 ⁷ Sar len-pe pala o exemplo le Isusosco le phure iubitori. Anda amende si zurales cuci i phari buchi cai cheren-la le phure ande amaro miștimos. Le mai but andal buchia cai von cheren-le anda i congregația ci dichion-pe. Sar exemplo, cana iech phral silo zurales nasfalo hai trebul îngărdo co spitalo, le phrala andal comitetea cai încăren o phanglimos le spitalența, sighiaren te ajutin cadal phralen. Butivar, cadaia întâmplol-pe ando mașcar la ratiaco, tha i compasiunea caring lenghe phrala hai pheia cai sile ando pharimos, cherel-le te aven pașa lende hai te ajutin-le. Cadal cuci phure, ande iech than lenghe familiența, șion o miștimos averengo po iechto than.

⁸ Sa cadea, le phure ajutin cana vazden-pe le săli le Regatosche sau aver clădiri la organizațiache, hai len partea vi ca le operațiuni de ajutorare cana si iech dezastro. Lenghi buchi ci așel po than cade. Von cheren penghe timpo te sicaven, te zuriaren hai te aven pașa lenghe phrala. Anda codoia daisaras te das pachiv anda ilo sea cadale phralenghe hai lenghe familienghe. Camas ca o Iehova te avel lența pala o baro lașimos cai sicaven-les. Tha le phure, cadea sar le coaver phrala, trebun te arachen iech echilibro. Von ci trebulas te arăsăn te na mai aven-le timpo te len sama pe penghe familii, anda codoia că cheren prea but buchia teocratico.

9. Cadea sar phenel-pe ando Filipeni 2:4, 5, so modo gândimasco trebun te bariaren sea le creștini?

⁹ Citisar Filipeni 2:4, 5. Na numai le phure de congregație, tha savore anda  amende trebul te sicavas că camas te cheras mai but anda aver, cadea sar o Isus. I Biblia phenel anda o Isus că „lea chipo sclavosco”. (Filip. 2:7) So sichioas catar? Iech lașio sclavo, sau slujitoro, delas peschi zor te cherel mișto peschi buchi hai rodelas te avel cuci andel iacha lesche stăpânosche. Anda codoia că sam sclavi le Iehovasche hai slujisaras amare phralenghe, camas te cheras mai but anda o Iehova hai anda amare phrala. Daisaras te cheras cadaia dacă las-ame pala le buchia cai sile sicade mai dur.

10. So pușimata trebulas te șioas amenghe?

¹⁰ Dich so si ande chio ilo. Daștis te șios tuche chichiva pușimata, sar avenas: „Chichi de but camav te dav anda mânro timpo caște ajutisarav averen? So avelas te cherav, dacă manghelas-pe mandar, te jiav ca iech phral mai phuro co azilo sau te îngărav iecha pheia mai phuri ca le întruniri? Sighiarav te dav mânro ajutorii cana cherel-pe ujimos ca iech than cai încărdea-pe o congreso sau cana cherel-pe buchi ca i sala le Regatoschi?”. Cana dedichisardeam-ame le Iehovasche, phendeam lesche că va avela te folosisaras sea so si amen caște slujisaras lesche. O ilo le Iehovasco bariol cana dichel că das anda amaro timpo, amaro zuralimos hai amare buchia caște ajutisaras averen. Tha so trebul te cheras dacă das amari sama că trebul te cheras chichiva paruimata?

11. Sar daștil te ajutil-tu o manglimos te cames te ajutis mai but averen?

¹¹ Mang-tu zurales le Iehovasche te ajutil-tu. Daștil-pe că, hachiares că trebul te cheres chichiva paruimata, tha ci si tut o zuralimos cai trebul-tu. So daștis te cheres? Mang-tu butivar hai anda sea o ilo le Iehovasche. Phen sea so si pe chio ilo hai mang-les te del-tu „i dorința, hai vi i zor caște cheres so trebul”. (Filip. 2:13)

12. Sar daștil iech phral tărno te ajutil andi organizația?

¹² Dacă san iech phral tărno, mang le Iehovas te ajutil-tu te cames te cheres mai but andi congregația. Ande chichiva thema, le phure de congregație sile mai but sar le slujitori auxiliari, hai but anda cadal slujitori auxiliari ci mai sile cadea de tărne. Anda codoia că amari organizația bariol, trebun mai but phrala tărne cai te ajutin le phuren te len sama pe le phrala hai pheia andai congregația. Dacă cames te slujis oricai si nevoia, va aveia fericime. Sostar? Anda codoia că va aveia cuci andel iacha le Iehovasche, va aveia prinjiando sar iech lașio phral cai ajutil averen hai va avela te araches but bucuria.

13, 14. So daisaras te cheras caște ajutisaras amare phralen? (Dich i imaginea pa i coperta.)

¹³ Av atento te diches dacă varecon trebul ajutime. O apostolo Pavel phendea le evreienghe: „Na bâstrăn te cheren o miștimos hai te den vi averen anda so si tumen, că le Devles placian-les cadal jertfe”. (Evr. 13:16) Cado sfato sas zurales lașio! Na pa but timpo pala so arăslea lende cado lil, le creștini anda Iudeea trebuisarde te mechen penghe chăra, penghe afaceri hai le neamuri cai ci sas-le creștini hai trebuisarde „te nașen ca le plaina”. (Mat. 24:16) Si ciaces că, ande codo timpo, sas zurales importanto ca von te ajutin-pe iech averes. Dacă angla cadaia von cărde so phendea lenghe o Pavel te den vi averen anda so sas-le, siguro sas lenghe mai ușoro te paruven pengo modo viațaco ande codo nevo than cai sas-le mai țâra buchia.

¹⁴ Daștil-pe că amare phrala hai pheia ci va phenena amenghe sea o timpo dacă trebul lenghe vareso. Te gândisaras-ame, sar exemplo, ca iech phral cai silo zurales duchado anda codoia că mulea leschi  rromni. Si le phrales nevoia ca varecon te cherel lesche haben, te îngărel-les varecai sau te cherel lesche anumime buchia ando chăr? Daștil-pe că vo ci va manghela amaro ajutorii anda codoia că ci camel te șiol o pharimos pe amende. Tha, si ciaces că, va avela zurales recunoscătorii dacă amen ajutisaras-les mai anglal ca vo te manghel cadaia amendar. Ci trebul te pachias că va ajutila-les aver varecon sau că va phenela amenghe de fiesavi data sar te ajutisaras-les. Daștis te pușes-tu: „Dacă avelas te nachav prin sa codo pharimos, so ajutorii placealas-ma te avel manghe dino?”.

15. So trebul te cheras caște șioas o miștimos averengo po iechto than?

¹⁵ Phirav-tu cadea ca le coaver te daștin te pașion ușoro tutar. Siguro că vi ande chi congregația, si phrala hai pheia cai camen anda ilo te ajutin averen. Von ci sicaven niciechdata că si pharo anda lende te cheren so mangas-le. Jianas că de fiesavi data cana mangas lengo ajutorii von va dena-les amenghe hai camas te las-ame pala lengo exemplo. O Alan, iech phuro de congregație cai siles 45 bărșa, șiutea pesche o obiectivo te phiravel-pe cadea ca le phrala te daștin te pașion mai ușoro lestar. O Alan gândisardea-pe ca o exemplo le Isusosco. Vo phenel: „Chiar cana le Isusos sas-les but buchia te cherel, sea le manușa vi tărne hai vi phure iubinas-les, hai daștinas te pașion lestar caște manghen lesco ajutorii. Von dichle că o Isus sas iech manuș cai rodelas ciaces lengo miștimos. Camav anda sea o ilo te phiravav-ma cadea sar o Isus, hai te avav prinjiando sar iech phral iubitorii savestar le phrala daștin te pașion hai te avav lenghe vi iech lașio amal”.

16. Sar ajutil-ame o Psalmo 119:59, 60 te las-ame chichi mai mișto pala o exemplo le Isusosco?

¹⁶ Ci trebul te avas perade dacă ci daisaras  te las-ame pala o Isus ande iech modo perfecto. (Iac. 3:2) Cana iech manuș camel te sichiol te ghilabal, ande le dintune bărșa cana sichiol, vo ci daștil te ghilabal sa cadea de mișto sar codo cai sicavel-les. Tha, dacă sichiol andal buchia cai ci cherel-le mișto hai del peschi zor te lel-pe pala so cherel codo cai sicavel-les, țâra po țâra, vo va avela te ghilabal sea mai șucar. Sa cadea, dacă pala so studiisardeam i Biblia, cheras so sichileam hai das amari zor te cheras le paruimata cai trebun, daisaras te las-ame pala o exemplo cai mechlea-les amenghe o Isus. (Citisar Psalmo 119:59, 60.)

17, 18. So miștimata si amen cana cheras mai but anda aver, cadea sar o Isus?

¹⁷ Cana cheras mai but anda amare phrala, vi aver va camena te cheren sa cadea. Iech phuro de congregație cai bușiol Tim phenel: „Si amen andi congregația phrala tărne, chiar zurales tărne, cai barile spiritualo hai arăsle slujitori auxiliari. Von daisarde te cheren cadaia anda codoia că dichle averen sar slujinas hai camle te cheren vi von sa cadea. Cadal phrala tărne sile iech baro ajutorii anda i congregația hai andal phure ”.

¹⁸ Le mai but manușa andai lumea ande savi traisaras gândin-pe numai pende. Tha, le slujitori le Iehovasche ci sile cadea. O fapto că o Isus șiutea o miștimos averengo mai opral sar pesco arăsăl ande amaro ilo hai zuriarel-ame te camas te cheras vi amen sa cadea. Jianas că ci daisaras te las-ame ande iech modo perfecto pala lesco exemplo, tha daisaras te ‘uștaras chichi mai exacto pe lesche urme’. (1 Pet. 2:21) Cadea că, te cheras sea so daisaras caște șioas o miștimos averengo po iechto than, cadea sar o Isus, hai cadea va avela te simțosaras i bari bucuria că sam cuci andel iacha le Iehovasche.