1. Xana lizrandzru dzri va susumetela ku yentxa yini vhanu va Yehovha?

 BIBELE dzri profete khale leswaku vhanu va Xikwembu Nkulukumba a va tava ‘lava nkhinkhi’, nkama lowu va tizrelaka Yehovha na va kongomisiwa hi n’wanake. (Ps 110:3) Handle ka ku ganaganeka wuprofeta lebyi bya hetiseka swoswi. Lembe ni lembe vhanu va Yehovha va heta mawora manyingi a ntizrweni wa ku zrezra. Va yentxa leswo hi ku swi zrandzra nakone minkama yin’wanyana va tizrisa mintxhumu yavu akuva va hetisisa ntizro lowu. Va tlhela va pfuna vamakwavu hi tlhelo dzra moya, dzra nyama ni ka matitwela yavu. Vakulu ni malandzra ya wutizreli va heta mawora manyingi na va lulamisela swiyenge swavu swa mintlhanganu ni ku hamba mayendzro ya wubyisi. I yini lexi va susumetelaka ku yentxa hinkwaswu leswo? I lizrandzru ledzri va nga na dzrone ha Yehovha ni vhanu van’wana.—Mt 22:37-39.

2. He xini xikombiso lexi hi bekeliwiki ha Yesu?

² Yesu a hi bekele Xikombiso lexinene hi ku zrangisa swivileleko swa van’wana, na hine hi yentxa leswi hi nga swi kotaka akuva hi landzra xikombiso xake. (Dondzra Ba-le-Roma 15:1-3.) Loko hi yentxa leswo hi ta vona ku hetiseka ka mazritu ya Yesu lama liki: ‘A tovoko dzra ku hanana dzri tlula tovoko dzra ku hananiwa.’—Min 20:35.

3. I yini leswi hi ta ka swi vona ka xidondzro lexi?

³ Ka xidondzro lexi hi ta vona swimbeni leswi Yesu a swi yentxiki akuva a pfuna vambeni hi tlhela hi vona ndlela leyi hi nga mu yetiselaka ha yone. Hi ta tlhela hi vona leswi hi nga swi yentxaka akuva hi nyonxela ku pfuna vambeni.

4. Xana Yesu a swi kombise hi ndlela yini leswaku a a zrangisa swivileleko swa van’wana?

⁴ Yesu a a pfuna vambeni nambi loko a kazralile. Khambi dzrimbeni Yesu a hete wusiku hinkwabyu na a khongota a nhaveni leyi kumbexana a yi li kusuhi ni Kapernawumi. Yanakanya ndlela leyi a titwiki ha yone loko a vona xitsrhungu xi mu tela. Nambi leswi a a kazralile, a xi twele wusiwana a va a daha ni timbabyi. Kambe a nga yentxanga leswo ntsena, a xi bekele wukaneli lebyi tivekaka ngopfu swanga dondzro ya le nhaveni.—Lk 6:12-20.

5. Xana tinhloko ta mindangu ti nga xi yetisela hi ndlela yini xikombiso xa Yesu loko ti kazralile?

⁵ Xana tinhloko ta mindangu ti nga xi yetisela hi ndlela yini xikombiso xa Yesu. Yanakanya hi xikombiso lexi: A hi nge makwezru lwa nga nhloko ya ndangu a buya he ntizrweni na a kazrale ngopfu swinene. A yanakanya ni ku txintxa siku dzra wugandzreli bya ndangu, kambe a khongota ka Yehovha a mu kombela kuva a mu pfuna akuva a wugandzreli bya ndangu byi famba hi siku ledzro. Yehovha a hlamula xikhongoto xake a va makwezru a swi kota ku fambisa wugandzreli bya ndangu. Hi ndlela leyo vana va dondzra mhaka ya lisima swinene. Va dondzra leswaku vapswele va zrangisa mintxhumu ya lisima a wuton’wini byavu.

6. Xana Yesu a va pfunise kuyini vhanu hi nkama lowu a a navela kuva wuswake?

⁶ Yesu a tinyike nkama wa ku va ni vambeni nambi loko a navela ku va wuswake. U same u yanakanyisisa hi ndlela leyi Yesu a titwiki ha yone loko a yingele leswaku Yohane Mubabatisi a dlayiwile? Yesu a xukuvale ngopfu swinene. Bibele dzri li: “Loko a yingela leswo [leswaku Yohane a dlayiwile], Yesu a khwela boti a ya mbangwini wa kukazri akuva a ya va wuswake.” (Mt 14:10-13) Swa twisiseka leswaku ha yini Yesu a yentxe leswo. Vanyingi loko va kumana ni swiyimu swa ku bindzra va vona swi yampswa kuva va titsrhamela wuswavu. Yesu a a djula ku yentxa swoswo kambe a swi kotekanga. Hikusa loko xitsrhungu xi yingele leswaku Yesu a ya kwini, xi tsrutsrumile xi mu zrangela ku tlhasa. Kutani Yesu a yentxe yini? A yanakanyisise hi xiyimu xa vhanu lavayani kutani a  ‘a va twela vuzrombe’. Yesu a swi xiyile leswaku a va djula mpfunu ni ntxhavelelo wa Xikwembu Nkulukumba, kutani ‘a sungula ku va dondzrisa [ku nga li mintxhumu yitsrongo kambe] leswa ku tala’.—Mr 6:31-34; Lk 9:10, 11.

7-8. Nyikela xikombiso xa ndlela leyi vakulu va yetiselaka Yesu ha yone loko makwezru wa kukazri a vilela mpfunu.

⁷ Ndlela leyi vakulu va nga yetiselaka xikombiso xa Yesu ha yone. Hi swi nyika lisima hinkwaswu leswi vakulu va hi yentxelaka swone! Vamakwezru vanyingi bandleni a va swi tivi leswaku vakulu va tikazrata ku ya tlhasa kwini. Hi xikombiso loko makwezru wa kukazri a khomiwa hi mavabyi ya ku kazrata swa kola ni kola, vakulu lava tizraka ka Ndzrawulu ya ku Vulavulisana ni Swipiritana va hatla va mu tsrutsrumela. Hakanyingi leswo swi humelela a makazri ka wusiku! Kambe vamakwezru lava va ku zrandzreka ni mindangu yavu, va zrangisa swivileleko swa vamakwavu a bandleni. Va yentxa leswo hi kola ka ntwelawusiwana lowu va nga na wone hi vamakwavu lava nga ka xiyimu xa ku bindzra.

⁸ Vakulu va tlhela va patsreka ku yakiweni ka Tiyindlu ta Wugandzreli, ni le ka tiyindlu tin’wana leti tizrisiwaka hi nhlengeletanu. Va tlhela va patsreka ka ntizro wa ku lamulela lava weliwiki hi timhangu, hi nga ha hlayi ni nkama lowu va wu hetaka na va dondzrisa ni ku tiyisa bandla. Vamakwezru lava hinkwavu ni mindangu yavu va faneliwa hi ku kulungeliwa. Hi khongota kuva Yehovha a tama a va tovokisa! Kambe ku fana na hine, vakulu na vone va fanela ku dzringanisela. A va fanelanga va heta nkama wunyingi na va vonelela timhaka ta bandla va dzrivala ni mindangu yavu.

9. Hi ku ya hi Ba-le-Filipi 2:4, 5, xana vakriste va fanela ku va ni mayanakanyela muni?

⁹ Dondzra Ba-le-Filipi 2:4, 5. Ku hlaya ntiyiso, a hi vakulu ntsena va fanelaka ku landzra xikombiso xa Yesu xa ku zrangisa swivileleko swa van’wana, na hine hi fanela ku xi landzra. Bibele dzrili Yesu ‘a teki xiyimu xa nandzra’. (Flp 2:7) Yanakanya hi leswi hi nga swi dondzraka ka mhaka leyi. Nandzra kumbe mutizri, minkama hinkwayu a djuletela tindlela ta ku nyonxisa n’winyi wake. Hine hi malandzra ya Yehovha tlhelo vatizreli va vamakwezru, xileswo hi djula ku yetisela xikombiso xa Yesu ni ku yentxa hinkwaswu leswi hi nga swi kotaka akuva hi nyonxisa Yehovha ni ku tizrela vamakwezru. A hi voneni mayentxela ya kone.

10. He swini swivutiso leswi nga hi pfunaka u tikambela?

¹⁰ Kambisisa swiyentxo swaku. Tivutise leswi: ‘Xana ni tiyimisele ku titsrona swa kukazri ku ya tlhasa kwini akuva ni pfuna vamakwezru? Hi xikombiso, xana ni nga kuyini loko no kombeliwa ku ya pfuxela makwezru lwa duwhaliki ka muti lowu hlayisaka swiduhwati? Kumbe ku nyika boleya makwezru lweyi a duhwaliki akuva a ya mintlhanganwini? Xana ni hatla ni tinyiketela akuva ni ya basisa yindlu ya wugandzreli kumbe yindlu ya tinhlengeletanu?’ Nkama lowu hi babatisiwiki hi dumbise Yehovha leswaku hi ta mu tizrela hi lani hi nga kotaka ha kone. Yin’we ya tindlela ya ku yentxa leswo i ku tizrisa nkama wezru ni leswi hi nga naswu akuva hi pfuna vamakwezru nakone Yehovha a nyonxa ngopfu swinene loko a hi vona hi yentxa leswo. Kambe i yini leswi hi fanelaka ku swi yentxa loko hi xiya leswaku hi fanela ku yampswisa swa kukazri?

11. Xana xikhongoto xi nga hi pfunisa kuyini akuva hi navela ku pfuna vambeni?

¹¹ Khongota ka Yehovha swi sukela mbilwini. Swi nga ha yentxeka u xiya leswaku u fanela ku zrangisa swivileleko swa van’wana. Kambe u xiya leswaku a swi ku nyiki ntamu wa ku yentxa leswo. Loko u titwa hi ndlela leyo, khongota ka Yehovha swi sukela mbilwini u mu byela ndlela leyi u titwaka ha yone na wu nga djikadjiki. Kombela Yehovha leswaku a ku nyika ntamu wa ku zrandzra ni ku tizra kumbe ku yentxa.—Flp 2:13.

12. Xana mumpshwa lweyi a babatisiwiki a nga pfunisa hi ndlela yini a nhlengeletanwini?

¹² Loko u li mumpshwa lwa babatisiwiki, khongota ka Yehovha u kombela leswaku a ku pfuna leswaku u va ni ku navela ka ku yentxa leswi yengetelekiki a bandleni. A matikweni man’wana ku ni vakulu vanyingi ku tlula malandzra ya wutizreli, nakone malandzra wolawu ya wutizreli a ma a li mampshwa. Leswi nhlengeletanu yi yaka yi kula, ku djuleka vampswa; leswaku va ta pfuna vakulu a ku bekiseni ka vhanu va Yehovha. Loko u tinyikela akuva u yentxa leswi yengetelekiki, handle ka ku ganaganeka u ta nyonxa. Ha yini? Hikusa u ta nyonxisa Yehovha, u dumbiwa hi vamakwezru, u tlhela u vani ku nyonxa loko tisiwaka hi ku pfuna vambeni.

13-14. Hi nga yentxa yini akuva hi pfuna vamakwezru? (Vona xifaniso lexi nga ka kapa.)

¹³ Xiyisisa swivileleko swa vambeni. Mupostola Pawulo a byele vakriste va le Yudeya a ku: ‘Kambe n’wi nga dzrivali wunene ni ku yavelana swenu, hikusa Xikwembu Nkulukumba a tsrhavisiwa hi timhamba leta ku tanu.’ (Hb 13:16) Lexi ku ve xitsratsriyo lexinene! Ntsrhakunyana ka nkama na va ha ku yamukela papela ledzro, vakriste va le Yudeya va sindzriseki ku ‘tsrutsrumela a tinhaveni’ va  siya makaya yavu, mabindzru ni maxaka yavu lama nga liki vakriste. (Mt 24:16) Hi nkama lowo swi djule leswaku vamakwezru va pfunana. Loko a li leswaku a va swi tolovelile ku pfunana swi va nabyalelile ku hanya hi switsrongo.

¹⁴ A hi minkama hinkwayu vamakwezru va hi byelaka loko va vilela swa kukazri. Hi xikombiso, swi nga yentxeka makwezru wa kukazri a li ku hlatiyeleni hi leswi a feliwiki hi nsati. A nga va a vilela mpfunu ka mintizro ya le kaya, kumbe a vilela swakuda kumbe a pfumala mali ya xapa. Swi nga yentxeka a nga kombeli mpfunu hi leswi a nga djuliki ku kazrata vamakwezru. Handle ka ku ganaganeka, a nga nyonxa ngopfu loko hi mu nyika mpfunu lowu a wu vilelaka nambi a nga kombelanga. A hi fanelanga hi tibyela leswaku ku ni lava nga mu pfunaka kumbe hi ku loko a vilela mpfunu a ta hlaya. Tivutise leswi: ‘Loko a no va ka xiyimu xa ku fana ni xake, xana a ni ta navela leswaku va ni yentxela yini?’

15. Hi fanela ku yentxa yini loko hi djula ku pfuna van’wana?

¹⁵ Ngheneka. Nakunene ku ni vamakwezru a bandleni dzraku nava nakunene va lulameliki ku pfuna van’wana. Nakone va yentxa leswo hi mbilu ya ku basa. Minkama yin’wana ha swi tiva leswaku loko hi vilela mpfunu, va ta hi pfuna. Handle ka ku ganaganeka, vamakwezru lava i xikombiso xa ku xi yetisela! Na a yanakanyisisa hi leswo, makwezru Alan, lweyi a nga ni kolomu ka 40 wa malembe, a hlaye leswi: “Yesu a a tsrhama na a khomekile kambe vhanu va tintanga hinkwatu a va titwa na va ntsrhunxekile akuva va mu yela va ya kombela mpfunu. A va swi vona leswaku hakunene Yesu a a zron’weka ha vone. Ni djula ku yetisela Yesu hi ku vani xinghanu, ni va lwa nghenekaka ni ku pfuna van’wana.”

16. Xana ku tizrisa nsinya wa nawu lowu nga ka Amapsalma 119:59, 60 swi nga hi pfunisa kuyini ku yetisela Yesu hi le kusuhi?

 ¹⁶ A hi fanelanga ku hela ntamu loko hi nga swi koti ku yetisela Yesu hi lani ku heleliki. (Yk 3:2) Yanakanya hi lweyi a dondzrelaka ku dezenyara, lweyi a hlulekaka ku dezenyara ku fana ni mudondzrisi wake. Kutani a dondzra ka swihoxo swake nakone a dzringisa ku yetisela mudondzrisi wake hi le kusuhi. Hi ku famba nkama wa yampswisa. Hi lani ku fanaka, loko hi tizrisa leswi hi swi dondzraka a Bibeleni, hi tlhela hi tikazratela ku yampswisa, hi ta swi kota ku yetisela Yesu hi kusuhi swinene.—Dondzra Amapsalma 119:59, 60.

17-18. Xana ma ta va wani mabindzru ya ku landzra xikombiso xa Yesu xa ku zrangisa swivileleko swa vambeni?

¹⁷ Loko hi tinyiketela ku pfuna vambeni, van’wana va ta susumeteleka ku hi pfuna. Nkulu lweyi a vitaniwaka Tim a te: “Hi ni vampshwa lava yentxiki nhluvuku va va va bekiwa swanga malandzra ya wutizreli. Van’wana a va ha li vampswa swinene. Leswo swi koteki hi leswi va yetiseli vamakwezru lava a va tiyimisele ku pfuna van’wana. Vampshwa lava va pfuna ngopfu a bandleni va tlhela va pfuna ni vakulu.”

¹⁸ Hi hanya ka misava leyi vhanu va kalaka va nge na mhaka ni vambeni. Kambe vhanu va Yehovha a va na mahanyela lawo. Swi hi kumba ngopfu ku vona ndlela leyi Yesu a a zrangisa swivileleko swa van’wana ha yone. Nakone hi tiyimisele ku landzra xikombiso xake. I ntiyiso leswaku a hi nge swi koti ku landzra xikombiso xa Yesu hi lani ku heleliki. Kambe hi nga swi kota ku landzra mintila yake hi le kusuhi. (1Pe 2:21) Loko hi yentxa hinkwaswu hi nga swi kotaka akuva hi zrangisa xikombiso xa Yesu xa ku zrangisa swivileleko swa van’wana, hi ta nyonxa hi ku tiva leswaku Yehovha a ta hi yamukela.