1. Yihowa manni hiikkonne dancha coye assanni no?

 LOWO diri albaanni Maganu manni Yesuusi aanno biddishsha harunse, Yihowara ‘baxe’ soqqamannota masaalloonni. (Far. 110:3) Tini masaalo yannankera woˈmitanni no. Diru kiiro, diinaggaabbe soqqantannoti Yihowa soqqamaano sabbakate looso loossanni lowo xibbe miliyoone ikkitanno saate sayissanno. Insa tenne assitannohu uminsa fajjonni woxe baantinsakkinniiti. Qoleno insa yanna gaaˈmite, ammanate roduuwinsara hasiisannore assite kaaˈlitannonsa, sheshifachishshannonsa hattono ayyaanaamittetenni jawaachishshannonsa. Shoomantino roduuwi gambooshshunniwa shiqishshanno kifilla qixxaabbanninna roduuwa towaattanni lowo yanna guddanno. Yihowa manni tenne baala assanno gede kakkayisannonsari maati? Yihowaranna mannaho noonsa baxilleeti.—Mat. 22:37-39.

2. Roomu Sokka 15:1-3 kultanno garinni Yesuusi kaajja lawishsha ikkinonkehu hiittoonniiti?

² Yesuusi umisi hasattonni roore wolootu hasatto balaxisiise kaajja lawishsha ikkinonke. Ninkeno isi faale haˈrate dandiinummore baala assinanni heeˈnoommo. (Roomu Sokka 15:1-3 nabbawi.) Yesuusi faale hadhannori lowo atoote afidhanno. Isi, “Adhannonkunni aannohu baˈraaˈrinoho” yiino.—Soq. 20:35.

3. Konni birxichira maa ronseemmo?

³ Konni birxichira, Yesuusi umisi horo agure woloota kaaˈlate assinoha mito coye laˈneemmo hattono ninkeno isi faale haˈra dandiineemmohu hiittoonniitiro ronseemmo. Qoleno woloota  kaaˈlate hasattonke lexxitanno gede assiˈra dandiineemmohu hiittoonniitiro xiinxallineemmo.

4. Yesuusi umisi hasattonni roore wolootu hasatto balaxisiisinohu hiittoonniiti?

⁴ Yesuusi daafure noo yannara nafa woloota kaaˈlino. Hanni mitte yannara Yesuusi ilaalu mule heeˈreenna lowo manni isiwa dayi yannara isi ma assinoro laˈno; kuni bayichi Qifirinahoomi qooxeessa ikkikkinni digatino. Yesuusi hashsha woˈma huuccatto assiˈranni galino. Isi daafurinoti dihuluullissannote; ikkirono Yesuusi mannu giddo noo buxanenna dhiwantinore lae lowo geeshsha mararino. Yesuusi insa hurse agurinoha calla ikkikkinni baalantenni roortannota lowo geeshsha jawaachishshanno lallawo shiqishinonsa; tenne lallawo Ilaalu Sibikate yinanni.—Luq. 6:12-20.

5. Maatete umo ikkitinori daafurte noo yannara nafa Yesuusi lawishsha harunsa dandiitannohu hiittoonniiti?

⁵ Maatete umo ikkitinori Yesuusi lawishsha harunsitanni noo gara. Hanni mitto lawishsha laˈno: Mittu anni barra woˈma loosanni hose daafurinohu hawarro minira dayino. Isi hakko hashsha assidhannota Maatete Magansiˈra wolu barrira sayisate hedinoha ikkirono, xiinxallo massaganno gede kaaˈlasira Yihowa huucciˈrino. Yihowa kaaˈleennasi isi bashshonte gede Maatete Magansiˈra massagino. Oosonsa hakko hashsha lowo geeshsha hasiisanno roso rossino; insa anninsanna amansa baalunku coyinni roore ayyaanaamittete coye balaxisiissannota wodanchitino.

6. Yesuusi callisi heeˈra hasiˈranno yanna woloota kaaˈlate horoonsiˈrinohu hiittoonniitiro leellishanno lawishsha kuli.

⁶ Yesuusi callisi heeˈra hasiˈrino yannara nafa woloota kaaˈlino. Yesuusi Cuuaancho Yohaannisi goowa murre shinoonnita macciishshi woyite hiitto ikkinoro heda dandiineemmo. Yesuusi lowo geeshsha dadillinoti dihuluullissannote. Qullaawu Maxaafi togo yaanno: “Yesuusi Yohaannisi reyo macciishshe, yowolote ofolle mannu nookkiwa hasiˈre callisi haˈri.” (Mat. 14:10-13) Isi callisi heeˈra hasiˈrinohu mayiraatiro huwata diqarrissannonke. Ninke giddo batinyu shiiˈne xissiisiˈneemmo woyite callootinke heeˈra hasiˈneemmo. Yesuusira kayinni coyi hedino gede diˈˈikkinosi. Yesuusi haˈrara hedinowa lowo manni balaxe  marino. Yesuusi maa assiyya? Isi mannaho hasiisannore hedino; hattono ‘mararinonsa.’ Yesuusi insara ayyaanaamittete jawaante hasiissannonsata huwatino hattono hasiisannonsare bayichonkonni wonshinonsa. Isinni Yesuusi insara ‘lowo coye rosiisinonsa.’—Maq. 6:31-34; Luq. 9:10, 11.

7-8. Roduuwaho kaaˈlo hasiissanno woyite cimeeyye insa kaaˈlite Yesuusi faale haˈra dandiitanno gara leellishanno lawishsha kuli.

⁷ Shaqqadda songote cimeeyye Yesuusi lawishsha harunsitanno gara. Insa uminsa horo agurte ninke kaaˈlate assitannorira lowo geeshsha galanteemmonsa! Batinyu roduuwi cimeeyye loossannoha roore looso diaffanno. Lawishshaho, mitu roduuwira hedeweelcho xagisira hasiissannonsa woyite, Hospitaalete Ledo Xaadissanno Komite insa bayichonkonni kaaˈlate woˈnaaltanno. Duucha woyite togoo hedeweelcho kalaqantannohu hashshu taalootiraati! Ikkollana muxxe ikkitinori kuri cimeeyye qarru amadinonsa roduuwa marartanno daafira, insanna maatensa uminsa hasattonni roore ammanate roduuwinsa hasatto balaxisiissanno.

⁸ Songote cimeeyye Gambooshshu Addaraashenna wole Magano magansiˈnanni minna minate loosono kaaˈlitanno; hattono kalaqamu dano kalaqantanno woyite roduuwa kaaˈlitanno. Qoleno songonke cimeeyye ninke rosiisate, jawaachishatenna kaaˈlate sayissannota lowo yanna heda dandiineemmo. Kuri roduuwanna maatensa lowo geeshsha galata hasiissannonke. Insa uminsa hoˈro agurte assitannorira Yihowa maassiˈronsa! Hige cimeeyyeno wolu manninte gede quwa saˈannokkire ikka hasiissannonsa. Insa songote looso, maatensa towaaxxitanno yanna hoogga geeshsha loosa dihasiissannonsa.

9. Filiphisiyusi Sokka 2:4, 5 kultanno garinni baalunku Kiristaani hiikkonne akata lossiˈra hasiissannonsa?

⁹ Filiphisiyusi Sokka 2:4, 5 nabbawi. Cimeeyye calla ikkikkinni ninke baalunku Yesuusi gede uminke hasattonni roore wolootu hasatto balaxisiisa rosa hasiissannonke. Qullaawu Maxaafi Yesuusi, “borojjichu daniha” ikkinota kulanno. (Fil. 2:7) Hanni konni qummeeshshinni maa ronseemmoro hendo. Mittu borojjichi woy soqqamaanchi mootichasi hagiirsiisanno faro hasiˈranno. Yihowa borojjoota ikkinoommohuranna roduuwanke kaaˈlineemmo daafira, albinni roore Yihowa hagiirsiisannorenna roduuwanke kaaˈlannore assa hasiˈneemmoti dihuluullissannote. Aante noo hedo xiinxallanke tenne assate kaaˈlitannonke.

10. Ninkeneeto hiikkuri xaˈmuwa xaˈma dandiineemmo?

¹⁰ Akataˈne layidhe. Kiˈneneeto aante noo gedee xaˈmo xaˈme: ‘Umiˈya horo agure woloota kaaˈlate maahoyye yeemmo? Lawishshaho, mitto jawa rodoo mare laeemmo gede woy mitte jawa rodoo gambooshshe haaˈre haˈreemmo gede kulliero ma asseemmo? Qoqqowu gambooshshi bayicho woy Gambooshshu Addaraashe feyanno manni hasiisiro feyate maahoyye yeemmo?’ Yihowa heeshshonke isira sayinse uyinoommori baalunku yannankenna wolqanke mararrummokkinni isira soqqammammoranna, roduuwanke kaaˈlinammora hasiˈranno. Woyyeessiˈra hasiissannonkeri noota huwantummoro maa assa dandiineemmo?

11. Huuccatto uminke horo agurre woloota kaaˈlineemmo gede kaaˈlitannonkehu hiittoonniiti?

¹¹ Yihowa eeggifattine huuccidhe. Hanni woyyeessiˈra hasiissannoheri nooheta wodanchoottoha ikkirono hatto assate hasatto hoogootto yine hendo. Hatto ikkiro Yihowa eeggifatte huucciˈri. Giddokkita maaxidhooti. Macciishshamannohere Yihowara hasaaphi; hattono isi, ‘hasattonna wolqa’ aannohe gede huucciˈri.—Fil. 2:13, NW.

12. Cuuantinori wedellu roduuwi songo kaaˈla dandiitannohu hiittoonniiti?

¹² Ati cuuamootto wedellichaatiro Yihowa songokki giddo noo roduuwa albinni roore kaaˈlatto gede hasatto aahera huucciˈri. Mite gobbara songote soqqamaano kiironni, cimeeyyete kiiro roortanno; songote soqqamaano giddo batinyu mereerimu dirireeti woy jajjabbaho. Yihowa dirijjite lexxitu kiiro, Yihowa manna towaattannori wedellu roduuwi hasiissanno. Kaaˈlo hasiissannowa baalawa soqqamate maahoyye yiittoro hagiirraamo ikkatto. Mayira? Korkaatuno, Yihowa hagiirsiisatto, suˈnaadu suˈmi heeˈrannohe hattono woloota kaaˈline afiˈnanni harshammo afiˈratto.

13-14. Roduuwanke kaaˈlate maa maa assa dandiineemmo? (Aaniidi qoolira noo misile lai.)

¹³ Kaaˈlo hasiissannosihu ayetiro hedde. Soqqamaasinchu Phaawuloosi Ibiraawootu Kiristaana togo yee amaalino: “Dancha coye assanna afidhinoonnire woleho beeha habbinoonte. Magano hagiirsiissannoti hattoo kakkalooti.” (Ibi. 13:16) Tini kaaˈlitanno amaaleeti! Yihudu Kiristaani tini sokka iillitunsahunni shiima yanna gedensaanni minensa, daddaˈlitanni noo daddalo, hattono Kiristaana ikkinokki fiixansa agurte ‘ilaallate widira higge xooqa’ hasiissinonsa. (Mat. 24:16) Hatte yannara insa mimmito rakke kaaˈla hasiissinonsati dihuluullissannote. Isa hakkuyira albaanni, noonsare wolootu ledo beeqqite Phaawuloosi amaalino amaale loosu aana hosiissinoha ikkiro, martinowa haaro heeshsho rosa qarra diˈˈikkitannonsa.

¹⁴ Roduuwinke mayi hasiisannonsaro duucha woyite kula hooggankera dandiitanno. Lawishshaho mittu rodii minaama shiiˈre xissiisiˈrino yine hendo. Konni rodiira sagale worannosihu,  hodhishsha afiˈranno gede kaaˈlannosihu woy mini giddo looso kaaˈlannosihu hasiisannosi? Isi ninke qarrisa giwe kaaˈleˈˈe yaa hoogara dandaanno. Kayinni uminkenni kaˈne hasiisannosire assine kaaˈlinummosiro lowo geeshsha hagiidhara dandaanno. Iso wolu manni hasiisannosire asse kaaˈlanni noosihu gede assine woy kaaˈlo hasiissusiro kulannonke yine heda dihasiissannonke. Kiˈneneeto togo yitine xaˈme: ‘Ani iso ikkoommoro maa assine kaaˈlinaera hasiˈreemmo?’

15. Woloota kaaˈla hasiˈneemmoha ikkiro maa assa hasiissannonke?

¹⁵ Huxuxxi yinikkinni shinqannire ikke. Songoˈne giddo, woˈmanka woyite woloota kaaˈlate qixxaabbino roduuwi noota affinoonniti dihuluullissannote. Kuri roduuwi qarrinsanni heeˈnoommonsahu gede assine hendammora dihasidhanno. Kaaˈlo hasiissannonke woyite kaaˈlitannonketa anfoommo; ninkeno insa gedeere ikka hasiˈneemmo! Aleeni yinannihu 40 diri balla ikkannosihu songote cimeessi, huxuxxi yinikkinni shinqanniha ikka hasiˈrino. Aleeni Yesuusi lawishsha hiince togo yiino: “Yesuusira loosu batiˈrannosiha ikkirono, baalunku manni yaano ajuno akkaluno isiwa daye huxuxxi yiikkinni kaaˈlannonsa gede kuˈlanno. Kuni manni Yesuusi insa daafira addinta hedannota afino. Anino Yesuusi gedeeha yaano huxuxxi yinikkinni shinqanniha, faasiiqanna mannaho hedeemmoha ikka hasiˈroommo.”

16. Faarso 119:59, 60 noo hedo loosu aana hosiisa Yesuusi lawishsha seekkine harunsineemmo gede kaaˈlitannonkehu hiittoonniiti?

¹⁶ Woˈmunni woˈma Yesuusi faale haˈra hoongummoro hexxo mudha dihasiissannonke. (Yai. 3:2) Mittu rosaanchi, rosiisaanchisi assannore woˈmunni woˈma assa didandaanno. Ikkirono soˈrinore biddi assiˈre rosiisaanchisi lawishsha seekke harunsate sharramannoha ikkiro dandoosi woyyeessiˈranni haˈranno. Hatteente gede ninkeno Qullaawu Maxaafinni  ronsoommore loosu aana hosiinseemmohanna soˈronke taashshiˈrate dandiinummore baala assineemmoha ikkiro, Yesuusi faale haˈra dandiineemmo.—Faarso 119:59, 60 nabbawi.

17-18. Yesuusi gede uminke horo agurre woloota kaaˈlinummoro mayi atoote afiˈneemmo?

¹⁷ Uminke horo agurre woloota kaaˈlineemmo woyite wolootuno hatto assate kaˈanno. Tiimi yinannihu songote cimeessi togo yiino: “Songonke giddo ayyaanaamittetenni lophite songote soqqamaano ikkite shoomantinori wedellu roduuwi no; insa giddo gamu shiimmaaddaho; insa hatto assate kaˈinohu wolootu uminsa horo agurte roduuwa kaaˈlitanna laˈino daafiraati. Kuri roduuwi songonna cimeeyye lowo geeshsha kaaˈlitino.”

¹⁸ Heeˈnoommohu umonsa calla baxanno manni woˈmino alameraati. Yihowa manni kayinni hattooha diˈˈikkino. Yesuusi umisi horo agure woloota kaaˈlino gari dhagge ikkannonke; ninkeno isi lawishsha harunsate murciˈnoommo. Yesuusi lawishsha guutu garinni harunsa didandiineemmo; ikkirono isi ‘faale’ seekkine harunsa dandiineemmo. (1 Phe. 2:21) Yesuusi gede uminke horo agurre woloota kaaˈlate dandiinummore baala assinummoro, Yihowa hagiirsiinseemmo daafira ninkeno hagiirraamma ikkineemmo.