1. O ā uiga mataʻina o loo faaalia e tagata o Ieova?

UA LEVA ona valoia e le Tusi Paia le “ofo atu ma le lotomalie” e tagata o le Atua o i latou lava e auauna iā Ieova, i lalo o le taʻitaʻiga a lona Alo. (Sala. 110:3) Ua faataunuuina moni lava lenā valoaga i aso nei. I tausaga taʻitasi, e faaalu e auauna maelega a Ieova le faitau miliona o itula i le galuega talaʻi. E latou te tauofo e faia lenā galuega e aunoa ma se totogi. E faaalu foʻi lo latou taimi e fesoasoani ai i uso tapuaʻi i le itu faaletino, taufaalogona ma le faaleagaga. O toeaina ma auauna o le faiva e latou te faaaluina foʻi le tele o itula, e sauniuni ai vaega mo sauniga ma faia ai asiasiga faaleoleo mamoe i o latou uso ma tuafāfine. O le ā ua uunaʻia ai i latou e faia faapea? Talu ai ona e latou te alolofa iā Ieova ma o latou tuaoi.​—Mata. 22:37-39.

2. E pei ona taʻua i le Roma 15:1-3, o le ā le faaaʻoaʻoga na faataatia e Iesu?

² Na faataatia e Iesu se faaaʻoaʻoga mataʻina o le faamuamua o manaʻoga o isi nai lo ona lava manaʻoga. O lea, e tatou te faia le mea e sili e mulimuli ai i ona tulaga aao. (Faitau le Roma 15:1-3.) E faamanuiaina i latou e faaaʻoaʻo iā te ia. Na fetalai Iesu: “E sili le fiafia e maua i le foaʻi atu i lo o le talia mai.”​—Galu. 20:35.

3. O le ā o le a tatou talanoaina i lenei suʻesuʻega?

³ I lenei suʻesuʻega o le a tatou iloiloina ai nisi o faataulaga na faia e Iesu mo isi, ma auala e tatou te faaaʻoaʻo ai i lana faaaʻoaʻoga. O le a tatou talanoaina foʻi le auala e faatuputeleina ai lo tatou naunau e auauna mo isi.

4. Na faapefea ona faamuamua e Iesu manaʻoga o isi nai lo ona lava manaʻoga?

⁴Na fesoasoani Iesu i isi e ui ina lē lavā. Seʻi manatu i le tali atu a Iesu, ina ua ō atu se motu o tagata e faafeiloaʻi o ia i se auvae mauga e latalata i Kapanaumi. Na faaalu e Iesu le pō atoa e tatalo ai. Atonu na matuā lē lavā o ia. Ae ina ua ia vaaia le motu o tagata, ona alofa mutimutivale lea o ia i ē matitiva ma mamaʻi na iai. O lea, e lē gata na ia faamālōlōina i latou, ae na ia faia foʻi se lauga e sili ona faalaeiau na uunaʻia ai le aofia, lea ua taʻua o le lauga i luga o le mauga.​—Luka 6:12-20.

5. E faapefea ona faaaʻoaʻo ulu o aiga i uiga faataulaga o Iesu pe a lē lavavā?

⁵Le auala o loo faaaʻoaʻo ai ulu o aiga iā Iesu. Seʻi mafaufau i le mea lenei: Ua alu le aso atoa o faigaluega le ulu o se aiga, ma ina ua taunuu i le fale ua matuā lē lavā lava. E ui ina faaosoosoina o ia e lē faia le tapuaʻiga a le aiga na faatulaga mo lenā afiafi, ae na ia faatoga atu iā Ieova mo le malosi e faia ai. Na tali Ieova i lana tatalo, ma na faia le tapuaʻiga a le aiga e pei ona masani ai. Na aʻoaʻoina e le fanau se lesona tāua i lenā afiafi, e faamuamua e o latou mātua mea faaleagaga nai lo se isi lava mea.

6. Aumai se faataʻitaʻiga o le auala na faataulaga ai e Iesu le taimi na tatau ona faaalu mo ia lava, e fesoasoani ai i isi.

⁶Na faaaogā e Iesu lona taimi e fesoasoani ai i isi e ui na manaʻo e faaalu mo ia lava. Pe e mafai ona e faaata faalogona faavauvau o Iesu ina ua fasiotia lana uō o Ioane le Papatiso? Ua faapea mai le Tusi Paia: “Ina ua faafofoga Iesu [ua maliu Ioane], ona tuumuli ai lea o ia i le vaa, ua na o ia i se mea tuufua.” (Mata. 14:10-13) E tatou te malamalama i le māfuaaga na manaʻo ai Iesu e tuua na o ia, ona o le toʻatele o i tatou e lē mananaʻo e faalavelave mai se isi pe a oo iā i tatou lagona faavauvau. Ae e leʻi taunuu le mea na manaʻo ai Iesu. E toʻatele le motu o tagata na taunuu muamua i lenā nofoaga tuufua a o leʻi taunuu Iesu. Na faapefea ona tali atu Iesu? Ina ua manatunatu o ia i manaʻoga o le motu o tagata, “ona tigā alofa ai lea o ia” ona o i latou. Na silafia e Iesu lo latou galala  ina ia faafouina faaleagaga, ma na vave lava ona tali atu Iesu. O lea, na ʻia aʻoaʻo atu ai i latou i le tele o mea,’ ae lē o ni nai mea.​—Mare. 6:31-34; Luka 9:10, 11.

7-8. O le ā se auala e faaaʻoaʻo ai toeaina alolofa iā Iesu, pe a iai se manaʻoga i le faapotopotoga?

⁷Le auala e faaaʻoaʻo ai toeaina alolofa iā Iesu. Maʻeu lo tatou talisapaia o galuega faataulaga a toeaina mo i tatou. O le tele o na galuega e lē iloa e le faapotopotoga. O se faataʻitaʻiga, pe a tupu se faalavelave faafuaseʻi e vave ona ō atu sui o Komiti mo Mataupu Tau Falemaʻi, e fesoasoani i o latou uso ma tuafāfine. E masani lava ona tutupu na faalavelave i le leva o le pō. Ae ona e alolofa faapelepele toeaina ma o latou aiga i ē pele ua mafatia, o le māfuaaga lenā e latou te faamuamua ai manaʻoga o latou uso ma tuafāfine.

⁸ E fesoasoani foʻi toeaina i le fausiaina o Maota mo Sauniga ma isi galuega faufale, ma e latou te avatuina foʻi fesoasoani laveaʻi. E tele foʻi itula e faaaluina e toeaina i a tatou faapotopotoga e aʻoaʻo, faalaeiau ma fesoasoani ai iā i tatou. E tatau ona tatou faamālō atu i nei toeaina ma o latou aiga. Tau ina ia faamanuia Ieova iā i latou ona o lo latou agaga faataulaga! O le mea moni, e manaʻomia foʻi e toeaina ma i tatou uma ona paleni. E lē tatau ona soona faaalu e toeaina o latou taimi i galuega a le faapotopotoga, ae lē tausia ai manaʻoga o latou aiga.

9. I le Filipi 2:4, 5, o le ā le mafaufau po o le uiga e tatau ona atiaʻe e Kerisiano uma?

⁹ Faitau le Filipi 2:4, 5. E lē mafai ona avea i tatou uma ma toeaina, ae e mafai e i  tatou uma ona faaaʻoaʻo i le agaga faataulaga o Iesu. Ua faapea mai le Tusi Paia, ua “fai o ia ma pologa.” (Fili. 2:7) Seʻi manatu i le tāua o lenā faaupuga. O se pologa po o se auauna e pele i lona matai, e na te saʻilia auala uma e faafiafia ai lona matai. Talu ai o i tatou o pologa a Ieova ma auauna i o tatou uso ma tuafāfine, e tatou te naunau la ina ia tele so tatou aogā mo Ieova ma uso ma tuafāfine. E mafai ona e faia faapea, e ala i le iloiloina o fautuaga o loo mulimuli mai.

10. O ā fesili e mafai ona tatou fesili ifo ai?

¹⁰Iloilo ou uiga. Ia fesili ifo i fesili nei: ʻPo o oʻu lotomalie e faia faataulaga e fesoasoani ai i isi? O se faataʻitaʻiga, e faapefea ona ou tali atu pe a talosagaina aʻu e asiasi atu i se uso po o se tuafafine matua, o loo tausi i nofoaga mo tagata matutua pe ave foʻi i le sauniga? Pe e vave ona ou tauofo e fesoasoani i le faamāmāina o nofoaga mo tauaofiaga ma Maota mo Sauniga?’ E faafiafiaina Ieova pe a faataulaga o tatou taimi ma meafaitino e fesoasoani ai i isi, ma o na mea uma ua tatou tuuina atu mo Ieova. Pe a tatou iloa se vala e manaʻomia ona faaleleia, o le ā e mafai ona tatou faia?

11. E faapefea ona fesoasoani le tatalo iā i tatou e atiaʻe ai le agaga faataulaga?

¹¹Ia tatalo faatauanau iā Ieova. Seʻi faapea ua e iloa se vala e manaʻomia ona faaleleia, ae leai se uunaʻiga iā te oe e faia ai ni suiga talafeagai. I lenā tulaga, ia tatalo faatauanau iā Ieova. Ia faamaoni e faailoa iā Ieova ou faalogona moni, ma talosaga ina ia foaʻi atu iā te oe se ʻfaanaunauga ma le malosi e galue ai.’​—Fili. 2:13. NWT.

12. O le ā le manaʻoga e mafai ona fesoasoani ai se uso talavou ua papatiso?

¹² Pe afai o oe o se uso talavou ua uma ona papatiso, ia talosaga atu iā Ieova mo le fesoasoani e atiaʻe ai se faanaunauga o le aapa atu mo isi faaeaga e fesoasoani ai i le faapotopotoga. I nisi atunuu e toʻatele atu toeaina nai lo auauna o le faiva, ma o le toʻatele o na auauna o le faiva ua matutua. A o faaauau pea ona faatuputeleina le faalapotopotoga, e tatou te manaʻomia le toʻatele o uso talavou e fesoasoani i le tausiaina o tagata o Ieova. E te maua le fiafia pe a e lotomalie e auauna po o fea lava e manaʻomia ai lau fesoasoani. Aiseā? Talu ai o le a e faafiafiaina Ieova, ma e maua ai se talaaga lelei, ma le faamalieina ona o le fesoasoani i isi.

13-14. O ā auala aogā e fesoasoani ai i o tatou uso ma tuafāfine? (Tagaʻi le ata i le faavaa.)

¹³Ia mataala i manaʻoga o isi. Na fautuaina e le aposetolo o Paulo Kerisiano na nonofo i Iutaia: “Aua neʻi galo le faia o mea lelei, ma le tufa atu o mea i isi, auā o taulaga faapena e matuā fiafia i ai le Atua.” (Epe. 13:16) Maʻeu se fautuaga aogā! E leʻi umi talu ona latou mauaina lenā tusi, ae tuua loa e nisi Kerisiano o latou fale, o pisinisi ma o latou tauaiga lē talitonu ae ʻsosola atu i mauga.’ (Mata. 24:16) I lenā taimi e mautinoa na iai se manaʻoga e sili ona tāua, o le fesoasoani lea o le tasi i le isi. Pe afai na latou faatatauina le fautuaga a Paulo ma tufa atu i isi mea na latou maua, e mautinoa o le a faigofie ona latou faamasani i se olaga fou e lē tele ni mea.

¹⁴ Atonu e lē masani ona faailoa mai e o tatou uso ma tuafāfine, e latou te manaʻomia se fesoasoani. Mo se faataʻitaʻiga, ua maliu se tuafafine, ma ua tuua ai na o lana tane lotofaavauvau. Po o manaʻomia e le uso se fesoasoani tau taavale, meaʻai, po o le faia o feʻau i le fale? Atonu e na te lē faailoaina mai ona manaʻoga ona e matamuli.  Peitaʻi, e na te matuā talisapaia lo tatou tausolomua e ofo atu le fesoasoani. E lē tatau ona tatou manatu o loo iai se isi e fesoasoani i ai, pe o le a ia faailoa mai foʻi pe a manaʻomia se fesoasoani. Ia fesili ifo, ʻPe afai o aʻu lea e tupu ai lenā mea, o le ā le fesoasoani ou te manaʻomia mai i se isi?

15. Ina ia tatou faaalia le agaga faataulaga, o le ā e tatau ona tatou lotomalilie e fai?

¹⁵Ia lotofesoasoani. Atonu e te iloa uso ma tuafāfine e lotofesoasoani i le tou faapotopotoga. E lē taitai manatu ua tatou faalavelave iā i latou. E tatou te iloa e mafai ona tatou faalagolago iā i latou pe a manaʻomia le fesoasoani, ma e tatou te fiafia foʻi e faaaʻoaʻo i lo latou lotofesoasoani. Na manaʻo Alan o se toeaina e 45 tausaga e faaalia le lotofesoasoani. Na manatunatu o ia i le faaaʻoaʻoga a Iesu, o lea na ia faapea mai ai: “E ui na matuā pisi lava Iesu, ae na tosina atu so o se ituaiga tagata iā te ia, ma e latou te leʻi faatalatū e talosaga atu iā te ia mo se fesoasoani. Na faigofie ona latou iloa, o ia o se tagata e manatu mamafa iā i latou. I loʻu lotoatoa ou te manaʻo e faaaʻoaʻo i uiga o Iesu. Ia iloa aʻu o se tagata e lotofesoasoani, māfana ma manatu mamafa i uso ma tuafāfine.”

16. E faapefea i le faatatauina o le Salamo 119:59, 60, ona fesoasoani iā i tatou e mulimulituʻi ai i le faaaʻoaʻoga a Iesu?

¹⁶ E lē tatau ona tatou lotovaivai, pe a lē taulau ona tatou faaaʻoaʻo atoatoa iā Iesu. (Iako. 3:2) E lē mafai e se tamaitiiti aʻoga tusi ata ona faaaʻoaʻo atoatoa i le tusi ata a le faiaʻoga. Ae e mafai ona faaleleia pea lana tusi ata, pe a aʻoaʻo ni lesona mai i ana mea sesē ma fai le mea sili e faaaʻoaʻo ai i le faiaʻoga. Pe a tatou faatatauina foʻi mea ua aʻoaʻoina mai i a tatou suʻesuʻega o le Tusi Paia,  ma faia le mea sili e faasaʻo ai o tatou sesē, o le a mafai ai ona tatou mulimuli i le faaaʻoaʻoga na faataatia e Iesu mo i tatou.​—Faitau le Salamo 119:59, 60.

17-18. A o tatou faaaʻoaʻo i le uiga faataulaga o Iesu, o ā aogā o le a tatou maua ai?

¹⁷ O le tatou faaalia o le agaga faataulaga, e uunaʻia ai foʻi isi e faia faapea. Ua faapea mai se toeaina e igoa ia Tim: “E iai uso talavou i le matou faapotopotoga ua agaʻigaʻi luma ma avea ma auauna o le faiva, o nisi na tofia a o talavou lava. O se tasi o māfuaaga, ona na latou faaaʻoaʻo i uiga faataulaga o isi. Ua fesoasoani ā latou galuega lē manatu faapito i le faapotopotoga, ma lagolagosua ai i le ʻautoeaina.”

¹⁸ Ua tatou ola i se lalolagi ua pulea e le manatu faapito. Ae ua matuā tū ese ai lava tagata o Ieova. Ua pāʻia o tatou loto i le agaga faataulaga na faaalia e Iesu, ma ua tatou maumauaʻi ai e faaaʻoaʻo i lana faaaʻoaʻoga. E lē mafai ona tatou mulimuli atoatoa i tulaga aao o Iesu, ae e mafai ona tatou “mulimulituʻi i ona tulaga aao.” (1 Pete. 2:21) A o tatou taumafai e faia le mea sili e faaaʻoaʻo ai i le uiga faataulaga o Iesu, o le a tatou tofo ai foʻi i le olioli e maua ona o le faamaoniga a Ieova.