1. Ikanyi yɛ wɔlɔ yɛkɔnge y’ɛnaso l’anteyi k’enkambi wɛ Yehova?

 ILÁ efula lá ntondo, Bible ewoyɛka djɛ enkambi wɛ Ndjambe ‘wangoyapɛyɛ l’ɛkɔpa’ l’olemo wɔ Yehova winá w’okilikawɔ ɛlɔndjɛlɔ kɛ Wɔnande. (Yee. 110:3) Prɔfɛsi kɛsɔ kekotshama nsɔsɔlɔ lɔɔko kɛnɛ. Ɛnɔnyi enkfumɔ, enkambi wɛ Yehova mpetshɛka l’osasalo onkfumɔ miliɔ yɛ winá l’olemo w’ipoposanyɛ. Iwɔ wapafutama m’olemo wɔsɔ koko iwɔ nanghaka m’ɛkɔpa kɛwɔ. Lonkina iwɔ ndɔsaka winá djɛ nsuka winawɔ andjawodji lá demba, lá ngandji, edjinge lá nyuma. Tokokolo l’enami w’ekotshɛ ndɔsaka winá efula ngo djɛ ndɔngɔsɔla nsanghanyɛ la mbembola wináwɔ andjawodji djɛ ndaakembɛ. Kɛkɔnge k’atshinda djɛ nangha elemo enkfumɔ wɛsɔ? Kɛnɛ k’atshindande, ngandji, ngandji te Yehova la te winawɔ anto.—Mat. 22:37-39.

2. Etengo Ɔrɔma 15:1-3 ɛnyɛwɔ, ndjɔmbɔmba kɛkɔnge ketotshikelisa Yeso?

² Yeso atotshikelaka ndjɔmbɔmba kɛ wɔlɔ kɛ mpetshɛ wapɔ w’anto ankina lá ntondo kɛ wɛnde. Iso nanghaka la welo wɛso enkfumɔ djɛ nkilika wiina wande. (Wala Ɔrɔma 15:1-3.) Wanɛ w’okilika wangowa eposelo wɛ wɔlɔ efula. Yeso atepelaka ante: ‘Osasa woyɛ má mpɛyɛ ndeka wɔ ndongola.’—Ele. 20:35.

3. Kɛkɔnge k’ɔkɔpaso nyɛna lá djamba djɛnɛ?

³ Lá djamba djɛnɛ, tongoshishima akambo amɔtshi wa Yeso ndoyapekala ngo djɛ nkambela anto ankina olemo edjinge tɔngɛna wopo w’okokaso ndjokola ndjɔmbɔmba kɛnde. Tɔngɛna lonkina wopo w’okokaso mfudjɛ mposɛ kɛso kɛ nkambela anto ankina.

4. Wopo wɔkɔnge Yeso ndahetshɛka ehomba w’anto ankina lá ntondo kɛ wɛnde?

⁴ Yeso akotshɛki anto ankina kaanga lá winá wɔ ndalɛmbɛ. Kokanela kɛnɛ kɛ ndananghe winá w’oloyi w’anto yatshu djɛ ntɛnana lande entshupa l’onkókó ɔmɔtshi, nkoka ndjala entshupa la Kapɛrnauma. Yeso alɔmbaka otsho w’otondo. Ndjokamaka ente nde akokaka ndɛmba efula, koko winá wɔ ndɛnyi oloyi w’anto, nde okaka ase ɔmvɔ la ase elando nkɛtshi. Nde ataakɔnɔla toko koko ápɛyɛka edjinge djamba djelá ntshandjawala djetawɔ ambɔ Djamba djelá onkoko.—Luka 6:12-20.

5. Wopo wɔkɔnge ewandji wɛ nkfumbo okolakawɔ eyalelo kɛ ndapekala kɛ Yeso winá woyɛwɔ la lɔlɛmbɔ?

⁵ Wopo wɔ ewandji wɛ nkfumbo okolawɔ Yeso. Kokanela nkambo djɛnɛ: M’ɔkɔngɔ wɔ mpetshɛ lofu l’otondo l’olemo, papa kɛ nkfumbo ambokalɔ lá mbandja la lɔlɛmbɔ l’efula. Kaanga ndombotshindama dj’ipa nangha wekelo wɔ nkfumbo nkɔlɔ djenyi, nde ambɔlɔmba Yehova djɛ nde ndɔɔpɛyɛ wolo wɔnde ndɔndjɛ wekelo. Yehova ambokadjimola lɔlɔmbɔ lɔnde, edjinge wekelo wɔ nkfumbo wombonanghema etengo onanghemakawɔ ntondo. Wana wambowa olakanyelo wɔ djonyi la nkɔlɔ djɛsɔ, olakanyelo wɔkɔnde, le ambotshi wawɔ, akambo welá nyuma ndeke loleka nkete nkina djonyi.

6. Kɔpɛyɛ ndjɔmbɔmba k’ɛnyɛ wopo wɔ Yeso ndoyapekala winá wɛnde djɛ nkotshɛ anto ankina.

⁶ Yeso akotshɛki anto ankina kaanga winá wɔ ndayalaka la djonyi djɛ ndjala nyɔmɛlɛ. Okoka nkanela wopo wɔ Yeso ndoyawoke winá wɔ ndewe ante wambopa ilongo yɛnde Djɔanɛ Ombatisanyi ɔtɛ? Ape l’ehamo, Yeso ayalaka la yɛnyi efula. Bible ntepelaka ante: ‘Winá wɔ Yeso ndoke [nkambo djelendana la nyɔyi kɛ Djɔanɛ], Yeso imaka m’eteyi la wato ko atshɔka t’edjena k’okokande toyala nyɔmɛlɛ.’ (Mat. 14:10-13) Tokoka nsipisoyɛ lamo ndakombola toyala nyɔmɛlɛ. Efula l’anteyi kɛso nkɔpaka ndela winá w’oyɛwɔ iyɔmɛlɛ. Koko Yeso atawa mbamba kɛsɔ. Oloyi w’anto wakomaka l’edjena kɛ ndakɔpɛ toyala nyɔmɛlɛ kɛsɔ lá ntondo kɛnde nkoma. Yeso ndananghe mo? Nde akanelaka ehomba  w’oloyi w’anto wɔsɔ, edjinge ‘awokaka nkɛtshi.’ Yeso asipisoyɛka djɛ wayalaka la djonyi dj’okotshɔ la osukɔ welá nyuma, djɛkondeke mbala kɛkɔ kɛmɔ nde atateyɛka ndakotshɛ. Lá nsɔsɔlɔ, ‘nde atateyɛka ndaalakanyɛ [ape akambo daambi, koko] akambo efula.’—Mar. 6:31-34; Luka 9:10, 11.

7-8. Kɔpɛyɛ ndjɔmbɔmba y’ɛnyɛ wopo wɔ tokokolo tɔso tɔ ngandji okolakawɔ Yeso winá wɔ djonyi mɔtshi oposawɔ.

⁷ Wopo wɔ tokokolo tɔ ngandji okolawɔ Yeso. Tolekɔ la djedjɛ efula l’olemo wɔ ndapekala wɔ tokokolo onanghawɔ lá nkambo djɛso! Elemo efula w’onanghawɔ wepaleke ndjewama le anto ankfumɔ wal’otshumano. Ndjɔmbɔmba, winá wɔ olando wɔlɔmba esakelo kɛ la nkeke oposawɔ, wananyɔ wakamba lá Kɔmite kɛ djokanelo la epitalo nanghaka akambo la nkeke la nkeke djɛ nkotshɛ winawɔ andjawodji. Mbala efula esakelo kɛlɔmbama nanghema lankeke kɛsɔ mposaka ngo l’otsho! Koko má nkɛtshi k’okawɔ wananyɔ l’ankaana yɛwɔ walekɔ lá ndjolo, tokokolo tɔ ngandji tɔsɔ, esanga l’ankfumbo yɛwɔ mpetshɛka wapɔ wɛ winawɔ andjawodji ntondo kɛ wɛwɔ.

⁸ Lonkina tokokolo ndapɛyɛka lá olemo w’opikelo w’Amvulu y’Onkfumi la y’amvulu inkina edjinge iwɔ nkotshɛka winá woposa ambalaka yeyɛ má nkete djetongamisa. Iwɔ mpetshɛka lonkina winá efula djɛ ntolakanyɛ, ntokeketshɛ, la ntosuka lá ntshumano djɛso. Wananyɔ ankfumɔ wasɔ la ankfumbo yɛwɔ wɛdje djɛ mba djedjɛ djɛso. Yehova átshɔkɔlɛ má ikanyi yɛnyɛwɔ yɛsɔ! Koko lá nsɔsɔlɔ, ngo ngete anto ankina ankfumɔ, tokokolo ladjɛ ndjala la wɛdjimo. Iwɔ wapakoke ndapɛyɛ tshɛ t’elemo wɛ teokrasi ko mvungɛ ehomba w’ankfumbo yɛwɔ.

9. Lá nkilika Filipɛ 2:4, 5, eyalelo kɛkɔnge Akristo ankfumɔ oyɛwɔ ladjɛ ndjala la kɛkɔ?

⁹ Wala Filipɛ 2:4, 5. Apengo tokokolo toko, koko isankfumɔ nkoka ndjeka djɛ ndjokola ikanyi yɛ ndapekala yɛ Yeso. Bible ntepelaka ante nde ‘ayakomɛka etengo mfumbe.’ (Flp. 2:7) Kokanela kɛnɛ kɛ nkambo djɛsɔ ɔkɔpawɔ nsakisola. Mfumbe, kana onkambi wɔ wɔlɔ, mponaka mbamba yɛ nsasangɛ owandji wɔnde. Ladjikɛnde tolekɔ amfumbe yɛ Yehova edjinge enkambi wɛ wananyɔ waso, ape l’ehamo iso nkombolaka ndjala la ntshina efula le Yehova la le winaso andjawodji. Iso nkoka nangha nkambo djɛsɔ má nshishima akambo wa wɔlama wanɛ.

10. Weepó wɛkɔnge w’okokaso ndawopola?

¹⁰ Shishima eyalelo kɛko. Yawopola weepó etengo wɛnɛ: ‘Polo lá lɛdji lɔkɔnge l’oyɛmi entshupa djɛ ndapekala l’ikanyi yɛ nkotshɛ anto ankina? Ndjɔmbɔmba, monghonangha nge ntsha wamɔndɔmba djɛ ntowembola wɔnanyɔ w’ekokolo woyala lá amvulu y’olamawɔ nkokolo kana tɔsa nkaana k’ekokolo tá losanghanyɛ? Langoyalake entshupa djɛ mpɛyɛ okotshɔ wɔmi winá w’oyalawɔ la djonyi dj’anto wayapɛyɛ l’ɛkɔpa djɛ ntila piyɔɔ l’edjena k’onanghakaso nsanghanyɛ yɛ nkekete kana lá Mvulu k’Onkfumil?’ Yehova nsasangaka efula winá w’ɔpɛyɛso winá wɛso la nkete djɛso la lokapo lonkfumɔ lá nkambo djɛnde la djɛ nkotshɛ anto ankina. Iya ntsha tɔmbɛna ente tolekɔ la djonyi djɛ ndalɔngɔsɔla, kɛkɔnge k’oyɛso ladjɛ nangha?

11. Wopo wɔkɔnge lɔlɔmbɔ okokawɔ nkokotshɛ djɛ ndjala l’ikanyi yɛ ndapekala?

¹¹ Lɔmba Yehova l’oloko ɔmɔ. Kɔsa djɛ ombisola ente opalekɔ l’ikanyi yɛ ndapekala, koko opalekɔ la mposɛ kɛ nangha etshikitano. Ntsha nghɔsɔ lɔmba Yehova l’oloko ɔmɔ. Tepela nsɔsɔlɔ. Shimela Yehova djɛnde nkɔpɛyɛ ‘mposɛ la wolo wɔ nangha akambo lá wopo w’osasangɛ.’—Flp. 2:13.

12. Ehomba wɛkɔnge wɔnanyɔ w’olangala wombolongola batisimo okokande nkotshɛ?

¹² Ntsha oyɛnde wɔnanyɔ w’olangala wombolongola batisimo, lɔmba Yehova djɛ nde nkokotshɛ djɛ wɛ ndjala la mposɛ kɛ nkambela wananyɔ l’ankaana yel’otshumano. L’ewila ɛmɔtshi, tokokolo tolekɔ efula ndeka enkambi wekotshɛ, edjinge efula k’enkambi wekotshɛ wɛsɔ wapalekɔ lonkina dangala. Etengo olonghanyelo wɔ Yehova yotakindjɛ mfula, tolekɔ la djonyi efula djɛ wananyɔ wa dangala djɛ ntokotshɛ djɛ nkotshɛ mposɛ y’enkambi wɛ Yehova. Ntsha wɛ ndjala entshupa djɛ ntokamba l’edjena k’oyɛwɔ la djonyi djɛko, ongoyala l’osasa. Lamo? Ladjikɛnde ongosasangɛ Yehova, ongoyala la lokumu lɔ wɔlɔ, edjinge ongoyala l’osasa woyɛka má nkotshɛ anto ankina.

13-14. Akambo wakɔnge w’okokaso nangha djɛ nkotshɛ wananyɔ l’ankaana yɛso? (Lenda ntshango djelá loposo.)

¹³ Ila yimba l’ehomba w’anto ankina. Ɔpɔstɔlɔ Poolo alakaka ase Hebero ante: ‘Nyotavungɛke nangha wɔlɔ la nkotshɛ anto ankina la nkete dj’okotshɛnyo, mande Ndjambe nsasangaka wepo w’elambo wɛ nghɔsɔ.’ (Heb. 13:16) Ɔsɔ ayalaka dako djɛ wɔlɔ efula! Lako mpeta ilá m’ɔkɔngɔ w’iwɔ ndongola onkanda wɔsɔ, Akristo welá Judeya watshikaka amvulu yɛwɔ, elemo wɛwɔ, la boto djɛwɔ djepalekɔ andjawodji ko ‘ndota t’enkókó.’ (Mat. 24:16) Ape l’ehamo, lá mbamba kɛsɔ ayalaka djonyi efula nkotshana l’anteyi kɛwɔ. Ntsha má bango iwɔ wakambaka la dako djɛ Poolo djɛ nkapanaka l’anto ankina nkete dj’okotshɛwɔ, mbɔ ayalaka nkambo djɛ wɔdju lewɔ djɛ ndjekesanela la yopo yɛ lowiko lɔ bango lɔsɔ.

 ¹⁴ Apalekɔ winá enkfumɔ ndeke wananyɔ l’ankaana yɛso yongotoshimelaka kɛnɛ k’oyɛwɔ la djonyi. Ndjɔmbɔmba, wɔnanyɔ wombovusɛ wadji ndjalaka la yɛnyi y’efula. Wɔnanyɔ wɔso wɔsɔ nkoka ndjala la djonyi dj’ekete kɛ ndɛ, ndambo kɛ akfuta kana djɛ onto ɔmɔtshi ndookotshɛ la tolelemo telá mbandja. Koko, nkoka ndjala ko nde apangotoshimela kaanga djoyi l’ikanyi y’ente atɔtɔpɛyɛ odjito. Koko nde nkoka ndjala la djedjɛ dj’efula ntsha iso ndɔsa nonghanyi isɔmɛlɛ djɛ ndɔɔpɛyɛ okotshɔ w’oyɛnde la djonyi. Totakanelake ente onto ɔmɔtshi angookotshɛ kana nde nyɔmɛlɛ angotoshimelaka winá enkfumɔ wopo w’okokaso ndokotshɛ. Yawopola ente: ‘Ntsha lemi ndeke lombopomana la nkambo djɛ nghɔnɛ, okotshɔ w’ɔkɔnge w’otakombolami mba?’

15. Kɛkɔnge koyɛso ladjɛ nangha ntsha iso nkombolaka djɛ nkotshɛ anto ankina?

¹⁵ Ilaka anto lá demba. Ape l’ehamo, wɛ ndjewaka wananyɔ l’ankaana yɛ l’otshumano wɔnyo yeyalaka winá enkfumɔ entshupa djɛ nkotshɛ anto ankina. Iwɔ wapɛnyɛka etengo t’afutanyɛ kana tapɛyɛ odjito. Iso nkoka ndawɛkɛ tewɔ winá w’oyɛso la djonyi, edjinge iso nkombolaka ndawokola! Alan, ikokolo yelekɔ l’ɛnɔnyi 40 la ndjakfe, nkɔpaka ndjila anto ankina lá demba. Winá w’ɔtɔnɔlande lá ndjɔmbɔmba kɛ Yeso, Alan ntepelaka ante: “Yeso ayalaki l’akambo efula wa nangha, koko anto wa nsɔkɛ inkfumɔ wasepamaki tende edjinge watayalaki la wɔma wɔ ndɔɔlɔmba okotshɔ. Iwɔ wewaki djɛ nde alekɔ nsɔsɔlɔ mpame keyakiyanyɛki lá nkambo djɛwɔ. Lemi nkɔpaka ndjokola eyalelo kɛ Yeso l’oloko onkfumɔ la ndjewama etengo onto wilanaka lá demba, w’osasalo la woyakiyanyɛka lá nkambo dj’anto ankina.”

16. Wopo wɔkɔnge nkamba la Yeembo 119:59, 60 okokawɔ ntokotshɛ djɛ nkilika ndjɔmbɔmba kɛ Yeso wɔlɔwɔlɔ?

 ¹⁶ Topakoke ndɛmba ntsha topokola Yeso lá lɛdji lɔ djɔ. (Dja. 3:2) Ombeki apewaka ndjokola wetsha wɔnde lá lɛdji lɔ djɔ. Koko ntsha ombeki mba olakanyelo má evunga wɛnde la ndjila welo djɛ nkilika ndjɔmbɔmba kɛ wetsha wɔnde lá lɛdji lɔ wɔlɔ, nde angotayalɔngɔsɔlaka ndambo ndambo. Wopo ɔkɔmɔ ndeke, ntsha iso nkamba la kɛnɛ k’ekaso má wekelo w’onto nyɔmɛlɛ, la ndjila welo djɛ ndasembola winá w’onanghaso evunga, tokoka nkilika ndjɔmbɔmba ketotshikelisa Yeso lá lɛdji lɔ wɔlɔ.—Wala Yeembo 119:59, 60.

17-18. Wapɔ wɛkɔnge songowa ntsha iso ndjokola eyalelo kɛ Yeso kɛ nkotshɛka anto ankina?

¹⁷ Eyalelo kɛso kɛ ndapekala nkoka nsambeyana. Ikokolo yetawɔ Tim atepelaka ante: “Tolekɔ la wananyɔ wa dangala wananghisá efulelo edjinge wasɔnamisá etengo enkambi wekotshɛ, amɔtshi l’anteyi kɛwɔ wayalaka dɛngɛ efula, ladjikɛnde iwɔ wokolaka eyalelo kɛ nkamba l’ɛkɔpa k’iyɛnyi le anto ankina. Wananyɔ wasɔ nkotshɛka otshumano wɔso edjinge nsukaka tokokolo efula.”

¹⁸ Towika l’andja wambolola tɔɔ l’akambo wa lokaki. Koko enkambi wɛ Yehova ntshikitana l’anto ankina ankfumɔ. Tombokeketshama má nyɛna ikanyi yɛ ndapekala yeyalaki la Yeso edjinge tɔmbɔsa nkano djɛ nkilika ndjɔmbɔmba kɛnde. Ee, topangokoka nkilika ndjɔmbɔmba kɛnde lá lɛdji lɔ djɔ, koko iso nkoka ‘ndokilika wɔlɔwɔlɔ.’ (1 Pɛ. 2:21) Ntsha iso ndjila welo djɛ ndjokola eyalelo kɛ Yeso kɛ nkotshɛka anto ankina, tongoyala l’osasa wɔ ndjawolama me Yehova.