1. Sortu bun sani a pipel fu Yehovah e du?

 LANGA ten kaba, Bijbel ben taki dati a pipel fu Gado ben o „de klariklari” fu dini Yehovah ondro a tiri fu Yesus (Ps. 110:3). A de krin taki a profeititori dati e kon tru na ini a ten disi. Ibri yari den fayafaya futuboi fu Yehovah e wroko milyunmilyun yuru na ini a preikiwroko. Den no e kisi pai fu a wroko disi èn den e du en fu di den srefi wani. Den e gebroiki den ten tu fu yepi den Kresten brada nanga sisa fu den fu kisi den sani di den abi fanowdu, fu gi den deki-ati èn fu tranga a bribi fu den. Owruman nanga dinari ini a diniwroko e gebroiki furu yuru fu sreka densrefi gi den pisi di den musu hori na den konmakandra. Boiti dati, den e go luku Kresten brada nanga sisa fu gi den deki-ati. Fu san ede a pipel fu Yehovah e du ala den sani disi? Na fu di den lobi Yehovah èn fu di den lobi tra sma.​—Mat. 22:37-39.

2. San wi kan leri fu Yesus, soleki fa Romesma 15:1-3 e sori?

² Yesus sori taki a ben e broko en ede moro nanga trawan leki nanga ensrefi. Wi e du ala san wi man fu teki na eksempre fu en. (Leisi Romesma 15:1-3.) Te wi e du disi, dan wi o kisi wini. Yesus ben taki: „Wan sma sa de moro koloku te a e gi sani, leki te a e kisi sani.”​—Tori 20:35.

3. San wi o luku na ini na artikel disi?

 ³ Na ini na artikel disi, wi o luku wan tu sani di Yesus ben du fu yepi trawan èn wi o si fa wi kan teki na eksempre fu en. Wi o luku tu fa wi kan kisi a firi fu yepi trawan.

4. Fa Yesus sori taki a ben e broko en ede moro nanga trawan leki nanga ensrefi?

⁴ Yesus ben yepi trawan, srefi te a ben weri. Wan leisi di Yesus ben de na tapu wan bergi, kande krosibei fu Kaperna-um, bun furu sma kon na en. Yesus ben begi heri neti. A ben musu fu weri. Ma di a si den ipi-ipi sma, dan a bigin firi sari gi den pôtiwan nanga den sikiwan na den mindri. Boiti taki a dresi den sma disi, a ben hori wan fu den moro moi lezing di ben hori oiti.​—Luk. 6:12-20.

5. Fa osofamiri-edeman e sori lobi neleki Yesus, srefi te den weri?

⁵ Fa osofamiri-edeman e teki na eksempre fu Yesus? Luku a tori disi: Wan osofamiri-edeman wroko heri dei èn a weri te a doro na oso. Kande a no e firi fu hori na Osofamiri Anbegi a neti dati soleki fa den gwenti, ma a e begi Yehovah fu gi en krakti fu studeri nanga en osofamiri. Yehovah e piki a begi fu en èn a e hori na Osofamiri Anbegi soleki fa a gwenti du ibri wiki. Den pikin e leri wan prenspari sani a neti dati. Den e kon si taki gi den papa nanga mama na anbegi fu den prenspari moro leki iniwan tra sani.

6. Gi wan eksempre di e sori fa Yesus gebroiki en ten fu yepi trawan aladi a ben wani de en wawan.

⁶ Yesus ben e meki ten gi trawan, srefi te a ben wani de en wawan. Fa yu denki taki Yesus ben e firi di a kon sabi taki den ben kiri en bun mati Yohanes a Dopuman? A no de fu taki dati a ben e sari srefisrefi. Bijbel e taki: „Di Yesus yere [taki Yohanes dede], a gowe fu drape nanga wan boto èn a go na wan presi fu kan de en wawan” (Mat. 14:10-13). Wi kan frustan fu san ede a ben wani de en wawan. Son sma wani de den wawan te den e sari. Ma Yesus no  ben man du dati. Fosi Yesus doro na a presi pe a ben wani de en wawan, wan bigi grupu sma ben de drape kaba. San Yesus du? Fu di a ben prakseri den nowtu fu den sma disi, meki „a ben sari den”. A ben kan si taki den ben abi trowstu fanowdu fu Gado. Dati meki a no draidrai fu yepi den. Fu taki en leti, a no leri den wan tu sani nomo, ma „a bigin leri den furu sani”.​—Mark. 6:31-34; Luk. 9:10, 11.

7-8. Gi wan eksempre di e sori fa den owruman e sori lobi neleki Yesus te wan sma abi yepi fanowdu.

⁷ Fa owruman e sori lobi neleki Yesus? Wi de nanga tangi trutru taki den owruman e du so furu muiti fu yepi wi! Furu brada nanga sisa na ini a gemeente no sabi ala san den owruman e du. Fu eksempre, te wan sma musu kisi datrayepi, dan den brada fu na Ati-oso Kontakti Komte no e draidrai fu yepi den Kresten brada nanga sisa fu den. Nofo tron den problema disi e kon mindrineti! Ma fu di den owruman e firi gi a brada noso sisa fu den di de na nowtu, meki den nanga den osofamiri e du ala muiti fu yepi a brada noso sisa dati.

⁸ Owruman e yepi tu fu bow Kownukondre zaal nanga tra presi èn den e yepi te wan rampu pasa. Dan wi no taki srefi fu ala a ten di den e gebroiki fu gi sma na ini a gemeente leri, fu gi den deki-ati èn fu yepi den na tra fasi tu. Nanga wi heri ati, wi e prèise ala den brada disi nanga den osofamiri fu den. Meki Yehovah blesi den gi den sani di den e du! A no de fu taki dati ala sma, sosrefi den owruman, musu luku bun taki den no gebroiki so  furu ten gi a gemeente taki den no abi ten moro gi den osofamiri.

9. Sortu denki ala Kresten musu kon abi soleki fa Filipisma 2:4, 5 e sori?

⁹ Leisi Filipisma 2:4, 5. A no soso den owruman musu du muiti fu sori lobi neleki Yesus. Wi alamala kan leri fu du dati. Bijbel e taki dati Yesus ben „kon de leki fa wan srafu de” (Fil. 2:7). Prakseri san disi wani taki. Wan bun srafu noso futuboi ben o suku okasi fu plisi a masra fu en. Fu di wi na srafu fu Yehovah èn fu di wi wani yepi wi Kresten brada nanga sisa, meki wi wani du ala san wi man gi Yehovah èn gi wi brada nanga sisa. Kow luku san wi kan du.

10. Sortu sani wi kan aksi wisrefi?

¹⁰ Ondrosuku fa yu e denki. Aksi yusrefi den sani disi: ’Mi de klariklari fu gebroiki mi ten nanga mi krakti fu yepi trawan? San mi ben o du efu den ben aksi mi fu go luku wan owru brada na wan presi pe den e sorgu gi owru sma, noso fu tyari wan owru sisa go na den konmakandra? Mi de klariklari fu yepi te den abi sma fanowdu fu krin wan kongreshal noso fu sorgu a Kownukondre zaal? Yehovah lobi te wi e gi wi ten, wi krakti, nanga wi moni fu yepi trawan. Efu wi e si taki wi kan du moro, dan san wi kan du?

11. Fa begi kan yepi yu fu kisi a firi fu yepi trawan?

¹¹ Begi Yehovah fayafaya. Kande yu e si taki yu kan du moro, ma yu no e firi fu du dati. Efu dati de so, dan begi Yehovah fayafaya. Taigi Yehovah krin fa yu e firi èn aksi en fu gi yu „a firi nanga a krakti fu du sani di e plisi en”.​—Fil. 2:13.

12. Fa yongu dopu brada kan yepi a gemeente fu den?

¹² Efu yu na wan yongu dopu brada, dan begi Yehovah fu yepi yu fu kisi a firi fu du moro na ini a gemeente. Na son kondre owruman lai, ma furu dinari na ini a diniwroko no de. Boiti dati, furu fu den dinari na ini a diniwroko no yongu moro. Fu di na organisâsi e kon moro bigi, meki moro yongu brada de fanowdu fu yepi den owruman fu sorgu gi a gemeente. Efu yu de klariklari fu yepi, awinsi na sortu fasi, dan yu o de koloku. Fu san ede? Fu di Yehovah o breiti nanga yu, yu o abi wan bun nen èn yu o de koloku fu di yu e yepi trawan.

13-14. San wi kan du fu yepi wi brada nanga sisa? (Luku a fowtow tapu a kafti.)

¹³ Luku fa yu kan yepi trawan. Na apostel Paulus ben gi den Kresten na ini Yudea a rai disi: „Un no musu frigiti fu du bun èn fu prati san unu abi nanga trawan, bika Gado e prisiri nanga den sortu ofrandi dati” (Heb. 13:16). Dati ben de heri bun rai. Syatu baka di den Kresten na ini Yudea kisi a brifi disi, den ben musu gwe libi den oso, den bisnis, nanga den famiri di no ben de Kresten èn den ben musu „lowe go na den bergi” (Mat. 24:16). Na a ten dati a ben prenspari srefisrefi taki den ben yepi makandra. Efu den ben gi yesi kaba na a rai di Paulus ben gi den fu prati san den ben abi nanga trawan, dan a ben o moro makelek gi den fu kon gwenti a nyun libi fu den.

¹⁴ A no ala ten wi brada nanga sisa o taigi wi san den abi fanowdu. Kow taki  dati a wefi fu wan brada lasi libi. Wi musu bori gi a brada, noso tyari en go na wan presi? Noso, wi kan yepi en fu krin na oso? Kande a no o taki noti fu di a no wani fruferi sma. Ma a ben o breiti srefisrefi efu wi yepi en fosi a aksi wi wan sani. Wi no musu waka nanga a denki taki wan tra sma o yepi en, noso taki ala ten a o taigi wi san a abi fanowdu. Aksi yusrefi: ’Efu a sani disi ben pasa nanga mi, fa mi ben o wani taki sma yepi mi?’

15. San wi musu du efu wi wani yepi trawan?

¹⁵ No meki en muilek gi trawan fu aksi yu wan sani. Wi alamala sabi brada nanga sisa na ini a gemeente di de klariklari ala ten fu yepi trawan. Noiti den e meki wi firi taki wi e fruferi den. Wi sabi taki wi kan go na den te wi abi yepi fanowdu èn wi alamala wani de leki den. Alan, wan owruman di abi 45 yari, wani de so wan sma. Di a prakseri fu na eksempre fu Yesus, a taki: „Yesus ben abi furu fu du, ma owrusma nanga yongusma ben lobi en èn den no ben frede fu aksi en sani. Den ben sabi taki Yesus ben e broko en ede nanga den trutru. Mi srefi wani de leki Yesus. Mi no wani taki sma frede fu aksi mi fu yepi den. Den musu sabi taki mi lobi den èn taki mi e broko mi ede nanga den.”

16. Te wi e du san Psalm 119:59, 60 e taki, dan fa dati o yepi wi fu waka moro bun baka Yesus?

¹⁶ Wi no musu lasi-ati efu wi no man du ala sani soifri soleki fa Yesus ben du en (Yak. 3:2). Wan studenti no man du ala sani precies leki fa a leriman fu en e du. Ma te a e leri fu den fowtu di a meki èn a e meki muiti fu du ala sani soleki fa a leriman fu en e du, dan a o go na fesi  moro nanga moro. Na so a de tu taki te wi e du san wi leri fu Bijbel èn wi e leri fu den fowtu di wi meki, dan wi o man waka baka Yesus moro bun.​—Leisi Psalm 119:59, 60.

17-18. Sortu wini wi o kisi te wi e teki na eksempre fu Yesus di ben lobi yepi sma?

¹⁷ Te wi de klariklari fu yepi sma, dan trawan o wani du dati tu. Wan owruman di nen Tim, taki: „Wan fu den reide di meki taki son brada du muiti yonguyongu kaba fu tron dinari ini a diniwroko, na fu di den ben e luku tra brada na ini a gemeente di ben lobi yepi sma èn den ben wani de leki den brada dati. Den yongu brada disi e yepi a gemeente sondro fu denki den srefi nomo èn den e yepi moro sma leki den owruman srefi.”

¹⁸ Wi e libi na ini wan grontapu pe sma e denki densrefi nomo. A pipel fu Yehovah no de so kwetikweti. Fu di na eksempre fu Yesus naki wi ati, meki wi wani du muiti fu de leki en. A tru taki wi no o man du ala sani finifini soleki fa en ben e du en, ma wi kan du muiti fu waka soifri na en baka (1 Petr. 2:21). Te wi e du muiti fu yepi sma leki fa Yesus ben du dati, dan wi srefi o breiti tu fu di wi sabi taki Yehovah feni wi bun.