1. Ngutiphi tintfo letinhle letentiwa bantfu baJehova lamuhla?

 LIBHAYIBHELI lasho kutsi bantfu baNkulunkulu ‘bebatawutinikela ngekutitsandzela’ bente umsebenti waJehova bacondziswa yiNdvodzana yakhe. (Hla. 110:3) Lesiphrofetho siyagcwaliseka lamuhla. Njalo ngemnyaka, tinceku taJehova letikhutsele ticitsa tigidzi tema-awa tenta umsebenti wekushumayela. Loko tikwenta ngekutitsandzela futsi tisebentisa imali yato. Tiphindze tisite nebazalwane bato ngetintfo labatidzingako, tibakhutsate, tiphindze tibasite babe nebuhlobo lobucinile naJehova. Labadzala belibandla netinceku letisebentako bacitsa ema-awa lamanyenti balungiselela tinkhulumo futsi bavakashela bazalwane babo nabodzadze kuze babakhutsate. Yini lebenta bente lomsebenti lomkhulu kangaka? Kungenca yekutsi batsandza Jehova nabomakhelwane babo.—Mat. 22:37-39.

2. Njengobe kusho KubaseRoma 15:1-3, ngusiphi sibonelo Jesu lasibekela sona?

² Jesu wasibekela sibonelo lesihle sekubeka tidzingo talabanye kucala kunetakhe. Natsi senta konkhe lesingakwenta kuze simlingise. (Fundza KubaseRoma 15:1-3.) Sitawutfola imiphumela lemihle nasetama kumlingisa. Jesu watsi: “Kunenjabulo lenkhulu ekupheni kunasekwemukeleni.”—Imis. 20:35.

3. Sitawucoca ngani kulesihloko?

³ Kulesihloko, sitawucoca ngaletinye tintfo Jesu latenta kuze asite labanye, sicoce nangekutsi singamlingisa njani. Sitawuphindze  sicoce ngekutsi singasikhulisa njani sifiso setfu sekusita labanye.

4. Jesu watibeka njani tidzingo talabanye kucala kunetakhe?

⁴ Jesu wasita labanye nanobe bekadziniwe. Cabanga ngaloko Jesu lakwenta ngesikhatsi sicumbi sebantfu sita kuye entsabeni, lokungenteka beyidvute naseKhaphanawume. Jesu bekacitse busuku bonkhe athantaza. Kungenteka bekadzinwe kakhulu, kodvwa watsi nakabona lesicumbi sebantfu wasivela ngobe bekunebantfu labeswele nalabagulako kuso. Akagcinanga nje ngekubelapha kodvwa wabeka lenye yetinshumayelo lenemandla kakhulu, lebitwa ngekutsi yiNshumayelo YaseNtsabeni.—Luk. 6:12-20.

5. Tinhloko temindeni tisilingisa njani sibonelo saJesu ngisho tidziniwe?

⁵ Tinhloko temindeni tingamlingisa njani Jesu? Cabanga nganasi simo: Inhloko yemndeni ibuya ekhaya idziniwe ngemuva kwekusebenta kamatima. Nanobe ifisa kuhlehlisa Kukhonta Kwemndeni kwangalelo langa, kodvwa incenga Jehova kutsi ayiphe emandla ekuchuba lesifundvo. Jehova uyawuphendvula umthantazo wayo futsi babanako Kukhonta Kwemndeni. Bantfwana batfola sifundvo lesihle ngalelo langa, sekutsi kukhonta Nkulunkulu kubaluleke kakhulu kubatali babo.

6. Niketa sibonelo lesikhombisa kutsi Jesu wacitsa sikhatsi nalabanye bantfu nanobe bekafuna kuba yedvwa.

⁶ Jesu bekatinika sikhatsi sekuba nalabanye bantfu ngisho nobe bekafuna kuba yedvwa. Cabanga nje kutsi Jesu wativa njani nakeva kutsi umngani wakhe Johane uMbhabhatisi ujutjwe inhloko. Kungenteka weva buhlungu kakhulu. LiBhayibheli litsi: “Nakeva ngalendzaba [lemayelana nekufa kwaJohane], Jesu wesuka lapho wahamba ngesikebhe waya endzaweni lethulile kute abe yedvwa.” (Mat. 14:10-13) Siyacondza kutsi yini leyamenta wafuna kuba yedvwa. Labanye betfu bayatsandza kuba bodvwa nabeva buhlungu. Kodvwa Jesu akazange akhone kuba yedvwa. Sicumbi lesikhulu sebantfu sefika kucala kunaye kulendzawo lebekaya kuyo. Wenta njani  Jesu? Wacabanga ngetidzingo talesicumbi futsi “wasihawukela.” Jesu wabona kutsi besidzinga lusito nekudvudvutwa nguNkulunkulu, ngako wasisita ngekushesha. Ecinisweni, ‘wase uyasifundzisa [hhayi tintfo letimbalwa, kodvwa] tintfo letinyenti.’—Mak. 6:31-34; Luk. 9:10, 11.

7-8. Niketa sibonelo lesikhombisa indlela labadzala belibandla labalingisa ngayo Jesu nakukhona lodzinga lusito ebandleni.

⁷ Labadzala belibandla labanelutsandvo bangamlingisa njani Jesu? Sijabula kakhulu ngemisebenti lemihle lesiyentelwa ngulabadzala belibandla! Bazalwane nabodzadze labanyenti abayiboni leminyenti yalemisebenti. Nasi sibonelo, nakuvela simo lesiphutfumako, bazalwane labangemalunga eKomidi Yekubonisana Netibhedlela basita bazalwane babo nabodzadze ngekushesha. Letimo letiphutfumako tivama kuvela ebusuku kakhulu! Kodvwa ngenca yekutsi bayabatsandza bazalwane babo nabodzadze, labazalwane nemindeni yabo babeka tidzingo tebazalwane nabodzadze kucala kunetabo.

⁸ Labadzala bemabandla baphindze basite ekwakheni emaHholwa eMbuso, naletinye takhiwo tenhlangano futsi bayasita nalapho kuvela tehlakalo. Ngetulu kwaloko, bacitsa sikhatsi lesinyenti basifundzisa, basikhutsata futsi basisekela. Kufanele sibancome kakhulu bonkhe labazalwane nemindeni yabo. Shengatsi Jehova angababusisa ngenca yaloko labakwentako! Nobe kunjalo, labadzala belibandla kufanele balinganisele njengabo bonkhe ebandleni. Akukafaneli bacitse sikhatsi lesinyenti benta imisebenti yelibandla bese bababete sikhatsi sekunakekela imindeni yabo.

9. Ngekusho kwaKubaseFiliphi 2:4, 5, yini onkhe emaKhristu lokufanele etame kuyenta?

⁹ Fundza KubaseFiliphi 2:4, 5. Nanobe singasibo labadzala belibandla sonkhe, kodvwa sonkhe singamlingisa Jesu ngekutsi sibeke tidzingo talabanye kucala kunetetfu. LiBhayibheli litsi “waba njengesigcili.” (Fil. 2:7) Cabanga ngaloko lesingakufundza kulelivesi. Sigcili nobe sisebenti sivame kubuka kutsi singamjabulisa njani umphatsi waso. Ngenca yekutsi sitisebenti taJehova netebazalwane betfu, sifisa kuba lusito kakhulu kuJehova nakubazalwane betfu. Loku ungakwenta ngekutsi ucabange nganaku lokulandzelako.

10. Ngumiphi imibuto lesingatibuta yona?

¹⁰ Tihlole. Tibute imibuto lenjenganayi: ‘Ngitimisela kanganani kusebentisa emandla ami nesikhatsi sami kuze ngisite labanye? Ngingenta njani nangingacelwa kutsi ngivakashele umzalwane ekhaya lelinakekela lasebakhulile, nobe nangingacelwa kutsi ngihambe nadzadze losakhulile emihlanganweni? Ngisukumela etulu yini nakunesidzingo salabatawuvolontiya nakuhlantwa indzawo yemhlangano nobe nakunakekelwa liHholwa leMbuso?’ Jehova uyajabula nasisebentisa sikhatsi setfu netintfo lesinato kuze sisite labanye, lokutintfo lesetsembisa kumnika tona nasitinikela kuye. Yini lesingayenta nasibona kutsi kunesidzingo sekutsi sitfutfukise?

11. Umthantazo ungasisita njani kutsi sibe nesifiso lesikhulu sekusita labanye?

¹¹ Thantaza kuJehova ngalokusuka enhlitiyweni. Ase sitsi uyabona kutsi kudzingeka wente lushintjo lolutsite, kodvwa ute umdlandla wekulwenta. Thantaza kuJehova ngalokusuka enhlitiyweni, umtjele konkhe. Mtjele indlela lotiva ngayo futsi umcele ‘akunike sifiso nemandla ekwenta intsandvo yakhe.’—Fil. 2:13.

12. Umzalwane losemusha angalisita njani libandla?

¹² Nangabe ungumzalwane losemusha, cela Jehova akusite ube nesifiso sekwenta lokunyenti ebandleni. Kulamanye emave, labadzala bemabandla banyenti kunetinceku letisebentako, futsi linyenti lato setikhulile. Njengobe inhlangano ichubeka ikhula, kunesidzingo lesikhulu sebazalwane labasebasha labatawunakekela bantfu baNkulunkulu. Nawenta nobe ngumuphi umsebenti lonikwa wona, utawujabula. Sisho ngani? Ngobe utawujabulisa Jehova, utakhele neligama lelihle, futsi utawujabula ngenca yekutsi usita labanye.

13-14. Yini lesingayenta kuze sisite bazalwane betfu nabodzadze? (Buka sitfombe lesisekhasini lekucala.)

¹³ Naka bazalwane bakho kuze ubone nabadzinga lusito. Umphostoli Pawula watjela emaHebheru watsi: “Ningakukhohlwa kwenta lokuhle nekupha labanye loko leninako, ngobe Nkulunkulu uyajabula ngeminikelo lenjalo.” (Heb. 13:16) Leso bekuseluleko lesihle! Ngekushesha nje ngemuva kwekutfola lencwadzi, lamaKhristu lebekahlala eJudiya kwadzingeka kutsi ashiye emakhaya awo, emabhizinisi awo kanye netihlobo tawo lebetingasiwo emaKhristu, futsi kwadzingeka ‘abalekele etintsabeni.’ (Mat. 24:16) Ngaleso sikhatsi, bekubaluleke kakhulu kutsi lamaKhristu asitane. Nangabe asheshe asisebentisa seluleko saPawula sekupha labanye kusengakenteki loko, bewatakutfola kumelula kwemukela simo sawo lesisha.

¹⁴ Bazalwane betfu nabodzadze abahlali basitjela nangabe badzinga lokutsite. Ase  sitsi umzalwane ushonelwa ngumfati wakhe. Uyakudzinga yini kusitwa ngekuphekelwa kudla, ngekwekuhamba nobe ngekwentelwa imisebenti yasekhaya? Kungenteka angaluceli lusito ngobe esaba kutsi utawube uyasihlupha. Kodvwa angajabula kakhulu nasingamsita ngetintfo latidzingako ngisho angakasiceli. Akukafaneli sicabange kutsi ukhona lotamsita nobe kutsi utawusho nakadzinga lusito. Tibute: ‘Kube bekungatsiwa ngisesimeni lesifana nesakhe, yini lebengingatsandza kusitwa ngayo?’

15. Yini lokufanele siyente nangabe sifuna kusita labanye?

¹⁵ Yenta kube melula kutsi labanye bacele lusito kuwe. Siyaciniseka kutsi bakhona bazalwane nabodzadze lobatiko ebandleni labahlale bakulungele kusita labanye. Abasenti sitive ngatsi siyabahlupha. Siyati kutsi bahlale bakulungele kusisita futsi singajabula kufanana nabo! Alan longulomdzala welibandla loseminyakeni yabo-40, uyafisa kutsi labanye bative bakhululekile kucela kuye lusito. Acabanga ngesibonelo saJesu, Alan utsi: “Jesu bekahlala amatasatasa, kodvwa bantfu bebudzala lobehlukene bebeta kuye futsi bebativa bakhululekile kucela lusito kuye. Bebabona kutsi ubakhatsalela mbamba. Ngiyafisa kumlingisa Jesu nekutsi bantfu bangati njengemuntfu lokumelula kukhuluma naye, lonebungani nalokhatsalelanako.”

16. Kungasisita njani kwenta loko lokushiwo Tihlabelelo 119:59, 60 kuze sikhone kulingisa Jesu?

¹⁶ Akukafaneli siphele emandla nangabe singakhoni kumlingisa ncamashi Jesu. (Jak. 3:2) Umfundzi lofundza kudvweba angahle angakhoni kudvweba ncamashi njengathishela wakhe. Kodvwa njengobe afundza emaphutseni lawentako, futsi etame kudvweba njengathishela wakhe, utawutfutfuka kancane  kancane. Ngendlela lefanako, nangabe sikwenta loko lesikufundza nasitidadishela liBhayibheli, sente lokusemandleni etfu kuze silungise emaphutsa lesiwentako, singakhona kumlingisa Jesu.—Fundza Tihlabelelo 119:59, 60.

17-18. Ngumiphi imiphumela lesitayitfola nasilingisa sibonelo saJesu sekusita labanye?

¹⁷ Nangabe sisita labanye, labanye bangafundza esibonelweni setfu futsi bente lokufanako. Lomunye lomdzala welibandla lokutsiwa nguTim utsi: “Labanye bazalwane labasebasha batfutfuke baze baba tinceku letisebentako, lokunye lokubasitile kubona sibonelo salabanye lebebakulungele kusita labanye futsi nabo bafuna kubalingisa. Labazalwane labasebasha balusito kakhulu ebandleni futsi basita nalabadzala belibandla.”

¹⁸ Bantfu labanyenti kulelive baticabangela bona. Kodvwa bantfu baJehova abafani nabo. Siyasikhutsata sibonelo saJesu sekusita labanye futsi natsi sitimisele kumlingisa. Kuliciniso kutsi ngeke sikhone kumlingisa ncamashi, kodvwa singakhona ‘kulandzela tinyatselo takhe edvute.’ (1 Phet. 2:21) Nasilingisa sibonelo saJesu sekusita labanye, sitawujabula ngobe siyati kutsi Jehova uyasemukela.