1. Ni mibeele ki iweeme ituli twamona pakati ka bantu bakue Yehova?

 MUSITA waapitile, Bibilia yaalandile ntaanzi nangue bantu bakue Leeza “bakepeela bo beene mu kwitonena” mu miilo yakue Yehova bali pensina butunguluzi bwakue Muana wakue. (Malum. 110:3) Bobo bukabika kakiine buli mukufikiliziiwa loonu. Kila muaka babombi bakue Yehova bali ni mute, bali mukupisia mamilioni a nsa mu miilo ya kusimikila. Bali bakita miilo ezio mu kwitonena, kabili bila balipua. Kabili bali bapisia nsita babakwasia bazumizi naabo mu aali ya kimubili, vibali baiunvua, ni mu aali ya kimupasi. Bakote pamo ni babombi bali babombela bali bapisia nsita ingi bali mukuteania kulonghaana ni kubendela balupua ni bankazi babo eevi kubakoselezia. Ni kiki kili kyabakinkizia bantu bakue Yehova bakite ezio miilo? Paantu bamutonene Yehova, kabili babatonene bantu.​—Mat. 22:37-39.

2. Nga vilandile Baroma 15:1-3, Yesu waatusiliile mufuano ki?

² Yesu waatubiikiile mufuano wa kwemena bintu bikabiile bange kuliko bintu byaali wakabiile weene muine. Tuli twaezia kukita maka etu onse eevi tumupale. (Soma Baroma 15:1-3.) Kine twaikwinda kumupala, twakaba kupata bintu biweeme. Yesu waalandile eevi: “Mu kupeelana muli nsaansa ingi kukila mukupeelua.”​—Miil Bat. 20:35, NWT.

3. Tuli kulondoluela ki mu leeli lyasi?

³ Mu leeli lyasi, tuli kulondoluela kabili bintu bimo pakati ka beelia byaakitile Yesu bilangiliile nangue waipeele eevi ababombele bange, kabili tuli kumona vituli kuviinda kupala mufuano wakue. Tuli kulondoluela kabili vituli kuviinda kukizia nkulu yeetu ya kubabombela bange.

4. Yesu waabiikile siani bintu bikabiile bantu bange pa ntaanzi kuliko bintu byaali wakabiile weene?

⁴ Yesu waabakwasiizie bange anzia kine waali watopele. Tontonkania Yesu vyaakitile musita bantu bengi lubaaizile eevi basaakaane nakue peepi ni lupili, paange peepi ni Kapernaumu. Yesu waakesiizie wapepa. Kipalile abanga watopele saana, inzi musita lwaamwene libumba lya bantu waabonvuiliile nkumbu bapabi ni baluele babanga baali pakati kabo. Taabakosiiziesie, inzi waalandile ni maasi a bantu bonse asikalabika ali akuutua Masambilizio a ku Lupili.​—Luk. 6:12-20.

5. Baviazi bali bapala siani mibeele ya kwipeela yakue Yesu musita ubatopele?

⁵ Mitue ya masesi ili yamupala siani Yesu? Tontonkania palua ozu mufuano. Kisia kukita koba kalingi wali ku miilo, mutue wa mu nsesi waiza ku nsesi watopele saana. Paange, keekio kyungulo atonene kwalulula ntantiko ya Lupupo lwa mu Lupua, inzi wamuloomba Yehova eevi amupeele maka a kutungulula lisambililo. Yehova waasuka mapepo akue, ni lisambililo lyatwalilila nga vibali bakita kila mulungu. Baana basambilila kintu kya mana saana keekio kyungulo, i kulanda nangue bainika nangue kumupupa Yehova, i kintu kya mana saana mu buikazi bwa baviazi babo.

6. Leeta mufuano ulangiliile Yesu vyaaipeele musita wakue eevi kubakwasia bange.

⁶ Yesu waali wapisia nsita pamo ni bange anzia kine ezio nsita waali wakabiile kuya wali pa bunke. Eba, kunti watontonkania Yesu vyaaiunvuile musita lwaapatile mpunda nangue Yoane Mubatizi, kibuza wakue wakipaiwa? Kipalile Yesu waakisikile saana. Bibilia ili yalanda eevi: ‘Lwaaunvuile mpunda [palua lufu lwakue] Yoane, waafuminepo, wapatama mu buato waya kwikala kwa bunke.’ (Mat. 14:10-13) Kunti twainika kintu kyaamulengiizie aye wali kwa bunke. Bantu bange bali batona kulila bali pa bunke. Inzi Yesu waandilue kupata fuasi yakuya wali bunke. Libumba lya bantu lyaafikile ntaanzi ku fuasi kwaali kwakebele Yesu kuya eevi aye wali kwa bunke. Yesu waakitile siani? Waatontonkaniizie palua bintu byaali byakabiile leelio libumba lya bantu, kabili ‘waabonvuiliile nkumbu.’ Yesu waainikile nangue babo bantu baali bakabiile kukwasiiwa ni  kukoseleziiwa na Leeza, pakaako waabakwasiizie bila kukokola. Kakiine ‘waabambile kubasambilizia [apana twebo tuniini, inzi] twebo twingi.’​—Mark. 6:31-34; Luk. 9:10, 11.

7-8. Leeta mufuano umo ulangiliile bakote bali ni ntono vibali bamupala Yesu musita muntu umo mu kilonghaano lwakabiile kukwasiiwa.

⁷ Bakote bali ni ntono bali bamupala siani Yesu? Tuli twatasia saana miilo ili yakita bakote bali ni mutima wa kwipeela palwetu! Balupua ni bankazi bengi mu kilonghaano, te beezi kumana kila miilo ili yakita bakote. Kwa mufuano, musita lukuli kwaaluka aali iloombele kukita lubilo palua matunzo, baalia balupua bali babombela mu Kabungue Kali Kabombela Pamo ni Opitali bali bakita lubilo eevi kubakwasia balupua ni bankazi babo. Aali ingi ya evio ili yaloomba kukita lubilo, lingi ili yakitika busiku! Inzi, paantu bali basaangua bakinkiziiziwe na nkumbu palua balupua ni bankazi bali basaangua mu maavia, babo bakote batonua pamo ni lupua lwabo bali babiika pa ntaanzi bintu bikabiile balupua ni bankazi, kuliko kutangizia bintu bibakabiile beene.

⁸ Kabili bakote bali bakwasia mu miilo ya kukuula Masesi a Bukolo, ni miilo inge ya kukuula, kabili bali babomba ni mu miilo ya kukwasia baalia basaanzilue. Kabili bakote bali bakita nsita ingi bali mukutusambilizia ni kutukoselezia. Tupalile kubatasia kakiine babo balupua pamo ni lupua lwabo. Kansi Yehova akilepo kubakwasia palua mutima ubali balangilila! Kakiine, bakote bapalile kuya bali ni malanga ateekameene nga balupua ni bankazi bange. Te bapalile kupisia nsita ingi saana mu miilo ya kiteokrasi ni kulengia aali ya mu lupua lwabo iinooneke.

9. Nga vilandile Bafilipi 2:4, 5, Bakristu bonse bapalile kukuzia aali ki?

⁹ Soma Bafilipi 2:4, 5. Anzia kine fwe bonse te tuli bakote, kila muntu kunti wapala mutima wa kwipeela wakue Yesu. Bibilia ili yalanda nangue ‘waaialuile mubombi.’ (Baf. 2:7) Tontonkania palua bintu bituli kuviinda kusambilila mu ozo mulongo. Muzia ao mubombi apalile, ali wakeba fuasi ya kumusaansamusia mukulu wakue wa miilo. Paantu tuli bazia bakue Yehova kabili tuli twabombela balupua betu, tutonene kuya twali ba mana saana kuli Yehova ni ku balupua betu. Kunti twaviinda kukita evio kupitila kukoonka masoke ali paapa pensina.

10. Kunti twaiipuzia biipuzio ki?

¹⁰ Toosia aali yobe. Iipuzie biipuzio nga beebi: ‘Aali yane ya kwipeela mu kwitonena eevi kukwasia bange, ili yasaangua siani? Kwa mufuano, ndi nakita siani kine nalandua kuya kumwendela lupua akotele ku nsesi yakue ao kuya kumutwama ni kuya nakue ku kulonghaana? Eba, ndi nasaangua naleengele kukwasia kine kuloombelue bantu ba kukwasia kuwaamia fuasi ya kulonghaaninapo ao kuwaamia Nsesi ya Bukolo?’ Musita utwaaipeele fwe beene kuli Yehova, twaamulaile nangue twakabombia byonse bituli nabio eevi kumubombela weene. Atonene tubombie musita weetu, maka, pamo ni bintu byetu bya kimubili eevi kukwasia bange. Kansi, ali waunvua nsaansa musita utuli twakita evio mu kwitonena. Kine twamona nangue tupalile kuwaamia aali yeetu, kunti twakita siani?

11. Lipepo kunti lyatukwasia siani kukuzia mutima wa kwipeela?

¹¹ Pepa kuli Yehova kufuma ku mutima. Tulande nangue, kuli ni kintu kyupalile kuwaamia, inzi wainika nangue mutima te ukukinkiziizie kukita bupilibuko bupalile. Kine waisaanga mu ezio aali, pepa saana kuli Yehova. Landa bila kufiika. Mubuile Yehova vyuli mukwiunvua, kabili muloombe akupeele “nkulu ni buviinde bwa kukita.”​—Baf. 2:13, NWT.

12. Balupua balumendo babatiziiziwe kunti bakwasia siani bilonghaano byabo?

¹² Kine uli lupua mulumendo abatiziiziwe, muloombe Yehova akukwasie eevi utone kubombela saana balupua ni bankazi mu kilonghaano kyobe. Mu byalo binge muli mwasaangua bakote bengi kuliko babombi bali babombela, kabili bengi pakati ka babo babombi bali babombela, tebeezi kusaangua bali balumendo. Paantu buyantanzi mu kuteania butwaliliile kuya bwaongezeka, tukabiile balupua balumendo eevi bakwasie kusuunga bantu bakue Yehova. Kine watona kubombela koolia kubakukabiile eevi ukwasie, wakaba kwaluka ni nsaansa. Juu ya ki? Paantu wakaba kumusaansamusia Yehova, balupua bakaba kwinika nangue utonene kubakwasia bange, kabili wakaba kwimwena nsaansa ili yafuma mu kukwasia bange.

13-14. Kunti twakita siani eevi tubakwasie balupua ni bankazi betu? (Mona foto ili ku ntendeko ya kazeeti.)

¹³ Uye watoosia ni kumona bintu bikabiile bantu bange. Mutumua Paulo waabalandile eevi Bakristu baali baikeele mu Yudea: “Tekulabe kukita biweeme ni kukwasiania paantu ngeleelo ya ozu musango i ili yamuwaamina Leeza.” (Baeb. 13:16) Ozo ubanga wali musoko waweeme! Musita uniini kisia kupata ozo mukanda, babo Bakristu, baali bapalile kusia masesi abo, bintu byabo bya busulu, pamo ni bantu babo ba mu lupua basizumiine, kabili baali bapalile ‘kubutukila ku mpili.’ (Mat. 24:16) Pa ozo musita babanga bapalile  saana kukwasiana. Kine ntaanzi ya paapo babanga babombia musoko wakue Paulo wa kuya bakwasiana kupitila beelia bibaali bakwete, kipalile baamwene kyaleengele kwipatanisia ni nzila ya leenu ya buikazi.

¹⁴ Paange balupua ni bankazi betu, tebaviinda kutubuilasie lyonse bintu bibakabiile. Kwa mufuano, lupua kunti wafuilua na mukazi ni kusiala mu bulanda. Eba, ozo lupua akabiile kukwasiiwa kyakulia, nfalanga ya kulipila lwendo ao kiombo kya kumutwala ku fuasi imo, ao kukwasiiwa kukita miilo ya pa nsesi? Paange weene kunti watiina kutubuila eevi tumukwasie paantu amwene nangue ali kutuleetela miilo. Inzi, kunti watasia saana kine twamukwasia anzia kine tanatulande tumukwasie. Te tupalile kutontonkania nangue wakaba kukwasiiwa na bange ao nangue lyonse wakaba kuya walanda muine kine akebele kukwasiiwa. Iipuzie eevi: ‘Kabenge neene i ali mu ezio aali, nga nakitona kukwasiiwa siani?’

15. Kine tutonene kubakwasia bange tupalile kupingula kukita ki?

¹⁵ Uye waali ni mibeele ili kulengia bange baye bakupalama. Kulanda kisinka umanine balupua ni bankazi ba mu kilonghaano kyenu bali basaangua baleengelesie lyonse kukwasia bange. Tebeezi kulengia ata kaniini twimone nangue tuli mukubeemia. Tumanine nangue lyonse bali basaangua batonenesie kutukwasia, kabili kunti twatona kwalukasie nga beene! Lupua Alan, ali na miaka 45, ali watona kuya wali ni mibeele ya kuya waleengele kupalamua. Alan walanda eevi palua mufuano wakue Yesu: “Yesu abanga wali ni bingi bya kukita, inzi bantu ba miaka yonse baali bamutonene kabili tebaali batiina kumuloomba eevi abakwasie. Baamumwene kuya wali muntu abanga wabeemena saana.  Ntonene kuya nali nga Yesu, kabili nali muntu ali wapalamua, asaansamukile kabili ali waemenana.”

16. Kubombia lileembo lya Malumbo 119:59, 60 kunti kwatukwasia siani kukoonka mu peepi mufuano wakue Yesu?

¹⁶ Kine twaandua kumupala Yesu mu nzila ipuililikile te tupalile kutioka mutima. (Yak. 3:2) Kine muntu ali mukusambilila kukita kantu, taviinda kukita buino saana nga mwalimu wakue. Inzi, kine ozo muntu wasambilila kupitila bilubo byakue ni kwikwinda kukoonka mufuano wakue mwalimu wakue, wakaba kukila kuwaamia bufundi bwakue. Kine twabombia bintu bituli twasambilila mu lisambililo lya bunke, twakaba kukila kuwaamia bufundi bwetu ni kukila kukoonka mufuano wakue Yesu.​—Soma Malumbo 119:59, 60.

17-18. Kine twapala mibeele yakue Yesu ya kwipeela, twakaba kupata mpaalo ki?

¹⁷ Mibeele yeetu ya kwipeela kunti yalengia ni bange batupale. Mukote umo ali wakuutua Tim walanda eevi: “Balupua bange balumendo saana baakifikiila kwaluka babombi bali babombela. Kintu kimo kyaalengiizie ni kumona bange vibaali baipeela eevi kubakwasia bange, pakaako ni beene baatonene kubapala. Babo balupua balumendo bali bakwasia saana kilonghaano kyetu, kabili bali babakwasia saana bakote.”

¹⁸ Bantu bengi mu keenu kyalo bali ni mibeele ya butani. Inzi, bantu bakue Yehova beene tebeezi kusaangua bali evio. Mibeele yakue Yesu yakwipeela ili yatukumia saana, kabili tupinguile kupala mufuano wakue. Te tuviinda kukoonka mu kupuililika ntanfu yakue Yesu, inzi kunti ‘twakoonka mu peepi ntanfu yakue.’ (1 Pet. 2:21, NWT) Kine twakita maka etu onse eevi kupala mibeele ya kwipeela yakue Yesu, ni fwefue twakaba kwaluka ni nsaansa paantu tuli mukusaansamusia mutima wakue Yehova.