1. Inogne ty toe-tsaigne soa anagna o vahoa i Jehovah-o?

FA ELA ty Baiboly ro nirehake tie “hanolo-tegna an-tsitrapo” mba hanompo i Jehovah ty vahoa’e, sady magnorike ty tari-dala i Ana-dahi’ey. (Sal. 110:3) Tena tanterake o faminaniagne iohoe amy izao. Isan-taogne le an-jato tapetrisa’e ty lera lany o vahoa i Jehovah-o mba hanoagne i asa fitoriagney. Tena sitra-po iareo ty hanao izay sady tsy karamaegne iareo. Manokagne fotoagne hoahy o mpiara-manompo ama’eo ka iareo mba hagnampeagne iareo hahazo ty raha ilae’e ara-nofo naho hampaherezagne aze vaho hagnamafesagne ty finoa’e. Mandany lera tsy fotofoto ka o rahalahy voatendreo mba hagnomanagne ty anjara’e amy ty fivoriagne naho hitilihagne o mpiara-manompò mba hampaherezagne iareo. Inogne ty mandrisike iareo hanao izay? Ty hatea iareo i Jehovah naho ty ndaty hafa.​—Mat. 22:37-39.

2. Inogne ty modely nengà i Jesosy ho antika, arake ty trea amy Romanina 15:1-3 ao?

² Natoro i Jesosy tamy ty fiaigna’e fa ze hahasoa ty hafa heike ro tena nihevere’e voaloha’e fa tsy ze hahasoa ty vata’e. Mikezake mafe tika mba hagnorike ty modely nimei’e. (Vakio ty Romanina 15:1-3.) Handrambe soa tika naho manao izay. Hoe ty Jesosy: “Mahasambatse vata’e ty magnomey ty amy tie mandrae.”​—Asa. 20:35.

3. Inogne ty hodinehentikagne ato?

³ Hodinehentika amy ty lahatsoratse toy ty sorogne natao i Jesosy mba hahafaha’e hagnampe ty hafa naho ty fomba azontika anahafagne aze. Hodinehentika ato ka ty raha hagnampe antika hampitombo i fagniriantika hanao raha hoahy ty hafay.

4. Akore ty nanoroa i Jesosy fa ze hahasoa ty hafa heike ro nihevere’e voaloha’e?

⁴Mbe nagnampe ty hafa avao ty Jesosy ndra tie fa nirokake aza. Dineho ohatse ty natao’e naho fa niavy tama’e eo i vahoake maroy tamy ireke tam-bohitse agney. Va’e narine i Kapernaomy o vohitse iohoe. Nivavake avao ty Jesosy tamy ty hariva taloha io. Tsy maintsy ho nirokake areke ty Jesosy naho fa nimaray igne. Faie naho fa nahatrea i vahoake maroy reke, le nalahelo i ndaty mahantra naho marare niarake tamy i vahoake reỳ. Le nagnasitragne i ndaty nararey reke. Faie tsy izay avao ty natao’e. Nanao lahajaka tena nahavelombolo hoahy iareo ka reke tamy izay. Toriteny i Jesosy Tam-bohitse ey ty ahafantarantika o lahajaka’e iohoe.​—Lioka 6:12-20.

5. Akore ty azo o loha ty keleiagneo anahafagne i Jesosy naho fa rokake iareo?

⁵Ty fomba hanahafa o loha ty keleiagneo i Jesosy. Dineho ty ohatse toy: Misy loha ty keleiagne raike rokake naho fa avy an-tragno amy iareo ao, amy ie boake niasay. Va’e tea’e hofoagnagne zao i Fotoam-pivavaha ty Keleia iareo hatao amy ty hariva ioy. Faie nangatake amy i Jehovah reke mba hagnomey hery aze hahavità’e mitarike i fianara iareoy. Namale i vavake natao’ey ty Jehovah, le nivita’e avao ty nitarike i fianara iareoy manahake ty fatao’e isan-keregnandro. Izao ty lesogne lahibey nianara i ana iareo rey tamy i hariva igne: ‘Tsy misy raha hevere o rae aman-drene’ay reo ho sarobily ambone ty raha ara-pagnahy.’

6. Mirehafa ohatse raike ahatreavagne tie nahafoe ty fotoa’e hoahy ty hafa ty Jesosy ndra tie nite ho irerike aza.

⁶Nahafoe ty fotoa’e hoahy ty hafa ty Jesosy ndra tie te ho nirerike aza. Mba azo’o sare an-tsaigne vao ty raha nitsapa i Jesosy naho fa naharey reke tie nitapahen-doha ty Jaona Mpanao Badisa? Azo antoke fa tsy maintsy ho nalahelo mafe reke. Hoe ty Baiboly: “Niala teo ty Jesosy naho fa naharey [tie nimate ty Jaona], le nandeha sambo mbamy i toeragne bangìgne zay agne reke satria te ho irerike.” (Mat. 14:10-13) Haintika tie nagnino ty Jesosy ro nite ho irerike. Misy ndaty te ho irerike naho fa malahelo. Faie tsy afake nanao izay ty Jesosy. Fa nagnino? Nisy vahoake maro niavy aloha tamy i toeragne mitokagne tea’e handehana’ey agne. Le akore ty natao’e? ‘Nitretréʼ  iareo reke, satria nitsapaʼe fa tena nipay raha ara-pagnahy i ndaty rey mba hamelombelogne iareo. Le avy le nanao raha malaky areke reke mba hagnampeagne iareo. Rehafe ty Baiboly tie: “Nanomboke nampianatse iareo raha maro reke.”​—Mar. 6:31-34; Lioka 9:10, 11.

7-8. Mirehafa ohatse mampiseho ty fomba anahafa o androanavi-pagnahy bey hateao i Jesosy naho fa misy mila fagnampeagne ty amo o fiangonagneo eo.

⁷Ty fomba anahafa o androanavi-pagnahy bey hateao i Jesosy. Tena ankasitrahantikagne ty asa atao o androanavi-pagnahy bey hateao ho antika. Tsy le hay ty ankamaroa ty ndaty amo o fiangonagneo eo ty asa atao iareo iaby amy ty ankapobei’e. Naho misy mpiara-manompo ohatse marare le mila fitsaboagne tampoke, le avy le manao raha malaky ty androanavi-pagnahy agnisa ty Komity Mifandrambe amy ty Lapotaly mba hagnampeagne i mpiara-manompo ama’ey. Mateteke aza halegne ty isehoa ze raha zay. Faie noho ty fiferegnesa o androanavi-pagnahy bey hatea rehoe i rahalahy ndra i rahavave iareoy, le hamake engà iareo eo i keleia iareoy fa mandeha iareo magnampe i mpiara-manompo amy iareoy.

⁸ Mandrambe anjara amy ty fagnoregnagne i Anjomba i Fanjakagney naho amy ty tetik’asa hafa ka o androanavi-pagnahio, agnisa izay ty amy ty fagnampeagne ze niazom-boigne. Fa tsy rehafegne sasa ty halako ty fotoagne lany iareo mba hampianaragne naho hampaherezagne antika. Tena fagneva ty hoderaegne o rahalahy rehoe naho ty keleia iareo. Lonike abey ty Jehovah hitahy iareo noho ty toe-tsaigne soa anagna iareo! Faie mazava hoaze fa mila mahay manahatsahatse avao ka iareo, manahake o ndatio iaby avao. Tsy toko’e handany fotoagne bey loatse hanoagne i raha rey iareo kera hanjare tsy vita’e ty hagnomey ze raha paliae ty keleia’e.

9. Inogne ty toe-tsaigne toko’e hikezaha ty Kristiana iaby hanagnagne, arake ty Filipianina 2:4, 5?

⁹ Vakio ty Filipianina 2:4, 5. Tsy o androanavi-pagnahio avao ro toko’e hikezake hihevetse ze raha hahasoa ty hafa aloha ty tegna’e fa itika iaby. Rehafe ty Baiboly fa “nangalake ty vinta o mpanompò” ty Jesosy. (Fil. 2:7) Mba dineho heike ty dika o rehake rehoe. Lava mipay hirike mba hanoagne raha hampifaleagne i tompo’ey avao o mpanompò. Noho itika mpanompo i Jehovah sady manompo o rahalahio ka, le azo antoke fa irie’o ty hampiasae i Jehovah naho o rahalahio amy ty fomba maro. Hagnampe azo hahavita izay ty fandinehagne ty soso-kevetse magnarake retoa.

10. Ino iaby ty fagnonteneagne azontika saintsaignegne?

¹⁰Dineho ty toe-tsai’o. Saintsaigno ty fagnonteneagne retoa: ‘Vognogne hamoe ty fotoako naho ty heriko mba hagnampeagne ty hafa vao raho? Akore ohatse ty ataoko, naho angatahegne mba hitilike o rahalahy naho o rahavave fa beio an-tragno’e agne raho, ndra ampangalagne iareo an-tragno’e agne mba hinday iareo hivory? Le avy le manolo-tegna an-tsitrapo vao raho naho fa misy ndaty ilaegne mba hagnalio i toeragne fanoagne havoriambey rey ndra hikojakoja i Anjomba i Fanjakagney?’ Tena ho fale tika naho mahafoe ty fotoantika naho ty herintika vaho ty fanagnantikagne mba hagnampeagne ty hafa, satria nampitamà ty hagnomey o raha rehoe iaby i Jehovah tika naho fa nanokan-tegna ho aze. Inogne ty hagnampe antika naho mahatsapa tika tie mbe mila mikezake hahafoe tegna hoahy ty hafa?

11. Nagnino ty vavake ro magnampe antika hanagne i toe-tsaigne mahafoe tegna hoahy ty hafay?

¹¹Mivavaha mafe amy i Jehovah. Andao hatao tihoe mahatrea rehe tie misy lafi’e ila’e mbe mila ikezaha’o, faie tsy managne fagniriagne hanao aze rehe. Naho izay ty raha misy, le azo’o atao ty mangatake mafe amy i Jehovah amy ty alala ty vavake. Tsoro ama’e ty maregne. Ambarao aze ty raha tsapa’o, le mangataha ama’e mba homea’e ‘i fagniriagney naho hery hanoagne’ izay.​—Fil. 2:13.

12. Inogne ty azo o rahalahy tanora vita badisao atao mba hagnampeagne ty fiangona iareo?

¹² Naho rahalahy tanora sady vita badisa rehe, le azo’o atao ty mangatake amy i Jehovah mba hagnampe azo hanagne fagniriagne hampiasae’e amy ty fomba maro amo o fiangonagneo eo. Amy ty tane ila’e agne, le ty androanavi-pagnahy ro tena maro naho oharegne amy ty mpagnampe amy ty fiangonagne, sady ie amy izao iareo fa bey fa tsy tihoe mbe tanora. Tena mipay rahalahy tanora areke tika amy izao mba hagnampe amy ty fikarakaragne o fiangonagneo, satria ty fandaminagne mihamandroso avao. Ho fale rehe naho vognogne handeha amy ze toeragne mipay fagnampeagne. Fa nagnino? Satria hampifale i Jehovah rehe, hanagne laza soa, sady hahatsiaro ho afa-po ka.

13-14. Inogne ty raha hagnampe antika hahafoe tegna hoahy ty hafa? (Henteo ty sare amy ty fogno ty gazete toy.)

¹³Dineho ze raha va’e ho paliae ty hafa. Nanoro hevetse o Hebreò hoe izao ty apostoly Paoly: “Ko magnaligno hanao ty soa naho hizara amy ty hafa, fa ty sorogne hoe izay ty ankasitrahan’Andrianagnahare.” (Heb. 13:16) Tena nahasoa iareo o torohevetse iohoe. Ty anto’e, nila “nilay am-bohitse agne” o Kristiana nitoboke ta Jodia agne rehoe tsy ela tafara ty nahazoa iareo o taratasy iohoe. Tsy maintsy nienga ty tragno’e, ty asa’e naho ty longo’e tsy manompo i Jehovah rey iareo tamy izay. (Mat. 24:16) Azo antoke fa tena nila nifagnampe o Kristiana rehoe tamy izay. Naho ohatse  nampihatse i toroheve i apostoly Paoly hifampizara ze raha anagnagne amy ty hafay iareo, le nimora tamy iareo ty nizatse i fiaigna iareo vaovaoy.

¹⁴ Va’e tsy hirehake amantika ty raha paliae iareo o rahalahy naho o rahavaventikagneo kindraike. Akore ohatse naho nimate ty valy ty rahalahy raike? Kera i rahalahintikagney mipay ndaty mba hahandro ho aze, ndra hinday aze naho ty raha vilie’e, vaho hanao tolon-draha an-tragno’e ao? Va’e tsy hirehake amantika reke satria tsy te hanahiragne antika. Faie azo antoke fa tena ho fale reke naho le avy le manao raha mba hagnampeagne aze tika ndra tie tsy mirehake amantika aza reke. Tsy toko’e hieretseretse tika tie tsy maintsy hisy hikarakara avao reke, ndra mbe hirehake amantika avao reke naho fa mipay fagnampeagne. Eretsereto areke zao: ‘Inogne zao ty raha teako ho natao amako naho izaho ro tratse ty raha hoe io?’

15. Ino ty tsy maintsy ataontika naho te hahafoe tegna hoahy ty hafa?

¹⁵Mikezaha ho mora hatognegne. Azo antoke fa misy rahalahy naho rahavave amo o fiangonagneo eo trea’o tie lava vognogne hagnampe ty hafa avao. Mbe lia iareo naho nanao ze hahatsapantika tie manahiragne iareo tika naho fa mipay fagnampeagne amy iareo. Manjare matoky areke tika tie hagnampe antika iareo naho fa mila izay tika, sady teantika ka ty hanahake iareo. Te ho mora hatognegne ty Alan, androanavi-pagnahy raike 45 taogne. Izao ty rehafe’e miomba i Jesosy: “Nimaro raha atao ty Jesosy. Faie tsy natahotse hangatake fagnampeagne ama’e o ndatio iaby ndra bey ndra kede. Nitrea iareo tie tena nihevetse ze hahasoa iareo reke. Tena te hanahake i Jesosy amy ty foko raho, le ho mora hatognegne, bey hatea naho mihevetse ty hafa manahake aze.”

16. Nagnino ty fampiharagne ty Salamo 119:59, 60 ro hagnampe antika hitsikombe soa i Jesosy?

 ¹⁶ Tsy toko’e ho kivy tika naho mahatsapa tie tsy tena mahavita mitsikombe i Jesosy amy ty fomba voririke. (Jak. 3:2) O mpianatseo zao tsy tena hahay hitovy amo o mpampianatse azeo. Faie hitombo ty fahaiza’e arakarake ty andrambesa’e lesogne amy ty hadisoa’e naho ty ikezaha’e mafe hanahake i mpampianatse azey arake ze vita’e. Naho itika ka mampihatse ty raha nitreantika tamy ty fianaragne raike nataontika, sady mikezake avao magnitsy ty hadisoantikagne, le ho vitantika ty hagnorike soa ty modely i Jesosy.​—Vakio ty Salamo 119:59, 60.

17-18. Ino ty soa ho azontikagne naho itika mahafoe tegna hoahy ty hafa manahake i Jesosy?

¹⁷ Mifindra o toe-tsaigne mahafoe tegna hoahy ty hafao. Hoe ty Tim, androanavi-pagnahy: “Misy rahalahy amy ty fiangona’ay eo mbe tanora le fa mpagnampe amy ty fiangonagne. Ty ila’e aza le mbe kede vata’e. Fa inogne ty nahavy izay? Satria nite hanahake i ndaty nahafoe tegna hoahy ty hafa nitrea’e rey iareo. Magnampe o fiangona’ay io naho tena manohagne o androanavi-pagnahio o rahalahy tanora rehoe.”

¹⁸ Tea tegna ty ankamaroa ty ndaty amy ty tontolo toy eto. Faie o vahoa i Jehovah-o tsy hoe izay. Nisy voka’e tamantika ty toe-tsaigne soa nanagna i Jesosy, le ty fahafoezan-tegna hoahy ty hafa, sady tapa-kevetse ty hanahake aze ka tika. Maregne fa tsy ho vitantika ty hagnorike ty lia’e amy ty fomba voririke, faie afake ‘magnorike an-tomitse’ ty lia’e tika. (1 Petera 2:21) Naho itika mikezake hahafoe tegna hoahy ty hafa manahake i Jesosy, le tena ho fale satria mahazo ty fankasitraha i Jehovah.