1. Naa yimba ya dimɛna yɛnaso l’atei w’ekambi wa Jehowa?

AYA edja kele Bible kakatatshi dia wodja wa Nzambi “wayoyakimɔ la lolango” l’olimu wa Jehowa l’ɛlɔmbwɛlɔ k’Ɔnande. (Os. 110:3) Prɔfɛsiya kɛsɔ kekɔ lo kotshama mɛtɛ ɛlɔ kɛnɛ. Ɔnɔnyi tshɛ, ekambi wa Jehowa wele l’ohetoheto mbetshaka nkama ya miliyɔ ya wenya l’olimu w’esambishelo. Hawowafute dia nsala olimu ɔsɔ, koko vɔ mbosalaka la lolango lawɔ. Vɔ mbɔsaka nto etena ka nsukɛ asekawɔ ambetawudi lo demba, lo yimba ndo lo nyuma. Dikumanyi la ekambi wakimanyiya mbɔsaka wenya efula lo nɔngɔsɔla tenyi dia nsanganya ndo lo nkokɛ asekawɔ ambetawudi. Ko kakɔna kaatshutshuya vɔ tshɛ dia nkamba olimu ɔsɔ? Ekɔ ngandji, mbuta ate ngandji kokawɔ Jehowa ndo wonya awɔ onto.​—Mat. 22:37-39.

2. Oko wotamidiɔ lo Rɔmɔ 15:1-3, naa ɛnyɛlɔ kakatotshikɛ Yeso?

² Yeso akatotshikɛ ɛnyɛlɔ ka dimɛna ka mbetsha wahɔ w’anto akina la ntondo ka wakinde hita. Sho salaka la wolo tshɛ dia mboyela lo wanya ande. (Adia Rɔmɔ 15:1-3.) Wanɛ wawokoya wayokondja wahɔ. Yeso akate ate: “Ɔngɛnɔngɛnɔ waya lo mbisha ndeka wa nongola.”​—Ets. 20:35.

3. Kakɔna kayotɔsɛdingola lo sawo nɛ?

³ Lo sawo nɛ, tayɔsɛdingola awui amɔtshi wakayahondja Yeso l’oyango wa kambɛ anto akina ndo tayɔsɛndingola woho wakokaso mbokoya ɛnyɛlɔ kande. Tayɔsɛdingola nto woho wakokaso mfudia nsaki kaso ka kambɛ anto akina.

4. Ngande waketshaka Yeso ehomba w’anto akina la ntondo ka wande hita?

⁴Yeso akakimanyiyaka anto akina kaanga etena kakinde la ɔlɛmbɛlɔ. Ohokanyiya kɛnɛ kakandasale etena kakatshu olui w’anto dia tɛnana la nde suke la dikona dimɔtshi, ondo suke la Kapɛrnauma. Yeso aki oma la nɔmba otsho w’otondo. Nde akakoke monga la ɔlɛmbɛlɔ w’efula, koko lam’akandɛnyi olui w’anto, nde akoke ase wola ndo wanɛ waki la hemɔ kɛtshi. Nde kokomɛ tsho lo mbakɔnɔla, koko nde akasha ndo sawo dia lo sɛkɛ dia lɔɔka dielamɛ ɔnɛ Dako dia lo dikona.​—Luka 6:12-20.

5. Ngande wokoya ewandji wa nkumbo yimba ya ndjahondja ya Yeso etena kewɔ l’ɔlɛmbɛlɔ?

⁵Woho wokoya ewandji wa nkumbo Yeso. Ohokanyiya dui nɛ: L’ekomelo ka lushi l’olimu, owandji ɔmɔtshi wa nkumbo ambokalola la ngelo l’ɔlɛmbɛlɔ w’efula. Kaanga mbambondohemba dia mbitola ɔtɛmwɛlɔ wa lo nkumbo la dikɔlɔ sɔ lo ndjela ekongelo kawɔ, nde ambɔlɔmba Jehowa dia mbosha wolo wa mbɔlɔmbɔla. Jehowa ambokadimola dɔmbɛlɔ diande ndo wekelo wambosalema oko mbekelo kawɔ. Ana wambokondja wetshelo w’ohomba la dikɔlɔ sɔ, ɔnɛ ambutshi awɔ mbetshaka akambo wa lo nyuma la ntondo ka akambo akina.

6. Sha ɛnyɛlɔ kɛnya woho wakayahondjaka Yeso wenya ande dia nkimanyiya anto akina.

⁶Yeso akakambaka la wenya ande lo dikambo di’anto akina. Onde wɛ koka nkanyiya woho wakayaoke Yeso etena kakandoke dia Joani Obatizanyi y’ɔngɛyi ande ambodiakema? Ndooko onyake Yeso aki la lɔkɔnyɔ l’efula. Bible mbutaka ɔnɛ: “Lam’akoke Yeso dikambo sɔ (diendana la nyɔi ka Joani Obatizanyi), nde akamɔ oma lɛkɔ lo waato ko akatshu lo diɛta dia toonga ndamɛ.” (Mat. 14:10-13) Sho koka nshihodia lande na kakandalange monga ndamɛ. Anto efula l’atei aso nangaka ndela etena kewɔ lo shɔpɔ. Koko aha ngasɔ mbakadionge lo dikambo dia Yeso. Olui w’anto wakakome lo dihole dia diɛta sɔ la ntondo ka nde nkoma. Kakɔna kakasale Yeso? Nde akakanyiya dikambo dia ehomba awɔ, ko nde “akawaoke nkɛtshi.” Nde akɛnyi dia vɔ waki l’ohomba w’ekimanyielo ndo ekeketshelo ka lo nyuma. Diakɔ diele, “nde  akatatɛ mbaetsha [aha akambo yema tshitshɛ, koko] akambo efula.”​—Makɔ 6:31-34; Luka 9:10, 11.

7-8. Sha ɛnyɛlɔ kɛnya woho wokoya dikumanyi di’okana ngandji Yeso etena konga ohomba ɔmɔtshi.

⁷Woho wokoya dikumanyi dia ngandji Yeso. Sho mongaka la lowando l’efula l’ɔtɛ w’olimu wa ndjahondja wakamba dikumanyi lo wahɔ aso. Elimu efula l’atei awɔ hawoleke mɛnama le ase etshumanelo lo tshɛ kawɔ. Ɛnyɛlɔ, etena katomba hemɔ kalɔmba esakelo wa wanyandja, ase Kɔmite ka diɔtɔnganelo la pitadi salaka akambo la shamanya dia nkimanyiya asekawɔ ambetawudi. Mbala efula awui wa wanyandja asɔ tombaka l’atei wa deke. Koko l’ɔtɛ wa ngandji kokawɔ anangɛwɔ la akadiyɛwɔ wele la paa, dikumanyi dia ngandji sɔ kaamɛ la ase nkumbo yawɔ mbetshaka wahɔ w’asekawɔ ambetawudi la ntondo ka wawɔ hita.

⁸ Dikumanyi kimanyiyaka nto lo wokelo wa Mbalasa ya Diolelo ndo wa mvudu kina ndo vɔ kimanyiyaka etena katomba mpokoso. Ndo dikumanyi dia l’etshumanelo kaso mbetshaka nto wenya efula dia tetsha, tokeketsha ndo tosukɛ. Anangɛso asɔ tshɛ kaamɛ la nkumbo yawɔ sunganaka sho mbawandola efula. Jehowa awatshɔkɔlɛ lo yimba yakɛnɛmɔlawɔ! Koko oko anangɛso akina tshɛ, dikumanyi pombaka monga la wɛdimo. Vɔ hawohombe mbetshaka wenya efula lo elimu wa teokrasi ko hawotane etena ka nkotsha ehomba wa lo nyuma wa nkumbo yawɔ.

9. Lo ndjela Filipɛ 2:4, 5, naa yimba yahomba Akristo tshɛ monga la yɔ?

⁹ Adia Filipɛ 2:4, 5. Aha sho tshɛ mbele dikumanyi,  koko sho tshɛ kokaka mbokoya yimba ya ndjahondja ya Yeso. Bible mbutaka ɔnɛ nde “akayaetɛ oko mfumbe.” (Flpɛ. 2:7) Ohokanyiya kɛnɛ kalembetshiya etelo kɛsɔ. Mfumbe kana ose olimu w’oshika nyangaka waaso wa ngɛnyangɛnya owandji ande. Oko weyɛ ose olimu wa Jehowa ndo okambi w’anangɛyɛ, aha la tamu wɛ ekɔ la nsaki k’efula ka nyomoleka kambɛ Jehowa ndo asekayɛ ambetawudi. Wɛ koka nsala dui sɔ lo nsɛdingola alako wayela anɛ.

10. Ambola akɔna wakokayɛ ndjaoka?

¹⁰Sɛdingola yimba yayɛ. Yaoka ambola wele oko wanɛ: ‘Ngande wakokami ndjahondja la lolango tshɛ dia nkimanyiya anto akina? Ɛnyɛlɔ, kakɔna kayomosala naka wambɔnɔmba dia tembola ɔnangɛso ɔmɔtshi l’osombe lele lo luudu lalamawɔ esombe kana dia tɔsa kadiyɛso kɛmɔtshi k’osombe oya lo nsanganya? Onde lekɔ suke dia mbisha ekimanyielo kami etena kongawɔ l’ohomba w’anto wayakimɔ la lolango dia mbetɛ dihole diasalema nsanganya ya weke kana Mbalasa ka Diolelo pudipudi?’ Jehowa ngɛnangɛnaka etena kakambaso la wenya ndo la ekundji aso, diangɔ diele takatshike dɔkɔlɔkɔ dia tayokambaka la diɔ tshɛ, lo dikambo diande dia nkimanyiya anto akina. Naka tambɛna dia ekɔ ohomba ndjalowanya, akokaso nsala?

11. Ngande wakoka dɔmbɛlɔ tokimanyiya dia monga la yimba ya ndjahondja?

¹¹Lɔmba Jehowa l’otema ɔtɔi. Tɔshi dia wɛ amboshihodia dia wɛ pombaka ndjalowanya lo awui amɔtshi, koko wɛ bu la nsaki ka nsala etshikitanu wahombama. L’etena kɛsɔ, lɔmba Jehowa l’otema ɔtɔi. Onga la losembwe, tɛ Jehowa woho wayaokayɛ ndo lɔmbande dia kosha “nsaki la wolo wa nsala akambo.”​—Flpɛ. 2:13.

12. Ohomba akɔna wakoka ɔlɔngɔlɔngɔ wambobatizama nkotsha?

¹² Naka wɛ ekɔ ɔnangɛso l’ɔlɔngɔlɔngɔ lambobatizama, kete lɔmba Jehowa dia kokimanyiya dia wɛ monga la nsaki ka kambɛ etshumanelo efula. Lo wedja ɛmɔtshi, dikumanyi ndeka ekambi wakimanyiya efula ndo ekambi wakimanyiya efula l’atei awɔ waya epalanga efula kana esombe. Oko watatetemala okongamelo wa Jehowa mpama, tekɔ l’ohomba efula w’anangɛso w’ɛlɔngɔlɔngɔ dia tokimanyiya dia nkotsha ehomba efula w’ekambi wa Jehowa. Naka wɛ mbetawɔ la lolango tshɛ dia nkamba lɛnɛ atanema ohomba, wɛ ayonga la ɔngɛnɔngɛnɔ. Lande na? Nɛ dia wɛ ayɔngɛnyangɛnya Jehowa, ayonga la lokumu la dimɛna ndo ayokondja ɔngɛnɔngɛnɔ waya lo nkimanyiya anto akina.

13-14. Akambo akɔna shikaa wakokaso nsala dia nkimanyiya anagɛso la akadiyɛso? (Enda osato wele lo lohoso.)

¹³Todje yimba lo ehomba w’anto akina. Ɔpɔstɔlɔ Pɔɔlɔ akalake ase Hɛbɛru ate: “Tanyohɛke nsala ɔlɔlɔ ndo nkimanyiya anto akina la diangɔ diele la nyu, nɛ dia Nzambi ngɛnangɛnaka woho w’elambo wa ngasɔ.” (Hɛb. 13:16) Ɔsɔ aki dako di’oshika! Yema tshitshɛ l’ɔkɔngɔ wa vɔ nongola mukanda ɔsɔ, Akristo wa la Judeya wakahombe ntshika ngelo yawɔ, elimu awɔ ndo ewotɔ awɔ waki komonga ambetawudi ko ‘wakalawɔ otsha l’akona.’ (Mat. 24:16) Aha la taamu, l’etena kɛsɔ aki ohomba efula dia vɔ kimanyiyana lam’asawɔ. Naka la ntondo ka laasɔ vɔ wakakambe la dako diakasha Pɔɔlɔ dia nkahana l’anto akina kɛnɛ kaki lawɔ, kete aki dui dia wɔdu efula dia vɔ ndjaɔtɔnganyiya la yoho ya lɔsɛnɔ y’oyoyo shɔ.

¹⁴ Mbeyaka monga ko anangɛso l’akadiyɛso hawoototɛka ehomba awɔ tena tshɛ. Ɛnyɛlɔ, ɔnangɛso lambovusha wadɛnde mongaka la  lɔkɔnyɔ l’efula. Onde ɔnangɛso ekɔ l’ohomba wa yangɔ ya ndɛ, w’ekolo wa lɔkɛndɔ kana dia onto ndjoosalɛ elimu wa la ngelo? Mbeyaka monga ko nde hota ndooko dui la wɔma w’ɔnɛ ayoyonga wotsho le so. Koko nde mbeyaka monga la lowando efula naka sho mbɔsa yɛdikɔ ya mbosha ekimanyielo kende l’ohomba. Hatohombe mfɔnya ɔnɛ ka onto ɔmɔtshi ayowokimanyiya kana ɔnɛ onto lele lo dihombo ayototɛka tena tshɛ woho wakokaso mbokimanyiya. Yambola ɔnɛ: ‘Naka dimi mbele la ntondo ka dikambo dia nganɛ, ekimanyielo ka ngande kayomokombola nongola?’

15. Kakɔna kahombaso ndjashikikɛ dia nsala dia sho ndjahondja?

¹⁵Onga onto ladja anto lo demba. Aha la taamu, wɛ mbeyaka anangɛso l’akadiyɛso wa l’etshumanelo kanyu wokongaka tena tshɛ suke dia nkimanyiya anto akina. Vɔ hawotokonya pondjo dia sho ndjaoka dia tekɔ wotsho lewɔ. Sho mbeyaka dia sho koka mendɛ le wɔ etena konga ohomba ɔmɔtshi ndo sho nangaka monga oko vɔ. Alan, ekumanyi kɛmɔtshi kele l’ɛnɔnyi 40 l’ɛmɔtshi nangaka mbidja anto lo demba. Alan mbutaka lo kɛnɛ kendana la ɛnyɛlɔ ka Yeso ate: “Yeso aki l’akambo efula wa nsala, koko anto wa nɔnga tshɛ wakayasukanyaka la nde ndo wakayaokaka dimɛna ndo wakɔlɔmbaka dia nde mbakimanyiya. Vɔ wakeyaka dia nde aki mɛtɛ pami kakayakiyanyaka lo dikambo diawɔ. Dimi nangaka monga onto ladja anto lo demba l’ɛnyɛlɔ ka Yeso, l’okana ngandji ndo layakiyanya dikambo diawɔ.”

16. Ngande wele nkamba la Osambo 119:59, 60 koka tokimanyiya dia ndjela ɛnyɛlɔ ka Yeso dimɛna dimɛna?

¹⁶ Hatohombe nkɔmɔ naka hatokoya Yeso lo yoho ya kokele. (Jak. 3:2) Ombeki hakoke mbokoya kɛnɛ kasala ombetsha ande lo yoho  ya kokele. Koko naka ombeki akɔ nkondja wetshelo oma lo munga yande ndo nsala la wolo dia mbokoya dimɛna dimɛna ɛnyɛlɔ k’ombetsha ande, kete nde ayotetemala ndjalowanya. Woho akɔ waamɛ mbele, naka sho nkamba la kɛnɛ kekaso lo wekelo wa Bible w’onto ndamɛ ndo nsala la wolo dia ndjalowanya lo wandja wakokaso nsala, kete sho koka ntondoya dia ndjela ɛnyɛlɔ kakatotshikɛ Yeso.​—Adia Osambo 119:59, 60.

17-18. Wahɔ akɔna wayotokondja naka sho mbokoya yimba ya ndjahondja ya Yeso?

¹⁷ Yimba yaso ya ndjahondja koka sambemɛ le anto akina. Ekumanyi kɛmɔtshi kelɛwɔ Tim mbutaka ate: “Tekɔ l’anangɛso w’ɛlɔngɔlɔngɔ wakahame ndo wakasɔnama oko ekambi wakimanyiya, amɔtshi etena kakiwɔ weke ɛlɔngɔlɔngɔ efula, l’ɔtɛ wakawokoya yimba ya nkamba la lolango yakawɛnyi le anto akina. Anangɛso w’ɛlɔngɔlɔngɔ asɔ kimanyiyaka etshumanelo kaso ndo sukɛka dikumanyi efula.”

¹⁸ Tekɔ lo nsɛna l’andja woludi la lokaki, koko ekambi wa Jehowa ntshikitana lawɔ tshɛ. Tambonandema lo menda yimba ya ndjahondja yaki la Yeso ndo tamboyashikikɛ dia ndjela ɛnyɛlɔ kande. Hatokoke ndjela ɛnyɛlɔ kande lo yoho ya kokele, koko sho kokaka “mboyela dimɛna dimɛna lo wanya ande.” (1 Pe. 2:21) Naka sho nsala la wolo dia mbokoya yimba ya ndjahondja ya Yeso, kete sho lawɔ tayonga l’ɔngɛnɔngɛnɔ waya lo mbetawɔma le Jehowa.