1. Kumbi ŵanthu aku Yehova alongo jalidu lamampha nili?

VYAKA vinandi vo vajumpha, Bayibolu lingukambiya limu kuti ŵanthu aku Chiuta, ‘azakujipereka mwakukhumbisiska’ kuti ateŵete Yehova mwakulongozgeka ndi Mwana waki. (Salimo 110:3) Uchimi wenuwu ufiskika nadi mazuŵa nganu. Chaka chechosi, ateŵeti aku Yehova aphamphu atijipereka kumaliya maola mamiliyoni nganandi pa ntchitu yakupharazga. Yiwu achita venivi mwakukhumba ŵija ndipu alipirika cha. Yiwu asaniya so nyengu kuti awovyi Akhristu anyawu kusaniya vinthu vakukhumbika pa umoyu, kuŵachiska kweniso kuŵawovya kuti ayanjengi Yehova. Ŵara ndi ateŵeti akovya, amaliya maora nganandi kunozgeke nkhani kweniso kuchita maulendu nga uliska. Ntchinthu wuli cho chitiŵachiska kuchita venivi? Ntchifukwa chakuti atanja Yehova kweniso ŵanthu.​—Mate. 22:37-39.

2. Nge mo pakambiya pa Aroma 15:1-3, kumbi Yesu wangulongo chakuwoniyapu wuli?

² Yesu wangulongo chakuwoniyapu chamampha ukongwa pa nkhani ya kuŵika vakukhumba va ŵanthu anyaki pa malu ngakwamba. Nasi titesesa kuti tilondongi maphazi ngaki. (Ŵerengani Aroma 15:1-3.) Ŵanthu wo atimuyezga atumbikikengi ukongwa. Yesu wangukamba kuti: “Kupaska kuchitiska kuti munthu wakondwengi ukongwa kuluska kulonde.”​—Machi. 20:35.

3. Kumbi tikambiskanengenji mu nkhani iyi?

³ Mu nkhani iyi, tiwonengi vinthu vinyaki vo Yesu wanguchita kuti wawovyi ŵanthu anyaki kweniso tikambiskanengi mo isi tingayezge  chakuwoniyapu chaki. Tikambiskanengi so vo tingachita kuti tikhumbisiskengi kuteŵete anyidu.

4. Kumbi Yesu wanguŵika wuli vakukhumba va ŵanthu anyaki pa malu ngakwamba?

⁴Yesu wangujipereka kuti wawovyi anyaki chinanga mphanyengu yo wanguvuka. Aŵanaŵaniyani vo Yesu wanguchita pa nyengu yo chigulu cha ŵanthu chakhumbanga kukumana nayu mumphepeti mwa phiri, kufupi ndi Kaperenao. Pa nyengu iyi, Yesu wenga wakuti wachereza kupemphera. Iyu watenere kuti wanguvuka ukongwa. Kweni wati wawona chigulu cha ŵanthu, wanguŵalenge lisungu akavu kweniso akutama. Iyu wanguŵachizga pe cha, kweni wanguŵakambiya so fundu zakuchiska ukongwa pa Upharazgi wa Paphiri.​—Luka 6:12-20.

5. Kumbi mitu ya mabanja yiyezga wuli chakuwoniyapu chaku Yesu pa nkhani yakulongo chanju asani avuka?

⁵Mo mitu ya mabanja yiyezge Yesu. Ŵanaŵaniyani chakuchitika ichi: Pavuli pakugwira ntchitu zuŵa losi, mutu wa banja ufika pa nyumba wavuka. Chinanga kuti venivi vingachitiska kuti aleki kuchita Kusopa kwa Pabanja mazulu ngenanga, kweni iyu wapempha Yehova kuti wamupaski nthazi kuti wafiski kuchitiska kusopa kwa pabanja. Yehova wamuka pempheru laki ndipu achita kusopa kwa pabanja nge mo achitiya mazuŵa ngosi. Chifukwa cha vo awisewu achita, ŵana asambira fundu yakukhumbika ukongwa yakuti, apapi ŵawu awona kuti vinthu vakukwaskana ndi kusopa vakukhumbika ukongwa pa umoyu wawu kuluska chinthu chinyaki chechosi.

6. Kambani chakuyeruzgiyapu cho chilongo kuti Yesu wangugwiriskiya ntchitu nyengu yaki kuti wawovyi ŵanthu anyaki.

⁶Yesu wapatuwanga nyengu yakuchezge ndi ŵanthu chinanga mphanyengu yo wakhumbikanga kuja pakuyija. Kumbi muŵanaŵana kuti Yesu wanguvwa wuli wati waziŵa kuti mubwezi waki Yohane Mubatizi, amudumuwa mutu? Yesu watenere kuti wenga ndi chitima ukongwa. Bayibolu likamba kuti: “Wati wavwa [vakukwaskana ndi nyifwa yaku Yohane] Yesu wangutuwaku kweniko, wangukwera boti ndi kuluta kumalu ngambula ŵanthu kuti wakaje kwakuyija.” (Mate. 14:10-13) Tingavwisa chifukwa cho wakhumbiyanga kuti wakaje kwakuyija. Tanandi  titanja kuliya te kwakutija. Kweni Yesu, wangufiska cha kuchita venivi. Chigulu cha ŵanthu chingufika ku malu ngo wakhumbanga kuchija yija, iyu wechendafikeku. Kumbi Yesu wanguchita wuli? Iyu wanguŵanaŵaniya vo ŵanthu ŵenaŵa akhumbikiyanga ndipu “wanguŵalenge lisungu.” Iyu wanguwona kuti akhumbikanga kusisipulika mwauzimu ndipu wanguchitapu kanthu mwaliŵi kuti waŵawovyi. Mwaviyo, “wangwamba kuŵasambiza vinthu vinandi.”​—Mariko 6:31-34; Luka 9:10, 11.

7-8. Kambani chakuyeruzgiyapu cho chilongo mo ŵara ayezge Yesu asani munthu munyaki wakhumbika chovyu mumpingu.

⁷Mo ŵara achanju ayezge Yesu. Tiwonga ukongwa ntchitu yo ŵara atijipereka kugwira chifukwa chaku isi. Abali ndi azichi mumpingu aziŵa ntchitu zosi cha zo ŵara agwira. Mwakuyeruzgiyapu, asani munthu munyaki watama mwamabuchibuchi, abali a mu Komiti Yakukambiskana ndi Madokotala pa Nkhani ya Ndopa, achitapu kanthu mwaliŵi kuti awovyi Akhristu anyawu. Kanandi venivi vichitika usiku pakati! Chifukwa chakuti atimulongo lisungu mubali pamwenga mzichi wawu yo wakumana ndi suzgu, ŵara akwanjiwa ŵenaŵa limoza ndi mabanja ngawu, aŵika vakukhumba va Akhristu anyawu pa malu ngakwamba.

⁸ Ŵara agwiraku so ntchitu za kuzenga Nyumba za Ufumu ndipuso nyumba zinyaki za mugulu laku Yehova kweniso asani kwachitika masoka. Kweniso yiwu amaliya maora nganandi pakusambiza ndipuso kuchiska. Titenere kuŵawonga ukongwa abali wosi ŵenaŵa limoza ndi mabanja ngawu. Yehova walutirizgi kuŵatumbika chifukwa cha vo achita! Kweni nge mo viliri ndi munthu weyosi, ŵara akhumbika cha kutaluliya. Atenere cha kumaliya nyengu yinandi pakuchita vinthu vauzimu, mpaka kutondeka kusaniya nyengu yakuphwere mabanja ngawu.

9. Mwakukoliyana ndi Afilipi 2:4, 5, kumbi Akhristu tikhumbika kuja ndi maŵanaŵanu nanga?

⁹ Ŵerengani Afilipi 2:4, 5. Mbuneneska kuti tosi te ŵara cha, kweni tosi tingayezga Yesu mwakuŵika vakukhumba va anyidu pa malu ngakwamba. Bayibolu likamba kuti iyu “wanguja nge kapolu.” (Afi. 2:7) Ŵanaŵaniyani vo tingasambira pa vesi lenili. Kapolu pamwenga kuti mteŵeti wamampha, wangasaniya mipata yakuti wakondwese ambuyaki. Nge kapolu waku Yehova kweniso nge mteŵeti wa abali ŵinu, tikayika cha kuti mukhumbisiska kumuchitiya vinandi Yehova kweniso Akhristu anyinu. Mungachita venivi mwakuŵanaŵaniya masachizgu ngo tikambiskanengi.

10. Kumbi tingajifumba mafumbu nanga?

¹⁰Muŵanaŵaniyengi mo muwone vinthu. Jifumbeni mafumbu nge ngakuti: ‘Kumbi nde wakunozgeka kupereka nyengu yangu ndi nthazi zangu kuti ndiwovyi anyangu? Mwakuyeruzgiyapu, kumbi ndichita wuli asani ndapempheka kuti nkhawoni mubali wakukota ku nyumba kwaki pamwenga nkhato mzichi wakukota kuti ndiluti nayu ku maunganu? Kumbi ndichitapu kanthu mwaliŵi kovya asani pakhumbika ŵanthu akujipereka kuti akatowesi malu nga unganu pamwenga kunozga so Nyumba ya Ufumu?’ Yehova wakondwa asani tigwiriskiya ntchitu nyengu yidu kweniso vinthu vo te navu pakovya anyidu, ndipu venivi ndivu tingumulayizga pa nyengu yo tajiperekanga kwaku iyu. Kumbi tingachita wuli asani tawona kuti tikhumbika kusazgiyaku vo tichita pasonu panu?

11. Ntchifukwa wuli pempheru lingatiwovya kuti tikhumbisiskengi kovya anyidu?

¹¹Mupempherengi kwaku Yehova mwakutuliya pasi pa mtima. Tiyeruzgiyi kuti mwawona kuti mukhumbika kusazgiyaku vo muchita sonu, kweni muwona kuti mungafiska cha kuchita viyo. Asani ndi viyo, pempherani kwaku Yehova mwakutuliya pasi pa mtima. Mungamubisanga chechosi cha. Mukambiyeni Yehova mo muvwiya ndipuso mupempheni kuti wakupaskeni “vosi viŵi, khumbu kweniso nthazi zakuchitiya.”​—Afi. 2:13.

12. Kumbi mubali wachinyamata wakubatizika, wangawovya wuli mugulu laku Chiuta?

¹² Asani ndimwi mubali wachinyamata wakubatizika, mupempheni Yehova kuti wakuwovyeni kuti muje ndi khumbu lakuti muchitengi vinandi mumpingu. Mu vyaru vinyaki, mwe ŵara anandi kuphara ateŵeti akovya ndipu anandi mwa ateŵeti akovya ŵenaŵa, mbachinyamata cha pamwenga mbakukota. Pakuti gulu laku Chiuta likuwa ukongwa, pakhumbika abali achinyamata anandi kuti awovyengi ŵanthu aku Yehova. Asani mukhumba kuteŵete mu nthowa yeyosi, mukondwengi. Chifukwa wuli? Chifukwa mukondwesengi Yehova, mujengi ndi mbiri yamampha ndipuso mukondwengi chifukwa chakovya ŵanthu anyaki.

13-14. Kumbi tingachita wuli kuti tiwovyi abali ndi azichi ŵidu? (Wonani chithuzi cho che pachikonkhombi.)

¹³Mujengi masu kuti muziŵengi vinthu vo ŵanthu anyaki akhumbikiya. Wakutumika Paulo wangukambiya Akhristu Achiheberi kuti: “Mungaluwanga cha kuchita vamampha ndi kugaŵiyaku anyinu vinthu vo mwe navu, pakuti Chiuta wakondwa ukongwa ndi sembi zaviyo.” (Ahe. 13:16) Wenuwu wenga ulongozgi wamampha ukongwa! Pati pajumpha nyengu yimanavi kutuliya po Akhristu angulonde kalata iyi, Akhristu wo ajanga ku Yudeya akhumbikanga kuleka nyumba zawu, mabizinesi ngawu kweniso abali ŵawu wo ŵenga Akhristu cha, ndipu akhumbikanga kwamba “kuthaŵiya kumapiri.” (Mate. 24:16) Pa nyengu yeniyi, yiwu akhumbikanga kuwovyana ukongwa. Asani yiwu agwiriskiyanga ntchitu ulongozgi wakuti agaŵanengi vinthu vo ŵenga navu ivi vechendachitiki, vatingi viŵasuzgengi cha kuziŵiliya umoyu wasonu.

¹⁴ Ndi nyengu zosi cha po abali ndi azichi ŵidu  angatikambiya kuti akhumbika chovyu. Mwakuyeruzgiyapu, mubali wangaŵa kuti muwolu waki wakutayika ndipu we ndi chitima ukongwa. Kumbi mubali widu wapenjeka kumunozge chakurya, kumuwovya thirasipoti pamwenga kumugwiriya ntchitu zapanyumba? Iyu wangatipempha cha kuti timuwovyi chifukwa cha kopa kuti wangatisuzga. Kweni iyu wangawonga ukongwa asani tingamuwovya chinanga kuti watipempha cha. Tikhumbika cha kuŵanaŵaniya ŵaka kuti munthu munyaki ndiyu wamuwovyengi pamwenga tichitengi kukhazga kuti nyengu zosi watikambiyengi asani wakhumbika chovyu. Jifumbeni kuti: ‘Asani ndenga ini, kumbi ndatingi ndikhumbengi chovyu cha mtundu wuli?’

15. Kumbi tikhumbika kuchitanji kuti tijengi akunozgeka kovya anyidu?

¹⁵Mujengi akufwatuka kuti anyinu akupempheningi chovyu. Tikayika cha kuti muziŵa abali ndi azichi anyaki mumpingu winu, wo nyengu zosi atuŵa akunozgeka kovya anyawu. Yiwu achita cha vinthu vakulongo kuti tijivwengi kuti titiŵasuzga. Tiziŵa kuti nyengu zosi akhumbisiska kutiwovya ndipu nasi tingayanja kuja nge yiwu! Mura munyaki zina laki Alan wa vyaka va mu ma 40, wakhumba kuti ŵanthu afwatukengi nayu. Asani waŵanaŵaniya chakuwoniyapu chaku Yesu, iyu wakamba kuti: “Yesu watangwanikanga, kweni ŵanthu a misinkhu yosi amuyanjanga ndipu afwatukanga kumupempha chovyu. Yiwu aziŵanga kuti waŵaŵanaŵaniyanga ukongwa. Ndikhumbisiska kuja nge Yesu ndipuso kuti ŵanthu andiziŵengi kuti nde wakufwatuka kweniso kuti ndiŵanaŵaniya ŵanthu.”

16. Kumbi kugwiriskiya ntchitu lemba la Salimo 119:59, 60, kungatiwovya wuli kuti tiyezgengi chakuwoniyapu chaku Yesu mwakugomezgeka?

¹⁶ Titenere cha kuguŵa asani titondeka kuyezga Yesu mwakufikapu. (Yako. 3:2) Mwana wa sukulu, wangamuyezga mwakufikapu cha msambizi waki. Kweni asani wasambira pa vo wanangisa, ndikuyesesa kuyezga msambizi  waki mwakugomezgeka, iyu wangaluta panthazi. Mwakuyanana ŵaka, asani tigwiriskiya ntchitu vo tasambira pakusambira Bayibolu pakutija, ndikuchita vosi vo tingafiska kuti tinozgi vo tinangisa, tingayezga chakuwoniyapu chaku Yesu mwakugomezgeka.​—Ŵerengani Salimo 119:59, 60.

17-18. Kumbi tiyanduwengi wuli asani tiyezga Yesu pa nkhani ya kuŵika vakukhumba va anyidu pamalu ngakwamba?

¹⁷ Asani tiŵika vakukhumba va anyidu pamalu ngakwamba, vingawovya so anyaki kuti achitengi viyo. Mura munyaki zina laki Tim wangukamba kuti: “Abali anyaki achinyamata aja ateŵeti akovya ŵeche anamana ukongwa. Ve viyo chifukwa chakuti awonanga kuti abali anyaki akhumbisiskanga kovya anyawu, ndipu nawu akhumbanga kuja nge yiwu. Abali achinyamata ŵenaŵa atovya mpingu widu kweniso atiŵawovya ukongwa ŵara.”

¹⁸ Tija mucharu cho ŵanthu mbakujiyanja ukongwa. Kweni ŵanthu aku Yehova, mbakupambana ukongwa ndi ŵanthu ŵenaŵa. Tachiskika ndi jalidu laku Yesu la kuŵika vakukhumba va ŵanthu anyaki pamalu ngakwamba, ndipu nasi tikhumbisiska kuyezga chakuwoniyapu chaki. Mbuneneska kuti tingalondo cha maphazi ngaki mwakufikapu, kweni ‘tingalondo maphazi ngaki mwakugomezgeka.’ (1 Petu. 2:21) Asani tichita vosi vo tingafiska kuti tiyezgi Yesu, nasi tikondwengi chifukwa Yehova watiyanjengi.