1. Makhalelo muni nya yadi vathu va Jehovha va gu nawo?

BHIBHILIYA yi profetide gu khiyo vathu va Nungungulu va di hadzi gu ‘dzi ningeya’ gasi gu thumeya Jehovha na va gu landrisa sileletelo sa Jesu. (Ndzi. 110:3) Khu lisine, giprofeto gegi gi ngu tadzisega muhuno. Mwaga ni mwaga, sithumi nyo tumbege sa Jehovha si ngu vbedza dzimiliyoni nya dziora thumoni nyo tshumayele. Avo khava livbwi gilo gasi gu gira thumo wowu, ganiolu va gu gira isoso khu gu dzina. Avo gambe va ngu phasa vandriyawe khu gu va ninga esi si va keneleyago, va va tiyisa ni gu phasa gu tiyisa gukhodwa gwawe. Madhota ni vaphasedzeyi nya libandla va ngu vbedza dziora nya dzingi na va gu donga sipandre ni gu wuseya vandriyawe gasi gu va tiyisa. Ginani gi kutsago vathu va Jehovha gu gira yatshavbo mithumo yeyi? Lihaladzo. Avo va ngu haladza Jehovha ni vathu.— Mat. 22:37-39.

2. Guya khu Varoma 15:1-3, giyeyedzo muni Jesu a hi ningidego?

² Jesu yeyedzide gu khuye a di gu khathala khesi sa vambe guvbindra esi saye. Ethu ho zama gu gira satshavbo hi si kodzago gasi gu mu pimedzeya. (Leri Varoma 15:1-3.) Ha gu gira isoso hi na mana mihandro nya yadi. Jesu ganede gu khuye: “Kategide ngudzu oyu a ningago guvbindra oyu a hakhago.” — Mith. 20:35.

3. Ginani hi na bhulago khigyo avba nya ndrima yeyi?

³ Avba nya ndrima yeyi, hi na wusedza esi Jesu a giridego gasi gu phasa vambe, hi bwe hi hevbula khedzi hi nga pimedzeyago khidzo giyeyedzo gyaye. Hi na bhula gambe khesi hi nga girago gasi gu engedzeya gudogoreya gwathu nyo phase vambe.

4. Jesu yeyedzide kharini gu khuye a di gu thangisa sa vambe gu vbindra esi saye?

⁴Jesu phaside vambe ambari tepo a nga ba a garade. Dundrugeya khesi Jesu a giridego tepo gidzemo nya gikhongolo nya vathu gi nga mu yela gigomoni vbafuvbi ni Kaferinawume. Jesu a di gombede wutshigu watshavbo. Ambari olu a nga ba a garade ngudzu, tepo a nga wona gidzemo nya gikhongolo, a di pweya wusiwana vadwali ni sisiwana. Uye khandri a di va hawulugisa basi, ganiolu uye vegide ganelo nya gu khuhe, a gu Ganelo ya Gigomoni. — Luka 6:12-20.

5. Mihungo nya dzindranga yi nga pimedzeya kharini giyeyedzo gya Jesu nya gu yeyedze lihaladzo ambari na va garade?

⁵Mihungo nya dzindranga ya gu pimedzeya kharini Jesu. Nga dundrugeya khu giyeyedzo gegi: Hwane nya gu ba a thumide ngudzu litshigu latshavbo, hungo nya ndranga a gu vboha gaya na garade. Adzina a nga vbweta gu thindrekisa wukhozeyi nya ndranga va nga hadzi gu gira ga wutshigu wule, ganiolu uye a gu lomba tshivba ga Jehovha gasi gu gimbidzisa gihevbulo. Jehovha a hlamula nombelo waye, nigu gihevbulo gi gimbiya gwadi nga mambe matshigu. Sanana sa gu hevbula gilo nya lisima ga wutshigu wule gu dziti gu khiso, igyo gi gu na ni lisima ngudzu ga vavelegi vaso wukhozeyi wawe ga Jehovha.

6. Ninga giyeyedzo nya edzi Jesu a thumisidego khidzo tepo yaye gasi gu phasa vambe.

⁶Jesu a di thumisa tepo yaye a nga ba a yede gu gira sisaye gasi gu phasa vambe. Nga dundrugeya khedzi Jesu a dzipwidego khidzo tepo a ngapwa gupwani pari yaye Johane Mubhabhatisi yi di songidwe? Jesu pwide wuvi nya wukhongolo. Bhibhiliya yari khiyo: “Na pwide esi [maningano ni gufa ga Johane], a di bela ngalavani a khuga khu vbale a gu hongola wulangani nya giwula.” (Mat. 14:10-13) Hi nga pwisisa gu khethu khu ginani a nga ba a vbweta gu khala enga. Vathu nyo khaguri va ngu hatha gu khala vonga tepo va garadzegago. Ganiolu Jesu kha si kodza gu khala enga. Gitshungu nya gikhongolo gi di pheya khigyo gi vboha ga wulanga wule uye na si gu vbohi. Ginani egi Jesu a giridego? Uye a dundrugede khesi gitshungu gi nga ba gi si vbweta, nigu uye ‘a va pwede wuhindzi’. Uye wonide gu  khuye avo va di gu vbweta giphaso ni gu tiyiswa khu liphuvboni, khu kharato a di dzegeya gu va phasa. Khu lisine, “Uye a di phela gu va hevbudza silo nya singi.” — Marko 6:31-34; Luka 9:10, 11.

7-8. Ninga giyeyedzo gi yeyedzago gu khigyo madhota ma gu na ni lihaladzo ma ngu pimedzeya giyeyedzo gya Jesu tepo muthu nyo khaguri a vbwetago giphaso libandlani.

⁷Madhota ma gu na ni lihaladzo ma gu pimedzeya kharini Jesu. Ethu hi ngu bonga ngudzu khu thumo nya wadi owu madhota ma hi gireyago. Vandriyathu nya vangi libandlani, kha va yiti yatshavbo mithumo yi girwago khu madhota. Khu giyeyedzo, vandriyathu va wumbago kometi nyo thumisane ni dzi ospitali, va ngu dzegeya gu ya phasedzeya vandriyawe, a gu tshuka moyo a vbweta giphaso nya avba ni avba. Sigaradzo nya nga esi si ngu tala gu dugeleya vbakari nya wutshigu! Khu gu kutswa khu pweya wusiwana va gu nawo khu vandriyathu, madhota ni dzindranga dzawe, va gu thangisa esi vandriyathu va si vbwetago guvbindra esi sawe.

⁸ Madhota ma nga phasa avba nya guvbahe nya Dzisalawu nya Mufumo ni gu phasedzeya vale va nga dugeledwa khu dzimhango nya tumbunugo. Nigu ayo ma ngu vbedza tepo nya yingi na ma gu hevbudza ni gu hi tiyisa. Vatshavbo vandriyathu vava ni dzindranga dzawe, va ngu yedwa khu gu hakha wuzundzu wathu. Jehovha a na va kategise khesi va girago! Khu lisine, gufana ni vathu vatshavbo, madhota ma yede gu dinganiseya silo. Avo kha va yeli gu vbedza tepo nya yingi na va gu gira silo sa libandlani nyo bwe va si kodzi gu khathaleya dzindranga dzawe.

9. Guya khu Vafilipi 2:4, 5, makhalelo muni Makristo yatshavbo ma yedego gu manega nawo?

⁹ Leri Vafilipi 2:4, 5. Khu lisine, hatshavbo kha hiri madhota, ganiolu hatshavbo hi nga pimedzeya giyeyedzo gya Jesu khu gu thangisa esi sa vambe guvbindra esi sathu. Bhibhiliya yari khiyo: Uye a di “dzi gira khumbi.” (Filp. 2:7) Dundrugeya khesi hi nga si hevbulago khu livhesi leli. Khumbi mwendro githumi gi ningwago lisima, gi nga gira esi gi si kodzago gasi gu tsakisa mune wagyo. Kha nga olu hi gu sithumi sa Jehovha, ethu ha gu thumeya vandriyathu nigu ho vbweta gu khala vathu va girago esi si phasago vambe. U nga gira isoso khu gu wona esi si landreyago.

10. Khu sevbini siwudziso u yedego gu dzi gira?

¹⁰Dundrugeya khu mavbanyelo yago. U nga dzi gira siwudziso nya nga esi: ‘Ina nyi ngu dzi emiseya gu dzi hiya silo nyo khaguri gasi gu phasa vambe? Khu giyeyedzo, nya gu hlamula kharini nya gu lombwa gu endreya ndriyathu a dandridego khu tanga ospitali, mwendro guya dzega ndriyathu nya nyamayi a dandridego khu tanga gasi gu hongola mitshanganoni? Ina nyi dzi emisede gu dzi ningedza tepo va vbwetago va voluntaryo gasi gu ya agisa wulanga gu na giredwago avbo kongresu mwendro gu lungisa silo nyo khaguri Salawuni nya Mufumo?’ Tepo hi nga dzi hendzeledza ga Jehovha, hi di mu tumbisa gu khethu hi na thumisa satshavbo hi gu naso gasi gu mu thumeya. Uye o vbweta gu khuye hi thumisa tshivba, tepo ni esi hi gu naso gasi gu phasa vambe. Khu kharato uye a ngu tsaka tepo hi girago isoso khu gu dzina. Ha gu wona gu khethu gyomo hi yedego gu tshukwadzisa, ginani hi yedego gu gira?

11. Nombelo wu nga hi phasa kharini gasi hi dzi emiseya gu phasa vambe?

¹¹Gombeya ga Jehovha khu monyo wago watshavbo. Hi nga ganeya gu khethu u tugude gilo u yedego gu tshukwadzisa, ganiolu u wona gu khuwe gimwalo gi gu kutsago gu vbindrugedza. Wa gu ba uri ga giemo gegi, gombeya ga Jehovha khu monyo wago watshavbo. Mu embeye satshavbo. Embeya Jehovha edzi u dzi pwago khidzo, u bwe u mu lomba gasi a gu “ninga gusuva ni guthuma guhaladza gwaye.” — Filp. 2:13.

12. Muphya a bhabhatisidwego a nga phasa kharini libandlani?

¹² Wa gu ba uri muphya u bhabhatisidwego, lomba Jehovha gasi a gu phasa gu engedzeya gudogoreya gwago nya gu phase vandriyathu libandlani. Ga mambe mayigo, gu ni madhota nya mangi guvbindra vaphasedzeyi nya libandla, ganiolu vaphasedzeyi nya vangi nya libandla khandri vaphya. Kha nga olu hengeledzano ya Jehovha yi engedzeyago gu dandra, gu ngu vbwetega vaphya nya vama gasi gu phasedzeya madhota gu khathaleya vandriyathu libandlani. Wo ba u dzi emisede gu thuma omu gu vbwetegago giphaso, u na mana gutsaka nya gukhongolo. Khu ginani? Kholu u na tsakisa Jehovha, nigu vandriyathu va na wona gu khavo u ngu dzi garadzeya gu phasa vambe nigu u na tsaka ngudzu khu gu phasa vambe.

13-14. Ginani hi nga girago gasi hi phasa vandriyathu? (Wona fotu avba nya kapa.)

¹³Khalani na mu gengede gasi mu si kodza gu tugula tepo muthu nyo khaguri a na vbwetago giphaso. Mupostoli Pawulo gengedzide Vahebheru khuye: “Mu nga digi gu gira ndruda ni gu phasanani khu gyanu kholu khiyo mhamba yi tsakisago Nungungulu.” (Hebh. 13:16) Igyogyo gi diri gigengedzo nya gyadi! Gitepwana hwane nya gu ba Vahebheru va hakhide  lidangaliya lolo, va digide dzindraga dzawe, dzinogosi dzawe ni valongo va nga ba va siri Makristo gasi va tutuma ‘va hongole sigomoni.’ (Mat. 24:16) Khu lisine ga tepo yile, si diri ni lisima gu va phasana khu gyawe. Nari khatshi va di thumiside wusingalagadzi va ningidwego khu Pawulo nya gu kabane esi va nga ba vari naso ni vambe, na si va vbevbugede gu eneledwa khesi nya sidugwana va nga ba va ri naso ga womi wawe nya wuphya.

¹⁴ Khandri tepo yatshavbo vandriyathu va na hi embeyago esi va si vbwetago. Khu giyeyedzo, dundrugeya khu ndriyathu a fedwego khu mwangadzi waye. Ndriyathu yoyu a fedwego adzina a na vbweta giphaso nya gu phuledwe, nya gu ningwe boleya ni gu phaswa gu gira mithumo ya ndrangani. Adzina kha na nga lomba giphaso kholu kha dzini gu garadza muthu. Ganiolu, uye adi hadzi bonga ngudzu ha gu mu phasa na si hi lombi giphaso. Kha hi yeli gu pimisa gu khethu mumbe muthu a na mu phasa mwendro gu vireya gu khethu tepo yatshavbo uye a na hi embeya esi a si vbwetago. Dzi wudzise esi: ‘Nari khatshi nyi di romo ga giemo gegi, giphaso muni nyi nga hadzi gi vbweta?’

15. Gasi gu phasa vambe, ginani hi yedego gu dzi emiseya gu gira?

¹⁵Dzi vbevbugise gasi vambe va gu lomba giphaso. Nya mba kanakana uwe u ngu vati vandriyathu libandlani gwago va dzi emisedego gu phasa vambe tepo yatshavbo. Avo gima kha va yeyedzi gu khavo hi ngu va garadza. Ethu hi ngu dziti gu khethu avo tepo yatshavbo va dzi emisede gu hi phasa, nigu ethu hi ngu dzina gu va pimedzeya! Alan, lidhota li gu na ni 45 myaga, li ngu dzina gu dzi vbevbugisa. Na gu dundrugeya khu giyeyedzo gya Jesu, Alan wari khuye: “Ambari olu Jesu a nga ba a pharegide, vathu nya dzitanga dzatshavbo  va di gu mu hidzimeleya nigu va di gu dzipwa na va tshulegide gasi gu mu lomba giphaso. Avo va di gu dziti gu khavo, uye a di gu khathala khavo. Eni nyi ngu dzina gufana ni Jesu, ni gu tidwa kha nga muthu nya gu dzi vbevbugise ni gu khathala khu vambe.”

16. Ndzimo 119:59, 60 yi nga hi phasa kharini gu landreya giyeyedzo gya Jesu khu gafuvbi?

¹⁶ Kha hi yeli gu vbeya tshivba ha gu mba si kodza gu pimezeya Jesu khu gu vbeleya. (Jak. 3:2) Muthu nyo khaguri a hevbuleyago gu sona, kha si kodzi gu pimedzeya thumo wa muhevbudzi waye khu guvbeleya. Ganiolu tepo gihevbuli gi hevbuleyago khu sihoso sagyo, gi bwe gi dzi garadza gu pimedzeya muhevbudzi wagyo, gi na simama gu tshukwadzisa. Khu ndziya nyo fane, ha gu thumisa esi hi si hevbulago tepo hi lerigo Bhibhiliya, ni gu simama gu zama gu tshukwadzisa, hi na ba hi pimedzeya giyeyedzo gya Jesu khu vbafuvbi.— Leri Ndzimo 119:59, 60.

17-18. Hi na wuyedwa khu ginani ha gu pimedzeya giyeyedzo gya Jesu?

¹⁷ Tepo hi dzi emiseyago gu phasa vambe hi na kutsa vambe gu gira sasimweso. Lidhota limwedo nya gu pwani khu Tim lari khilo: “Vaphya nyo khaguri va khade vaphasedzeyi nya libandla kholu va di wona edzi vambe va nga ba va dzi emisede khidzo gu phasa vambe, nigu avo va di gu vbweta gufana navo. Vandriyathu vava nya vaphya va ngu phasedzeya libandla nigu va ngu seketeya madhota.”

¹⁸ Ha gu vbanya ga litigo eli vathu nya vangi va khathalago khu silo sawe basi. Ganiolu vathu va Jehovha va hambanide navo. Anethu ha gu kutswa khu giyeyedzo gya Jesu nya gu thangise esi sa vambe guvbindra sathu, nigu hi dzi emisede gu pimidzeya giyeyedzo gyaye. Ethu kha hi si kodzi gu mu pimedzeya khu gu vbeleya, ganiolu ethu ha gu “landra ndzila yaye.” (1 Ped. 2:21) Ha gu gira satshavbo hi si kodzago gasi gu pimedzeya Jesu, khu gu thangisa esi sa vambe guvbindra esi sathu, hi na tsaka kholu hi na ba hi tsakisa Jehovha.