1. Bakombi baJehova balipeda kuchitaanzi mazubaano?

KUZWA chiindi, Bbayibbele lyakaamba kuti bakombi baLeza “bayoolyaaba cakuliyandila” mumulimu waJehova kabazulwidwa aaMwanaakwe. (Int. 110:3) Bupolofita oobu bulikuzuzikizigwa mazubaano. Munyaka amunyaka, bakombi baJehova bamaninsya ma-awa miingi loko kabali mumulimu wakukambawuka. Bachita oobo chakuliyandila alubo tababbadalwi pe. Alubo bajana chiindi chakugwasya bakombinyina azintu nzibayanda, kubasungwaazya akubagwasya kuti bakkale kabali aabweenzinyina busimide aJehova. Baalu ababelesi babelekela bamaninsya chiindi chiingi kabali kulibambila miswaangano akuswaya bakwesu abachizi kuti bakabasungwaazye. Niinzi chipa kuti bakombi baLeza bachite milimu yoonse eeyi? Bayanda Jehova kuswaanizya abakombinyina.—Mt. 22:37-39.

2. Mbuli mbukwaambidwe muli Baroma 15:1-3, Jesu wakatusiila chikozyano chili?

² Jesu wakatondeezya kuti ubikka ziyandwa aabamwi mubusena bwakusaanguna kwiinda nzyaakali kuyanda. Andiswe tulikubeleka changuzu kuti tutobelezye chikozyano chakwe. (Bala Baroma 15:1-3.) Aabo batobelezya chikozyano chakwe bayoojana zilongezyo. Jesu wakaamba kuti: “Kupa kulakkomanisya kapati kwiinda kupegwa.”—Mil. 20:35.

3. Tulalanga-langaanzi muchiiyo eechi?

³ Muchiiyo eechi, tulabona zimwi zintu Jesu nzyaakachita kuti agwasye bamwi alubo tulabona mbutukonzya kutobelezya chikozyano chakwe. Tulabona zintu zikonzya kutugwasya kuti tuzumanane kuba aachiyandisyo chakugwasya bamwi.

4. Jesu wakatondeezya biyeni kuti ubikka ziyandwa aabamwi mubusena bwakusaanguna kwiinda nzyaakali kuyanda?

⁴Jesu wakalipeda kugwasya bamwi nikuba kuti wakalikatede. Yeeya kuti Jesu wakamvwa biyeni chiindi bantu biingi nibakamutobela kuchilundu. Kulakonzeka kuti chilundu eecho chakali aafwiifwi akuKkapenawuma. Jesu wakali wabuchesya kali kukomba eezi nizyakachitika. Kweelede kuti wakalikatede loko pesi naakabona nkamu yabantu aaba, wakabafwida luzyalo bafwaba abachiswa. Wakabaponia alubo wakabapa nkani iisungwaazya loko iizibinkenwe kuti Nkambawuko Yakuchilundu.—Lk. 6:12-20.

5. Mitwe yampuli ilikuchitobelezya biyeni chikozyano chaJesu chakutondeezya luyando?

⁵Mitwe yampuli mbiili kutobelezya chikozyano chaJesu. Yeeya atala achikozyano chitobela. Mwaalumi wazwa kumulimu alubo ulikatede. Akaambo kakuti ulikatede, wayeeya kuti batachiti pe kukomba kwampuli nkubeelede kuchita goko. Pesi wakomba kuli Jehova kamukumbila kuti amupe manguzu aakuti achitisye kukomba kwampuli. Jehova wayisandula nkombyo yakwe alubo bazwidilila kuchita kukomba kwampuli. Nzyachita mukwesu ooyu zigwasya bana kuti babone kuti bazyali babo babikka zintu zyabukombi mubusena bwakusaanguna.

6. Jesu wakachibelesya biyeni chiindi chakwe kuti agwasye bamwi?

⁶Jesu wakalipeda kubaamwi abamwi nikuba kuti aachiindi eecho wakali kuyanda kuba aalikke. Amuyeeyele kuti Jesu wakamvwa biyeni chiindi naakamvwa kuti mweenzinyina, Johane Mubbabbatizi wakajayigwa. Kweelede kuti zyakamuchisa loko. Bbayibbele lyaamba kuti: “Naakamvwa [atala akujayigwa kwaJohane], Jesu wakatanta bwato akuzwa ooko, wakaunka kubusena bunyina bantu kutegwa abe alikke.” (Mt. 14:10-13) Tulakonzya kuzimvwisisisya kuti nkamboonzi Jesu naakali kuyanda kuba alikke nkaambo biingi besu tuyandisya kulila katuli atulikke. Pesi Jesu taakakonzya pe kuba aalikke. Nkamu mpati yabantu yakamusaangunina kusika kubusena nkwaakali kuyanda kuya kuti akabe aalikke. Jesu wakachitaanzi? Wakayeeya atala azintu nzibakali kuyanda bantu aabo alubo “wakabeetelela.” Jesu naakabona kuti bakali kuyanda  kugwasigwa akuumbulizigwa, wakafwambaana kubagwasya alubo “wakatalika kubayiisya zintu zinji.”—Mk. 6:31-34; Lk. 9:10, 11.

7-8. Baalu batondeezya biyeni kuti bali aaluyando mbuli Jesu?

⁷Baalu mbubatobelezya chikozyano chaJesu. Tubalumba loko baalu akaambo kakulipeda nkubachita kuti batugwasye. Bakwesu abachizi balakonzya kutayibona milimu njibachita. Muchikozyano, kuti umwi mukwesu naakuti muchizi wamumbungano wachiswa zyakuti ngawabuyanda lugwasyo chakufwambaana, bakwesu bali muKkomiti Yakwaambuuzyania Abasilisi ngabafwambaana kumugwasya. Chiindi chiingi, zintu zili boobu zichitika mansiku. Akaambo kakuti baalu ampuli zyabo balamweetelela mukwesu naakuti muchizi uunga ulikuchiswa, balamugwasya nkaambo babikka ziyandwa aabakombinyina mubusena bwakusaanguna kwiinda nzibayanda.

⁸ Baalu balagwasilizya kukuyaka Maanda aaBwaami naakuti amwi mayake aambunga alubo balagwasilizya chiindi nikwachitika mapenzi aalichitikila. Alubo bamaninsya chiindi chiingi kabali kutusungwaazya, kutuyiisya akutugwasya. Tubalumba loko bakwesu aaba ampuli zyabo. Jehova abalongezye akaambo kaluyando ndubalaalo. Nikuba kuti kulayandikana kuti baalu bachite milimu eeyi yabukombi pesi kulayandikana kuti bajane chiindi chakubaamwi ampuli zyabo.

9. Kweendelana alugwalo lwa Bafilipi 2:4, 5, ngaali maboneno ngibeelede kubaawo maKristu boonse?

⁹ Bala Bafilipi 2:4, 5. Toonse tulakonzya kulipeda kugwasya bamwi mbuli mbaakachita Jesu kazitakwe ndaba kuti tuli baalu na naakuti pe. Bbayibbele lyaamba kuti Jesu ‘wakabweza  ciimo camuzike.’ (Flp. 2:7) Yeeya atala anzitwiiya kuzwa kuvesi eeyi. Muzike naakuti mubelesi ulakonzya kuyanduula nzila zyakuti abotezye simalelaakwe. Akaambo kakuti tuli bazike baJehova akuti tuyanda kugwasya bakombima, tuli aachiyandisyo chakuchita zyiingi mumulimu waJehova alubo tuyanda kulipeda kuchita zintu zyiingi zigwasya bakombima. Atulange-lange zintu zikonzya kutugwasya kuti tukonzye kuchita oobo.

10. Njiili mibuzyo njitukonzya kulibuzya?

¹⁰Lilange-lange. Libuzye mibuzyo iili mbuli yakuti: ‘Ndilalipeda na kubelesya chiindi changu amanguzu aangu kuti ndigwasye bamwi? Muchikozyano, ndalikunoochita biyeni kuti ndabuzigwa kuti ndikaswaye mukwesu wachembaala naakuti ndabuzigwa kuti ndiinke aamuchizi wakomena kumiswaangano? Kuti ndaziba kuti kuli kuyanda kusalazigwa busena buchitilwa miswaangano naakuti kubambululwa Ng’anda yaBwaami, ndilafwambaana na kulipeda kuti ndikagwasilizye?’ Jehova ulabotelwa kuti twabelesya chiindi chesu azintu zyesu kuti tugwasye bamwi nkaambo nitwakalipeda kulinguwe twakamusyomezya kuti tuzoochita oobo. Niinzi nzitukonzya kuchita kuti twabona kuti kuli mputweelede kubambulula?

11. Kukomba ngakulatugwasya biyeni kuti tube aachiyandisyo chakugwasya bamwi?

¹¹Komba kuli Jehova kumukumbila kuti akugwasye. Niinzi nzukonzya kuchita kuti wabona kuti kuli mpuyelede kubambulula pesi kutakwe chiyandisyo pe chakuchita oobo? Komba kuli Jehova kumukumbila kuti akugwasye alubo utamusisili pe zili mumoyo wako. Mubuzye mbulikulimvwa alubo umukumbile kuti akupe ‘chiyandisyo anguzu zyakuchita zintu.’—Flp. 2:13.

12. Bakwesu bachiniini babbabbatizidwe ngabalagwasilizya biyeni mumbunga?

¹² Kuti kuli mukwesu wachiniini uubbabbatizidwe, kumbila Jehova kuti akugwasye kuti ube aachiyandisyo chakugwasya bakwesu abachizi mumbungano yanu. Kuli zimwi mbungano, kuli baalu biingi kwiinda babelesi babelekela alubo biingi bababelesi babelekela aabo bakomena. Mbukunga mbunga yaJehova iili kukomena, kulikuyandikana bakwesu bachiniini kuti bagwasilizye baalu kulangania bakombi baJehova. Uyoobotelwa loko kuti walipeda kugwasilizya kufumbwa kuyandikana lugwasyo nkaambo uyoobotezya Jehova, uyooba aampuwo mbotu alubo uyookkutisikana akaambo kakugwasya bamwi.

13-14. Niinzi nzitukonzya kuchita kuti tugwasye bakwesu abachizi? (Langa chifanikisyo chili aachivumbyo.)

¹³Langisisya zyiimo zyabamwi kuchitila kuti ubone mpubayanda lugwasyo. Mwaapostolo Pawulu wakabuzya maKristu bakuJudiya kuti: “Mutalubi kucita zibotu akwaabana zintu nzyomujisi abamwi, nkaambo Leza ulabotelwa azipaizyo zili boobo.” (Heb. 13:16) Aaya akali malayilile mabotu loko. Kakuli kwayinda chiindi chiniini kuzwa Pawulu naakabalembela malayilile aaya, maKristu aaba bakasiya myuunzi yabo, mabbizinesi aabo ababbululu babo batakombi ‘akutalika kuchijila kumalundu.’ (Mt. 24:16) Aachiindi eecho, kwakali kuyandikana loko kuti bagwasyanie. Kubelesya malayilile Pawulu ngaakababuzya aakuti babaane aabamwi zintu nzibakalaazyo kabatanachijila kumalundu kwakali kuyoobagwasya kuti bakakonzye kuyoogwasyania kundawu nkubakali kuyoochijila.

¹⁴ Chimwi chiindi kulakonzya kubayumina bakwesu abachizi kuti batukumbile lugwasyo. Muchikozyano, kuti kakuli mukwesu wakafwidwa aamwanakazi wakwe, tulakonzya kumugwasya kwiinda mukumujikila chakulya, kumubweza amoota kuti kayanda kuya kuli iimwi ndawu naakuti kumuchitila iimwi milimu yaang’anda. Mukwesu ooyo ulakonzya  kutatukumbila lugwasyo akaambo kakuti ngatayandi pe kutukataazya. Pesi ulakonzya kubotelwa loko kuti twabweza ntaamu yakuti tumugwasye katatukumbide pe. Tatweelede kuyeeya kuti bamwi balakonzya kumugwasya muntu waswaanana aapenzi naakuti kuyeeya kuti muntu uyanda lugwasyo nguwe weelede kutubuzya. Libuzye kuti: ‘Kaansinga ndime ndali muchiimo eechi, ndalikunooyanda kuti bantu bandichitilenzi?’

15. Niinzi nzitukonzya kuchita kuti tukonzye kugwasya bamwi?

¹⁵Bamuntu waangunukide. Amwi kuli bakwesu abachizi bamumbungano yanu mbuzi banga balilibambilide kugwasya bamwi. Tabalimvwi mbuli kuti bamwi ngabali kubakataazya pe. Chiindi choonse balalipeda kutugwasya alubo tulayanda kuba mbuli mbabo. Umwi mwaalu uuli aaminyaka iili 45 uutegwa Alan uyanda kuti bamwi kubawubile kumukumbila lugwasyo. Alan kali kwaambuula atala achikozyano chaJesu wakaamba kuti: “Jesu wakali muntu wakali aazintu zyiingi zyakuchita pesi wakali kupa kuti bantu boonse bapati abaniini kubawubile kumukumbila lugwasyo. Bakalizi kuti ulaandaba ambabo. Ndiyanda kutobelezya chikozyano chaJesu kwiinda mukuba muntu waangunukide, ulaaluyando alubo uuli aandaba abamwi.”

16. Kubelesya majwi ali mulugwalo lwa Intembauzyo 119:59, 60, ngakulatugwasya biyeni kuti tutobelezye chikozyano chaJesu?

¹⁶ Tatweelede kumana manguzu pe kuti twakachilwa kutobelezya chikozyano chaJesu munzila iimaninide. (Jak. 3:2) Sikwiiya takonzyi pe kwiinda muyiisi wakwe. Pesi kuti sikwiiya wayiya kuzwa kukulubizya kwakwe akubeleka changuzu kuti atobelezye muyiisi wakwe zilapa kuti azumanane kuchita kabotu. Munzila iikozyenie, kuti twabelesya nzitwiiya kuzwa muBbayibbele akubambulula mpututachiti kabotu tulakonzya kuzwidilila kutobelezya chikozyano  chaJesu.—Bala Intembauzyo 119:59, 60.

17-18. Tugwasigwa biyeni kuti twatobelezya chikozyano chaJesu?

¹⁷ Kuti twalipeda kugwasya bamwi, zilakonzya kupa kuti bamwi batubona ambabo batobelezye chikozyano chesu. Umwi mwaalu uutegwa Tim wakaamba kuti: “Kuli bachikula bakabeleka changuzu kuti basimye bweenzinyina bwabo aJehova alubo bakasalwa kuti babe babelesi babelekela kabachili baniini loko. Kamwi kaambo kakapa kuti basalwe kuba babelesi babelekela nkakuti bakatobelezya chikozyano chabamwi bakalipeda kugwasya bakombinyina. Bakwesu bachiniini aaba bali kugwasya mbungano yesu alubo balikubelekelaamwi abaalu.”

¹⁸ Bantu biingi bali munyika mazubaano tabakwe chiyandisyo chakugwasya bamwi. Pesi bakombi baJehova teembubabede pe. Chikozyano chaJesu chakulipeda kugwasya bamwi chatugwasya loko. Alubo tuyanda kulipeda andiswe kuti tugwasye bamwi. Nikuba kuti tatukonzyi pe kutobelezya chikozyano chakwe munzila iimaninide pesi tulakonzya ‘kwiitobelesya mikondo yakwe.’ (1 Pet. 2:21) Kuti twabeleka changuzu kuti tutobelezye chikozyano chaJesu chakulipeda kugwasya bamwi, tuyoobotelwa nkaambo ngatuli kuchita zintu zibotezya Jehova.