1. Ntekereza ki enungi eitukurora omu bantu ba Yahwe?

 EMYAKA nyingi enyuma, Baibuli ekaranga ngu abantu ba Yahwe bakwehaireyo begondiize kumuheereza ha nsi y’oburagirizi bw’Omwana we. (Zab. 110:3) Busaho kugurukyagurukya, obunabbi obu nibuhikirra omu kasumi kanu. Buli mwaka, abaheereza ba Yahwe n’obwekambi bamara obukaikuru n’obukaikuru bw’esaaha omu kutebeza. Tibasasurwa kukora omulimo ogu habwokuba bagukora begondiize. Kandi batunga n’obwire obw’okukonyera Abakristaayo bagenzi baabo omu byetaago byabo eby’omubiri, kubagarramu amaani, kandi n’okubagumya omu by’omwoyo. Abagurusi hamu n’abaheereza bamara esaaha nyingi muno nibatekaniza ebicweka by’ensorrokano kandi nibabungira Abakristaayo bagenzi baabo kubagarramu amaani. Nsonga ki ey’eretera abantu ba Yahwe kukora emirimo enu yoona? Habwokuba bagonza Yahwe hamu n’abantu abandi.​—Mat. 22:37-39.

2. Kusigikirra ha Abarumi 15:1-3, kyokurorraho ki Yesu ekiyatuteriireho?

² Yesu akatekaho ekyokurorraho ekirukukirayo oburungi eky’okwebembeza ebyetaago eby’abandi okukira ebye. Nitukora kyona ekiturukusobora kurubatira omu bigere bye. (Soma Abarumi 15:1-3.) Abo abeegera ha kyokurorraho kye nibaija kutunga emigisa. Yesu akagamba ati: “Okugaba kwomugisa okukira okuhebwa.”​—Eng. 20:35.

3. Nitwija kubazaaho ki omu kicweka kinu?

³ Omu kicweka kinu nitwija kubazaaho ebintu ebimu Yesu ebiyakozere kusobora kuheereza abandi kandi n’omulingo tusobora kwegera ha kyokurorraho kye. Kandi nitwija kubazaaho omulingo tusobora kwongera ha kugonza kwaitu okw’okwehayo kuheereza abandi.

4. Yesu akebembeza ata ebyetaago eby’abandi okukira ebye?

⁴ Yesu yayehayoga kukonyera abandi n’obuyabaga ajwahire. Tekerezaaho Yesu ekiyakozere abantu baingi obubaizire kumutangatangana ha rubaju rw’orusozi orusobora kuba rukaba ruli haihi na Kaperenaumu. Yesu akaba amazire obwire bw’ekiro bwona nasaba. Nahabweki aine kuba akaba ajwahire muno, baitu obuyarozere ebitebe by’abantu, akakwatirwa abanaku n’abarwaire embabazi. Atagarukire ha kubakiza kyonka baitu akabegesa n’ebintu bingi ebirukugarramu amaani, kandi okwegesa kunu nukwo kwetwa Okwegesa Okwa ha Rusozi.​—Luk. 6:12-20.

5. Banyineeka bahondera bata ekyokurorraho kya Yesu eky’okwoleka okugonza n’obubaba bajwahire?

⁵ Omulingo banyineeka barukwegera ha kyokurorraho kya Yesu. Tekerezaaho enyikara enu: Hanyuma y’okukora ekiro kyona, nyineeka agaruka omu ka ajwahire. N’obukiraaba ngu n’agonza kusazaamu okuramya kw’eka okwa rwebagyo oru, ayesengereza Yahwe kumuha amaani ag’okukwebembera. Yahwe agarukamu okusaba kwe, kandi tiboosa okuramya kwabo okw’eka. Rwebagyo oru, abaana beega isomo erikuru ngu bazaire baabo bebembeza kuramya Yahwe kukira ekintu ekindi kyona.

6. Bazaaho ekyokurorraho ekirukwoleka omulingo Yesu y’ahaireyo obwire bwe kukonyera abandi.

⁶ Yesu yahaga abantu abandi obwire bwe n’obuyabaga n’agonza kuba wenka. Tekerezaaho omulingo y’ayehuliiremu obuyakimanyire ngu munywani we Yohana Omubatizi aisirwe. Yesu aine kuba y’asaliirwe muno. Baibuli negamba eti: “Yesu obuyahuliire [ha kufa kwa Yohana], yarugayo omu bwato yagenda hali irungu [kuba wenka].” (Mat. 14:10-13) Nitusobora kwetegereza ensonga habwaki Yesu akaba n’agonza kuba wenka. Habwokuba baingi omuliitwe tukira kugonza kuganya tuli itwenka. Baitu Yesu, atasobole kuba wenka. Ekitebe ky’abantu ekikooto kikamubanza kuhika omu kiikaro nambere akaba n’agenda kuba wenka. Yesu akehurra ata obuyabarozere? Akatekerezaaho ebyetaago byabo, kandi y’abasaalirirwa. Akakyetegereza nk’oku bakaba nibetaaga kukonyerwa kandi n’okuhuumuzibwa omu by’omwoyo, nahabweki aho naaho akatandika kubakonyera. Kandi amananu gali, ‘akabegesa ebigambo bingi.’​—Mar. 6:31-34; Luk. 9:10, 11.

7-8. Bazaaho ekyokurorraho ekirukwoleka omulingo abagurusi ab’okugonza bahondera ekyokurorraho kya Yesu obuhabaho obwetaago.

 ⁷ Omulingo abagurusi abaine okugonza beegera ha kyokurorraho kya Yesu. Nitusiima muno habw’emirimo abagurusi abarukwefereza eibatukorra! Emirimo ey’erukukira obwingi eibakora terorwa ab’oruganda na banyaanya itwe omu kitebe. Ekyokurorraho, obuhabaho ensonga ey’obujanjabi eya bwangu bwangu, ab’oruganda abali h’akatebe aka Hospital Liaison Committee barahuka kugenda kukonyera Abakristaayo bagenzi baabo. Emirundi erukukira obwingi enyikara zinu zikira kubaho omu bwire bw’ekiro! Baitu habw’okusaalirirwa Abakristaayo bagenzi baabo abali omu bujune, abagurusi abo abagonzebwa hamu n’ab’omu maka gaabo, bebembeza ebyetaago eby’Abakristaayo bagenzi baabo kukira eby’abo.

⁸ Kandi abagurusi bakonyera omu kwombeka Kingdom Hall hamu n’ebyombeko ebindi eby’Obukama, kandi n’omulimo ogw’okwirukirra ababa bahikirweho ebigwererezi. Ekindi, bamara obwire bwabo bwingi nibatwegesa kandi nibatugarramu amaani. Mali tusemeriire kusiima ab’oruganda banu boona hamu n’ab’omu maka gaabo. Nitusaba Yahwe abahe emigisa habw’okwehayo kwabo! Ky’amananu ngu, nk’abantu abandi boona, abagurusi nibetaaga kwoleka okwetegereza. Tibasemeriire kumara obwire bwabo boona omu mirimo y’ekitebe bakaburwa obwire obw’okufaaho ebyetaago eby’ab’omu maka gaabo.

9. Kusigikirra ha Abafiripi 2:4, 5, ntekereza ki Abakristaayo boona eibasemeriire kutunga?

⁹ Soma Abafiripi 2:4, 5. Ky’amananu ngu itwena tituli bagurusi, baitu itwena nitusobora  kwegera ha kyokurorraho kya Yesu eky’okwebembeza ebyetaago by’abandi kukira ebyaitu. Baibuli negamba ngu ‘akatwara omulingo ogw’omwiru.’ (Baf. 2:7) Tekerezaaho ekitusobora kwega kuruga omu rukarra oru. Omwiru, rundi omuheereza arukugonzebwa akozesa buli kagisa koona kusemeza mukama we. Habwokuba tuli bairu ba Yahwe kandi tuheereza ab’oruganda bagenzi baitu, nitugonza kweyongera kuba b’omugaso hali Yahwe hamu n’Abakristaayo bagenzi baitu. Kinu nosobora kukikora kuraba omu kutekerezaaho amagezi agahairwe hansi.

10. Bikaguzo ki ebitusobora kwekaguza?

¹⁰ Tekerezaaho entekereza yaawe. Wekaguze ebikaguzo binu: ‘Nyetekaniize kukozesa obwire bwange n’amaani kukonyera abandi? Ekyokurorraho, nyetwaza nta obubansaba kubungira ow’oruganda omu ka ye ow’agurusire, rundi kutwara munyaanya itwe ow’akaikwire omu nsorrokano? Nyanguha kukonyera obuhabaho obwetaago obw’okusemeza nambere turukugenda kutungira orusorrokano orukooto rundi obw’okudabiriza Kingdom Hall?’ Yahwe asemererwa obutwefereza obwire bwaitu hamu n’ebintu ebitwine kukonyera abandi, kandi kinu nikyo twayeragire obutukaba nitwehayo hali uwe. Kakuba turora ngu nitwetaaga kusemezaamu omu nsonga zinu, kiki ekitusobora kukora?

11. Okusaba nikusobora kuta kutukonyera kukurakuraniza omutima ogw’okugonza kukonyera abandi?

¹¹ Saba Yahwe kuruga ha mutima. Kiki eky’osobora kukora kakuba okyetegereza ngu noyetaaga kweyongera kuba muntu ow’arukwehayo baitu kandi n’oyehurra ngu torukugonza kukikora. Obworaaba nukwo orukwehurra oti, wesengereze Yahwe kuruga ha mutima. Kandi omugambire amananu gonyini. Gambira Yahwe omulingo orukwehurramu, kandi omusabe akuhe “okugonza n’amaani ebyorukwetaaga kukora eby’agonza.”​—Baf. 2:13, NWT.

12. Ab’oruganda abato ababatiziibwe, nibasobora bata kukonyera ekitebe?

¹² Obworaaba oli w’oruganda omuto, kandi ow’abatiziibwe, saba Yahwe akukonyere kukurakuraniza omutima ogw’okugonza kweyongera kuheereza omu kitebe. Omu mahanga agamu, abagurusi baingi kukira abaheereza, kandi baingi h’abaheereza banu bakuzire omu myaka. Ekitebe nk’oku kirukugenda nikyeyongera kuba kikooto, nitwetaaga ab’oruganda abato abandi baingi kutukonyera kurolerra abantu ba Yahwe. Obworaaba oine omutima ogw’okugonza kuheereza nambere orukwetaagwa, noija kutunga okusemererwa. Habwaki? Habwokuba noija kusemeza Yahwe, oyekorre ibara erirungi, kandi otunge n’okumarwa okuruga omu kukonyera abandi.

13-14. Biki ebitusobora kukora kukonyera ab’oruganda na banyaanya itwe? (Rora ekisisani ekya ha kyesweko.)

¹³ Ba muntu arukurahuka kurora abali omu bwetaago. Omukwenda Paulo akatererra Abaheburaniya ati: “Mutebwa okukora kurungi [n’okugabana ebimwine n’abandi]: baitu ebyonzira ebirukusisana biti Ruhanga nabisima muno.” (Baheb. 13:16) Obu bwali buhabuzi burungi! Hanyuma y’akaire kake Abakristaayo omu Yuda bamazire kutunga ebbaruha egi, bakaba baine kulekaho amaka gaabo, bizineesi, hamu n’abanyabuzaale baabo abatali Bakristaayo kwiruka kugenda omu nsozi. (Mat. 24:16) Hataroho kugurukyagurukya, omu kasumi ako, kyali kikuru muno bakonyerengana. Obubaraaba baali batandikire kara kuteeka omu nkora obuhabuzi bwa Paulo obw’okubagana ebibaine n’abandi, kyakubanguhire kumarwa ebike ebibaine omu kiikaro ekihyaka.

¹⁴ Obwire oburukukira obwingi ab’oruganda na banyaanya itwe nibasobora kutatugambira ebyetaago byabo. Ekyokurorraho,  ow’oruganda n’asobora kufeerwa mukazi we. Nitusobora kwekaguza, ow’oruganda ogu nayetaaga omuntu ow’okumukonyera kucumba, omu mirimo y’omuka, rundi ow’okumukonyera omu by’endubata? Nasobora kutatusaba obukonyezi habwokuba tarukugonza kututalibaniza. Baitu n’asobora kutusiima muno kakuba tumukonyera n’obwarukuba atatusabire obukonyezi. Titusemeriire kutekereza ngu abandi nibaija kumukonyera rundi ngu naija kwikara n’atugambira ebyarukwetaaga. Wekaguze, ‘Kakuba ndi omu nyikara nk’egi, bukonyezi ki obunakwetaagire?’

15. Kiki ekitusemeriire kukora, obuturaaba nitugonza kukonyera abandi?

¹⁵ Letera abandi kwanguhirwa kukusaba obukonyezi. Hataroho kugurukyagurukya omanyire ab’oruganda na banyaanya itwe omu kitebe kyanyu abaikara betekaniize kukonyera abandi. Tibatuletera kwehurra ngu nitubatalibaniza. Baitu baikara betekaniize kutukonyera obuhabaho obwetaago, kandi naitwe twakugondeze kuba nkabo! Omugurusi arukwetwa Alan, ow’aine emyaka 45, yakugondeze abantu banguhirwe kumusaba obukonyezi. Alan n’abazaaho ekyokurorraho kya Yesu ati: “Yesu akaba aine bingi eby’okukora, baitu abantu boona abakuru n’abato bamugonzaaga kandi tibatiinaga kumusaba obukonyezi. Bakaba bakimanyire ngu mali yabafaahoga muno. Ningonza kuba nka Yesu, kandi manywe nk’omuntu ow’ayanguhire kusabwa obukonyezi, omunywani, kandi arukufaaho abandi.”

16. Kuteeka omu nkora obuhabuzi obuli omu Zabuli 119:59, 60 nikiija kutukonyera kita kweyongera kuhondera ekyokurorraho kya Yesu?

¹⁶ Titusemeriire kuhwamu amaani kakuba tulemwa kuhondera ekyokurorraho kya Yesu kikumi ha kikumi. (Yak. 3:2) Omwegi ow’arukwega kusiiga ebisisani tasobora kwegera ha kyokurorraho ky’omwegesa we kikumi ha kikumi. Obw’akora ensobi baitu akazegeraho kandi  akekamba nk’oku arukusobora kuhondera ekyokurorraho ky’omwegesa we, ayeyongera kusemezaamu omulingo arukusiiga. Omu mulingo nugwo gumu kakuba naitwe tuteeka omu nkora ebitwegere kuruga omu kwesomesa Baibuli, kandi tukakora kyona ekiturukusobora kusemeza engeso zaitu, nitwija kweyongera kwegera ha kyokurorraho kya Yesu.​—Soma Zabuli 119:59, 60.

17-18. Obuturayegera ha kyokurorraho kya Yesu eky’okukonyera abandi migisa ki eituratunga?

¹⁷ Obutuba n’omutima ogw’okwehayo kukonyera abandi kiretera n’abandi kukora nikyo kimu. Omugurusi arukwetwa Tim nagamba ati: “Twine ab’oruganda abato abakurakuraine bafooka abaheereza omu kitebe habwokuba bakegera ha kyokurorraho ekyabo abaine omutima ogw’okwehayo kuheereza abandi. Ab’oruganda banu abato bakonyera muno ekitebe kyaitu kandi basagika muno abagurusi b’ekitebe.”

¹⁸ Omu kasumi kanu abantu abarukukira obwingi omu nsi befaaho bonka. Baitu abantu ba Yahwe b’embaganiza. Tukakwatwaho habw’ekyokurorraho kya Yesu eky’okwehayo kukonyera abandi, kandi naitwe tucweriiremu kimu kukihondera. Titurukusobora kuhondera ekyokurorraho kye kikumi ha kikumi, baitu nitusobora kulengaho kurubatira omu bigere bye. (1 Pet. 2:21) Obuturakora kyona ekiturukusobora kwegera ha kyokurorraho kya Yesu eky’okwehayo kukonyera abandi, nitwija kutunga okusemererwa habw’okukimanya ngu nitusemeza Yahwe.