MUSORO WE KUFUNDA 9
Teedzerai Djesu nge Kuseenzera Amweni
“Kupasa kuno mupfaro mukuru kudarika kupaswa.”—ZVI. 20:35.
NGOMA 17 “Ndinoda”
ZVATICAFUNDA *
1. Anhu a Djehovha anoitei nge ndaa ye rudo?
BHAIBHERI rakabhuya kare kuti anhu a Mwari “aizodzipira” kuti amuseenzere uye aizozviita nge kuteedzera nhungamiriro dze Mwana wake. (Pis. 110:3) I cokwadi kuti uphorofita uu urikudzadzika mazuwa ano. Makore ese, aseenzi a Djehovha anopedza nguwa yakawanda eciparidzira masoko akanaka. Awona anozviita ngekuda kawo uye nguwa dzimweni anoseenzesa zviro zvawo kuti aite basa iri. Kupinda izvona, awona anobetsera hama dzawo mukutenda pa zviro zvekunyama, zvemundangariro uye zvekunamata. Akuru no abati anoseenzera anopedza nguwa yawo ecigadzirira matii awo e musangano uye anoita shanyo ye kuusha. Anhu a Djehovha anoita zvese izvi nge ndaa ye rudo—rudo kuna Djehovha uye ku anhu.—Mat. 22:37-39.
2. Maererano no zviri pana Aroma 15:1-3, Djesu akasiya muezaniso upi?
2 Djesu akasiya muezaniso wakanaka. Pano kurangarira nge zvake, ayena airangarira maningi nge zve amweni. Asi isusu tirikupeta masimba ari esse kuti titeerere tsoka dzake. (Erengai Aroma 15:1-3.) Kana tikadaro, ticazwa zvakabhuya Djesu eciti: “Kupasa kuno mupfaro mukuru kudarika kupaswa.”—Zvi. 20:35.
3. Ticaonei mu fundo ino?
3 Mu fundo ino, ticaona zviro zvinganani zvakaizwa na Djesu kuti abetsere amweni uye kuti isusu tingamuteedzera kudini. Ticaonawo zvatingaita kuti titunhudzire cido cedu cekubetsera amweni.
TEEDZERAI MUEZANISO WA DJESU
Kunyazi ainga akaremba, Djesu akaitei paakaona anhu akawanda ecienda kaari? (Onai ndima 4)
4. Djesu akakanda kudini zvido zve amweni pa mberi pe zvido zvake?
4 Djesu aibetsera anhu amweni kunyazi paainga akaremba. Djesu ainga apedza usiku wese eciita munamato, uye ainga ari pa dunhu pamweni padhuze no Cafarnaum. Cimborangarirai kuti akazwa kudini paakaona anhu akawanda ecienda kaari. Ayena akaazwira usisi uye kunyazi ainga akaremba, akatanga kurapa airhwara. Andizvopi zvega. Pa nguwa iyona, ayena akaita mharidzo inoziikanwa yatinodaidza nyamasi kuti Mharidzo ye pa Dunhu.—Ruka 6:12-20.
Tingateedzera Djesu nge mishobo ipi patinokanda zvido zve amweni pa mberi pe zvido zvedu? (Onai ndima 5)
5. Musoro we mhuri ungateedzera kudini muezaniso wa Djesu paanonga akaremba?
5 Musoro we mhuri ungateedzera kudini muezaniso wa Djesu. Rangarirai zvinoteera: Pakupera ke zuwa re basa, baba e mhuri anoguma pa nyumba akaremba. Babewo anorangarira kusama kuita Kunamata ke Mhuri, asi unonamata kuna Djehovha ecikumbira simba kuti akwanise kuita Kunamata ke Mhuri, uye Djehovha anodaira munamato wake. Iyena unokwanisa kuita Kunamata ke Mhuri. Nge kudaro, ana anofunda fundo rinokosha. Awona anokwanisa kuona kuti ku abereki awo, zviro zvekunamata zvinouya pa mbuto yekutanga.
6. Pasai muezaniso wekuti Djesu akabetsera kudini anhu kunyazi paaida kugara ari ega.
6 Djesu aitora nguwa kuti afundise amweni kunyazi paaida kugara ari ega. Makamboedza kurangarira kuti Djesu akazwa kudini paakabvunzwa kuti shamwari yake Juau Mubhabhatidzi wainga auraiwa? Zvingaita kuti Djesu akatsukwara maningi. Bhaibheri rinoti: “Djesu paakazwa izvi [nge zve rufu ra Juau], akabudepo no bharko oenda ku mbuto isina anhu kuti agare ega.” (Mat. 14:10-13) Isusu tinozwisisa ngei Djesu akaita izvona. Anhu akawanda anosanangura kugara ari oga paanofirhwa no munhu waanoda. Djesu aida kuita izvona, asi aazi kuzvikwanisa. Anhu akawanda akazwa kaiendhwa ndi Djesu uye akatanga kugumeyo ayena asati atokuguma. Djesu akaitei? Ayena akarangarira zvaisongana no anhu aya uye akaazwira “usisi.” Ayena akaona kuti anhu aya ainga akapsveteka pakunamata uye aida rubetso. Hino, ayena “akatanga kuafundisa zviro zvakawanda.”—Mk. 6:31-34; Ruka 9:10, 11.
7-8. Pasai muezaniso wekuti akuru anoteedzera kudini muezaniso wa Djesu hama ye mu ungano painonga yecida rubetso.
7 Akuru angateedzera kudini muezaniso wa Djesu. Isusu tinokoshesa kudzipira kunoita akuru kuti atibetsere! Kajinji, ungano aigari yakaziya zvese zvinoizwa no akuru. Ngo muezaniso, pakaitika ciro cinodikana kuti mamedhiko abetsere no kukasika, akuru anobatanidzwa pa Dare Rinopindirana Mucitenderano no Zvipitari anobetsera hama dzinoda rubetso. Kajinji migariro ii inoitika pakati pe usiku! Asi akuru no mhuri dzawo anokanda zvido zve hama no hanzvadzi pa mberi pe zvido zvawo. Awona anoita izvi nge kuti anoada.
8 Akuru anobatikanawo mu basa rekuwaka Nyumba dze Umambo uye zviwakwa zvimweni zvinoseenzeswa pakunamata Djehovha. Aona anobatikanawo pakubetsera panonga paitika njodzi, tisikabhui nge zve nguwa yakawanda yaanopedza ecifundisa uye ecibambisa ungano. Hama idzi no mhuri dzawo dzakasisira kusimbwa. Tinonamata kuna Djehovha kuti arumbwe ecibetsera hama idzi! Zviri pamhene kuti hingana isusu, akuru anodikanawo kugara no maonero ari pakati no pakati. Aona aadi kupedza nguwa yakawanda eciita zviro zve ungano dakara pakusiya mhuri dzawo.
TINGAKANDA KUDINI ZVIDO ZVE AMWENI PA MBERI PE ZVIDO ZVEDU
9. Maererano na Afiripi 2:4, 5 aKristu anodikana kugara no muitiro upi?
9 Erengai Afiripi 2:4, 5. Djesu akasiya muezaniso wekukanda zvido zve amweni pa mberi pe zvido zvedu. Akuru andiopi basi anodikana kuteedzera muezaniso uu. Cokwadi ngecekuti tese isusu tinodikana kuzviita. Bhaibheri rinobhuya kuti Djesu “akagara hinga muranda.” (Afi. 2:7) Rangarirai zvatingafunda no masoko aya. Muranda kana kuti museenzi waipsvaka mukana kuti apfadze tenzi wake. Pa nyaya yedu, isusu tiri aranda a Djehovha uye aseenzi e hama dzedu. Ndiyo ndaa, tinoda kuteedzera muezaniso wa Djesu wekuita zviri zvese kuti tipfadze Djehovha uye tiseenzere hama dzedu. Ngatione mishobo minganani yekuita izvona.
10. Mibvunzo dzipi dzatinodikana kudzibvunzisa?
10 Ongororai maitiro enyu. Dzibvunzisei kuti: ‘Ndakagadzirira kudzipira dakara papi kuti ndibetsere hama dzangu? Ngo muezaniso, ndinosoitei kana ndikakumbirhwa kuti ndiende koovhakacira hama yacembera inogara ku nyumba inocengeterhwa acemberi, kana kuti kootora hanzvadzi yacembera kuti iende ku misangano? Inini ndinodzipira kuti ndicenese Nyumba ye Umambo kana kuti nyumba dze magungano?’ Patinodzipira kuna Djehovha, tinomugondesa kuti ticaita zviri zvese kuti tinyase kumuseenzera. Umwe we mushobo wekuita izvona nge we kupedza nguwa yedu uye kuseenzesa zviro zvedu kuti tibetsere hama dzedu. Djehovha anopfara maningi paanotiona teciita izvona. Asi tinodikana kuitei kana tikaona kuti pano patinodikana kugadzirisa pa nyaya ii?
11. Munamato ungatibetsera kudini kuti tigare no cido cekubetsera amweni?
11 Namatai no mwoyo wese kuna Djehovha. Pamweni makwanisa kuona kuti pano pamunodikana kugadzirisa pa nyaya yekukanda zvido zve amweni pa mberi pe zvido zvenyu. Asi zvezvirokwazvo, pamweni murikuona hingana kuti amuna cido cekuzviita. Kana zviri izvona, namatai no mwoyo wese kuna Djehovha. Bhuyai zviri mu mwoyo menyu. Mubvunzei zvese zvamuri kuzwa, uye mukumbirei kuti amupase ‘cido uye simba rekuzviita.’—Afi. 2:13.
12. Hama yecidjaha yakabhabhatidzwa ingabetsera kudini sangano ra Djehovha?
12 Kana muri djaha rakabhabhatidzwa, namatai mecikumbira rubetso kuna Djehovha kuti mukwanise kubetsera mu ungano. Mu nyika dzakawanda, kune akuru akawanda kupinda abati anoseenzera, uye abati anoseenzera aya aaciripi madjaha. Asi sangano ra Djehovha ririkurumbwa recikura. Ndiyo ndaa tinoda hama dze cidjaha kuti dzibetsere akuru pakuonerera ungano. Kana mukadzipira kuti muite zvakawanda, mucapfara maningi. Ngei? Ngekuti mucapfadza Djehovha, mucagondhwa no hama dze mu ungano uye mucazwa mupfaro wekubetsera amweni.
MaKristu ecibva ku Djudha ecidarika Murambo we Djordhaniecienda ku thaundi re Pera. Aya akatanga kuguma arikukowanisa zvokurhya ku aKristu abva kuguma (Onai ndima 13)
13-14. Tinodikana kuitei kuti tibetsere hama dzedu? (Onai foto ye pa kapa.)
13 Garai makagadzirira pa zviro zvinodiikanwa no amweni. Mu phostori Pauro wakabvunza aKristu e ku Djudha kuti: “Musakanganwe kuita zvakanaka uye kupasawo amweni zvamunazvo, ngekuti Mwari anopfadzwa nge zvibairo zvakadaro.” (Ahe. 13:16) Zano iri rakanaka maningi! Pasati padarika nguwa yakareba awona aa atambira tsamba ii, aKristu e ku Djudha “akatizira ku matunhu,” osiya nyumba dzawo, mabhizi awo uye hama dzawo dzainga dzisiripi aKristu. (Mat. 24:16) Uye pa nguwa iyona, zvaikosha maningi kuti hama dzibetserane. Kudai awona ainga ano musambo wekupangurirana zviro zvaainga anazvo, zviri pamhene kuti zvakaaitira nyore kuti ararame no zviro zvidoko zvaainga anazvo.
14 Anguwa dzesepi hama no hanzvadzi dzinobhuya kuti dzinoda rubetso. Ngo muezaniso, pamweni pano hama yakafirhwa no mukadzi uye iyona yakatsukwara maningi. Kodi hama ii inoda rubetso pa mabasa e pa nyumba, e kubika, kana kupaswa bhureya here? Zvingaita kuti hama ii aidi kukumbira rubetso ngekuti aidi kunetsa munhu. Asi iyona yaizopfara maningi kana tikaibetsera isati yatikumbira rubetso. Atidikani kurangarira kuti aakubetserhwa no amweni, kana kuti hameyo inodikana kuuya kotikumbira rubesto. Dzibvunzisei kuti: Kudai ndainga ndiri inini, cinyi candaizopfarira kuti amweni andiitire?
15. Tinodikana kuitei kana tecida kubetsera amweni?
15 Garai munhu ari nyore kune amweni kuti amukumbire rubesto. I cokwadi kuti mu ungano mune hama no hanzvadzi dzakagadzirira kubetsera amweni, uye aona aaoni hingana kuti izvona zvinoshupha. Isusu tinoziya kuti pa nguwa yatinonga tecida rubetso, aona acatibetsera. Zviri pamhene kuti aona ndi muezaniso wakanaka watinoda kuteedzera! Tecirangarira izvona, mukuru umweni unozwi Alan uno makore 40 wakati: “Djesu ainga akabatikana maningi, asi anhu e mathunga ese aizwa akasudzunuka kumupsvaka kuti amukumbire rubetso. Aona aikwanisa kuona kuti Djesu aiarangariradi kamare. Inini ndirikuda kuteedzera muezaniso wa Djesu ngekuziikanwa hingana munhu uno ushamwari, munhu uri nyore uye unobetsera amweni.”
16. Kuseenzesa Pisarema 119:59, 60 kungatibetsera kudini kuti titeedzere muezaniso wa Djesu?
16 Amudikani kuora mwoyo kana mukasama kuteedzera Djesu nge mushobo wakakwana. (Tg. 3:2) Rangarirai nge zve mufundi we arti usikakwanisi kuteedzera zvinoizwa no mufundisi wake. Iyena unofundira no zvishaishi zvake uye unoedza kuteedzera nge padhuzi zvinoizwa no mufundisi wake. Nge kuhamba ke nguwa, mufundi uu unokwanisa kuteedzera mufundisi wake. Ngo mushobo umwewo, kana tikaseenzesa zvatinofunda kubva mu Bhaibheri uye topeta masimba kuti tigadzirise paya patinoona kuti tinodikana kugadzirisa, ticakwanisa kuteedzera Djesu nge padhuze.—Erengai Pisarema 119:59, 60.
KUBETSEREKA KATINOITA NGE KUKANDA ZVIDO ZVE AMWENI PA MBUTO YEKUTANGA
Paanoteedzera Djesu, akuru anonga ecipasa muezaniso wakanaka ku madjaha (Onai ndima 17) *
17-18. Tinobetsereka kudini ngekukanda zvido zve amweni pa mbuto yekutanga?
17 Patinodzipira kuti tibetsere amweni, anhu amweni acadao kuita zvimwezvo. Mukuru umweni unozwi Tim wakati: “Hama dzimweni dzecidjaha dzakagadzwa hinga abati anoseenzera. Cimwe ce zvikonzero zvakaita kuti agadzwe, ngecekuti akaona hama dzimweni dzecibetsera uye akadao kuita zvimwezvo. Madjaha aya, anobetsera maningi ungano uye akuru.”
18 Isusu tirikurarama mu nyika yekuti anhu anodzida. Asi anhu a Djehovha akasiyana. Muezaniso wa Djesu wekukanda zvido zve anhu amweni pa mberi pe zvido zvake, unotishamisa uye tinoda kuteedzera muezaniso wake. Zviri pamhene kuti atizokwanisi kuteedzera muezaniso wake nge mushobo wakakwana, asi tingatsika no “maakatsika namo.” (1 Pe. 2:21) Patinopeta masimba kuti titeedzere muezaniso wa Djesu, ticazwa mupfaro wekuziya kuti Djehovha anotitendera.
NGOMA 13 Kristu Muezaniso Wedu
^ par. 5 Pano kurangarira nge zvake basi, Djesu airangarira nge zve anhu amweni. Mu fundo ino ticaona mishobo minganani yatingateedzera nayo muezaniso wake. Ticaonawo pazvakatinakira kuteedzera muezaniso wake.
^ par. 57 KUPANGANIDZWA KE MUFANIKISO: Mudjaha unozwi Dan, eciona akuru airi arikuvhakacira baba ake mu shipitari. Muezaniso we hama mbiri idzi dzakaita kuti Dan adeo kubetsera amweni mu ungano. Djaha rinozwi Ben eciona Dan urikubetsera hanzvadzi yacembera. Muezaniso wa Dan unokohomedzesa Ben kuti adeo kubetsera pakucenesa Nyumba ye Umambo.
