1. Иегованың чонунда кандыг хөөн тергиидеп турар?

 МУҢ-МУҢ чылдар бурунгаар Библияда Бурганның чону «эки туразы-биле» чедип келгеш, Иисустуң удуртулгазы-биле Иеговага бараалгаар деп баш удур бижээн (Ыд. ыр. 109:3). Ол өттүр билген медеглелдиң күүсеттинип турарын ам көрүп турар бис. Бодун хайыралавас Бурганның бараалгакчылары чыл санында эки тура-биле чүс-чүс миллион шактарны суртаалче үндүрүп турар. Оон ыңай олар кады бүзүрээн ха-дуңмазын материалдыг болгаш сагыш-сеткил талазы-биле деткип, бүзүрелин быжыктырар дээш, үезин харамнанмайн турар. А томуйлаттырган акылар чыыштарга белеткенир дээш база кадарчы ажыл кылыр дээш чеже шакты үндүрүп турар деп! Олар ону чүү дээш кылып турар? Иеговага болгаш чанында кижиге ынакшыл оларны оттуруп турар (Мф. 22:37—39).

2. Иисус кандыг үлегерни арттырганыл? (Римчилерге 15:1—3).

² Иисус өскелерниң сонуургалдарын бодунуундан бедик салып, биске кайгамчык үлегерни арттырган. Бис шыдаар шаавыс-биле ону өттүнер дээш кызып турар бис. (Номчуптуңар: Римчилерге 15:1—3.) Ынчаар амыдырап-чурттаарының эки талалары дыка хөй. Иисус: «Алырынга көөрде, бээри — амыр-чыргалдыг» — дээн болгай (Аж.-ч. 20:35).

3. Бо статьяга чүнү сайгарар бис?

³ Бо статьядан Иисустуң бодун канчаар хайыралавайн  турганын база ону канчаар өттүнүп болурувусту билип алыр бис. Ол ышкаш өскелер дээш бодун хайыралавас күзелди сайзырадырынга чүү дузалаарын көөр бис.

4. Иисус бодун канчаар хайыралаваан?

⁴ Иисус шылап тургаш безин, бодун кээргевейн турган. Бир катап Капернаумдан ырак эвесте, даг эдээниң чанынга хөй чон Иисуска келген. Ол дүннү өттүр мөргээн болгаш, аажок шылап калган турган. Ынчалзажок ол улусту көөрге, дыка кээргенчиг болган. Иисус аарыг-аржык улусту экирткенинден аңгыда, Даг кырынга суртаал деп билдингир апарган илеткелин чугаалаан (Лк. 6:12—20).

5. Өг-бүле баштыңнары шылап тургаш безин, Иисусту канчаар өттүнүп турар?

⁵ Өг-бүле баштыңнары Иисусту канчаар өттүнүп турар? Мындыг байдал хөй кезиивиске таныш: өг-бүле баштыңы хүнзедир ажылдааш, шылаанындан аңдарлып дүжер чыгыы келген. Ол кежээ өг-бүле мөгейиишкини болур ужурлуг. Ачазы ону эрттирер харык чок-даа болза, дөмей-ле Иеговага мөргүп, Оон күштү дилээн. Иегова ооң мөргүлүнге харыылаан соонда, өг-бүле мөгейиишкини график ёзугаар эрткен. Ада-иезинге Иегова-биле хамаарылгадан артык чугула чүве чок деп, эң кол кичээлди ажы-төлү ол кежээ шиңгээдип алган.

6. Иисус бодунга аңгылап алган үезин өскелерге канчаар берген? Чижектен чугаалаңар.

⁶ Иисус үезин харамнанмас чораан. Ооң-биле болган база бир болуушкунну көрүптээлиңер. Иоанн Медеглекчиниң бажын одура кезип шаажылап каанын ол чаа дыңнап каан. Иисустуң орнунга бодуңарны салып көрүңер даан! Эжиниң өлүмүнүң дугайында дыңнааш, ол «чааскаан турары-биле... ээн черже» чорупкан (Мф. 14:10—13). Мындыг байдалда хөй кезиивис шак ынчаар алдынар чадавас. Ынчалза-даа аңаа «чааскаан турары» болдунмаан. Ол «ээн черниң» дугайында хөй улус билип каапкан. Иисус ынаар чедип чадап турда-ла, олар шагда-ла аңаа чеде бергеннер. Ол канчалган? Иисус өскелерниң сонуургалдарын бирги черге салып, оларны чылыг-чымчаа-биле хүлээп алган. Иисус көөрге, олар «кадарчызы чок хойларга дөмей болган». Ынчангаш ол «оларны  кээргей» бергеш, «хөй чүвеге өөредип эгелээн». Эскерип көрүңер даан, каш борбак чүүлге эвес, а хөй чүвеге! (Мк. 6:31—34; Лк. 9:10, 11).

7, 8. Чыышка бир кижиге дуза херек апаарга, сагыш човангыр удуртукчулар Иисусту канчаар өттүнүп турар?

⁷ Хуралдың удуртукчулары Иисусту канчаар өттүнүп турар? Эргим удуртукчу акылар, бис дээш хайыра чок ажылдап, күжүңерни үндүрүп турарыңар дээш, улуу-биле өөрүп четтирер-дир бис! Силерниң ха-дуңма дээш кылып чоруур ажылдарыңарның хөй кезиин билбес бис. Чижээ, акывыска азы угбавыска дүрген эмчи дузазы херек апаарга, эмнелгелер-биле харылзажыр комитеттиң удуртукчулары, оларга дузалаар дээш, шупту ажыл-херээн кааптарлар. Колдуунда ындыг байдалдар дүн ортузунда болгулаар. Ынчалза-даа сагыш човангыр удуртукчуларывыс болгаш ооң өг-бүлелери берге байдалга таварышкан ха-дуңмазын кээргеп, оларның эрге-ажыын бодунуундан бедик салып турар.

⁸ Оон ыңай удуртукчулар тудуг проектилеринге киржип, бойдус халавындан когараан улуска дузаны кадып турар. Чыыжыңарның удуртукчулары улусту өөредип, оларның сагыш-сеткилин өөртүп, деткиир дээш кайы хире үени үндүрүп турарын боданган силер бе? Ол дээш удуртукчу бүрүзүнге база ооң чоок улузунга өөрүп четтиргенивисти илередиксээр-дир бис. Иегова ол акыларывыстың бодун хайыралавас хөөнүн шаңназын! Удуртукчулар (бис шуптувус база) хүлээлгелеринге шын хамаарылгалыг боор ужурлуг. Ол акылар кадайынче болгаш ажы-төлүнче үндүрер үезин чыыштың ажыл-херээнче үндүрбес ужурлуг.

9. Филипчилерге 2:4, 5-тен алырга, христиан кижи бүрүзү канчаар боданыр ужурлуг?

⁹ Номчуптуңар: Филипчилерге 2:4, 5. Удуртукчу эвес-даа болзувусса, Иисусту өттүнүп, өскелерниң эрге-ажыын бодаар ужурлуг бис. Библияда Иисусту «чалчаның бүдүжүн» хүлээп алган дээн (Флп. 2:7). Ооң утказы кандыгыл? Ажылынга кызымак кул азы чалча дээргизиниң сеткилинге кирер дээш, аргаларны дилээр боор. Бис — Иегованың кулдары база акы-угбаларның чалчалары-дыр бис. Ынчангаш оларга бараан болуп, сеткилин өөртүр дээш, хөйнү кылыксаар бис. Ону канчаар кылып болур бис?

10. Бодувуска кандыг айтырыгларны салып болур бис?

¹⁰ Бодуңарны хынаңар. Мындыг айтырыгларны бодуңардан салыңар: «Өскелер дээш бир-ле чүүлден ойталаарынга белен мен бе? Улуг назылыг акывыстың бажыңынче баарын азы угбавысты чыыштарже чедирерин дилээр болза, ону кылырынга белен мен бе? Шуулган болур черни аштап-арыглаарынга азы Хурал залынга бир-ле чүүлдү септээринге күзелдии-биле дузалап турар мен бе?» Өскелерге үевисти болгаш күжүвүстү үндүрерин Иегова дилеп, ону күүседиривисти негээр эргелиг. Чүге дизе бис Ооң бараалгакчылары апаарының мурнунда чуртталгавысты Аңаа бараалгаткан болгай бис. Орнун манавайн, өске улус дээш сагыш човаар болзувусса, Иегова аажок өөрүп турар. А кажан бодувусту хынап тургаш, кошкак талаларывысты эскерип каан болзувусса, канчаар?

11. Өскелер дээш бодун хайыралавас күзелди сайзырадырынга, мөргүл канчаар дузалаар?

¹¹ Иеговага сеткилиңерден мөргүңер. Чижээ, кошкак талаларыңарны билип кааш, ынча дыка өскерлир күзелиңер чок болган дижик. Ындыг байдалда Иеговадан дузаны дилеп, сеткилиңерден мөргүңер. Аңаа чажырбайн, чүнү миннип турарыңарны чугаалап, өскерлиринче «чүткүүрүн-даа, ону күүседирин-даа боттандырып» бээрин дилеңер (Флп. 2:13).

12. Сугга суктурган аныяк эр дуңмаларывыс чыышка кандыг дузаны кадып болур?

¹² Сугга суктуруп алган аныяк эр дуңмавыс болзуңза, өске акы-угбаларга дузалажыр күзелди сеңээ оттурар кылдыр, Иеговадан диле. Чамдык чурттарда хуралдың дузалакчылары, удуртукчуларга бодаарга, эвээш база оларның хөй кезии аныяк эвес. Оон аңгыда, Иегованың организациязынга хөй улус катчып кээп турар болганда, сагыш човангыр аныяк дузалакчы акылар херек. Чыышка кандыг-даа ажылды кылырынга белен боор болзуңза, аас-кежикти миннир сен. Чүге дээрге шак ынчаар Иегованы өөртүп, эки ат сураглыг бооп, өскелерге дузалажып турарыңдан өөрүшкүнү миннир сен.

13, 14. Акы-угбаларга ажыл-херээвис-биле канчаар дузалажып болур бис? (Журналдың даштында чурукту көрүңер.)

¹³ Кичээнгейлиг бооп, өскелерниң хереглелдерин эскериңер. Б. э. 61 чылда Павел элчин Иудеяда христианнарга: «Буян тарыырын, араңарда сырый харылзаалыг боорун утпаңар, чүге дээрге ындыг өргүлдер Бурганның сеткилинге кирер» — деп бижээн (Евр. 13:16). Ооң сүмези өй шаанда болган! Чүге дизе ооң чагаазын алган христианнар каш-ла чыл болганда, бажыңнарын, ажылын, Бурганга бүзүревес төрелдерин каггаш, дагларже дезер ужурга таварышкан (Мф. 24:16). Оларга чаа черге баргаш, бот-боттарынга дузалажыры эргежок чугула турган. Берге үелерни манавайн, Павелдиң өскелер-биле үлежиңер дээн сүмезин ажыглап эгелээн  христианнарга бөдүүн амыдыралга чаңчыгып алыры белен болган.

¹⁴ Акы-угбалар дуза хереглеп турарын чамдыкта чугаалавас боор. Бир акывыстың кадайы чок апарган дижик. Аңаа аъш-чем кылырынга, машина-биле аай-дедир чедиреринге, бажың-балгат аштаарынга азы оон өске чүүлдерге дуза херек бе? Улуска аар чүък апаар мен деп бодааш, ол дузаны дилевес чадавас. Ынчалза-даа боттарывыс бирги базымны кылып, аңаа дузаны кадарын сүмелээр болзувусса, ол аажок өөрүп четтирер. Шупту чүве чоорту анаа апаар азы берге байдалда кижи боду бисче долгапкаш, дузаны дилээр деп бодавас болзувусса эки. «Мен ооң орнунга турган болзумза, меңээ кандыг дуза херек?» деп бодуңардан айтырыңар.

15. Бодун хайыралавас кижи кандыг боор ужурлуг?

¹⁵ Дузааргак болгаш чазык болуңар. Силерниң чыыжыңарда дузаны кезээде кадып кээр акы-угбалар бар чадавас. Кижи ындыг улустан дуза дилээринден бичии-даа эпчоксунмас, чүге дээрге олар ону бужурганмайн, күзелдии-биле кылыр. Оларга кижи үргүлчү идегеп болур. 45 харлыг Алан дээр хуралдың удуртукчузу өскелерге дузааргак, чазык болурун кызып чоруур. Ол Иисустуң үлегериниң дугайында бодангаш, мындыг түңнелге келген: «Иисус дыка чай чок турган, ынчалза-даа шупту улус, безин чаш ажы-төл болгаш улуг назылыг кижилер, олче чүткүп, оон дуза дилээринден эпчоксунмас турган. Оларга Иисус сагыш човангыр эжи турган. Мен база Иисусту өттүнүп, улус менден эпчоксунмайн, дузаны дилеп болур кылдыр, чылыг-чымчак, сагыш човангыр кижи болуксап турар мен».

16. Ырлар 118:59, 60-да дүрүм Иисустуң үлегерин чедиишкинниг эдереринге канчаар дузалаар?

¹⁶ Амгы үеде Иисустуң үлегерин тергиини-биле  эдерип шыдавас бис (Иак. 3:2). Ынчалза-даа муңгараан ажыы чок. Чурукчулар школазының өөреникчизи база доп-дораан тулган дээн чурукчу апарбас. Бир эвес ол бодунуң частырыгларынга өөренип, өндүр улуг чурукчуларны өттүнер болза, ол мергежилин чоорту сайзырадып аар. Бистиң дугайывыста база ынча деп болур. Хууда Библияны шинчилээш, билип алган чүүлүвүстү ажыглап, частырыгларывысты эдерин кызар болзувусса, Иисустуң биске арттырган үлегерин чедиишкинниг эдерип шыдаар бис. (Номчуптуңар: Ырлар 118:59, 60.)

17, 18. Иисустуң бодун хайыралавас хөөнүн чүге өттүнер болза эки?

¹⁷ Бодувусту хайыралавас болзувусса, өскелер бисти өттүнер боор. Хуралдың Тим дээр удуртукчузу мынча дээн: «Бистиң чыыжывыста элээн каш дуңмавыстың бүзүрели быжыгып кээрге, оларны хуралдың дузалакчылары кылдыр томуйлап каан. Оларның чамдыызы көңгүс аныяк. Акы-угбаларның бодун хайыралавас үлегери оларга дузалаан. Ол хып дээн аныяк эрлер — өскелерниң сонуургалдарын бодунуундан бедик салыр, ажылгыр-кежээ бараалгакчылар-дыр. Ынчангаш удуртукчулар оларны аажок үнелеп турар».

¹⁸ Бо каржы делегейде улус чүгле бодун бодаар, а Иегованың Херечилери олардан оранчок ылгалып турар. Иисустуң бодун хайыралавас үлегерин магадап, өттүнүксеп чоруур бис. Ооң арттырган изин кара олчаан изээри болдунмас, ынчалза-даа ону шыдаар шаавыс-биле кылыр дээш кызып чоруур бис (1 Пет. 2:21). Иисустуң өскелер дээш бир-ле чүүлден ойталаарынга беленин өттүнеривиске, Иегова бис дээш чоргаарланып турар. А ону миннири — улуг аас-кежик-тир!