1. ¿Kʼusitik lek tspasik li steklumal Jeovae?

 LI VIVLIAE ta voʼne xa onoʼox yaloj ti chlokʼ ta yoʼonton stukik chtunik ta stojolal Jeova li steklumal ti jaʼ chbeiltasatik batel yuʼun li Xnichʼone (Sal. 110:3). Li albil kʼop taje yakal chkʼot ta pasel li avie. Yuʼun li yajtuneltak Diose ta jujun jabil ta smiyonal xa noʼox ora chcholik mantal ta sjunul yoʼontonik xchiʼuk muʼyuk tskʼan stojolik. Jech xtok, chchʼakbeik yorail sventa skoltaik li yermanotakike, tspatbeik yoʼonton xchiʼuk tskoltaik ta mantal. Li moletik ta tsobobbail xchiʼuk li siervo ministerialetik eke jal chchʼakbeik yorail sventa xchapan li sparteik ta tsobajele, kʼalal chetʼesik junuk mantal xchiʼuk kʼalal chbat spatbeik yoʼonton li ermanoetike. ¿Kʼusi chtijbat yoʼontonik ta spasel taje? Jaʼ ta skoj ti skʼanojik Jeova xchiʼuk li xchiʼilike (Mat. 22:37-39).

2. Jech kʼuchaʼal chal Romanos 15:1 kʼalal ta 3, ¿kʼusi xuʼ jchanbetik li Jesuse?

² Li Jesuse jaʼ mas tsots skʼoplal laj yil li kʼusitik chtun yuʼun yantike, maʼuk li kʼusi tskʼan stuke. Li yajtsʼaklomutik Kristoe chkakʼtik persa ti jechuk jpastik eke (kʼelo Romanos 15:1-3). Mi jech ta jpastike, lek kʼusi chkʼot ta pasel. Xi laj yal li Jesuse: «Jaʼ mas xmuyubaj li buchʼu chakʼe, jaʼ mu sta li buchʼu chichʼe» (Ech. 20:35).

3. ¿Kʼusi ta jkʼeltik li ta xchanobil liʼe?

³ Li ta xchanobil liʼe, ta jkʼeltik kʼusi la spas ta stojolal yantik li Jesuse xchiʼuk kʼuxi xuʼ jech jpastik ek. Jech  xtok, ta jkʼeltik kʼuxi xuʼ xlokʼ ta koʼontontik skoltael li yantike.

4. ¿Kʼuxi laj yakʼ ta ilel Jesus ti jaʼ mas tsots skʼoplal chil li kʼusi chtun yuʼun yantike?

⁴ Li Jesuse la skolta yantik akʼo mi lubem tajek. Jvules ta joltik kʼusi la spas kʼalal bat kʼelatuk yuʼun epal krixchanoetik li ta vits ti te van nopol xil Kapernaume. Lubem van tajek ta skoj ti sjunul akʼobal la spas orasione. Pe kʼalal laj yil li krixchanoetike, kʼuxubaj ta yoʼonton li buchʼutik abol sbaike xchiʼuk li buchʼutik ipike. Maʼuk noʼox la xpoxtaan, yuʼun laj yal xtok li mantaletik ti chkʼot tajek ta oʼontonale: ti jaʼ li Mantaletik ta Vitse (Luk. 6:12-20).

5. ¿Kʼuxi chchanbeik stalelal Jesus li joliletik ta utsʼ alalil kʼalal lubemik tajeke?

⁵ ¿Kʼuxi chchanbeik stalelal Jesus li joliletik ta utsʼ alalile? Jnopbetik skʼoplal jun totil ti lubem tajek chkʼot ta sna ta skoj li yabtele. Pe li vaʼ akʼobale, jaʼo tspasik li yichʼel ta mukʼ Jeova ta yutsʼ yalalike. Yoʼontonuk xa ti yanuk to kʼakʼal spasike, pe tskʼanbe Jeova ti akʼo x˗akʼbat yipale. Chtakʼbat s˗orasion yuʼun li Jeovae, vaʼun jmoj chchanunajik xchiʼuk yutsʼ yalal jech kʼuchaʼal nopem xaʼiik jujun xemanae. Kʼalal jech tspase, te chakʼ venta xnichʼnab ti jaʼ mas tsots skʼoplal chaʼiik mantal li stot smeʼike.

6. Albo junuk skʼelobil ti chakʼ ta ilel ti jaʼ mas tsots skʼoplal laj yil Jesus ti skolta li yantike.

⁶ Li Jesuse la xchʼak skʼakʼal sventa xchiʼin li yantike. Jnopbetik skʼoplal liʼe: kʼalal laj yaʼi ti laj yichʼ milel li Juan J˗akʼ˗ichʼvoʼ ti jaʼ yamigoe, laj yat van tajek yoʼonton. Xi chal li Vivliae: «Kʼalal laj yaʼi Jesus taje, muy batel ta varko, nom bu bat sventa stuk oy» (Mat. 14:10-13). Oy lek srasonal ti tskʼan ti stuk bu oye. Junantik krixchanoetike tskʼan stuk bu oyik sventa xokʼitaik li buchʼu cham yuʼunike. Pe kʼalal kʼot Jesus ti bu tskʼan ox stuk oye, te xa ox malabil yuʼun epal  krixchanoetike. ¿Kʼusi la spas un? Jaʼ la snop li kʼusi chtun yuʼun li krixchanoetik taje xchiʼuk «kʼuxubaj ta yoʼonton». Laj yakʼ venta ti chtun xa noʼox yuʼunik koltael ta mantale xchiʼuk ta ora noʼox la skoltaan. Vaʼun, «ep kʼusitik lik yakʼbe xchan» (Mar. 6:31-34; Luk. 9:10, 11).

7, 8. ¿Kʼuxi chchanbeik stalelal Jesus li moletik kʼalal oy buchʼu chtun yuʼun koltaele? Albo junuk skʼelobil.

⁷ ¿Kʼuxi chchanbeik stalelal Jesus li moletike? Ta jtojtik tajek ta vokol skotol li kʼusi tspasik ta sjunul yoʼontonik li moletik ta jtojolaltike. Bakʼintike, mu xkakʼtik venta skotol li kʼusi tspasik ta jtojolaltike. Jech kʼuchaʼal liʼe, kʼalal oy buchʼu ch˗ipaj ta anile, li Komite ti Tsbeiltasvan batel ta Ospitaletike tskoltaik ta anil li ermanoetike. Bakʼintike, ta oʼlol akʼobal jech tspasik. Ta skoj ti kʼux ta yoʼonton yermanotakike, li moletik xchiʼuk li yutsʼ yalalike jaʼ mas tsots skʼoplal chilik ti lekuk oy li yantike.

⁸ Li moletik ta tsobobbaile tskolta sbaik svaʼanel Salonetik sventa Tsobobbail, yan naetik xchiʼuk tskoltaik li ermanoetik ti chil svokolike. Pe maʼuk noʼox, yuʼun chchanubtasik xtok li ermanoetike, tskoltaik xchiʼuk tspatbeik yoʼontonik. Staik˗o ti jkʼupil kʼoptatik xchiʼuk li yutsʼ yalalike. Ta jkʼantik ti x˗akʼbat yipalik yuʼun Jeova ta skoj li kʼusitik tspasike. Pe skʼan me mu jaʼuk xbat tajek ta yoʼontonik skʼelel li kʼusi sbainojik ta mantale ti jaʼ muʼyuk xa tstukʼulan li yutsʼ yalalike. Taje jaʼ jech skʼan spasik skotol li yajtsʼaklomtak Kristoe.

9. Jech kʼuchaʼal chal Filipenses 2:4 xchiʼuk 5, ¿kʼusi skʼan x˗ayan ta koʼontontik spasel jkotoltik?

⁹ (Kʼelo Filipenses 2:4, 5). Jkotoltik xuʼ jchanbetik stalelal Jesus akʼo mi maʼuk molutik ta tsobobbail. Li Vivliae chal ti «kʼot jech kʼuchaʼal jun mosoil» li Jesuse (Filip. 2:7). ¿Kʼusi chakʼ jchantik taje? Li jun lekil mosoil o jun lekil jtunele tskʼel kʼuxi xuʼ junuk yoʼonton yuʼun li yajvale. Ta skoj ti jaʼutik smoso Jeova xchiʼuk ti chijtun ta stojolal li kermanotaktike, ta jkʼantik ti oyuk to kʼusi mas jpastik ta stojolal li Jdiostik xchiʼuk ta stojolal li kermanotaktike. Jkʼeltik to batel kʼuxi xuʼ jpastik.

10. ¿Kʼusi skʼan jnopbetik skʼoplal ta jujuntal?

¹⁰ Kʼelo ti kʼu yelan atalelale. Xiuk xanope: «¿Mi ta sjunul koʼonton oy kʼusi chkikta spasel sventa jkolta li yantike? ¿Kʼu yelan chkaʼi jba mi la skʼanbeikun ti akʼo xbat jvulaʼan junuk ermano ti oy xa sjabilale o ti xkikʼ batel ta tsobajeletik junuk ermana ti oy xa sjabilale? ¿Mi chkal ta anil ti ta jkolta jba ta xchʼubael ti bu ch˗echʼ junuk asambleae o ti lekuk noʼox oy li salone?». Kʼalal laj kakʼ jkuxlejaltik ta stojolal Jeovae, laj kalbetik ta jamal ti ta jtunestik li kʼusitik oy kuʼuntik sventa xijtun ta stojolale. Taje te smakojbe skʼoplal li jkʼakʼaltike xchiʼuk li kʼusitik x˗ayan kuʼuntike. Jaʼ yuʼun, xmuyubaj kuʼuntik kʼalal chil ti ta jtunestik li kʼusitik oy kuʼuntik sventa jkoltatik˗o li yantike. Pe ¿kʼusi xuʼ jpastik mi oy to bu skʼan xlekub jtalelaltik chkiltike?

11. ¿Kʼuxi xuʼ skoltautik li orasion sventa x˗ayan ta koʼontontik skoltael li yantike?

¹¹ Kʼopono Jeova ta sjunul avoʼonton. Mi laj avakʼ venta ti skʼan xajel atalelale, pe ti muʼyuk ta avoʼonton spasele, kʼopono Jeova ta sjunul avoʼonton. Albo ta jamal ti kʼu yelan chavaʼi abae xchiʼuk kʼanbo ti oyuk ta avoʼonton spasele xchiʼuk ti spasuk avuʼune (Filip. 2:13).

12. ¿Kʼuxi xuʼ skolta sbaik ta s˗organisasion Jeova li keremetik ti yichʼojik xa voʼe?

¹² ¿Mi jaʼot jun kerem ti avichʼoj xa voʼe? Mi jeche, kʼanbo Jeova ti akʼo stikʼ ta avoʼonton ti oyuk kʼusi mas xapas ta stojolal li ermanoetik ta tsobobbaile. Ta junantik lumetike, jaʼ mas ep li moletik ta tsobobbaile, jaʼ mu sta li siervo ministerialetike. Jutuk mu skotoluk li siervo ministerialetik taje oy xa sjabilalik. Ta skoj ti yantik xchʼi li s˗organisasion Jeovae, skʼan mas ermanoetik ti keremik to sventa skoltaik li moletik ta tsobobbail yoʼ xchabiik li steklumal Jeovae. Chamuyubaj mi lokʼ ta avoʼonton chakoltavan ti bu chtun mas koltaele. ¿Kʼu yuʼun? Yuʼun chmuyubaj avuʼun li Jeovae, lek chbat akʼoplal xchiʼuk chamuyubaj ti chakolta li yantike.

13, 14. ¿Kʼusi xuʼ jpastik sventa jkoltatik li kermanotaktike? (Kʼelo li lokʼol ta pajina 1).

¹³ Teuk noʼox me asat li kʼusitik chtun yuʼun yantike. Li jtakbol Pabloe xi laj yalbe batel li ermanoetik ta Judeae: «Mu me xchʼay ta ajolik spasel li kʼusi leke xchiʼuk ti xavakʼbeik yantik li kʼusi oy avuʼunike, yuʼun lek tajek chil Dios li milbil matanaletik taje» (Ebr. 13:16). ¡Toj jtunel li kʼusi albatike! Yuʼun kʼalal muʼyuk toʼox jal laj yichʼik akʼbel li karta taje, li ermanoetike laj yikta snaik, spʼolmalik xchiʼuk li yutsʼ yalalik ti maʼukik yajtsʼaklom Kristoe. Vaʼun, jatavik batel ta vitstik (Mat. 24:16). Jaʼ yuʼun,  toj tsots skʼoplal ti skolta sbaik ta jujuntale. Mi jech xa onoʼox spasojik talel kʼuchaʼal albatik yuʼun Pabloe, mas kʼun chaʼiik ti jech spasik ti bu kʼotik ta nakleje.

¹⁴ Mu onoʼox skotoluk velta chalbutik li kʼusi chtun yuʼunik li kermanotaktike. Jnoptik noʼox ti oy jun ermano ti cham yajnile. ¿Mi skʼan van koltael ta spasel li sveʼele, li kʼusitik skʼan pasel ta snae o mi skʼan van skarroal kʼalal oy bu chbate? Mu van skʼan xal ta skoj ti mu skʼan xakʼbe yabtel li ermanoetike. Pe tstoj van tajek ta vokol mi la jakʼbetik kʼusi xuʼ jkoltatik˗oe. Mu jnoptik ti oy buchʼu tskoltae o ti chalbutik skotol velta li kʼusi chtun yuʼune. Xiuk jnoptike: «Ti jechuk yakal jnuptane, ¿kʼusi van ta jkʼan ti akʼo skoltaikun˗oe?».

15. ¿Kʼusi skʼan jpastik mi oy ta koʼontontik skoltael li yantike?

¹⁵ Xatakʼuk kʼoponel. Li ta jtsobobbailtike, oy onoʼox ermanoetik ti ta sjunul yoʼonton tskoltaik li yantike. Muʼyuk tsnopik ti jaʼ noʼox chkakʼbetik yabtelike. Jnaʼojtik ti xuʼ jkʼanbetik koltaele xchiʼuk ta jkʼantik ti jechuk jtalelaltik eke. Jun mol ta tsobobbail ti 45 sjabilal ti Alan sbie yakʼoj persa ti stakʼuk noʼox kʼoponele. Kʼalal tsnopbe skʼoplal li kʼusi la spas Jesuse, xi chale: «Toj ep noʼox kʼusi sbainoj spasel li Jesuse. Akʼo mi jech, li krixchanoetike tskʼanik ti te noʼox xchiʼinojike xchiʼuk muʼyuk chiʼik skʼanbel koltael. Snaʼojik ti kʼanbilike. Li kʼusi oy tajek ta koʼontone jaʼ ti jechuk jtalelal kʼuchaʼal li Jesuse, ti jtakʼuk kʼoponel xilik li yantike, ti lek koʼontone xchiʼuk ti te jsat li kʼusi chtun yuʼunike».

16. ¿Kʼuxi tskoltautik li Salmo 119:59 xchiʼuk 60 sventa jchanbetik stalelal li Jesuse?

 ¹⁶ Mu me xijchibajutik mi mu spas tajek kuʼuntik jech kʼuchaʼal la spas Jesuse (Sant. 3:2). Li jun jchanune mu onoʼox jech tajek tspas kʼuchaʼal li smaestroe. Pe mi muʼyuk xa tspas li kʼusi muʼyuk lek bat ta pasel yuʼun xchiʼuk mi chakʼ persa xchanel kʼuchaʼal li smaestroe, ta kʼunkʼun me chlekub batel li kʼusi tspase. Jaʼ noʼox jech ek, mi chkakʼ ta jkuxlejaltik li kʼusi ta jchantik ta Vivliae xchiʼuk mi chkakʼtik persa ta jel li jtaleltike, ta me spas kuʼuntik kʼuchaʼal la spas Jesuse (kʼelo Salmo 119:59, 60).

17, 18. ¿Kʼusi sbalil chichʼ tael mi ta jkoltatik yantik jech kʼuchaʼal la spas Jesuse?

¹⁷ Kʼalal chlokʼ ta koʼontontik skoltael li yantike, chchanik li yantik eke. Jun mol ta tsobobbail ti Tim sbie xi chale: «Li ta jtsobobbaile, oy ermanoetik ti keremik to ti chʼiemik xa ta mantale xchiʼuk ti jaʼik xa siervo ministeriale. Jtos kʼusi koltaatike jaʼ ti laj yakʼik venta ti toj lek snaʼ xkoltavanik li yantike xchiʼuk jaʼ jech la spasik ek. Li slekil talelalike staojbe tajek sbalil li tsobobbaile xchiʼuk ep tajek sbalil chaʼiik li moletik ta tsobobbaile».

¹⁸ Epal krixchanoetik avi kʼakʼale jaʼ noʼox tspasik li kʼusi tskʼan stukike. Pe li yajtunelutik Jeovae maʼuk jech jtalelaltik. Labal sba chkiltik ti kʼu yelan la skolta yantik li Jesuse, jaʼ yuʼun ta jkʼan ta jchanbetik stalelal. Jnaʼojtik ti mu jechuk tajek chbat ta pasel kuʼuntik kʼuchaʼal la spas Jesuse, pe xuʼ jtsʼaklibetik «lek li yav yoke» (1 Ped. 2:21). Mi chkakʼtik persa ta jkoltatik yantik jech kʼuchaʼal la spas Jesuse, chijmuyubaj, yuʼun jnaʼojtik ti jaʼ ta jpastik li kʼusi lek chil Jeovae.