1. Кыӵе мылкыдын вын-агайёс но сузэр-апайёс Иеговалы ужало-тыршо?

 БИБЛИЫН трос сю аръёс талэсь азьло гожтэмын вал, Инмарлэн калыкез Иисус Христослэн кивалтэмез улсын «дась луыса» Иеговалы ужалоз-тыршоз шуыса (Пс. 109:3). Та азьпалзэ ивортонлэсь быдэсмемзэ ми ас синъёсынымы адӟиськомы. Инмарлэн ужась-тыршисьёсыз котькуд ар туж трос дырзэс висъяло, тодытон уже пыриськон понна. Соос ас мылкыд каремзыя тодыто но со понна коньдон уг басьто. Озьы ик соос дась вын-агайёссылы но сузэр-апайёссылы ваньзэ кулэзэ сётыны, соосты буйгатыны но осконзэс юнматыны. Со сяна, вын-агайёс туж трос дырзэс висъяло, Инмарлэсь калыксэ дышетон но юнматон понна! Мар соослэсь мылкыдзэс ӝутэ? Яратон — Иеговаез но матысьёссэс яратон (Матф. 22:37—39).

2. Кыӵе адӟем карон возьматӥз милемлы Иисус? (Римъёслы 15:1—3).

² Иисус туж умой адӟем карон возьматӥз, кызьы нырысь ик мукетъёсызлы юрттыны тыршоно. Ми лэсьтӥськомы ваньзэ, мае быгатӥськомы, Иисуслэсь адӟем карон понна. (Лыдӟе Римъёслы 15:1—3.) Сыӵе улон трос  пайда вае. Ачиз Иисус вераз: «Басьтон сярысь, сётыны умойгес» (Ап. уж. 20:35).

3. Мае ми эскеромы та статьяын?

³ Та статьяысь ми тодомы, кызьы Иисус мукетъёслы юрттӥз но кызьы ми солэсь адӟем карыны быгатӥськомы. Озьы ик ми тодомы, мар милесьтым мылкыдмес ӝутоз мукетъёсызлы мар ке но карыны.

4. Вералэ учырез, кызьы Иисус ассэ жалятэк мукетъёсызлы юрттӥз.

⁴ Туж жадьыкуз но, Иисус ассэ ӧз жаля. Огпол Капернаум палась, вылды, одӥг гурезьлэн бамалаз Иисус доры трос калык лыктӥз. Со азьын Иисус уйбыт вӧсяськыса улӥз. Пуктэ син азяды, макем Иисус жадемын вал. Но солы калык жаль потӥз. Соин ик со соосты бурмытъяз но дышетӥз. Иисуслэн та гурезь йылын дышетонэз али но туж тодмо (Лука 6:12—20).

5. Кызьы жадем дыръязы но семьяослэн йыръёссы Иисуслэсь адӟем карыны быгато?

⁵ Кызьы семьяослэн йыръёссы Иисуслэсь адӟем карыны быгато. Тани тросэзлы тодмо учыр. Семьялэн йырыз лумбыт ужамез бере жадьыса мырдэм дораз бертэ. Та ӝытэ соос вераськизы вал семьяен йыбырттонзэс ортчытыны. Туж жадеменыз, солэн сое ортчытэмез уг поты ке но, со Иеговалы вӧсяське но солэсь кужым куре. Иегова солы ответ сётэ но, соос семьяен йыбырттонзэс ортчытыны быгато. Та ӝытэ нылпиоссы валазы: атайзы но анайзы понна Иеговаен кусыпъёссы самой дуноесь.

6. Вералэ, кызьы Иисус мукетъёсызлы дырзэ висъяз, кудзэ огназ ортчытыны малпаз вал.

⁶ Иисус мукетъёсызлы дырзэ ӧз жаля. Тани Иисуслэн улонысьтыз эшшо одӥг учыр. Со тодӥз, Иоанн Пылатӥсез йырзэ ӵогыса казнить каризы шуыса. Малпалэ гинэ, мар шӧдӥз Иисус. Эшезлэн кулэмез сярысь кылыса, со «калыктэм интые огназ кошкиз» (Матф. 14:10—13). Ми но озьы ик карысалмы, дыр. Но адямиос Иисуслы огназ кыльыны ӧз сётэ. Со калыктэм инты сярысь тодыса, соос Иисуслэсь но вазьгес отчы вуизы. Кызьы ассэ  возиз Иисус? Нырысь ик Иисус мукетъёсыз сярысь сюлмаськиз бере, со соосты лякытэн пумитаз. Соос шоры Иисус учкиз «возьмаськытэк кылем ыжъёс» шоры кадь. Иисуслы «соос жаль потӥзы» но, со «соосты трос дышетыса улӥз». Кык-куинь зэмлыкъёслы ӧз дышеты — трос дышетыса улӥз (Марк 6:31—34; Лука 9:10, 11).

7, 8. Вералэ, кызьы тӧроос Иисуслэсь адӟем каро, куке кенешысь кинлы ке но юрттэт кулэ.

⁷ Кызьы тӧроос Иисуслэсь адӟем каро. Дуно тӧроос, туж бадӟым тау тӥледлы, ми понна сомында лэсьтӥськоды шуыса! Вань тыршемдэс ми ум адӟиське. Кылсярысь, куке кыӵе ке вын-агайлы яке сузэр-апайлы шӧдтэк шорысь эмъюрттэт кулэ, эмъюртъёсын герӟаськонъя комитетысь тӧроос вань ужъёссэс кельто но со вын-агайёслы но сузэр-апайёслы юрттыны тыршо. Куддыръя сыӵе учыръёс уйшор уйин но кылдо. Но тӧроос, озьы ик соослэн семьяоссы но, вын-агайёсты но сузэр-апайёсты яратэменызы, асьсэлэсь ужъёссэс кельто но юрттыны тыршо.

⁸ Озьы ик тӧроос организацимылэн пӧртэм пуктӥськон ужъёсаз пырисько но инкуазь шимучыръёс бере юрттӥсько. Со сяна, соос трос дырзэс висъяло, вын-агайёсты но сузэр-апайёсты дышетон, юнматон но соослы юрттон понна. Котькуд тӧролы но солэн семьяезлы туж бадӟым тау шуэм потэ. Тыршемды понна Иегова тӥледыз бакель мед кароз! Ваньмылы милемлы, озьы ик тӧроослы но, та удысын зарни шорзэ шедьтыны кулэ. Тӧроос тырмыт дырзэс висъяны тыршо кенешлы но, семьязылы но.

9. Кыӵе мылкыдын улыны кулэ котькуд христиан мурт, Филиппыослы 2:4, 5 верамъя?

⁹ Лыдӟе Филиппыослы 2: 4, 5. Тӧроослы гинэ кулэ ӧвӧл, ми пӧлысь котькудӥзлы Иисуслэсь адӟем кароно но мукетъёсызлы юрттыны тыршоно. Библиын гожтэмын, Иисус «ляльчи кариськиз» шуыса (Флп. 2:7). Ойдолэ малпаськомы, мае возьмато та кылъёс. Вашкала дыръя ляльчи кузёезлы ярамон луыны тырше вал. Нош ми Иеговалэн ляльчиосыз луиськомы, озьы ик вын-агайёсмылы но сузэр-апайёсмылы ужаммы-тыршеммы потэ. Соку кызьы ми соос понна эшшо но тросгес карыны быгатӥськомы?

10. Кыӵе юанъёс вылын малпаськыны кулэ?

¹⁰ Асьтэды эскере. Малпаське: «Потэ-а мынам мукетъёсызлы юрттэме? Кылсярысь, дась-а мон арлыдо вын-агай доры ветлыны яке арлыдо сузэр-апаез машинаен кенешлэн пумиськоназ вайыны? Дась-а мон конгресс азьын яке со бере утялскыны? Яке Эксэйлык юртэз эскерон-тупатъян ужъёсы пыриськыны?» Иеговалэн потэ, ми вын-агайёсмылы но сузэр-апайёсмылы дырмес но кужыммес медам жалялэ шуыса. Малы ке шуоно, Иеговалэн ужась-тыршисьёсыз луыса, ми быдэсак асьмеды солы сӥзимы. Но тӥ валады ке, тӥледлы мае ке но тупатоно шуыса, мар тӥ карыны быгатӥськоды?

11. Малы, мукетъёсызлы юрттыны дась луон понна, вӧсяськыны кулэ?

¹¹ Иеговалы ӟырдыт вӧсяське. Шуом, тӥ валады, мае тӥледлы тупатыны кулэ. Но воштӥськыны мылкыдды туж ик ӧвӧл. Соку вань сюлмысьтыды вӧсяське Иеговалы. Ватытэк вералэ солы, воштӥськемды уг поты шуыса. Куре солэсь мылкыд но кужым (Флп. 2:13).

12. Кызьы пылатӥськем егит агайёс кенешлы юрттыны быгато?

¹² Тон пылатӥськем егит агай ке, Иеговалэсь мылкыд кур мукетъёсызлы юрттыны. Куд-ог шаеръёсын, тӧроосын ӵошатыса, кенешлы юрттӥсьёс ӧжытгес. Со сяна, соос пӧлысь тросэз арлыдоесь ини. Озьы ик Иеговалэн организацияз трос адямиос лыкто. Соин ик кулэ егит агайёс, кудъёсыз мукетъёсызлы юрттыны дась луысалзы. Кенешын котькыӵе ужез быдэстыны дась луид ке, тон шудо луод. Малы? Малы ке шуоно тон Иеговаез шумпоттод, вын-агайёс адӟозы, тынад мукетъёсызлы юрттэмед потэ шуыса, озьы ик ачид но шумпотод.

13, 14. Кызьы ми вын-агайёсмылы но сузэр-апайёсмылы уж вылын юрттыны быгатӥськомы? (Учке вылбамысь сурдэз.)

¹³ Адӟыны тырше, кинлы юрттэт кулэ. Асьме вакытысь 61-тӥ арын апостол Павел Иудеяын улӥсь христианъёслы гожтӥз: «Эн вунэтэ ӟеч уж лэсьтылыны, ог-огды сярысь сюлмаськыны, уго сыӵе курбонъёс Инмарлы ярамонэсь луо» (Евр. 13:16). Та визь-кенеш туж дырыз дыръя сётэмын вал! Малы ке шуоно, кӧня ке ар ортчыса гинэ, та христианъёс, коркаоссэс, ужзэс, оскисьтэм ӵыжы-выжыоссэс кельтыса, гурезьёсы пегӟоно луизы (Матф. 24:16). Выль интыын соос ог-огзылы юрттыны кулэ вал. Христианъёслы, кудъёсыз Павеллэн визь-кенешезлэсь соку ик кылзӥськизы но мукетъёсызлы юрттӥськыны тыршизы, секыт югдурлы дышыны капчигес вал.

¹⁴ Вын-агайёс но сузэр-апайёс котьку ик уг дӥсьто вераны, кыӵе соослы юрттэт  кулэ. Шуом, кыӵе ке агайлэн кышноез кулӥз. Кулэ-а солы юрттыны сиён пӧраны, машинаен кытчы ке ветлыны яке эшшо мар ке карыны? Оло нош, ачиз со юрттэт уз но куры, малы ке шуоно милемыз сюлмаськытэмез уз поты. Но со туж тау кароз, дыр, ми асьмеос солы юрттэтмес ӵектӥмы ке. Малпано ӧвӧл, ваньмыз тупалоз ай яке адями, кудӥз секыт югдуре сюриз, ачиз милемлы жингыртоз но юрттэт куроз шуыса. Юалэ асьтэлэсь: «Мон сыӵе югдуре сюрысал ке, кыӵе юрттэт мыным кулэ луысал?»

15. Кыӵе луыны кулэ адями, кудӥз мукетъёсызлы котьку но юрттыны дась?

¹⁵ Мукетъёсызлы тӥледлы вазиськыны капчи мед луоз. Тӥляд кенешады но вань, дыр, сыӵе вын-агайёс но сузэр-апайёс, кудъёсыз котьку но вань сюлмысьтызы юрттыны дась. Соос вылэ котьку но оскиськыны луэ. Милям но потэ, дыр, мукетъёсыз ми сярысь озьы ик мед малпалозы шуыса. Алан нимо тӧро но, кудӥз 40 ареслэсь ӧжыт бадӟымгес, тырше, мукетъёсыз солы вазиськыны медаз кышкалэ шуыса. Иисуслэн примерез вылын малпаськыса, со вера: «Иисуслэн трос ужъёсыз вал. Озьы ке но нылпиос но, арлыдоос но ӧз кышкалэ солэсь юрттэт курыны. Иисус шоры соос учкизы эшсы шоры кадь. Мынам но потэ, мукетъёсыз мед тодозы, мыным вазиськыны капчи но мынам соослы юрттэме потэ шуыса».

16. Кызьы Псалтирь 118:59, 60 юрттоз милемлы Иисуслэсь адӟем карыны?

¹⁶ Али ми Иисуслэсь быдэсак адӟем карыны ум быгатӥське. Но киосмес лэзёно ӧвӧл (Иак. 3:2). Кылсярысь, суредаськыны дышетскись адями соку ик чебер суредаськыны уз быгаты, дыр. Но  со аслаз янгышъёсыз вылын но усто суредаськисьёслэсь дышетскиз ке, дыр ортчыса, чебер суредаськыны быгатоз. Озьы ик ми но Библиысь басьтэм тодон-валанмес улонамы пыртӥськомы ке но тупатскыны тыршиськомы ке, соку Иисуслэсь адӟем карыны быгатомы. (Лыдӟе Псалтирез 118:59, 60.)

17, 18. Кыӵе пайда вае Иисуслэсь адӟем карон?

¹⁷ Ми адямиослы юрттыны дась луимы ке, мукетъёсызлэн но сыӵе ик мылкыдзы ӝутскоз. Тани мар вераз Тим нимо тӧро: «Милям кенешамы вань кӧня ке егит агайёс, кудъёсыз кенешлы юрттӥсьёс луизы. Соос адӟизы, кызьы вын-агайёс но сузэр-апайёс мукетъёсызлы юрттыны дась. Соин ик соослэн но сыӵе ик мылкыдзы ӝутскиз. Та агайёс кенешмы понна туж трос лэсьто. Тӧроос соосты туж дунъяло».

¹⁸ Та лек дуннеын адямиос асьсэды гинэ яратыса уло. Нош Иеговалэн ужась-тыршисьёсыз сыӵеесь ӧвӧл. Ми тыршиськомы Иисуслэсь адӟем карыны но мукетъёсызлы юрттыны. Валамон, Иисуслэсь быдэсак адӟем карыны ми ум быгатӥське. Но ми тыршиськомы лэсьтыны ваньзэ, мае быгатӥськомы (1 Пётр 2:21). Иегова шумпотэ, куке ми мукетъёсызлы юрттыны тыршиськомы. Та милемлы бадӟым шумпотон вае!