1. Omamọ rẹ uruemu vọ yen a mrẹ vwẹ uvwre rẹ idibo ri Jihova?

 IKPE buebun re wanre, Baibol na mraro rọyen phiyotọ nẹ ihwo rẹ Ọghẹnẹ che “siobọ nẹ oma rẹ ayen ọphọphẹ” vwẹ ẹga ri Jihova vwo nene odjekẹ rẹ Ọmọ rọyen. (Une 110:3) Aroẹmrẹ yena ruẹgba nonẹna. Kukpe kukpe yen idibo ri Jihova vwọ ghwọrọ inọke iduduru vwẹ iruo rẹ aghwoghwo na. Ayen vwomakpahotọ ọphẹ, a hwosa kẹ aye-en. Ayen je vwẹ ukẹcha kẹ iniọvo rayen womarẹ ayen vwo phiuduphiyọ ayen awọ, je bọn esegbuyota rayen gan kpahen Jihova. Ekpako vẹ idibo rowian ghwọrọ inọke buebun vwo muegbe rẹ uyono je kọn brẹ iniọvo na ra ra bọn ayen gan. Die yen mu ayen vwo ruiruo nana eje? Ẹguọnọ vwọ kẹ Jihova kugbe irivẹ rayen.—Mat. 22:37-39.

2. Kirobọ re djisẹ rọyen vwẹ Rom 15:1-3, udje vọ yen Jesu phi phiyotọ?

² Jesu phi omamọ rẹ udje phiyotọ kpahen obo ra vwẹ ọdavwẹ rẹ ihwo efa vwọ kobaro kẹ ọ rẹ avwanre. Avwanre davwẹngba rẹ avwanre eje vwọ vwẹrokere. (Se Rom 15:1-3.) Ihwo re vwẹrokere cha mrẹ ebruba gbidiki. Jesu da ta: “Ẹrhovwo herọ kẹ ọkokẹ nọ ohwo ra kẹ.”—Iruo 20:35.

3. Die yen a cha fuẹrẹn vwẹ uyono nana?

³ Vwẹ uyono nana, a cha fuẹrẹn erọnvwọn evo rẹ Jesu ruru vwọ chọn ihwo efa uko, a je cha fuẹrẹn obo ra sa vwọ vwẹrokere udje rọyen. Ukuotọ rọyen, ka cha ta ota kpahen obo ra sa vwọ chọn ihwo efa uko kpobarophiyọ.

4. Mavọ yen Jesu vwọ vwẹ ọdavwẹ rẹ ihwo efa vwọ kobaro kẹ ọrọyen?

⁴ Jesu je tobọ chọn ihwo efa uko ọke rẹ oma vwo broku. Vwẹ ẹwẹn roro oborẹ Jesu ruru ọke rẹ ihwo buebun vwo bro rhe vwẹ asan rọ kẹrẹ ugbenu vwẹ Kepanọm. Jesu ghwọrọ ason na eje vwọ nẹrhovwo. Aphro herọ-ọ nẹ oma bruro ku, ẹkẹvuọvo ọke rọ vwọ mrẹ otu na, o de gbe arodọnvwẹ kẹ ivwiogbere vẹ ihwo re muọga rehẹ ohri rayen. Ọ dia o di sivwin ayen ọvo-o, ọ je ta ota rotu ro me kperusi vwẹ ikuegbe rẹ ihworakpọ; ọyehẹ Ota ri Jesu vwẹ enu Ugbenu.—Luk 6:12-20.

5. Mavọ yen igbuyovwin rẹ orua vwọ vwẹrokere udje rẹ omaevwoze ri Jesu ọke oma da ghwọrọ ayen?

⁵ Oborẹ igbuyovwin rẹ orua vwọ vwẹrokere Jesu. Vwẹ ẹwẹn roro udje nana: Oma bru ọgbuyovwin rẹ orua ọvo ku, ọke ro vwo nẹ iruo te uwevwin. Dede nẹ o hirharoku ọdavwini rọ vwọ kpare Ẹga rẹ Orua rẹ ovwọnvwọn rẹ ẹdẹ yena, ọ rẹ Jihova nẹ ọ kẹ ọyen ẹgba o se vwo ru ẹga rẹ orua na. Jihova kpahenphiyọ oyare rọyen, o de ru ẹga rẹ orua na kirobo ro ruo jovwo. Emọ na yono uyono ọghanghanre ọvo vwẹ ovwọnvwọn rẹ ẹdẹ yena, nẹ ẹga ri Jihova yen obo re ma ghanre vwọ kẹ ọsẹ vẹ oni rayen.

6. Djudje rẹ oborẹ Jesu vwọ reyọ ọke rọyen vwọ chọn ihwo efa uko.

⁶ Jesu ji vwo ọke kẹ ihwo efa dede nẹ ọ guọnọ ọke ro vwo rovwoma. Wọ sa vwẹ ẹwẹn roro oborẹ oma ru Jesu ro vwo nyo nẹ e hwe ugbeyan rọyen Jọn ro brẹ ihwo phiyame? O muẹro nẹ ọ darọ mamọ. Baibol na da ta: “Ọke ri Jesu vwo nyo [kpahen ughwu ri Jọn], ọ da ro okọ; o de sioma reyọ kpo evun rẹ aton.” (Mat. 14:10-13) Avwanre se vwo ẹruọ rẹ oboresorọ o vwo siomareyọ. Ihwo evo guọnọ vwere uvweri vwẹ odjahọn. Ẹkẹvuọvo, Jesu sa dia vwẹ odjahọ-ọn. Kidie otu buebun karerọ te asan na. Die yen Jesu ruru? O roro kpahen ọdavwẹ rẹ otu na, “aro rẹ ayen da dọn.” Jesu mrẹvughe nẹ ayen guọnọ ukẹcha vẹ uchebro rẹ Ota rẹ Ọghẹnẹ, ọtiọyena Jesu  da chọn ayen uko. Vwọrẹ uyota, “o de yono ayen emu buebu.”—Mak 6:31-34; Luk 9:10, 11.

7-8. Djudje ọvo ro dje oborẹ ekpako na vwọ vwẹrokere udje ri Jesu ọke rẹ ohwo da guọnọ ukẹcha vwẹ ukoko na.

⁷ Oborẹ ekpako na vwọ vwẹrokere Jesu. Owian rẹ ekpako na wian fikirẹ avwanre ghene da avwanre aro mamọ. Ọ dia owian eje rẹ ayen ruẹ yen iniọvo rẹ ukoko na riẹn kpaha-an. Kerẹ udje, emu ri kpregede ro shekpahen omakpokpọ da phia, iniọvo rehẹ Umẹ Rọvwẹrote Omaesivwo brokpakpa vwẹ ukẹcha kẹ iniọvo na. Ọke buebun, emu ri kpregede tiọyena phia vwẹ uherevie ason! Kidie nẹ ekpako na gbe arodọnvwẹ kẹ iniọvo rayen rehẹ ẹdia rẹ ukpokpogho na, te ayen te erua rayen ke vwẹ ọdavwẹ rẹ iniọvo na vwọ kobaro kẹ ọ rayen.

⁸ Ekpako ji vwobọ vwẹ iruo rẹ ebanbọn rẹ Ọguan Ruvie kugbe iruo rẹ ebanbọn efa, ọtiọyen ji te iruo rẹ ukẹcha. Ekpako na ghwọrọ ọke buebun vwo yono avwanre, bru avwanre uche ji biẹcha avwanre. Iniọvo nana vẹ eya rayen ghene guọnọ ujiri rẹ avwanre. Jihova che bruba kẹ ẹwẹn rẹ omaevwoze rayen dẹn! Vwọrẹ uyota, ofori nẹ ekpako vwo ẹro abavo kerẹ iniọvo ichekọ. Ofori nẹ ayen ghwọrọ ọke rayen eje phiyọ iruo rẹ ukoko na te ẹdia rẹ ayen me kpairoro vrẹ orua raye-en.

9. Vwo nene Filipae 2:4, 5, uruemu vọ yen ofori nẹ Inenikristi eje vwo?

⁹ Se Filipae 2:4, 5. Aphro herọ-ọ, ọ dia avwanre eje yen ekpako-o, ẹkẹvuọvo  avwanre eje sa vwẹrokere uruemu rẹ omaevwoze ri Jesu. Baibol na tare nẹ, Jesu “da reyọ oma rẹ odibo.” (Fil. 2:7) Roro kpahen obo re se yono vwo nẹ awọrota yena rhe. Ọviẹn yẹrẹ odibo re niri ghanghanre cha guọnọ uphẹn ro vwo ru obo re cha vwerhen onini rọyen oma. Kidie nẹ avwanre eviẹn ri Jihova, ji gbe odibo kẹ iniọvo na, avwanre vwo owenvwe re vwo ru obo re se ru kẹ Jihova vẹ iniọvo avwanre. Wo se ru ọtiọyen siẹrẹ wọ da fuẹrẹn owọẹjẹ ẹne nana.

10. Enọ vọ yen a sa nọ oma avwanre?

¹⁰ Fuẹrẹn uruemu wẹn. Nọ oma wẹn enọ kerẹ: ‘Me ghene guọnọ vwẹ ọke vẹ ẹgba mẹ vwọ chọn ihwo efa uko? Kerẹ udje, Die mi che ru siẹrẹ a da vuẹ vwẹ nẹ me kọn brẹ oniọvo ọshare rọ kpakore ra vwẹ asan ra da vwẹrote yẹrẹ mu oniọvo aye ọvo rọ kpakore kpo uyono? Mi vwo owenvwe me vwọ vwẹ ukẹcha phia siẹrẹ a da guọnọ ukẹcha re vwo ru orufon rẹ Ọguan Romẹvwa yẹrẹ Ọguan Ruvie?’ Oma vwerhen Jihova siẹrẹ a da reyọ ọke vẹ ekuakua rẹ avwanre vwọ kpahotọ ọphọphẹ, rere e se vwo ru obo re vwerhọn oma je chọn ihwo efa uko? O de fo nẹ e ru yovwinphiyọ, die yen e se ru?

11. Mavọ yen ẹrhovwo sa vwọ chọn avwanre uko vwo vwo owenvwe ra vwọ chọn ihwo efa uko?

¹¹ Nẹrhovwo rhe Jihova. Ọkiọvo wo niro nẹ ofori nẹ wo ru yovwinphiyọ vwẹ ẹdia evo, ẹkẹvuọvo wo vwo owenvwe na-a. Ọ da dia ọtiọyen, gba nẹrhovwo rhe Jihova. Ta uyota kẹ. Vuẹ kpahen oborẹ wo rorori, wọ je vuẹ nẹ ọ kẹ wẹ “owenvwe vẹ ẹgba wo vwo ruiruo.”—Fil. 2:13, NW.

12. Ukẹcha vọ yen ighene eshare ri bromaphiyame re sa vwọphia vwẹ ukoko na?

¹² Wọ da dia eghene ọshare ro bromaphiyame re, vuẹ Jihova nẹ ọ chọn wẹ uko vwo ru bunphiyọ vwẹ ukoko na. Vwẹ ẹkuotọ evo, ekpako bun vrẹ idibo rowian, jẹ buebun rẹ idibo rowian na dia ighene-e. Ukoko na vwọ rhuaphiyọ na, a guọnọ ukẹcha rẹ ighene rẹ eshare re cha chọn idibo ri Jihova uko. Wo de vwo owenvwe wọ vwọ ga vwẹ asan ra da guọnọ owẹ, oma cha vwerhen owẹ. Diesorọ? Kidie wo che jiri Jihova, iniọvo na je cha mrẹvughe nẹ wọ guọnọ chọn ayen uko, oma je cha vwerhen owẹ nẹ wọ vwẹ ukẹcha kẹ ihwo efa.

13-14. Die yen avwanre se ru ra sa vwọ chọn iniọvo rẹ avwanre uko? (Ni uhoho rọhẹ opharo ọbe na.)

¹³ Vwo oniso rẹ ukẹcha rẹ ihwo efa guọnọre. Ọyinkọn Pọl vuẹ ihwo ri Hibru: “Wa rua uvwerhi rẹ emu esiri eruo-o kugbe rere wọ ghare obo ri rhe we kẹ ihwo, kidie okẹ ọtiọye na ri je Ọghẹnẹ.” (Hib. 13:16) Ọyena ghini omamọ rẹ uchebro! Ileta na vwo te ayen obọ nu, o kriri-i Inenikristi rehẹ Judia da yanjẹ iwevwin, eki kugbe ihwo rẹ orua rayen re ga Jihova-a vwo je “djẹ kpo enu rẹ ugbenu.” (Mat. 24:16) Vwẹ ọke yena, o muẹro nẹ ọyen obo re ghanre ayen vwọ chọn ohwohwo uko. Ọ da dianẹ ayen vwo uruemu rẹ ayen vwọ chọn ohwohwo uko tavwen Pọl ki si ileta nana rhe ayen, ọ rha lọhọ rẹ ayen vwo yerin akpọ ri kekpe.

¹⁴ Ọ dia ọkieje yen iniọvo na cha vwọ vuẹ avwanre kpahen oborẹ ayen ghene guọnọ-ọ. Kerẹ udje, aye rẹ oniọvo ọshare ọvo ghwuru. Oniọvo ọshare na cha  guọnọ ukẹcha rẹ emuọre, omaẹfa yẹrẹ iruo rẹ uwevwin? Ọkiọvo ọ cha nokpẹn rẹ ukẹcha-a, kidie ọ guọnọ kpokpo ihwo efa-a. Ẹkẹvuọvo, oma cha vwerhọn siẹrẹ e de vwo oniso rọyen je chọn uko. Ofori nẹ e roro nẹ ohwo ọfa cha chọn uko yẹrẹ ọ cha vuẹ avwanre siẹrẹ ọ da guọnọ ukẹcha-a. Nọ oma wẹn, ‘Ọ da dianẹ mẹ yehẹ ẹdia tiọyen, ukẹcha vọ yen mi che rhẹro rọyen?’

15. Die yen e se ru a vwọ chọn ihwo efa uko?

¹⁵ Dia ohwo ra sa rua. O muẹro nẹ wo vughe iniọvo rehẹ ukoko na ri muegbe re vwọ chọn ihwo efa uko. Ayen nama no nẹ avwanre kpokpo aye-en. Avwanre riẹnre nẹ a sa vwẹroso ayen ọke ra da guọnọ ukẹcha, ofori nẹ a vwẹrokere uruemu rayen! Ọkpako ọvo re se Alan, ro te ẹgbukpe 45 re, guọnọ dia ohwo ra sa rua. O vwo roro kpahen udje ri Jesu, Alan da ta: “Dede nẹ Jesu vwo owian buebun ro ruẹ, jẹ imitete vẹ ihwo re ghwanrire se sikẹrẹ je guọnọ ukẹcha vwo mie. Ayen riẹnre nẹ ọyen ohwo ro ghini vwo ọdavwẹ rayen. Me ghene guọnọ vwẹrokere uruemu ri Jesu, a je riẹn vwẹ phiyọ ohwo ra sa rua, ro ji vwo ọdavwẹ rẹ ihwo.”

16. Mavọ yen uchebro rọhẹ Une Rẹ Ejiro 119:59, 60 sa vwọ chọn avwanre uko vwo nene udje ri Jesu kpẹkpẹkpẹ?

¹⁶ E jẹ ofu dje avwanre siẹrẹ a rha sa vwẹrokere udje ri Jesu gbagba-a. (Jems 3:2) Ọmọ ro yono iruo cha sa riẹn iruo ru gbagba kerẹ onini rọye-en. Ẹkẹvuọvo o de yono vwo nẹ echobọ rọyen je vwẹrokere udje onini rọyen, ọ cha nẹrhẹ ọ riẹn iruo na phiyọ. Ọtiọyen ọ je hepha, avwanre de ru nene oborẹ avwanre yono vwo nẹ uyono ri Baibol  rẹ avwanre je davwẹngba ra vwọ rhuẹrẹ echobọ rẹ avwanre phiyọ, ka sa nabọ yan nene udje ri Jesu kpẹkpẹkpẹ.—Se Une Rẹ Ejiro 119:59, 60.

17-18. Erere vọ yen a cha mrẹ siẹrẹ a da vwẹrokere uruemu rẹ omaevwoze ri Jesu?

¹⁷ Uruemu rẹ omaevwoze rẹ avwanre sa nẹrhẹ ihwo efa vwẹrokere udje rẹ avwanre. Ọkpako ọvo re se Tim da ta: “Avwanre vwo ighene ri yerin tedje ra je reyọ vwo mu idibo rowian re, iroro ọvo rọ nẹrhẹ ayen muwan yen udje rẹ iniọvo efa re vwẹ ukẹcha phia rẹ ayen mrẹre, jẹ ayen je guọnọ vwẹrokere ayen. Ẹgbaẹdavwọn rẹ ighene nana chọn ukoko na uko, ayen ji biẹcha ekpako na.”

¹⁸ Akpọ rọ vọnre vẹ ihwo ri vwo ọdavwẹ rẹ ihwo efa-a yen avwanre de yerẹn. Ẹkẹvuọvo, ihwo ri Jihova fẹnẹre. Uruemu rẹ omaevwoze ri Jesu te avwanre ẹwẹn mamọ, avwanre ji brorhiẹn a vwọ vwẹrokere udje rọyen. Dede nẹ e che se nene udje rọyen gbagba-a, jẹ a sa “vwẹ ẹro kere.” (1 Pita 2:21) A vwọ davwẹngba vwọ vwẹrokere uruemu rẹ omaevwoze ri Jesu na, a cha mrẹ aghọghọ kidie e ruẹ obo re vwerhen Jihova oma.