THERO I GUDWAHO 9
Edzisani Yesu Nga U Ḓiimisela U Thusa Vhaṅwe
“U ṋea zwi a takadza u fhira u ṋewa.” —MISH. 20:35.
LUIMBO 17 “Ndi A Funa”
MANWELEDZO *
1. Vhathu vha Yehova vha khou ita mini?
BIVHILI yo dzula yo amba uri vhathu vha Mudzimu vha ḓo “ḓiṋekedza nga u tou ḓifunela” u itela u shumela Yehova vha tshi khou livhiswa nga Yesu. (Ps. 110:3) Honovhu vhuporofita vhu khou itea ṋamusi. Ṅwaha muṅwe na muṅwe, vhathu vha Yehova vha fhedza awara nnzhi-nnzhi vha tshi khou huwelela nga u fhisea. Wonoyu mushumo vha u ita nga u ḓifunela nahone a vha holelwi. Zwiṅwe hafhu, vha ḓiṋea tshifhinga tsha u thusa vhahavho uri vha wane zwine vha zwi shaya nahone vha a vha ṱuṱuwedza na u vha thusa uri vha vhe na lutendo lwo khwaṱhaho kha Yehova. Vhahulwane na vhashumeli vha fhedza tshifhinga tshilapfu vha tshi khou lugiselela dzinyambo na u dalela vhahavho u itela u vha ṱuṱuwedza. Ndi ngani vhathu vha Yehova vha tshi ita zwenezwi zwithu zwoṱhe? Ndi ngauri vha funa Yehova na vhaṅwe vhathu.—Mat. 22:37-39.
2. U ya nga Vharoma 15:1-3, Yesu o ri vhetshela tsumbo ifhio?
2 Yesu o ri vhetshela tsumbo nga u vhea vhaṅwe u thoma. Ri khou ita zwoṱhe zwine ra nga kona u itela u mu edzisa. (Vhalani Vharoma 15:1-3.) Vhane vha mu edzisa vha ḓo vhuyelwa. Yesu o ri: “U ṋea zwi a takadza u fhira u ṋewa.”—Mish. 20:35.
3. Ri ḓo amba nga ha mini kha ino thero?
3 Kha heyi thero, ri ḓo amba nga ha zwithu zwe Yesu a zwi ita u itela u thusa vhaṅwe na nḓila ine ra nga mu edzisa ngayo. Zwiṅwe hafhu, ri ḓo amba nga ha nḓila ine ra nga ḓiimisela ngayo u thusa vhaṅwe nga ho engedzeaho.
EDZISANI YESU
Naho Yesu o neta, o ita mini musi gogo ḽi tshi ḓa khae? (Sedzani phara 4)
4. Yesu o vhea hani vhaṅwe u thoma?
4 Yesu o thusa vhaṅwe naho o neta. Humbulani nga ha zwe Yesu a zwi ita musi vhathu vhanzhi vha tshi ḓa khae ngei thavhani ine ya nga vha i tsini na Kapernaume. Yesu o vha o fhedza vhusiku hoṱhe a tshi khou rabela. A nga vha o vha o neta, fhedzi musi a tshi vhona vhenevho vhathu, o pfela vhuṱungu vha shayaho na vha lwalaho. Nga nnḓa ha u vha fhodza, o vha funza nga nḓila i ṱuṱuwedzaho. Yeneyo pfunzo i ḓivhiwa sa Pfunzo ya Thavhani.—Luka 6:12-20.
Ri nga edzisa hani Yesu? (Sedzani phara 5)
5. Ṱhoho dza miṱa dzi khou edzisa hani Yesu musi dzo neta?
5 Ṱhoho dza miṱa dzi khou edzisa hani Yesu? Ṱhogomelani tsumbo i tevhelaho: Khotsi u vhuya hayani o neta vhukuma. Khamusi ha khou ṱoḓa u ita Vhurabeli ha Muṱa ha eneo madekwana. Fhedzi u humbela Yehova uri a mu ṋee maanḓa a u vhu ita. Yehova u fhindula thabelo yawe, a kona u ita Vhurabeli ha Muṱa sa nga misi. Vhana vha guda zwithu zwa ndeme eneo madekwana. Vha guda uri u gwadamela Yehova ndi zwa ndeme kha vhabebi vhavho.
6. Yesu o fhedza hani tshifhinga na vhaṅwe naho o vha a tshi khou ṱoḓa u vha e eṱhe?
6 Yesu o fhedza tshifhinga na vhaṅwe naho o vha a tshi ṱoḓa u vha e eṱhe. Ni vhona u nga Yesu o vha a tshi khou ḓipfa hani musi a tshi pfa uri khonani yawe Yohane Mulovhedzi o vhulawa? U tea u vha o vha o ṱungufhala vhukuma. Bivhili i ri: ‘Yesu a tshi pfa nga ha lufu lwa Yohane, a dzhena tshikepeni a ya fhethu hu re kule na miḓi uri a kone u vha e eṱhe.’ (Mat. 14:10-13) Zwi a pfala uri ndi ngani o vha a tshi ṱoḓa u vha e eṱhe. Musi vhaṅwe vhathu vho lovhelwa, vha ṱoḓa u lila vhe vhoṱhe. Fhedzi Yesu ho ngo kona u wana tshibuli tsha u ita zwenezwo. Yesu a tshi sala a tshi swika henefho fhethu hu re kule na miḓi, gogo ḽo vha ḽo no swika. Yesu o ita mini? O vha “pfela vhuṱungu” ngauri o humbula nga ha nḓila ine a nga thusa ngayo vhenevho vhathu. O ṱavhanya a vha thusa ngauri o zwi vhona uri vha khou ṱoḓa u thusiwa na u khuthadzwa nga Mudzimu. Zwavhuḓivhuḓi, o “vha funza zwithu zwinzhi.”—Marko 6:31-34; Luka 9:10, 11.
7-8. Vhahulwane vha edzisa hani Yesu musi vha tshi tea u thusa vhaṅwe?
7 Vhahulwane vha khou edzisa hani Yesu? Ri a livhuwa vhukuma zwine vhahulwane vha ḓidzima zwone vha tshi itela u ri thusa. Vhunzhi ha vhahashu a vha ḓivhi zwine vhahulwane vha ḓidzima zwone. Sa tsumbo, musi hu tshi vha na tshiimo tsha shishi, vhahashu vha tshinnani vhane vha shuma kha Komiti ya Vhulamukanyi na Vhuongelo (HLC) vha ṱavhanya vha thusa vhahavho. Kanzhi zwenezwo zwi itea vhusiku. Fhedzi vhenevho vhahashu vha tshinnani na miṱa yavho, vha vhea vhahavho u thoma ngauri vha a vha pfela vhuṱungu musi vho welwa nga khombo.
8 Vhahulwane vha dovha vha thusa musi hu tshi fhaṱiwa Dziholo, zwiṅwe zwifhaṱo zwa ndangulo na u thusa vho welwaho nga khombo. A ri tsha amba nga ha tshifhinga tshine vha tshi fhedza vha tshi khou ri funza na u ri ṱuṱuwedza. Vhenevha vhahashu na miṱa yavho ri a vha bvulela muṅadzi. Ngavhe Yehova a tshi vha fhaṱutshedza! Fhedzi vhahulwane vha tea u linganyisela u fana na muthu muṅwe na muṅwe. A vho ngo tea u farakanea nga u shumela tshivhidzo lune vha si tsha vha na tshifhinga tsha u ṱhogomela miṱa yavho.
RI NGA ḒIIMISELA HANI U THUSA VHAṄWE NGA HO ENGEDZEAHO?
9. U ya nga Vhafilipi 2:4, 5, Vhakriste vha tea u ita mini?
9 Vhalani Vhafilipi 2:4, 5. Roṱhe, u katela na vhahulwane, ri nga edzisa Yesu ra vhea vhaṅwe u thoma. Bivhili i ri Yesu o “fana na mulanda.” (Vhafil. 2:7) Humbulani nga ha zwine ra zwi guda kha yeneyi ndimana. Mulanda u ṱoḓa zwibuli zwa u takadza muṋe wawe. Samusi ri vhalanda vha Yehova nahone ri tshi ṱoḓa u shumela vhahashu, ri tea u vha shumela nga ho engedzeaho. Ni nga zwi kona arali na ita zwi tevhelaho.
10. Ri tea u ḓivhudzisa mbudziso dzifhio?
10 Humbulani nga ha nḓila ine na dzhia ngayo zwithu. Ḓivhudziseni uri: ‘Ndo ḓiimisela lungafhani u fhedza tshifhinga tshanga na nungo dzanga ndi tshi khou thusa vhaṅwe? Sa tsumbo, ndi ḓo ita mini arali nda humbelwa uri ndi yo dalela wahashu wa mulala a re fhethu hu no ṱhogomelwa vhalala? Kana nda humbelwa uri ndi ise wahashu wa mulala muṱanganoni? Naa ndo ḓiimisela u ya u thusa musi hu tshi kunakiswa hune ha ḓo farelwa hone buthano kana hu tshi kunakiswa Holo?’ Musi ri tshi ḓiṋekedzela kha Yehova, ro mu fhulufhedzisa uri ri ḓo shumisa zwoṱhe zwine ra vha nazwo u itela u mu shumela. U ṱoḓa ri tshi shumisa tshifhinga tshashu, nungo dzashu na thundu ine ra vha nayo u itela u thusa vhaṅwe. Yehova u a takala musi ri tshi zwi ita nga u ḓifunela. Ri tea u ita mini arali hu na hune ra tea u khwinisa hone?
11. Thabelo i nga ri thusa hani uri ri ḓiimisele u thusa vhaṅwe nga ho engedzeaho?
11 Rabelani zwi tshi bva mbiluni. Kha ri ri ni a zwi vhona uri ni tea u shumela kha u vha muthu ane a ḓiimisela u thusa vhaṅwe nga ho engedzeaho, fhedzi a ni na lutamo lwa u zwi ita. Zwi ḓo vha khwine uri ni rabele zwi tshi bva mbiluni. Vhudzani Yehova ngoho nga ha nḓila ine na ḓipfa ngayo nahone ni mu humbele uri a ni ite uri ‘ni tame u ita zwine a funa na u vha na maanḓa a u zwi ita.’—Vhafil. 2:13.
12. Vhaṱhannga vho lovhedzwaho vha nga thusa hani tshivhidzoni?
12 Arali ni muṱhannga o lovhedzwaho, humbelani Yehova uri a ni thuse u ita zwo engedzeaho u itela u thusa vhahaṋu tshivhidzoni. Kha maṅwe mashango, vhahulwane vha zwivhidzo ndi vhanzhi u fhira vhashumeli nahone vhunzhi ha vhenevho vhashumeli a vha tsha vha vhaswa. Samusi vhathu vha tshi khou engedzea ndanguloni, hu ṱoḓea vhaswa vhanzhi u itela u thusa vhahulwane u ṱhogomela vhenevha vhahashu. Arali no ḓiimisela u ita mushumo muṅwe na muṅwe, ni ḓo takala. Ndi ngani? Ngauri ni ḓo takadza Yehova, vhaṅwe vha ḓo zwi vhona uri no ḓiimisela u thusa vhaṅwe nahone ni ḓo takala ngauri ni khou thusa vhaṅwe.
Vhakriste vha Yudea vho wela Mulambo wa Yorodane vha tshi khou shavhela ḓoroboni ya Pella. Vhe vha ṱavhanya u swika vha khou ṋea vhahavho zwiḽiwa vhane vha kha ḓi tou bva u swika (Sedzani phara 13)
13-14. Ri nga thusa hani vhahashu? (Sedzani tshifanyiso tshi re kha gwati.)
13 Naa hu na ane na nga mu thusa? Muapostola Paulo o vhudza Vhakriste vhane vha dzula Yudea uri: “Ni songo hangwa u ita zwivhuya na u kovhela vhaṅwe, ngauri Mudzimu u takadzwa nga zwenezwo zwiṱhavhelo.” (Vhahev. 13:16) Yeneyo yo vha i nyeletshedzo yavhuḓi. Musi vha tshi kha ḓi bva u wana honoho vhurifhi, vhenevho Vhakriste vho tea u ‘shavhela thavhani’ vha sia miḓi yavho, mabindu avho na mashaka avho a si Vhakriste. (Mat. 24:16) Zwo vha zwi zwa ndeme uri vha thusane nga tshenetsho tshifhinga. Arali vho vha vho no thoma u shumisa nyeletshedzo ya Paulo ya u kovhelana zwine vha vha nazwo, zwi ḓo vha zwo vha lelutshela u tshila nga zwiṱuku zwine vha vha nazwo.
14 Vhahashu vha nga kha ḓi sa amba musi vha tshi ṱoḓa thuso. Sa tsumbo, wahashu a nga vha o lovhelwa nga mufumakadzi wawe. Naa wahashu a nga vha a tshi khou ṱoḓa u thuswa nga zwiḽiwa, tshiendedzi kana mishumo ya hayani? A nga kha ḓi sa ri humbela uri ri mu thuse ngauri u khou shavha u nga u khou dzindela. Fhedzi a nga takala vhukuma arali ra nga mu thusa naho a songo ri humbela. Ri songo humbula uri muṅwe u ḓo mu thusa kana uri u ḓo ri vhudza musi a tshi ṱoḓa u thusiwa. Ḓivhudziseni uri: ‘Arali ndo vha ndi kha honovhu vhuimo, ndo vha ndi tshi nga takalela u thuswa nga nḓila-ḓe?’
15. Ri tea u ita mini arali ri tshi ṱoḓa u thusa vhaṅwe?
15 Itani uri zwi lelutshele vhahaṋu u ni humbela thuso. Ni nga vha ni tshi ḓivha vhaṅwe tshivhidzoni vhane vha dzula vho ḓiimisela u thusa vhaṅwe. A vha iti uri ri ḓipfe u nga ri khou vha dzindela. Ri a zwi ḓivha uri vha ḓo ri thusa naho ha nga itea mini nahone na riṋe ri ṱoḓa u vha edzisa. Muṅwe muhulwane ane a pfi Alan a re na miṅwaha ya 45 u ṱoḓa uri zwi lelutshele vhaṅwe u mu humbela thuso. Vho Alan vho amba zwi tevhelaho nga ha Yesu: “Yesu o vha a tshi dzula o farakanea, fhedzi vhathu vhoṱhe vho vha vha tshi mu takalela, vha sa ofhi u mu humbela thuso. Vho vha vha tshi zwi ḓivha uri u na ndavha navho. Ndi ṱoḓa u fana na Yesu na u vha muthu a re na ndavha na vhaṅwe vhathu na ane zwa vha lelutshela u humbela thuso.”
16. Phisalema 119:59, 60 i nga ri thusa hani u edzisa Yesu nga vhuronwane?
16 Ri songo kulea nungo arali ri tshi khou kundelwa u edzisa Yesu kokotolo. (Yak. 3:2) Mugudiswa a nga si kone u edzisa ane a khou mu gudisa kokotolo. Fhedzi mugudiswa a nga khwinisa arali a guda kha vhukhakhi hawe na u bvela phanḓa a tshi lingedza u edzisa ane a khou mu gudisa. Na riṋe ri nga edzisa Yesu nga vhuronwane arali ra shumisa zwine ra khou zwi guda Bivhilini na u dzula ri tshi khwinisa.—Vhalani Phisalema 119:59, 60.
RI VHUYELWA HANI NGA U ḒIIMISELA U THUSA VHAṄWE?
Musi vhahulwane vha tshi edzisa Yesu, vha vha vha tshi khou vhetshela vhaswa tsumbo (Sedzani phara 17) *
17-18. Ri vhuyelwa hani nga u edzisa Yesu?
17 Vhaṅwe vha nga thusa vhaṅwe musi vha tshi vhona nḓila ye ra ḓiimisela ngayo u thusa vhaṅwe. Muṅwe muhulwane ane a pfi Tim u ri: “Vhaṅwe vhahashu vhane vha kha ḓi vha vhaswa ndi vhashumeli tshivhidzoni. Zwenezwi vho zwi itiswa ngauri vho vha vha tshi ṱoḓa u edzisa vhahashu vho ḓiimiselaho u thusa vhaṅwe. Vhenevha vhahashu vhane vha kha ḓi vha vhaswa vha a thusa tshivhidzoni na u tikedza vhahulwane.”
18 Ṋamusi vhunzhi ha vhathu vha humbulela vhone vhaṋe fhedzi. Fhedzi vhathu vha Yehova a vho ngo tou ralo. Ro guda kha nḓila ye Yesu a vha o ḓiimisela ngayo u thusa vhaṅwe nahone ro ḓiimisela u mu edzisa. Ndi ngoho uri ri nga si kone u mu edzisa kokotolo, fhedzi ri nga mu edzisa “nga vhuronwane.” (1 Pet. 2:21) Musi ri tshi ita zwoṱhe zwine ra nga kona u itela u edzisa Yesu, ri ḓo takala ngauri ri vha ri tshi khou takadza Yehova.
LUIMBO 13 Kristo, Tsumbo Yashu
^ phar. 5 Yesu o vha a tshi vhea vhaṅwe u thoma. Kha heyi thero, ri ḓo amba nga ha nḓila dzine ra nga mu edzisa ngadzo. Zwiṅwe hafhu, ri ḓo amba nga ha nḓila ine ra vhuyelwa ngayo musi ri tshi mu edzisa.
^ phar. 57 ṰHALUSO YA TSHIFANYISO: Dan ane a kha ḓi vha muswa o sedza musi vhahulwane vhavhili vho dalela khotsi awe sibadela. Dan u kwamiwa nga tsumbo ya vhenevho vhahulwane, zwa ita uri a wane nḓila dza u thusa vhaṅwe. Muṅwe muswa ane a pfi Ben, u sedza nḓila ine Dan a ṱhogomela ngayo vhaṅwe vhathu. Zwine Ben a zwi guda kha Dan zwi mu ṱuṱuwedza uri a thuse musi hu tshi kunakiswa Holoni.
