1. Cossa che i servi de Geovà i fà?

 LA BÌBLIA belche la disea che el pòpolo de Dio el volaria servirlo e che el ndaria farlo dela maniera che Gesù el ga insegnà. (Sal. 110:3) E ancoi, l’è pròpio questo che l’è drio suceder parché i servi de Dio i dopera milioni de ore par predicar le bone notìssie. Lori i fà questo parché i vol e i dopera i so soldi par farlo. Lori anca i incoraia i so fradei, li giuta in quel che i ga de bisogno e a far pi forte la so amicìssia con Geovà. Quei che i ze ansiani o servi ministeriai anca i dopera tanto del so tempo par pareciarse par far le parte nele riunion e par giutar i fradei. Ma parché che i servi de Geovà i fà tuto questo? Parché i ama a Geovà e ale persone. — Mat. 22:37-39.

2. De acordo con Romani 15:1-3, parché che Gesù l’è un bel esémpio?

² Gesù l’è un bel esémpio parché sempre el fea quel che l’era meio par i altri, e noantri se sforsemo par far compagno a lu. (Ledi Romani 15:1-3. *) Se femo cossita, ndaremo capir che “ghen’è de pi felicità in dar che in ricever”. — Ati 20:35.

3. Cossa che ndaremo imparar in questo stùdio?

³ In questo stùdio, ndaremo imparar sora quel che Gesù el ga fato par giutar i altri, e come che podemo far  come lu. Ndaremo anca imparar cossa podemo far par gaver de pi voia de giutar i altri.

4. Come che Gesù el ga mostrà che el fea sempre quel che l’era meio par i altri?

⁴ Gesù el giutea le persone anca quando l’era straco. Vedemo un esémpio. Una mùcia de gente la ze ndata catar Gesù nte un monte che fursi l’era darente de Cafarnaun. Ma Gesù l’era straco parché el gavea pregà tuta la note. Ma come quele persone le ghe ga fato pecà, lu el ga guario tute quele che le era malade e el ga anca fato el pi bel e el pi importante discorso che le persone le ga belche scoltà. — Luc. 6:12-20.

5. Come i paroni de fameia i pol far compagno a Gesù?

⁵ Cossa che i paroni de fameia i pol imparar del esémpio de Gesù? Vedemo un esémpio. Un paron de fameia el riva casa straco dopo de una giornada de laoro. Par quela lu el pensa de nò far la Adorassion in Fameia in quel giorno. Alora, lu el prega a Geovà par domandarghe forsa e lu lo giuta a farla. Cossita, lu e la so dona i insegna i so fioi che la adorassion a Geovà la vien in primo posto nela so vita.

6. Gesù el giutea le persone anca quando el volea restar lu sol. Parla de un esémpio.

⁶ Gesù el giutea le persone anca quando el volea restar lu sol. Vedemo un esémpio. Sicuro che Gesù el ga sofrio tanto quando el ga savesto che Gioani Batista l’era morto. La Bìblia la dise: “Quando Gesù el ga scoltà questo [sora la morte de Gioani], l’è ndato via de lì nte un barco, fin un posto pi tranquilo, par restar lu sol.” (Mat. 14:10-13) Tanti i vol restar lori soli quando i ze drio sofrir parché l’è morto qualchedun che i ama. Anca Gesù el volea farlo. Ma no’l ga podesto parché una mùcia de gente la ga savesto ndove lu l’era drio ndar e le ze rivade prima che lu. Cossa Gesù el ga pensà quando el ga catà quele persone? Lore ghe ga fato pecà. Lu el ga visto che quele persone le era distante de Geovà e che le  gavea bisogno de aiuto. Alora, el ga scominsià a insegnarghe tante robe. — Mar. 6:31-34; Luc. 9:10, 11.

7-8. I ansiani i fà compagno a Gesù quando i fradei i ga bisogno de aiuto. Parla de un esémpio.

⁷ I ansiani i fà compagno a Gesù. Par esémpio, quando un fradel l’è nel ospedal e el ga bisogno de aiuto, i ansiani che i fà parte dela Comission de Contato coi Ospedai suito i fà quel che ghe ocore. Dele volte, lori i ga de ndar giutar i fradei in meso la note. Ma questi bravi ansiani e le so fameie i fà quel che l’è meio par i fradei parché li ama. Noantri gnanca no savemo tuto quel che i ansiani i fà. Tuti i fradei i ghe dà tanto valor ai ansiani.

⁸ I ansiani anca i giuta a far su Saloni del Regno e altri posti doperadi par la organisassion. Lori i giuta anca quando sucede desgràssie e i insegna e i incoraia i fradei nela congregassion. Noantri lodemo tanto questi fradei e le so fameie, e domandemo a Geovà che el seite a benedirli. Ma tuti noantri, anca i ansiani, ghemo de star atenti par no doperar massa del nostro tempo sol par far i laori dela congregassion e desmentegarse dela fameia.

9. De acordo con Filipensi 2:4, 5, cossa che tuti noantri ghemo de far?

⁹ Ledi Filipensi 2:4, 5. * Gesù l’è un bel esémpio parché sempre el fea quel  che l’era meio par i altri. La Bìblia la dise che lu “l’è deventà un schiavo”. (Fil. 2:7) Un schiavo, o un servo, el fea sempre quel che assea el so paron contento. Anca noantri semo come schiavi parché volemo far tuto quel che podemo par assar Geovà contento e anca i nostri fradei. Alora, nò sol i ansiani, ma anca tuti noantri volemo far compagno a Gesù. Vedemo arquante robe che podemo far par servir i nostri fradei.

10. Che domande podemo farse?

¹⁰ Proa pensar se te sì drio far quel che l’è meio par i altri. Farte queste domande pol giutarte: ‘Sarà che go caro de doperar del me tempo e dela me forsa par giutar i me fradei? Cossa che mi faria se i me domandesse par visitar un fradel pi vècio o par menar una sorela pi vècia ale riunion? Sarà che mi vui sempre giutar a netar el Salon del Regno e el posto del Congresso?’ Ghemo de ricordarse che ghemo dito a Geovà che ndarìssino doperar la nostra vita par servirlo. E lu el vol che doperemo el nostro tempo e quel che ghemo par giutar i nostri fradei. Quando lo femo, Geovà el resta tanto contento. Ma cossa pol giutarne se ancora no semo drio far quel che l’è meio par i altri?

11. Parché che pregar a Dio pol giutarte a far quel che l’è meio par i altri?

¹¹ Parla a Geovà tuto quel che te sì drio sentir. Fursi te te nicordi che no te sì drio far quel che l’è meio par i altri. Pol esser che no te sì drio farlo parché te manca la voia. Cossa pol giutarte? Prega a Geovà e parla pròpio quel che te senti e domandaghe “la voia e anca la forsa de farlo”. — Fil. 2:13.

12. Come un gióveno el pol giutar nela congregassion?

¹² In tanti paesi, ghen’è de pi ansiani che servi ministeriai e arquanti de questi servi ministeriai i ga belche una bela età. Come la organisassion de Geovà la ze drio restar cada volta pi granda, ghemo bisogno de gióveni par giutar i ansiani nele congregassion. Alora, se te sì un gióveno e te sì belche batesà, domanda a Geovà che el te giute a far de pi nela congregassion. Se te lo fè, te sarè felice. Parché? Parché te sarè drio far quel che ghe piase a Geovà, te ndarè restar contento de giutar i fradei e lori ndarà fidarse in ti.

13-14. Cossa podemo far par giutar i nostri fradei? (Vedi la ilustrassion dela prima pàgina.)

¹³ Stà atento a quel che i to fradei i ga de bisogno. El apòstolo Paolo el ga dito ai fradei dela Giudea: “No sté desmentegarve de far el ben e de spartir coi altri quel che gavé, parché Dio el ghe piase de questi sacrifissi.” (Ebr. 13:16) Questo consìlio l’è stà tanto bon par i giudei parché, un tempo dopo, lori i ga bio de ndar via par i monti. (Mat. 24:16) Come lori i ga bio de assar indrio le so case, i so laori e le so fameie che no le servia a Geovà, lori i ga bio de giutarse un al altro. Alora, quei che i era belche drio meter in pràtica el consìlio de Paulo i ze stati boni de viver meio là su nei monti.

¹⁴ Dele volte, una sorela o un fradel che el ga bisogno de aiuto, no’l ndarà domandarne. Par esémpio, fursi la sposa de un fradel la ze morta e lu l’è tanto desanimà. Sarà che questo fradel el ga bisogno che lo giutemo a far qualcossa casa, che ghe femo da magnar o che lo menemo a qualche posto? Fursi lu no’l parle a nissuni parché no’l vol intrigarli, ma el  restaria tanto contento se lo giutessino vanti che el ne domandesse. No ghemo mai de pensar che un fradel l’è belche drio giutarlo o che lu ndarà domandarne se el ga pròpio de bisogno. Una roba che pol giutarne a saver cossa far l’è domandarse: ‘Se mi fusse drio infrontar la medèsima roba che questo fradel, cossa me piaseria che i fesse par mi?’

15. Cossa che ghemo de far se volemo giutar i altri?

¹⁵ Mostra ai fradei che te ghè caro de giutarli. Sicuro che ghen’è fradei nela nostra congregassion che i vol sempre giutar i altri. Lori i giuta pròpio de volentiera e savemo che podemo sempre domandarghe aiuto. Noantri volemo sforsarse par far compagno a lori. Un ansiano de nome Alan, che el ga 45 ani, el vol assar i fradei pi sicuri che el ga caro de giutarli. Lu l’è drio sforsarse tanto par far come Gesù. Lu el ga dito: “Gesù sempre el gavea tante robe da far, ma tute le persone le savea che le podea domandarghe aiuto. Lore le era sicure che Gesù el gavea caro de giutarle. Mi vui tanto far compagno a Gesù e assar i me fradei sicuri che mi ghe vui tanto ben e che go caro de giutarli.”

16. Come che el Salmo 119:59, 60 pol giutarne a far compagno a Gesù?

¹⁶ No ghemo de restar desanimadi se no semo boni de far pròpio compagno a Gesù. (Tiago 3:2) Imagina un maestro che l’è tanto bon de far una roba e un aluno che el proa far compagno a lu. Anca se lu no l’è bon de farla compagno al so maestro, el impara coi so sbali e el proa far dela meio maniera. Cossita, lu l’è bon de far quela roba cada volta meio. Anca noantri volemo seitar a  sforsarse par far come Gesù. Come saremo boni de farlo? Se metemo in pràtica quel che imparemo dela Bìblia e se noantri se sforsemo par far cada volta meio. — Ledi Salmo 119:59, 60. *

17-18. Che robe bone le ndarà suceder quando femo quel che l’è meio par i altri?

¹⁷ Quando ghemo caro de giutar ai altri, i fradei i ndarà veder e i volerà far compagno. Un ansiano de nome Tim el ga dito: “Arquanti fradei gióveni i ze deventadi servi ministeriai. Una dele robe che ga giutà questi fradei la ze stata veder el esémpio dei altri. Questi gióveni i giuta tanto la congregassion e i ansiani.”

¹⁸ Noantri vivemo nte un mondo che le persone le pensa sol in lore stesse, ma i servi de Geovà no i ze cossita. Noantri restemo maraveiadi col esémpio de Gesù parché el fea sempre quel che l’era meio par i altri, e volemo far compagno. L’è vera che no saremo boni de far pròpio compagno a Gesù, ma se sforsemo par far el meio che podemo. (1 Pie. 2:21) Se lo femo, restaremo tanto contenti parché saremo drio far quel che ghe piase a Geovà.