1. Itthu xeeni sooreera arumeyi a Yehova anivara aya mwaha wa ophenta?

 KHALAI, Biibiliya aahileiherya wira atthu a Muluku yaarowa wiivahererya “votthuna waya”, wira avareke miteko sa Yehova ehooleliwaka ni Mwanawe. (Esal. 110:3) Eprofesia eyo enniiraneya olelo-va. Khula eyaakha, arumeyi ooluttuweliwa a Yehova anniviriha iwoora sinceene elaleeryaka. Khaniliviwa etthu mwaha woovara muteko owo, maana anivara moowiivahererya. Nave annaakhaliherya axinnaya yaavahaka itthu sinaathowa, ni waakhaliherya olipiha waamini waya. Axitokweene ni arumeyi ookhaliherya, anniviriha okathi aya elokiheryaka ipantta sa mithukumano, ni waaxukurya axinnaya wira yaalipihe. Masi exeeni eniwiiriha ovara miteko iyo sootheene? Mwaha womphenta Yehova ni waaphenta akhwaaya.—Math. 22:37-39.

2. Moovarihana ni aRoma 15:1-3, ntakiheryo xeeni Yesu onivanhe awe?

² Yesu oovaha ntakiheryo nuulupale na ohela opuro woopacerya soophavela sa atthu akina ovikana sawawe. Hiyo ninniimananiha opaka sootheene ninwerya ahu wira nimutakihe. (Mmusome aRoma 15:1-3.) Okathi nimpaka ahu eyo, ninniphwanya mireerelo. Yesu aahimmwe so: “Ovaha onnitepa ohakalaliha ovikana ovahiwa”.—Mit. 20:35.

3. Exeeni ninrowa ahu othokorerya mwaha ola?

³ Yoosoma ela, nnoothokorerya itthu sikina Yesu aapanke awe wira aakhaliherye atthu akina, ni moota wootthara ntakiheryo nawe. Nave nnooweha etthu nikhanle oopaka wira nincererye ophavela wahu waakhaliherya akhwiihu.

4. Moota xeeni Yesu aahenle awe opuro woopacerya soophavela sa atthu akina, ovikana sawawe?

⁴ Yesu aanaakhaliherya atthu akina hata okathi aakhulumuwa  awe. Nkahaya muupuwele etthu aapanke awe, okathi atthu anceene yaaronwe aya okumana nuuwo omwaako, waattamela oKafarnawu. Yesu iira ovirinhe ene ohiyu wootheene ovekelaka. Hata aakhulumunwe, okathi aawenhe awe muttitthi ole wa atthu, aahiwoonela othunku atthu oohaawa ni aretta. Khahiyo paahi aapenunxe atthu yaawereiwa, masi-tho aahilavula mwaha wira aalipihe ale yaakhulumunwe.—Luka 6:12-20.

5. Ahooleli a itthoko anitthara sai ntakiheryo na ophenta Yesu oonihenrye awe okathi aakhulumuwa awe?

⁵ Moota ahooleli a itthoko anrowa omutakiha Yesu. Nkahaya muupuwelele ela: Muhooleli mmosa a etthoko nuumala ovara muteko nihiku nootheene, onniphiya owaani okhulumunwe ene. Nto okhala wira ookhulumuwa, onnuupuwela wunteerya eprograma ya emusi ya Omulompa Muluku ohiyu ole. Masi ohinatthi opaka eyo, onninvekela Yehova wira onvahe ikuru owerye wiiriha yoosoma eyo. Yehova onnaakhula nivekelo nawe, nto yoosoma eyo ennikhala. Ohiyu ole, anamwane a etthoko ele anniixutta wira, etthu anamuyari aya anihela aya nipuro noopacerya, omphenta waya Yehova.

6. Nvahe ntakiheryo na moota Yesu aalenve awe okathi awe wira aakhaliherye atthu akina.

⁶ Yesu aaniviriha okathi ori ene ni atthu akina. Nkahaya nuupuwele moota Yesu aariipiwe awe murima, okathi aasuwenle awe wira mpatthani awe, Yohani Mpatisa aahiiviwa. Biibiliya onihimya so: “Okathi aiwale awe eyo, Yesu aahikhuma opuro owo, owela mukalawani, onarowa opuro wahaavira-viriwa wira akhale mekhawe”. (Math. 14:10-13) Ninnisuwela etthu yaamwiirinhe Yesu orowa opuro ole wira akhale mekhawe. Anamunceene a hiyo onisivela wunla niri ene mekhihu. Masi Yesu khaawenrye okhala mekhawe. Muttitthi muulupale wa atthu waahiphiya opuro ole yena ohinatthi ophiya. Yesu oonenle sai? Aahuupuwela itthu saaxankiha atthu ale, ‘aahiwoonela othunku’, ni aahoona wira yaaniphavela okhaliheriwa. Nto moowakuveya aahipaka eyo. Yesu “aahipacerya owiixuttiha [ohiya paahi itthu vakhaani, masi] itthu sinceene”.—Mar. 6:31-34; Luka 9:10, 11.

7-8. Nvahe ntakiheryo nnooniherya moota axitokweene moophenta animutakiha aya Yesu, okathi munna aahiiso murokora oniphavela awe okhaliheriwa.

 ⁷ Moota axitokweene animutakiha aya Yesu. Ninnixukhurela ni murima ahu wootheene miteko sootheene axitokweene anivara aya wira enikhaliherye. Masi miteko sinceene, anna ni arokora a mmulokoni khanoona. Mwa ntakiheryo, okathi onikhumelela aya oretta wootutuxerya, Egrupu ya Axitokweene Anilavula ni Mameediku, moowakuveya annaakhaliherya annaya. Ikwaha sinceene iretta sootutuxerya sinkhumelela ohiyu eriyari. Masi mwaha woowoonela othunku anna ni arokora axankale ni ariipiwe murima, axitokweene awo ni imusi saya, annihela opuro woopacerya soophavela sa axinnaya, ovikana sawaya.

⁸ Nave ikwaha sikina axitokweene annikhaliherya otekiwa Ipa sa Omwene, inupa sinirumeeliwa ni mutthenkeso ahu, ni anniirela mpantta ikomisau sinaakhaliherya atthu aphwanyiwe ihasara. Nave anniviriha iwoora sinceene yiixuttihaka mmulokoni mwahu, onilipiha ni onikhaliherya. Tthiri ninnaaxukhurela vanceene anna awo ni imusi saya. Ninkupali wira Yehova onimwaareeliha mwaha wowiileva waya. Masi hata vari siiso, axitokweene ahaana okhalana ephoole wira ahiviriheke okathi munceene evaraka miteko sa Muluku, mpakha ohikhalana okathi wowaakhapelela atthu a vatthokoni vaya.

9. Moovarihana ni aFilipi 2:4, 5, mukhalelo xeeni makristau ootheene anireerela aya wooniherya?

⁹ Mmusome aFilipi 2:4, 5. Ohiya paahi axitokweene, otheene ahu nnoowerya otthara ntakiheryo na Yesu, nipwehaka opuro woopacerya soophavela sa atthu akina ovikana  sawihu. Biibiliya onihimya wira Yesu “aaheemererya okhala epottha”. (aFil. 2:7) Nkahaya niwehe etthu yoolepa ela enniixuttiha aya. Okathi wa khalai, vakhala wira epottha aahiiso murumeyi aanivara saana miteko sawe, aanimusiveliha pwiya awe. Okhala wira hiyo na ipottha sa Yehova, ni na arumeyi a axinnihu, nimphavela orumeeliwa saana ni Yehova vamosa ni anna akina. Hiyo pooti opaka eyo nittharaka malakiheryo anittharelana.

10. Makoho xeeni ninreerela ahu wiikohaka?

¹⁰ Nvareryeke makhalelo anyu. Mwiikoheke so: ‘Kinnirumeela okathi aka ni ikuru saka wira kaakhaliherye atthu akina? Mwa ntakiheryo, kaarowa woonela sai vaakhanle wira koovekeliwa omuxukurya munna onikhala opuro anikhapeleliwa atthu oowuuluvala? Nave kaarowa woonela sai kaavekeliwe omukuxa munna wala murokora oowuuluvala okathi kinrowa aka omuthukumanoni? Kinniivahererya opaka elimpesa opuro anipakiwa akonkresu aahiiso olokiherya Empa ya Omwene?’ Nihiku naivaherenrye ahu wa Yehova, naahimuleiherya wira naamunvaha itthu soolokexa nirina. Enamuna emosa yoopaka eyo, orumeela ikuru sahu ni mireerelo sahu wira naakhaliheryeke axinnihu. Yehova onnihakalala okathi onniweha awe nipakaka eyo. Exeeni nikhanle ahu oopaka akhala wira ninnoona oxankiha wiivahererya waakhaliherya axinnihu?

11. Ovekela onnikhaliherya sai ophavela waakhaliherya atthu akina?

¹¹ Munvekeleke Yehova ni murima anyu wootheene. Nyuwo pooti woonaka wira ehaavo etthu munireerela anyu olokiherya wira mukhale mutthu oreera murima, masi munoona-tho wira khivanreerela opaka eyo. Akhala wira eyo enimwiiraneya, munvekeleke Yehova ni murima anyu wootheene. Muhimukhuweke etthu, mmuleeleke itthu sootheene munuupuwela anyu. Nave munvekeleke wira oovaheeni “ophavela ni owerya ovara muteko”.—aFil. 2:13.

12. Amiravo oopatisiwa anrowa okhaliherya sai mutthenkeso wa Yehova?

¹² Akhala wira mwa mmiravo oopatisiwa, munvekeleke Yehova wira ookhaliheryeni ophavela waakhaliherya atthu akina a mmulokoni. Ilapo sikina miloko sa ekristau sookhalana axitokweene anceene waavikana arumeyi ookhaliherya. Nave anamunceene a arumeyi awo ookhaliherya khahiyo amiravo. Mutthenkeso wa Yehova onootepa wunnuwa. Nto ninnaaphavela amiravo anceene wira yaakhaliheryeke axitokweene okhapelela miloko. Akhala wira munimwiivahererya orumeela opuro woothowa anamalaleerya, munoophwanya ohakalala wuulupale. Mwaha wa xeeni? Mwaha woophavela wanyu omuhakalaliha Yehova, anna animoonaka wira munniphavela waakhaliherya atthu akina. Nave munoophwanya ohakalala wuulupale.

13-14. Exeeni nikhanle ahu oopaka wira naakhaliherye anna ni arokora? (Nwehe edesenyo ya ekaapa.)

¹³ Nweheke yaakhanle ene anna aniphavela okhaliheriwa. Murummwa Paulo aahaalopola makristau aheeberi ohimyaka so: “Nave-tho, muhiliyale owiirela sooreera atthu akina, ni okawana naawo itthu sirina anyu. Itthu iyo siri ntoko mikuttho, ni sinnimuhakalaliha vanceene Muluku”. (aHeeb. 13:16) Tthiri miruku iya ti soovareleya muteko. Nuuvira okathi vakhaani nuumala makristau a oYudeya waakhela epaphelo ele, yaahihiya inupa saya, anakoso aya ni amusi aya yahaakhanle makristau ni ‘yaahitthawela omiyaakoni’. (Math. 24:16) Moohaanyiherya okathi ole vaanitthuneya okhaliheryana. Wiiwelela miruku yaavahiwe aya ni murummwa Paulo, sa okawana ni atthu akina itthu yaarina aya, waamwaakhaliherya woona okhweya orumeela mireerelo vakhaani yaarina aya opuro ole.

 ¹⁴ Okathi mukina anna pooti ohinileela wira yookhala etthu enaathowa. Mwa ntakiheryo, munna mmosa pooti okhweliwa mwaarawe, nto onahala inlaka vanceene. Niireke munna owo onnireerela okhaliheriwa waapeya, ovahiwa puleya aahiiso oreeriha empa awe? Ikwaha sikina munna owo pooti ohiveka nikhaliheryo, oovaka onivaha muteko. Masi onooxukhurela vanceene akhala wira nnoomukhaliherya ohinatthi onivekela. Nihuupuweleke wira munna owo onookhaliheriwa ni mutthu mukina, aahiiso ohaana onileela okathi wootheene omphavela awe okhaliheriwa. Mwiikoheke so: ‘Vaakhanle wira muxankiho ole okiphwannye miyo, etthu xeeni kaarowaaka ophavela okhaliheriwa?’

15. Exeeni nikhanle ahu oopaka akhala wira nimphavela waakhaliherya atthu akina?

¹⁵ Mukhaleke mutthu ookhweya ovekeliwa nikhaliheryo. Moohaanyiherya, muloko anyu aakhala anna ni arokora oowaasivela waakhaliherya akhwaaya. Okhalawene awo khanuupuwela wira nnoowuukhula. Nave noosuwela wira okathi wootheene anna awo anoonikhaliherya. Tthiri anna awo annivaha ntakiheryo nooloka. Mutokweene mmosa oniitthaniwa Alan orina iyaakha 45, aaniimananiha wira okhala mutthu ookhweya olavulana. Alan aahimmye so: “Yesu aari mutthu oowaatteliwa miteko. Masi hata vari siiso amiravo, atthu aalupale ni oowuuluvala, yaanimwaattamela ni khiyoova onvekela nikhaliheryo. Awo yaaniweha wira Yesu aanaathokorerya. Kimphavela omutakiha Yesu ni murima aka wootheene, wira atthu akisuweleke ntoko mutthu ookhweya olavulana, oopatthaneya ni oophenta”.

16. Malakiheryo ari Esalimo 119:59, 60, anrowa onikhaliherya sai omutakiha Yesu?

¹⁶ Nihikhulumuweke akhala wira khaninwerya omutakiha Yesu moomalela. (Yak. 3:2)  Okhalawene, naxikola khonisuwela itthu sinceene onvikana prusoore awe. Masi, vaavo oniimananiha awe omutakiha hata ikwaha sikina ofalyariki, nuuvira okathi naxikola owo onoosuwelaka itthu sinceene. Nave akhala wira nnimweettelaka itthu nniixutta ahu mBiibiliyani, nnoowerya otthara vakhiviru vene ntakiheryo Yesu onihiyenrye awe.—Musome Esalimo 119:59, 60.

17-18. Exeeni ninrowa ahu ophwanya akhala wira nnootthara ntakiheryo na oreera murima wa Yesu?

¹⁷ Akhala wira ninniphavela okhaliherya, eyo pooti owiirihaka atthu akina opaka etthu emosaru. Mutokweene mmosa oniitthaniwa Tim ohimmwe so: “Nookhalana anna amiravo anirowa vahoolo ni athanliwe wira akhale arumeyi ookhaliherya. Akina athanliwe erina ene iyaakha vakhaani. Etthu emosa-emosa yaakhalihenrye, mwaha woowaaweha atthu akina ephavelaka okhaliherya, nuumala-vo, naawo-tho anaphavela opaka etthu emosaru. Amiravo awo annikhaliherya vanceene muloko ni annaakhaliherya axitokweene”.

¹⁸ Ninkhala olumwenku atthu anceene aniisuupuwela aya mmansaya paahi. Masi arumeyi a Yehova toovirikana ni atthu awo ootheene. Tthiri oreera murima Yesu oonihenrye awe, onninivara murima. Nave nimphavela otthara saana ntakiheryo nawe. Ekeekhai wira khaninwerya otthara moomalela ntakiheryo nawe, masi nnoowerya otthara “vakhiviru vene mavalo awe”. (1 Ped. 2:21) Nakhalela nthiti otthara oreera murima wa Yesu, nnoophwanya ohakalala, mwaha woosuwela wira ninnimuhakalaliha Yehova.