ALATIKE AKO 9
Kotou Faʼifaʼitakiʼi Ia Sesu ʼo Kotou Tauhi ʼIhi
“ ʼE lahi age te fiafia moka kita foaki, ʼi takita tali.”—GAUE 20:35.
KATIKO 17 “ ʼE Au Loto Ki Ai”
TE ʼU MANATU FAKANOUNOU *
1. Kotea te faʼahiga manatu lelei ʼe tou maʼu ʼi te hahaʼi ʼa Sehova?
KUA fualoa ki ai, neʼe fakakikite ʼi te Tohi-Tapu, ʼe ‘foaki anai e te hahaʼi ʼa te ʼAtua ʼaki he lotolelei’ ia he tauhi kia Sehova ʼaki te takitaki ʼo tona ʼAlo. (Pes. 110:3) ʼE lolotoga hoko nei te lea fakapolofeta ʼaia. ʼI te taʼu fuli, ʼe faʼafai ia te ʼu kaugana ʼa Sehova pea mo natou foaki ia hola ʼe lauʼi miliona ki te gaue faifakamafola. ʼE natou fai ʼaki he lotolelei pea ʼe mole totogi natou. ʼE natou toʼo he temi ke natou lagolago ki ʼonatou tehina mo tuagaʼane ʼi te faʼahi fakasino, mo fakalaumalie pea mo fakaha kia natou tonatou ʼofa. ʼE fakaʼaogaʼi e te ʼu tehina fakanofo ia he toe temi ki te teuteuʼi ʼo te ʼu fono pea mo foaki he ʼu tokoni ki te ʼu tehina mo tuagaʼane. Kotea ʼae ʼe ina uga natou ke natou fai ia te ʼu gaue ʼaia? Ko tonatou ʼofa ʼae kia Sehova pea mo tonatou tatau.—Mat. 22:37-39.
2. Ia Loma 15:1-3, kotea te faʼifaʼitaki ʼe tuku mai e Sesu?
2 Neʼe tuku mai e Sesu he faʼifaʼitaki lelei ʼaki tana fakamuʼamuʼa ia te ʼu meʼa ʼae ʼe lelei ki ʼihi ʼi te ʼu meʼa ʼae ʼe lelei kia te ia. ʼE tou faiga ke tou mulimuli ki ʼona lakaʼaga. (Lau ia Loma 15:1-3.) Ko natou ʼae ʼe natou faʼifaʼitakiʼi ia ia, ʼe fua lelei anai kia natou. Neʼe ui fenei e Sesu: “ ʼE lahi age te fiafia moka kita foaki, ʼi takita tali.”—Gaue 20:35.
3. Kotea ʼae ka tou vakaʼi anai ʼi te alatike ʼaeni?
3 ʼI te alatike ʼaeni, ʼe tou vakaʼi anai ʼihi sakilifisio neʼe fai e Sesu moʼo tauhi ʼihi pea mo feafeaʼi hatatou mulimuli ki tana faʼifaʼitaki. ʼE tou toe vakaʼi anai pe ʼe feafeaʼi hatatou fakatuputupu totatou holi ʼae ke tou tauhi ʼihi.
TOU FA’FA’ITAKI’I IA SESU
Logo tona gaʼegaʼe, kae kotea ʼae neʼe fai e Sesu ʼi tana sio ki te fakaovi ʼa te hahaʼi kia te ia? (Vakaʼi te palakalafe 4)
4. Neʼe fakamuʼamuʼa feafeaʼi e Sesu ia te ʼu meʼa ʼae ʼe lelei ki ʼihi ʼi te ʼu meʼa ʼae ʼe lelei kia te ia?
4 Ne’e foaki e Sesu tona malohi logo pe la tona ga’ega’e. Kotou fakakaukauʼi age te meʼa ʼae neʼe fai e Sesu ʼi te olo age ʼo te toe hahaʼi kaugā malie kia te ia ʼi te moʼuga ʼae ʼe tuʼu ovi ki Kapenaume. Neʼe faikole ia Sesu ʼi te po katoa. Neʼe lagi gaʼegaʼe, kae ʼi tana sio ki te hahaʼi, neʼe ʼofa ki te kau masisiva pea mo te kau mahahaki ʼae neʼe kau ai. Koia neʼe mole gata ʼaki pe tana fakamalolo natou, kae neʼe ina fai ia te akonaki malave loto neʼe heʼeki logo ki ai he tahi, te Akonaki ʼi Te Moʼuga.—Luka 6:12-20.
ʼE tou lava faʼifaʼitakiʼi feafeaʼi te manatu fakasakilifisio ʼa Sesu? (Vakaʼi te palakalafe 5)
5. ʼE faʼifaʼitakiʼi feafeaʼi e te ʼu pule famili ia te manatu fakasakilifisio ʼa Sesu moka natou gaʼegagaʼe?
5 ’E fa’ifa’itaki’i feafea’i e te ’u pule famili ia Sesu? Kotou fakakaukauʼi age moka ʼosi gaue mai he pule famili, ʼe kaku mai ki tona loto fale kua gaʼegaʼe. ʼE ina fia holoʼi atu ki he tahi ʼaho ia te Ako Fakafamili ʼae neʼe tonu ke fai ʼi te afiafi ʼaia. Kae ʼe ina kolekole kia Sehova ke ina foaki age te malohi ke ina fakahoko te ako fakafamili. ʼE tali e Sehova tana faikole pea fai leva ia te ako ohage pe ko te mahani. ʼI te afiafi ʼaia, ʼe ʼi ai te ako maʼuhiga ʼe taʼofi e te ʼu fanau, ʼe natou mahino ai ʼe maʼuhiga age ki te ʼu matuʼā te ʼu meʼa fakalaumalie ʼi te ʼu meʼa fuli.
6. Neʼe fakaʼaogaʼi feafeaʼi e Sesu tona temi moʼo tokoni ki te hahaʼi.
6 Ne’e faka’aoga’i lelei e Sesu tona temi. Ki takotou manatu la, kotea ʼae neʼe logoʼi e Sesu ʼi tana iloʼi ʼae neʼe tuʼusi te ulu ʼo tona kaumeʼa ko Soane Patita? ʼE mahino, neʼe lotomamahi ʼaupito ia Sesu. ʼE ui fenei ʼi te Tohi-Tapu: “ʼI te logo ʼa Sesu [kua mate ia Soane], neʼe heka leva ki te vaka ʼo alu ki he koga meʼa ke nofo tokotahi ai.” (Mat. 14:10-13) ʼE tou mahino neʼe fia nofo tokotahi ia Sesu. Tokolahi ia tatou ʼe tou fia nofo tokotahi moka tou lotomamahi. Kae neʼe mole feala ke hoko te faʼahi ʼaia. Koteʼuhi neʼe mumuʼa ia he hahaʼi kaugā malie ki te koga meʼa ʼaia. Kotea ʼae neʼe fai e Sesu? Neʼe manatu ki te ʼu meʼa ʼae neʼe ʼaoga ki te hahaʼi pea neʼe ʼofa ia natou. Neʼe ina tokagaʼi ʼe ʼaoga ke fakalotofimalieʼi natou ʼi te faʼahi fakalaumalie pea neʼe tokoni kia natou. Koia, “neʼe lahi te ʼu meʼa neʼe ina kamata akoʼi age kia natou.”—Mko. 6:31-34; Luka 9:10, 11.
7-8. ʼE faʼifaʼitakiʼi feafeaʼi e te ʼu tagata ʼafeā ia Sesu?
7 ’E fa’ifa’itaki’i e te ’u tagata ’afeā ia Sesu. ʼE tou leleiʼia ia te gaue ʼe fai te ʼu tagata ʼafeā maʼa tatou. ʼE lahi te ʼu gaue ʼe natou fai ʼe mole sisio ki ai te kokelekasio. Ohage la, moka leletakiʼi he tehina peʼe ko he tuagaʼane ki te lopitali, ʼe foimo olo fakavilivili ki ai te ʼu tehina ʼe gaue ki te Komite Fakafelogoʼi Mo Te Lopitali. ʼI ʼihi temi, ʼe hoko te ʼu aluʼaga ʼaia ʼi te poʼuli peʼe ko te mafoata. Kae ʼaki tonatou ʼoʼofa ki te tehina peʼe ko te tuagaʼane ʼae ʼe mahaki, ʼe fakamuʼamuʼa e te ʼu tagata ʼafeā ʼofaina ʼaia mo ʼonatou famili ia tonatou ʼu tehina mo tuagaʼane.
8 ʼE toe kau te ʼu tagata ʼafeā ki te laga ʼo te ʼu Fale Fono pea mo ʼihi atu gaue, ʼo toe feia ki te gaue haofaki maʼuli moka hoko mai he tuʼutamaki. ʼE toe fakaʼaogaʼi e te ʼu tagata ʼafeā ʼo tatatou kokelekasio ia he toe temi ki totatou akoʼi, mo totatou fakalotomalohiʼi pea tanatou tokoni mai. ʼE tuha ia te ʼu tehina ʼaia mo ʼonatou famili mo he ʼu fakavikiviki fakamalotoloto. Ke tapuakiʼi e Sehova tanatou faʼahiga manatu lelei ʼaia. ʼE mahino ia, ohage pe ko te tagata fuli, ʼe tonu foki ke fakapotopoto te ʼu tagata ʼafeā. ʼE mole tonu ke lahi fau te temi ʼe natou fakaʼaogaʼi ki te ʼu gaue fakalaumalie kae liʼakina ʼonatou famili.
’E TOU MA’U FEAFEA’I TE MANATU FAKASAKILIFISIO?
9. Ia Filipe 2:4, 5, ko te faʼahiga manatu fea ʼae ʼe tonu ke maʼu e te kau Kilisitiano?
9 Lau ia Filipe 2:4, 5. ʼE moʼoni, ʼe mole tou tagata ʼafeā fuli, kae ʼe feala ke tou akoʼi fuli ke tou faʼifaʼitakiʼi ia te manatu fakasakilifisio ʼa Sesu. ʼE ui ʼi te Tohi-Tapu, “neʼe liliu ai ohage ko he kaugana.” (Flp. 2:7) Kotou manatuʼi te fakaʼuhiga ʼo te palalau ʼaeni. ʼE fai e te kaugana ia meʼa fuli ke fiafia ai tona pule. Ko tatou ko te ʼu kaugana ʼa Sehova pea ʼe tou fia tauhi ʼotatou tehina mo tuagaʼane. ʼE tou fia ʼaoga fuli kia Sehova pea mo ʼotatou tehina mo tuagaʼane. Tou vakaʼi pe ʼe feafeaʼi hatatou fai ia te faʼahi ʼaia.
10. Kotea te ʼu fehuʼi ʼe feala ke tou fai?
10 Kotou vakavaka’i takotou fa’ahiga manatu. Kotou fai te ʼu fehuʼi ʼaeni: ‘ʼE au lotolelei koa ke au fai ni sakilifisio moʼo tokoni ki ʼihi? Kotea anai taku manatu moka kole mai ke au alu ʼo ʼaʼahi he tehina kua matuʼa ʼe nofo ʼi te fale ʼo te kau vaivai peʼe ke au ʼave he tuagaʼane kua matuʼa ki te ʼu fono? ʼE au lotolelei koa ke au kau ki te kau gaue ʼe kumi ki te fakamaʼa ʼo te fale fakatahi peʼe ko te Fale Fono?’ ʼE fiafia ia Sehova moka tou foaki totatou temi mo ʼotatou koloa moʼo tokoni ki ʼihi. Kapau ʼe tou tokagaʼi ʼe tonu ke tou tuputupu ʼi te aluʼaga ʼaia, kotea ʼae ʼe feala ke tou fai?
11. He koʼe ʼe tonu ke tou kole kia Sehova ke tou maʼu ia te manatu fakasakilifisio?
11 Kotou faikole fakamalotoloto kia Sehova. Kapau ʼe kotou tokagaʼi he ʼu aluʼaga ʼe tonu ke kotou tuputupu ai, kae ʼe mole kotou fia fai he ʼu fetogi, kotea ʼae ʼe tonu ke kotou fai? Kotou faikole fakamalotoloto kia Sehova. Kotou palalau fakahagatonu kia te ia. Kotou fakaha kia Sehova te meʼa ʼae ʼe kotou logoʼi pea mo kotou kole age ke ina foaki atu “te fakaʼamu pea mo te malohi.”—Flp. 2:13.
12. Kotea ʼae ʼe feala ke fai e te ʼu tehina tupulaga ʼi te kokelekasio?
12 Kapau ko koe ko he tehina tupulaga, kole kia Sehova ke ina foaki atu te fakaʼamu ʼae ke ke tokoni lahi ki te ʼu gaue ʼi te kokelekasio. ʼI ʼihi fenua, ʼe kaugā malie age te kau tagata ʼafeā ʼi te kau faifekau fakaminisitelio, pea tokolahi te kau faifekau fakaminisitelio kua matutuʼa. Kua toe hahaʼi mai mo natou ʼe hu mai ki te moʼoni. Koia ʼe ʼaoga mai ai he ʼu tehina tupulaga moʼo tokoni ki te taupau ʼo te hahaʼi ʼa Sehova. Kapau ʼe kotou lotolelei ke kotou olo ʼo gaue ʼi he faʼahi pe ʼe kotou ʼaoga ki ai, ʼe kotou fiafia anai. Kotea tona tupuʼaga? Koteʼuhi ʼe kotou fakafiafia anai ia Sehova, ʼe kotou maʼu ai he matagafua ʼe lelei pea ʼe kotou fiafia anai ʼi takotou tokoni ki ʼihi.
Neʼe feholaki te kau Kilisitiano ʼo Sutea ʼo fakalaka ʼi te Vai Tafe ʼo Solotane pea mo olo ki te kolo ko Pela. Ko natou ʼae neʼe natou mumuʼa ki te kolo, ʼe natou tufa te meʼa kai kia natou ʼae neʼe hoki tau age (Vakaʼi te palakalafe 13)
13-14. Kotea ʼae ʼe feala ke tou fai moʼo tokoni ki ʼotatou tehina mo tuagaʼane? (Vakaʼi te pāki ʼo te takafi.)
13 Kotou tokaga’i te ’u me’a ’ae ’e ’aoga ki ’ihi. Neʼe ui fenei e te apositolo ko Paulo ki te kau Hepeleo: “ ʼAua naʼa galo kia koutou te fai ʼo te meʼa ʼae ʼe lelei pea mo vaevae mo ʼihi te meʼa ʼae ʼe kotou maʼu, he ʼe leleiʼia e te ʼAtua te taʼi ʼu sakilifisio ʼaia.” (Hep. 13:16) Neʼe ko he tokoni lelei. Mole faʼa fualoa ki te maʼu ʼo te tohi ʼaia, neʼe mavae te kau Kilisitiano ʼo Sutea mai ʼonatou ʼapi, mo ʼonatou fale gaue pea mo ʼonatou famili ʼae neʼe mole tauhi kia Sehova pea natou ‘kamata feholaki ki te ʼu moʼuga.’ (Mat. 24:16) ʼI te moʼi temi ʼaia, ʼe mahino ia neʼe tonu ke natou fetokoniʼaki. Kapau neʼe natou maʼuliʼi te tokoni ʼa Paulo ke natou fevaevaeʼaki te meʼa ʼae ʼe natou maʼu, neʼe faigafua age tanatou maʼuli fakafaigafua ʼi te koga meʼa ʼae neʼe natou olo ki ai.
14 ʼI te agamahani, ʼe mole fakaha mai e te ʼu tehina mo tuagaʼane ia te ʼu meʼa ʼae ʼe ʼaoga kia natou. Ohage la, kotou fakakaukauʼi age he tehina neʼe mate siʼona ʼohoana pea kua nofo tokotahi. ʼE lagi tou feuiʼaki pe ʼe ʼaoga koa he tokoni ki te tehina ki te teuteuʼi ʼo siʼana meʼa kai, tona feʼaveʼaki pea mo te menasi ʼo tona ʼapi. ʼE lagi mole palalau ki he meʼa he ʼe mole fia liliu ko he kavega ki he tahi. Kae ʼe mahino ia, ʼe fiafia anai mo kapau ko tatou ʼae ʼe tou fakatuʼutuʼu ke tou foaki ia te tokoni ʼae ʼe ʼaoga ki ai. ʼAua naʼa tou manatu ʼe tokoni anai he tahi ki ai peʼe tou atalitali ke hoki ina ui mai te meʼa ʼae ʼe loto ki ai. Kotou fai ia te fehuʼi ʼaeni: ‘Ka na ko au la, ko te tokoni fea ʼae ʼe ʼaoga mai anai kia au?’
15. Kotea ʼae ʼe tonu ke tou fai moka ʼe tou fia tokoni ki ʼihi?
15 Kotou fai he me’a ke ’aua na’a ufiufi te ’u tehina mo tuaga’ane ’i te kole tokoni atu. ʼE kotou iloʼi he ʼu tehina mo tuagaʼane ʼi te kokelekasio ʼe ko tanatou agamahani ko te tokoni ki ʼihi. ʼE natou fiafia tuʼumaʼu ʼi te tokoni. ʼE tou falala kia natou moka tou tau mo he ʼu faigataʼaʼia pea ʼe tou fakaʼamu ke tou hage ko natou. Ko Alan, ko he tagata ʼafeā kua taʼu 40 tupu, ʼe fia tokoni ki ʼona tehina mo tuagaʼane. ʼE ina fakakaukauʼi te faʼifaʼitaki ʼo Sesu pea ina ui fenei: “Neʼe maʼumaʼua ia Sesu, kae neʼe ʼaʼatu te hahaʼi kehekehe kia te ia pea neʼe mole natou ufiufi ʼi te kole tokoni ki ai. Neʼe natou logoʼi tana lototokaga moʼoni kia natou. ʼE au fakaʼamu mo au ke au maʼu te faʼahiga manatu ʼa Sesu pea ke ʼaʼatu mai te hahaʼi kia au, ke au agalelei mo lototokaga.”
16. He koʼe ʼe feala ke tokoni mai te Pesalemo 119:59, 60 ke tou faʼifaʼitakiʼi ia Sesu?
16 ʼE mole tonu ke tou lotovaivai mo kapau ʼe mole tou lava faʼifaʼitakiʼi lelei ia Sesu. ʼE mole feala ki he fanau ako ke ina faʼifaʼitakiʼi agatonu ia te gaue ʼo tana faiako. (Sakp. 3:2) Kae ʼaki tana akoako mai tana ʼu hala pea mo tana faiga ʼae ke ina faʼifaʼitakiʼi lelei tana faiako, ʼe feala ai ke tuputupu te fanau ako. ʼO toe feia pe, kapau ʼe tou maʼuliʼi te ʼu meʼa ʼae ʼe tou ako ʼi tatatou ako takitokotahi, ʼo tou faiga ke tou gaueʼi ʼotatou vaivaiʼaga, ʼe feala ai ke tou faʼifaʼitakiʼi ia Sesu.—Lau ia Pesalemo 119:59, 60.
TE ’U LELEI ’E MA’U MAI TE MANATU FAKASAKILIFISIO
ʼI te temi ʼae ʼe faʼifaʼitakiʼi ai e te kau tagata ʼafeā ia te manatu fakasakilifisio ʼa Sesu, ʼe natou foaki he faʼifaʼitaki lelei ki te kau tupulaga (Vakaʼi te palakalafe 17) *
17-18. Kotea te ʼu fua lelei ʼe tou maʼu mo kapau ʼe tou faʼifaʼitakiʼi ia Sesu?
17 Kapau ʼe tou maʼu he manatu fakasakilifisio, ʼe tou fakalotomalohiʼi ai ʼihi ke natou fai feia mo natou. Neʼe ui fenei e te tagata ʼafeā ʼe higoa ko Tim: “ʼI tamatou kokelekasio, neʼe ʼi ai te ʼu tehina tupulaga neʼe tuputupu lelei pea neʼe fakanofo natou ko he ʼu faifekau fakaminisitelio, pea ko ʼihi kei taʼu veliveli. Koteʼuhi neʼe natou faʼifaʼitakiʼi ia te faʼahiga manatu pea mo te hoholi ʼa ʼihi ki te ʼu gaue. ʼE ko he tokoni lahi ʼe natou foaki ki tamatou kokelekasio pea mo te kau tagata ʼafeā.”
18 ʼE tou maʼuʼuli nei ʼi he malama ko te hahaʼi ʼe natou manatu pe kia natou totonu. Kae ʼe mole feia te hahaʼi ʼa Sehova. Neʼe malave kia tatou te manatu fakasakilifisio ʼa Sesu pea ʼe tou fakatotonu ke tou mulimuli ki tana faʼifaʼitaki. ʼE mahino ia, ʼe mole feala ke tou mulimuli agatonu ki ʼona lakaʼaga, kae ʼe feala ke tou “mulimuli fakalelei ki ai.” (1 Pet. 2:21) ʼI tatatou faiga ʼae ke tou mulimuli fakalelei ki te faʼifaʼitaki ʼo Sesu, ʼe tou toe iloʼi mo tatou te fiafia ʼae ko te ʼofainaʼi ʼo tatou e Sehova.
KATIKO 13 Ko Totatou Faʼifaʼitakiʼaga Ko Kilisito
^ Neʼe fakamuʼamuʼa tuʼumaʼu e Sesu ia te ʼu meʼa ʼae ʼe ʼaoga ki ʼihi ʼi te meʼa ʼae ʼe lelei kia te ia. ʼI te alatike ʼaeni, ʼe tou vakaʼi anai pe ʼe lava mulimuli feafeaʼi ki tana faʼifaʼitaki. ʼE tou toe vakaʼi anai pe ʼe tou maʼu feafeaʼi anai he ʼu lelei ʼe tologa ʼaki tatatou maʼu te manatu fakasakilifisio ʼa Sesu.
^ FAKAMATALA ʼO TE ʼU PĀKI: Ko Dan, ko he tehina tupulaga ʼe ina tokagaʼi te faʼahiga ʼaʼahi e te ʼu tagata ʼafeā ʼe toko lua ia tana tamai ʼi te lopitali. ʼE malave kia Dan ia te faʼifaʼitaki fonu ʼi te ʼofa ʼo te ʼu tagata ʼafeā. ʼE lototokaga ki te ʼu meʼa ʼae ʼe ʼaoga ki ʼihi ʼi te kokelekasio. Ko te tahi tehina tupulaga, ko Ben ʼe sio ki te tokoni ʼa Dan ki ʼihi. ʼE fakalotomalohiʼi e te faʼifaʼitaki ʼa Dan ia Ben ke tokoni ki te fakamaʼa ʼo te Fale Fono.