1. მუ ჯგირ დამოკიდებულება რე იეჰოვაშ ხალხ შქას?

ბრელ ხანიშ წოხოლე ნაწინასწარმეტყველებ რდჷ, ნამდა ღორონთიშ ხალხ იესოშ ხემძღვანელობათ მზადყოფნათ გიშელენდჷ დო ემსახურებუდ იეჰოვას (ფსალმ. 110:3). თე წინასწარმეტყველება ამდღა ისრულებ. ირ წანას იეჰოვაშ მსახურეფ მთელ გურით უთმენა მილიონობით საათის ქადაგებაშ საქმეს. თინეფ თეს მუნეფიშ სურვილით დო უფასოთ ორთნა. თეს გეძინელ, თანამორწმუნეეფიშ ფიზიკურ, ემოციურ დო სულიერ საჭიროებეფშე ზრუნენა. დანიშნულ ჯიმალეფ ბრელ დროს უთმენა კრებაშ დავალებეფიშ მომზადებას დო თანამორწმუნეეფიშ ჭყიშუას. მუშენ ორთნა თეს? მიზეზ ჸოროფა რე — იეჰოვაშ დო მოყვასიშ ჸოროფა (მათ. 22:37—39).

2. მუჭოთ რომაელეფიშ 15:1—3-ს რე ეჭარილ, მუ მაგალით დომტეს იესოქ?

² იესო მუშ საჭიროებეფშე უმოსო შხვეფიშ საჭიროებეფშე ზრუნენდჷ. ჩქი ირნერო ვოცადუთ, მივაჸუნათ თიშ მაგალითის (წეკითხით რომაელეფიშ 15:1—3). თიშ მაგალითიშ მეჸუნა კურთხევეფს მომღანა. იესოქ თქუ: „შხვაშა ჯგირიშ კეთებას უმოს მეტ ბედნერობა მოუღ, ვინემ მეღებას“ (საქ. 20:35).

3. მუ იჸუაფ თე სტატიას გარჩიებულ?

³ თე სტატიას ქობძირუნთ ნამთინე მხარეს, მუთ იესოქ აკეთ შხვეფიშ მახვარებელო დო გუვარჩიენთ, ჩქი მუჭო შემლებნა, მივაჸუნათ თიშ მაგალითის. თეს გეძინელ,  გუვარჩიენთ, მუჭო შემლებნა მიღდან უმოს სურვილ, ვემსახურათ შხვეფს.

4. მუჭო გიორინუანდჷ იესო შხვეფიშ საჭიროებეფს მუშ საჭიროებეფშე წოხოლე?

⁴იესო თიმწკუმა ხოლო ოხვარუდ შხვეფს, მუჟამსით შულადირ რდუ. დეფიქრით, მუჭო მიქცუ იესოქ, მუჟამსით თიშა ბრელ ხალხიქ მერთჷ მოხვარაშ მიოღებელო. თინა მთელ სერს ლოცულენდჷ დო, მუშო ოკო რაგად, შულადირ იჸიდ. მარა ხალხ ქოძირუნ, ეცოდ თინეფქ. თიქ ხვალე ლეხეფ ვა დასქილიდუნ, მუშ სიტყვეფით ხოლო ელუკინ თინეფს გურშა დო არძაშ უმოს ცნობილ ქადაგება — გვალას ქადაგება — თქუ (ლუკ. 6:12—20).

5. მუჭო მეჸუნა ოჯახიშ დუდეფ იესოშ დუდგინოდვალირობაშ მაგალითის, მუჟამსით შულადირეფ რენა?

⁵მუჭო შეულებნა ოჯახიშ დუდეფს, მიაჸუნან იესოშ მაგალითის. წერმიდგინით თეშნერ სიტუაცია: მთელ დღას მუშობათ შულადირ ოჯახიშ დუდ ირთუ ჸუდეშა. ონჯუას თიქ ოჯახურ თაყვანიშცემა ოკო ჩატარას. მარა მანგარ გინოშულადირ რე დო ფიქრენს, ხომ ვეგნოდვას თინა. თეშ უმკუჯინუო, თინა იეჰოვას თხინს ძალას, ნამდა შეიალებუას თეშ კეთებაქ. იეჰოვა პასუხენს თიშ ლოცვას დო ოჯახურ თაყვანიშცემა, მუჭოთ ირონ თეშ, ასე ხოლო იტარებ. ბაღანეფ მნიშვნელოვან მუდგარენს გურაფლენა თე ონჯუას. თინეფ ორწყენა, ნამდა მუნეფიშ მშობლეფშო მთავარ სულიერ საკითხეფ რე.

6. ქიმიჸონით მაგალით, მუჭო გიმურთუნდჷ იესო დროს შხვეფიშ მოხვარას.

⁶იესოს ვანარღუდ მუშ დროშ შხვაშა დათმება. შეილებნანო წერმიდგინათ, მუს იგინანდჷ იესო, მუჟამსით ქიგეგ, ნამდა მუშ მეგობარ იოანე ნათლიშმცემელ დოჸვილეს. თინა მანგარ მოწყინაფილ იჸუაფუდ. ბიბლია იჩიებ: „თე ამბე ქიგეგუნ, იესოქ ნავით კოჩ ვა რენ ფერ ადგილშა მიდართჷ, ნამდა ხვალე ქოჸოფედკო“ (მათ. 14:10—13). ჩქი მარჩქილენა, მუშენ ოკოდ იესოს ხვალე რინა. ჩქინდე ბრელს მწუხარებაშ დროს ხვალე რინა მისხუნნა. მარა იესოს თექ ვეშიალებუ, მუშენდა თიშ მეულაშახ თე ადგილს ხალხიქ დიშაყარ. მუჭო მიქცუ  იესოქ? თინა ფიქრენდჷ თე ხალხიშ საჭიროებეფშე დო „გურქ დაჭვჷ თინეფიშ გურშენ“. იესოს არჩქილედ, ნამდა თინეფს მოხვარა დო გურიშექექაფა ოსაჭირდეს დო ხეთეშე ქეშუდირთჷ თე საქმეს. თის თე ხალხ ხვალე მუსხირენ საკითხიშ ენწყუმათ ვემკუსურებუნ, ბრელ მუდგარენიშ გურაფა ქუდუჭყჷ თინეფს (მარ. 6:31—34; ლუკ. 9:10, 11).

7, 8. მუჭო მეჸუნა უხუცესეფ იესოშ მაგალითის, მუჟამსით თანაქრისტიანს მოხვარა ოსაჭირ?

⁷მუჭო მეჸუნა მოჸოროფე უხუცესეფ იესოშ მაგალითის. ჩქი მანგარო ვაფასენთ თი ხანდას, ნამდგას დუდგინოდვალირ უხუცესეფ ჩქინ საჯგირობუოთ ორთნა. თე საქმეეფშე უმენტაშის კრება ვარწყე. მაგალთო, საავადმყოფოეფწკუმა თანამშრომლობაშ კომიტეტის მსახურენან თი ჯიმალეფ ხეთეშე ოხვარნა თანამორწმუნეეფს. ხშირას თინეფს შქა სერს აფნა თანამორწმუნეეფშა მახვარებელ. თე უხუცესეფს და დო ჯიმალეფიშ გაჭირება გურიშ ხოლოშა მეუღნა დო მუნეფიშ ოჯახიშ წევრეფ ხოლო ელურენა, ნამდა შხვეფიშ ინტერესეფ პირველ ადგილს ქიგიორინუან.

⁸ უხუცესეფ მონაწილებას ღებულენა დარბაზეფიშ დო შხვა შენობეფიშ შენებას დო სტიქიურ უბედრობეფით დაზარალებურეფიშ მოხვარას. თეწკუმა ართო, თინეფ ქიანაშ დროს მიკახარჯენა კრებას ჩქინდა მითითებეფიშ მოჩამას, გურიშელაკინას დო ალარნას. თე ჯიმალეფ მუნეფიშ ოჯახწკუმა ართო ჩქინდე მთელ გურით ცქვაფას იმსახურენა. მუშო ოკო რაგად, მუჭოთ არძას თეშ უხუცესეფს ხოლო ოსაჭირნა გაწონასწორება. თინეფქ თიზმა დრო ოკო ვა დუთმან თეოკრატიულ საქმეეფს, ნამდა ოჯახშო დროქ ვა დასქიდან.

9. მუჭოთ ფილიპელეფიშ 2:4, 5-ის ჭარჷ, მუნერ დამოკიდებულება ოკო უღდან ქრისტიანეფს?

⁹ წეკითხით ფილიპელეფიშ 2:4, 5. ჩქი არძა ვა ვორეთ უხუცესეფ, მარა არძას შემლებნა, მივაჸუნათ იესოშ დუდგინოდვალირობაშ მაგალითის. ბიბლია იჩიებ, ნამდა თიქ „მონას ქაგურ“ (ფილ. 2:7). ძვირფას მონა ვარდა მსახურ, ირნერ საშვალებას გორუნს, ნამდა გურ გუხარას მუშ ბატონს. მუჭოთ იეჰოვაშ მონა დო და დო ჯიმალეფიშ მსახურ, მუშო ოკო რაგად, გოკოდან იჸი, ხოლო უმოს მეტ გაკეთათ იეჰოვაშო დო და დო ჯიმალეფშო. თეშ კეთება შეილებნა თუდო მოჩამილ რჩევეფიშ გიმორნაფათ.

10. მუ ოკო ბკითხათ ჩქინ დუდის?

¹⁰გეგმირკვით თქვან დამოკიდებულებეფ. დეფიქრით თეცალ კითხვეფშე: „ქუვორექო მზათ შხვეფიშ მახვარებელო მსხვერპლშა მიდაფრთე? მუჭო მიფქციებუქ, მუჟამსით ფთხინა, ხანშამიშულირ ჯიმა ქიბძირუე მოხუცებულეფიშ თავშესაფარს ვარდა ხანშამიშულირ და კრებაშა ქიმიპჸონე? ქუვორექო მზათ, მონაწილება მიბღე საკონგრესო ტერიტორიაშ ვარდა დარბაზეფიშ დონწყუალა დო მიკოლუაფას?“. იეჰოვას ოხიოლ, მუჟამსით მუშა მეძღვინელ მსახურეფ სარგებელიშ მეღებაშ უმშო ოცადნა, მუნეფიშ დრო დო ენერგია შხვეფიშ მახვარებელო გეგმირინუან.

11. მუჭო მიმეხვარებნა ლოცვა დუდგინოდვალირობაშ გავითარებას?

¹¹მთელ გურით ქილოცით. შილებე ორწყედათ, ნამდა მუდგარენ მხარეეფს გაუჯგუშება გოსაჭირნა, მარა თეშ კეთებაშ სურვილ ვაიღნა. თე შემთხვევას ალალას ქეჩით იეჰოვას, მუს გინაფლენთ დო ქოთხით, ქიმერჩან სურვილ დო მოქმედებაშ ძალა (ფილ. 2:13).

12. მუჭო შეულებ ახალგაზრდა ნათილ ჯიმას, მეხვარას მუშ კრებას?

¹² ახალგაზრდა ნათილ ჯიმა ქორეთ-და, ქოთხით იეჰოვას, გოირჩქინან სურვილ, უმოსო მემსახურათ თქვან კრებას. ნამთინე ქიანას უხუცესეფ უმოს რენა, ვინემ მომსახურეეფ დო თე მომსახურეეფიშ უმენტაშ ახალგაზრდა ვა რე. მუთ უმოსო ირდუ იეჰოვაშ ორგანიზაცია, თით უმოს მეტ ახალგაზრდა ჯიმა რე საჭირო იეჰოვაშ ხალხიშ მახვარებელო. მსახურებას არძანერ საქმეშ ოკეთებელო მზათ ქორეთ-და, თენა ბედნერობას მოიღანა. თეშნერო გურს გუხარენთ იეჰოვას დო გაღვენნა ჯგირ სახელ ჯიმალეფიშ თოლს. თეს გეძინელ, იჸუაფუთ კმაყოფილეფ, მუთ შხვეფიშ მოხვარას მოჸუნს.

13, 14. პრაქტიკულო მუშ კეთება შემლებნა ჩქინ და დო ჯიმალეფიშ მახვარებელო? (ქოძირით სურათ გალენ გვერდის)

¹³ყურადღებათ ქიდეკვირით, მუ ოსაჭირნა შხვეფს. მოციქულ პავლექ ებრაელეფს ელუჩ: „ვემიოტუათ შხვეფშა ჯგირიშ კეთება დო განაწილება, მუშენდა ღორონთის გურს უხარენს თეცალ მსხვერპლ“ (ებრ. 13:16). თენა პრაქტიკულ რჩევა რე! თე წერილიშ მეღებაშე ბრელ ხანს ვემკურთუმ დო იუდეველ ქრისტიანეფს დატებელქ აჸუეს ჸუდექ, სამუშაქ, ურწმუნო ნათესეეფქ დო ონტებელქ აჸის გვალაშა (მათ. 24:16). თე დროს თინეფს მანგარო ოსაჭირდეს ართიანიშ მოხვარა, მარა ულირს მუთ უღდესინ თის ართიანს ქუნაწილენდეს-და, ცხოვრებაშ ახალ წესიშ მერჩქვანა ხოლო ვა გუჭირდუდეს.

¹⁴ ჩქინ და დო ჯიმალეფქ შილებე ირო ვამწუან, მუ ოსაჭირნა. მაგალთო, ჯიმას, ნამდგას ოსურქ უღურ, შილებე  მოხვარა ოსაჭირდას ოჭკუმალიშ კეთებას ვარდა ჸუდეშ საქმეეფს დო თენა ვამწუან, მუშენდა ვაკო ჩქინ შეწუხება. მარა თინა მანგარ მარდულ იჸუაფ, მუჟამსით ჩქინით გეგნობჭყვიდუნთ, ქიმვეხვარათ თის. ჩქი ვა ფიფქრენთ, ნამდა თის შხვა მიდგარენ ქიმეხვარებ დო ქიგმახვილეს-და, აშო ქომწინა. ქოკითხით თქვან დუდის: „თიშ ადგილს მა ქუვორდკონ, მუნერ მოხვარას დუვაფასენდ?“.

15. მუ ოკო ვაკეთათ, დუდგინოდვალირეფ ქუვორდათინ?

¹⁵ირო მზათ რდათ შხვეფიშ მახვარებელო. მუშო ოკო რაგად, იჩინენდათ იჸი კრებას თიცალ და დო ჯიმალეფს, მით ირო მზათ რენა შხვეფიშ მახვარებელო. თინეფ დღას ვა მოგინაფუანა, ნამდა ვაწუხენთ. მიჩქნა, მუთუნქ გამჭირდეს-და, აუცილებერო ქელამდირთუნა. მოკონა, ჩქი ხოლო თინეფცალ ვორდათ, მით ირო მზათ რენა შხვეფიშ მახვარებელო. 40 წანას გინოჩილათირ უხუცეს ალან ოცად, ნამდა შხვეფს ვა გუჭირდან თიშა მოულაქ დო მოხვარაშ თხუალაქ. იესოშ მაგალითშე დაფიქრებაშ უკულ თინა იჩიებ: „იესოს ბრელ საქმე უღუდ, მარა არძანერ ხანიშ ადამიან თიშა თავისფალო მიშჷ დო მოხვარას თხინდჷ. თინეფიშ თოლს იესო რდჷ პიროვნება, მით მართალო ზრუნენდჷ თინეფშე. მა მთელ გურით მოკო, მიღდას იესოცალ დამოკიდებულება დო შხვეფ მიჩინენდან, მუჭოთ უშუალო, მეგობრულ დო მზრუნველ პიროვნებას“.

16. მუჭო მოხვარნა ფსალმუნიშ 119:59, 60-იშ გიმორნაფა, უჯგუშო მივაჸუნათ იესოშ მაგალითის?

¹⁶ იესოშ მაგალითშა სრულყოფილო ვემმაჸუნნეს-და, თეშ გურშენ გურქ ოკო ვა გომტირხან (იაკ. 3:2). მაგურაფ მახანტალს ზუსტას მუშ მასწავლებერცალ  ნახანტა ვეგშალე, მარა თინა გეუჯგუშებ, მუჟამსით მუშ შეცდომეფშე ქიდიგურუანს დო მასწავლებერცალო ხანტუას უმოსო ქეშეცადებ. ბიბლიაშე მუდგას ბგურაფლენთინ თის, გეგმიბრინუანთ დო გაუჯგუშებას ქივეცადებუთ-და, უმოს უჯგუშო ქიმვაჸუნუთ იესოშ მაგალითის (წეკითხით ფსალმუნიშ 119:59, 60).

17, 18. იესოშ დუდგინოდვალირობაშ მაგალითის ქიმვაჸუნუთ-და, მუ კურთხევეფს მიბღენთ?

¹⁷ ჩქინ დუდგინოდვალირობაქ შილებე შხვეფს ხოლო გინაჭყვიდირაფუას თეშნერო მოქციება. ართ უხუცეს ტიმ იჩიებ: „ჩქი პჸუნა ახალგაზრდა ჯიმალეფ, მით სულიერო წიმი მეულა დო მომსახურეთ ინიშნებნა. თინეფშე ნამთინე მანგარ ახალგაზრდა ინიშნებ, მუშენდა შხვეფიშ მომსახურებაშ ჯგირ მაგალითის ორწყენა დო ოკონა, მიაჸუნან. თე ახალგაზრდა ჯიმალეფ ოხვარნა ჩქინ კრებას დო ხუჯის უკინენა უხუცესეფს“.

¹⁸ ჩქი ფცხოვრენთ ქვეყნიერებას, ნამუთ ეგოისტობათ რე ეფშა, მარა იეჰოვაშ ხალხ ვაგჷ თინეფს. ჩქი მანგარო მობწონა იესოშ დუდგინოდვალირობა დო გინოჭყვიდილ მაფნა, მივაჸუნათ თიშ მაგალითის. მართალ რე, თიშ ნაკვალუშ სრულყოფილო გეჸუნა ვეშემლებნა, მარა ვოცადუთ, თიშ ზუსტას გეჸუნას (1 პეტ. 2:21). იესოშ დუდგინოდვალირობაშ მაგალითიშ მეჸუნას ირნერო ქივეცადებუთ-და, ჩქი ხოლო ქიბგინანთ ხიოლს, ნამუთ იეჰოვაშე მოწონაშ მეღებას მოჸუნს.