1. Ino toetsain̈y tsara anan̈any vahoakany Jehovah?

RANGO ela, Baiboly efa nan̈ambara fa vahoakany Zan̈ahary ‘hanoloten̈a antsitrapô’ amy fanompoan̈a. Miezaka iro man̈araka toromariky amezany Kristy. (Sal. 110:3) Tanteraka aminy andra iziô faminanian̈a io. Isaka taon̈o, panompony Jehovah mazoto man̈ano asa fitorian̈a; ke antapitrisany lera lanindro han̈anaovan̈a asa io. Amy sitrapôndro iro man̈ano izio, fa tsy ifain̈a vola. Manokan̈a fotoan̈a koa iro mankahery ndreky man̈ampy piaramanompo amindro izikoa fa misy raha ilandro fan̈ampian̈a. Mifen̈y koa iro mankafatatra finoan̈any piaramanompo amindro. Maro koa lera laniny antipan̈ahy ndreky pan̈ampy amy fanompoan̈a han̈omanan̈a anjara amy fivorian̈a ndreky fitsidihan̈a ondry. Fitiavan̈a Jehovah ndreky fitiavan̈a piaramanompo mahavy panompony Jehovah man̈ano raha jiaby zen̈y.​—Mat. 22:37-39.

2. Izikoa Romanina 15:1-3 zahavan̈a, ino modely nambelany Jesosy?

² Jesosy nitady raha mahatsara olo, alohany ninany. Mifen̈y atsika man̈ano zay vitantsika han̈arehan̈a modelinany. (Vakia Romanina 15:1-3.) Izikoa atsika man̈ano zen̈y, ho maro raha tsara miambin̈y atsika. Jesosy nivolan̈a: ‘Man̈amia raha olo ten̈a mampasambatra tozay mahazo raha baka aminolo.’​—Asa. 20:35.

3. Ino aby raha hianarantsika amy lahatsoratra ty?

³ Himpody handiniky raha sasany nataony Jesosy han̈ampian̈a olo atsika amy lahatsoratra ty. Hizahavantsika koa  akory mety hangalantsika tahaka izy, avio akory atao baka atsika hahaihazoto han̈ano raha mahatsara olo fo.

4. Akory nan̈aboahany Jesosy fa nitady raha mahatsara olo alohany ninany izy?

⁴Jesosy ndray efa kajo, izy mbala nan̈ampy olo fo. Tandraraiky, Jesosy nandeha tamy bongo araiky zay; mety narikitry Kapernaomy izio. Tan̈y izy nivavaka nampikiakandra. Mety kajo mare izy taminio, kanefa nisy olo marobe nan̈aton̈o izy. Akory nataony? Nahinakinaka mare izy nahita iro, fotony nisy tamindro io masikiny avio sasany ndraiky marary. Jesosy tsy basiny nampajanga iro fo fa, mbala nan̈ano kabaro ten̈a nankahery iro koa izy. Toriteny Tan̈abony Bongo ahaizanolo maro izio.​—Lioka 6:12-20.

5. Akory mety han̈arehany lohany fianakavian̈a modely nambelany Jesosy, intsaka eky lera izy lonja mare?

⁵Akory mety han̈arehany lohany fianakavian̈a modely nambelany Jesosy? Miniminia hely baka ty: Lonja mare lohany fianakavian̈a araiky, koa fa baka niasa hariva. Efa tseky hajanony Fotoampivavahan̈any Fianakavian̈andro taminy alin̈y io. Nahatsara izy, nivavaka antsendriky izy baka Jehovah han̈amia izy angovo. Nivaliany Jehovah vavakanany, ke vitany fo nitariky fotoampivavahan̈andro. Ino raha maventy mety nianarany zanakandro taminy alin̈y io? Fanompoan̈a Jehovah ny raha ten̈a maventy tamy raimandrenindro.

6. Man̈ameza ohatra ahitan̈a fa nahafoe fotoan̈a han̈ampian̈a olo i Jesosy.

⁶Nisy fotoan̈a Jesosy nila nitokan̈a, fa izy mbala nahafoe fotoan̈a fo han̈ampian̈a olo. Miniminia hely baka raha tsapany Jesosy taminizy naharen̈y fa nivonen̈a namany araiky, Jaona Pan̈ano Batisa! Misaora nalahelo mare i Jesosy. Karaha ty koran̈iny Baiboly: ‘Koa fa ren̈iny Jesosy fa nivonen̈a i Jaona, lôso Jesosy niondran̈a sambo nandeha nitady plasy mitokan̈a.’ (Mat. 14:10-13) Normaly tsarabe izikoa izy tihitokan̈a hely. Maro amintsika iziô tihitokan̈a hely karaha zen̈y izikoa fa an̈atiny alahelo. Kanefa, tsy nahavita nan̈ano zen̈y i Jesosy, fotony efa navy tan̈y talohanany iro olo aby io. Nahinihiny ma izy? Ehe. Ndray izy aby ‘nahinakinaka’  iro! Nieritreritry raha mahatsara iro fo izy. Hainy Jesosy fa nila fan̈ampian̈a ndreky fampahirezan̈a baka amy Jehovah iro, ke direkty nan̈ano raha izy han̈ampian̈a iro. ‘Nanomboko nampianatra iro raha maro izy.’​—Mar. 6:31-34; Lioka 9:10, 11.

7-8. Man̈ameza ohatra ahitan̈a fa be fitiavan̈a karaha Jesosy iro antipan̈ahy aby io, lera misy piaramanompo mila fan̈ampian̈a.

⁷Akory mety han̈arehany antipan̈ahy be fitiavan̈a modely nambelany Jesosy. Maresaka asandro antipan̈ahy aby io! Ankasitrahintsika mare iro, fotony iro tsy tia ten̈a fa mitady fomba han̈ampian̈a atsika fo. Maro aminy asa ataondro io tsy hitanolo amy fiangonan̈a aby. Ohatra iziô, izikoa fa misy piaramanompo tafiditry lopitaly ke mila fan̈ampiany Komity Mifandray amy Lopitaly, tsy mijijy tamban̈a foeky iro rahalahy aby io, fa direkty man̈ampy. Matetiky efa alin̈y be iro avoakaiky amy raha karaha zen̈y! Ino mahavy iro antipan̈ahy tiantsika aby io ndreky fianakavian̈andro, mitady raha mahatsara piaramompo alohany nindro? Fotony iro mahinakinaka amy raha mahazo piaramanompo amindro.

⁸ Man̈ampy amy fan̈oren̈ana Tran̈o Fivorian̈a ndreky man̈ampy pitory amy tany andalaovany antambo koa iro antipan̈ahy aby io. Mandany lera maro koa iro hampianaran̈a atsika ndreky hankahirezan̈a atsika. Ke vain̈y deraintsika iro rahalahy jiaby io ndreky fianakavian̈andro. Irarian̈a Jehovah hitahy iro, fotony iro manan̈a toetsain̈y tsara! Fa ndray zen̈y, iro antipan̈ahy aby io mila mahay mandanjalanja, miran̈a atsika fo. Iro tsy tokony handany fotoan̈a be loatra aminy asany fiangonan̈a, tsao tsy ho hisy fotoan̈a eky iro hikarakaran̈a fianakavian̈andro.

9. Eraka raha koran̈iny Filipianina 2:4, 5, ino toetsain̈y tokony hanan̈any Kristianin̈y jiaby?

⁹ Vakia Filipianina 2:4, 5. Atsika jiaby samby mety mangala tahaka Jesosy ndreky mitady raha mahatsara olo alohany nintsika, fa tsy antipan̈ahy fo. Koran̈iny Baiboly fa ‘nangala plasiny panompo’ i Jesosy. (Fil. 2:7) Ino raha ianarantsika baka aminy andininy io? Diniha baka! Panompo zen̈y tokony hitady raha hamparavoravo tômponany. Panompony Jehovah ndreky panompondro rahalahintsika aby io atsika, ke tiantsika izikoa ho azony Jehovah hampiasain̈a fo atsika sady ho azony piaramanompo tavandrain̈a. Han̈ampy anao han̈ano zen̈y sosokevitry man̈araka aby ty.

10. Ino aby fan̈ontanian̈a mila dinihintsika?

¹⁰Diniha toetsain̈inao. Man̈ontania ten̈a karaha ty: ‘Zaho ma mba vôn̈ono hahafoe fotoan̈anaka ndreky angovonaka han̈ampian̈a olo? Ohatra, akory izikoa misy antipan̈ahy man̈iraka zaho hamangy rahalahy araiky matoe antran̈onany, na hitondra ranabavy araiky matoe ampivorian̈a? Asa zaho mba vôn̈ono han̈adio Tran̈o Fivorian̈a na hikobaby izio?’ Taminy atsika nanokanten̈a tamy Jehovah, atsika nampan̈anten̈a izy fa hampiasa raha jiaby anan̈antsika hanompoan̈a izy. Ke ho ravoravo Jehovah izikoa atsika tsy tia ten̈a, fa mampiasa fotoan̈antsika, angovontsika ndreky fanan̈anantsika han̈ampian̈a olo. Izikoa hitantsika fa misy raha mila ankatsaraintsika, ino raha mila ataontsika?

11. Nan̈ino anao ten̈a mila mivavaka izikoa tsapanao fa anao tsy mazoto man̈ampy olo?

¹¹Mivavaha amy Jehovah amy fô jiaby. Izikoa tsapanao fa mbala misy fitiavanten̈a hely aminao, kanefa anao tsy ten̈a vôn̈ono hiova, mivavaha amy fô jiaby. Ambarà izy ny marin̈y. Koràn̈a aminany raha tsapanao. Ino antony? Fotony Jehovah afaka man̈ampy anao ‘han̈iry ndreky hahazo angovo’ han̈anaovan̈a zen̈y.​—Fil. 2:13.

12. Ino raha mety hataony rahalahy tanora vita batisa han̈ampian̈a fiangonan̈a?

¹² Izikoa anao rahalahy tanora vita batisa, iangavia Jehovah han̈ampy anao han̈iry han̈ampy piaramanompo fo. Amy tany sasany, antipan̈ahy maromaro tozay pan̈ampy amy fanompoan̈a, ary ankamarozany pan̈ampy amy fanompoan̈a efa mahazoazo taon̈o. Kanefa mahaimandroso fo fandaminan̈a, ke mila rahalahy tanora maro atsika han̈ampy antipan̈ahy hikarakara raha ilainy vahoakany Jehovah. Izikoa anao vôn̈ono hanompo amy zay tany ilàn̈a anao, ho ravoravo anao. Nan̈ino? Fotony anao hahazo sitraka amy Jehovah. Ho tsara laza koa anao sady ho afapô, fotony anao tia man̈ampy olo.

13-14. Ino raha mety hataontsika han̈ampian̈a piaramanompo? (Zahava sary amy fon̈ony gazety ty.)

¹³Diniha ino raha manahiran̈a piaramanompo, baka io ampia iro. Karaha ty ho Paoly tamy Kristianin̈y ta Jodia: “Aza man̈adin̈a man̈ano ny tsara ndreky mandrasa raha aminolo, fotony sôron̈o karaha zen̈y ten̈a mamparavoravo Zan̈ahary.” (Heb. 13:16) Tsy hitanao tsara torohevitry zen̈y? Tsy ela tafarany nazahoandro Kristianin̈y ta Jodia taratasy nalefany Paoly io, iro tsy maintsy niala tran̈ondro, asandro, ndreky havandro tsy panompony Jehovah ke nandeha ‘nilefa tamy bongo.’ (Mat. 24:16) Ten̈a nila nifan̈ampy mare iro tamy zen̈y. Tsy sarotro tamindro niatriky raha zen̈y, izikoa rango talohanizio iro efa zatra nan̈araka torohevitriny Paoly nan̈iraka iro hifan̈ampy in̈y.

¹⁴ Tsy voatery ho mora amy rahalahy na ranabavintsika aby io hivolan̈a amintsika raha  ilaindro. Ty misy ohatra: Malahelo mare rahalahy araiky maty vady. Maro raha mety ilàny fan̈ampian̈a. Ohatra, olo handokinany, hitondra izy amy tomôbily, na olo han̈ano asa hafa antran̈onany. Mety tsy hasaky hangataka fan̈ampian̈a amintsika izy, fotony izy tsy tihampanahiran̈a atsika. Fa izikoa atsika tsy miambin̈y izy hangataka fan̈ampian̈a fa direkty man̈ampy, ho ravoravo mare izy. Aza mieritreritry foeky fa tsy maintsy misy olo hafa fo han̈ampy izy izikoa anao tsy han̈ano, avio aza mihevitry fa tsy maintsy hivolan̈a fo izy koa fa setry. Diniha: ‘Izikoa zaho avoa raha mahazo izy io, ino raha tiako hatao aminaka?’

15. Ino raha mila ataontsika izikoa atsika tihan̈ampy olo?

¹⁵Ataova raha hahavy olo tsy havozo anao. Mety mahay rahalahy na ranabavy tia man̈ampy olo donko anao. Mifen̈y fo iro man̈ano raha hahavy atsika tsy hahatsapa fa man̈elingelin̈y iro atsika. Haintsika fa iro vôn̈ono han̈ampy atsika fo isaka atsika mila iro, ke mba tihan̈ano karaha zen̈y koa atsika. Antipan̈ahy kadiriny 40 taon̈o i Alan. Tsy tiany hihafahafa aminany foeky piaramanompo. Karaha ty nambarany rahalahy io momba toetriny Jesosy: “Izy maro asa, kanefa tia izy aby na tsaiky na olobe, avio tsy navozo foeky iro nangataka fan̈ampian̈a taminany. Haindro fa Jesosy ten̈a tia iro. Ke zaho mba tiako ho mora atôn̈iny sady be fitiavan̈a, karaha Jesosy.”

16. Ino raha han̈ampy atsika han̈araka marikitry modeliny Jesosy? (Salamo 119:59, 60)

¹⁶ Tsy ho vitantsika han̈araka amy fomba feno modely nambelany Jesosy. Kanefa tsy tokony hamparivan̈a atsika raha zen̈y. (Jak. 3:2) Pianatra tsy mety hitovy fahaizan̈a amy papianatranany. Fa izikoa pianatra io mifen̈y mare mangala tahaka papianatranany, hitombo fo raha hainy. Karaha zen̈y koa atsika.  Ho vitantsika fo han̈araka marikitry modeliny Jesosy, izikoa atsika man̈ano raha mifan̈araka amy raha nianarantsika tamy fianaran̈a manokan̈a nataontsika, sady mifen̈y fo mankatsara fomba fianarantsika.​—Vakia Salamo 119:59, 60.

17-18. Ino hatsaran̈a ho azontsika izikoa atsika mitady raha mahatsara olo fo, karaha nataony Jesosy?

¹⁷ Izikoa atsika tia man̈ampy olo, manjary tihan̈ano karaha zen̈y koa olo hafa. Karaha ty ho Tim, antipan̈ahy araiky: “Misy rahalahy sasany mbala tanora hely efa panampy amy fanompoan̈a. An̈isany antony araiky mahavy zen̈y, iro mahita olo tia man̈ampy olo, ke iro tihan̈ano karaha zen̈y koa. Man̈ampy fiangonan̈a mare ezaka ataondro rahalahy tanora aby io, sady man̈ampy antipan̈ahy koa.”

¹⁸ Tia ten̈a mare ankamarozanolo amy donia ty. Fa panompony Jehovah ndraiky tsy karaha zen̈y. Tapakevitry hangala tahaka Jesosy atsika, fotony nanohin̈y fôntsika mare mahay fa izy tia nan̈ampy olo. Marin̈y ndraiky fa tsy ho vitantsika han̈araka amy fomba feno dianany, kanefa ho vitantsika fo ‘han̈araka marikitry dianany.’ (1 Pet. 2:21) Ary atsika koa mangala tahaka Jesosy ke mitady raha mahatsara olo fo alohany nintsika, ho ravoravo mare atsika fotony ankasitrahiny Jehovah.