NGANI JAKULIJGANYA 9
Tumsyasyeje Yesu Mwakwatumichila Ŵane
“Kupeleka kukumsampa upile mundu kulekangana ni kupochela.”—MASE. 20:35.
NYIMBO NA. 17 “Ngusaka”
YACHITULIJIGANYE *
1. Ana ni yindu yambone yapi yakusatenda ŵakutumichila ŵa Yehofa?
YAKA yejinji yipiteyo, Baibulo jasasile chile kuti ŵandu ŵa Mlungu “tachilipeleka achimsyene” pakumtumichila Yehofa mwakulongoleledwa ni Mwanache jwakwe. (Sal. 110:3) Maloŵega gakukwanilichikwa masiku agano. Chaka chilichose, ŵakutumichila ŵa Yehofa akusamalila ma awala gejinji ali mkulalichila. Jemanjaji akusatenda yeleyi mwakulipeleka soni akusakamulichisya masengo yindu yawo. Akusapatasoni ndaŵi jakwakamuchisya achimjawo mwakuchilu soni mwausimu. Abale ŵakwete udindo akusamalila ndaŵi jejinji ali mkukosechela misongano soni kutenda maulendo ga ubusa. Ana chichi chachikusichatendekasya jemanjaji kukamula masengo gosopega? Akusatenda yeleyi ligongo lyakumnonyela Yehofa soni ligongo lyakwanonyela achalongo achimjawo.—Mat. 22:37-39.
2. Mwakamulana ni Aloma 15:1-3, ana Yesu jwapeleche chisyasyo chamtuli?
2 Yesu jwapeleche chisyasyo chambone pangani ja kuŵika pandanda yakusaka ya ŵane. M’wejisoni tukusalingalinga kumsyasya jwalakwe. (Aŵalanje Aloma 15:1-3.) Jwalijose jwakusamsyasya jwalakwe yindu yikusamjendela chenene. Yesu jwatite, “Kupeleka kukumsampa upile mundu kulekangana ni kupochela.”—Mase. 20:35.
3. Ana munganiji chitukambilane chichi?
3 Munganiji, chitulole yindu yaŵatesile Yesu pakusaka kwakamuchisya ŵane. Chitukambilanesoni yampaka tutende kuti tujigalile chisyasyo chakwe. Pakumalisya chitulole yampaka tutende kuti tukoleje mtima wakusaka kwakamuchisya ŵane.
TUMSYASYEJE YESU
Ana Yesu jwatesile chichi gulu ja ŵandu pajamsimene atamose kuti jwaliji ali apesile? (Alole ndime 4)
4. Ana Yesu jwaŵisile chamtuli yakusaka ya ŵane pamalo gandanda?
4 Yesu jwakamuchisyaga ŵane atamose ali apesile. Aganichisye yajwatesile jwalakwe ŵandu ŵajinji ali amsimene mungulugulu litumbi chiŵandika ku Kapelenawo. Yesu jwaliji ali achesisye kupopela. Komboleka jwaliji ali apesile mnope. Nambope ali ajiweni gulu ja ŵandu, jwalakwe ŵatendele chanasa ŵandu ŵakulaga soni ŵakulwala ŵaŵaliji m’gulujo. Jwalakwe nganagamba kwaposya ŵakulwalawo, nambo jwaŵechetesoni ngani jakulimbikasya kwa wosopewo jajikusakolanjidwa kuti Kulalichila kwa Petumbi.—Luk. 6:12-20.
Ana mpaka tumsyasye Yesu mmatala gapi pangani ja kwakamuchisya ŵane? (Alole ndime 5)
5. Ana achalume ŵalombele mpaka asyasye chamtuli chisyasyo cha Yesu pangani jakulosya chinonyelo?
5 Ana achalume ŵalombele mpaka amsyasye chamtuli Yesu? Aganichisye chakutendekwa chakuyichisyachi. Panyuma pakukamula masengo lisiku lyosope, jwamlume akukopechela pamlango ali apesile. Atamose kuti jwalakwe akuganisya yakuti akatendesya Kulambila kwa Peŵasa palisikulyo, nambope akumŵenda Yehofa kuti ampe machili kuti akombole kutendesya kulambilako. Kaneko Yehofa akwanga lipopelo lyakwe mwamti kulambilako kukutendekwa. Mwamti palisikulyo ŵanache akulijiganya kuti achinangolo ŵawo akusaŵika yindu yausimu pamalo gandanda kupunda chine chilichose.
6. Ana Yesu jwakamulichisye masengo chamtuli ndaŵi jakwe pakwakamuchisya ŵane?
6 Yesu jwakamulichisyaga masengo ndaŵi jakwe pakwakamuchisya ŵane. Agambe ganisya muŵapikanile Yesu mumtima pajwapikene kuti Yohane M’batisi juŵaliji mjakwe awulajidwe. Komboleka kuti yeleyi yamtendekasisye Yesu kola chanasa chekulungwa. Baibulo jikusati, “Yesu piŵapikene [yakuti Yohane awulajidwe], ŵatyosile kweleko mwiboti, nipo ŵajile kumalo gangapitapita ŵandu.” (Mat. 14:10-13) Mpaka tupikanichisye ligongo lyakwe jwasakaga kutama malo gajika. Ŵandu ŵane akusayiwona kuŵa yakamuchisya kutama kwajika pakwete chanasa. Nambo kwa Yesu yeleyi nganiyikomboleka. Gulu ja ŵandu jakopochele kumalo kuŵasakaga kutama jika msyenejo mkanaŵe kopochelako. Ana Yesu jwatesile wuli? Jwalakwe jwaganichisye yaŵasochelaga ŵanduwo mwamti “ŵatendele chanasa.” Jwalakwe jwayiweni kuti ŵanduwo ŵasosekwaga kwakamuchisya mwausimu, mwamti jwakamuchisye mwachitema. Myoyo jwalakwe, “ŵatandite kwajiganya yindu yejinji.”—Maliko 6:31-34; Luk. 9:10, 11.
7-8. Asale chisyasyo chakulosya kuti achakulungwa akusamsyasya Yesu ŵane pakusosekwa kwakamuchisya.
7 Achakulungwa ŵa mumpingo akusamsyasya Yesu. Kusala yisyene tukusayamichila mnope masengo gakusakamula achakulungwa ŵa mumpingo pakutukamuchisya. Abale ni alongo ŵangagamanyililaga gane mwa masengo gakusakamula achakulungwaŵa. Mwachisyasyo, naga pakusosekwa chikamuchisyo cha mtela, abale ŵa mu Komiti Jakuŵechetana ni Ŵachipatala, akusiŵakamuchisya abale ni alongo ŵawo mwachitema. Ndaŵi syejinji jemanjaji akusasosekwa kwakamuchisya abale ni alongoŵa pasikati pa chilo. Nambo ligongo lyakwanonyela achalongo achimjawo, abale ŵa mu komitiji yimpepe ni maŵasa gawo akusalingalinga kuŵika pamalo gandanda yakusaka ya ŵane.
8 Achakulungwa ŵa mumpingo akusakamuchisyasoni pa masengo gakutaŵa Nyumba sya Uchimwene soni yindu yine. Jemanjaji akusakamuchisyasoni kumalo kwakutendekwe ngosi. Achakulungwaŵa akusamalilasoni ndaŵi jejinji ali mkwakamuchisya soni kwalimbikasya abale ni alongo ŵa mumpingo mwawo. Kusala yisyene, tukusasosekwa kwayamichila abaleŵa pampepe ni maŵasa gawo. Yehofa akusosekwa kupitilisya kwakamuchisya jemanjaji. Mpela mwayikusaŵela ni mundu jwalijose, achakulungwaŵa akusasosekwa kuŵa ŵaganisya chenene. Jemanjaji ŵangasosekwa kutanganidwaga mnope ni masengo ga kumpingo mpaka kwika pakulepela kusamalila maŵasa gawo.
YAMPAKA ATENDE KUTI ŴAKAMUCHISYEJE ŴANE
9. Mwakamulana ni Afilipi 2:4, 5, ana Aklistu akusosekwa kola mtima wamtuli?
9 Aŵalanje Afilipi 2:4, 5. Wosopewe kupwatikapo achakulungwa ŵa mumpingo tukusosekwa kumsyasya Yesu mwakwakamuchisya ŵane. Baibulo jikusasala kuti jwalakwe ‘jwajigele uwoneche wamti mpela wa kapolo.’ (Afil. 2:7) Aganichisye yatukulijiganya pa lilembali. Kapolo jwambone akusatenda yindu yakwasangalasya ambuje ŵakwe. Mpela kapolo jwa Yehofa soni jwakwatumichila achalongo achimjawo, mwangakayichila wawojo akusasaka kuti Yehofa ŵakamulichisyeje masengo mmatala gejinji. Akusasakasoni kuti ŵatumichileje ŵakulupilila achimjawo mmatala gejinji. Mpaka akombole kutenda yeleyi pakuganichisya yindu yakuyichisyayi.
10. Ana tukusosekwa kuliwusya yiwusyo yapi?
10 Aliwungunyeje. Aliwusye yiwusyo mpela yakuti, ‘Ana ndili jwakusachilila kwakamuchisya ŵane? Ana mpaka ndende wuli naga ali ambendile kuti namjendele m’bale jwachikulile, kapena namjigalile kumisongano mlongo jwine jwachikulile? Ana ngusalipelekaga mwachitema pamasengo gakulinganya malo ga msongano kapena gakulinganya pa Nyumba ja Uchimwene?’ Patukutenda yiliyose pakwakamuchisya ŵane mwakamulana ni kulipeleka kwetu kwa Yehofa, jwalakwe akusasangalala mnope. Naga tukuyiwona kuti tukusosekwa kuchenga pane pakwe, ana tukusosekwa kutenda chichi?
11. Ana lipopelo mpaka litukamuchisye chamtuli kola mtima wakwakamuchisya ŵane?
11 Apopeleje kwa Yehofa kutyochela pasi pa mtima. Tuwanichisye kuti akusaka kwakamuchisya ŵane, nambo akukayichila naga mpaka akombole. Naga akulipikana myoyo, amŵendeje Yehofa kutyochela pasi pamtima kuti ŵakamuchisye. Mwakuwona mtima amsalileje Yehofa mwakupikanila mumtima soni amŵendeje kuti ŵape mtima “ŵakusachilila kutenda yakusaka” pakwakamuchisya ŵane.—Afil. 2:13, NWT.
12. Ana abale ŵachinyamata ŵabatisidwe mpaka akamuchisye chamtuli mu mpingo mwawo?
12 Naga ali jwachinyamata jwam’batisidwe, mpaka amŵende Yehofa kuti ŵakamuchisye kutenda yejinji pakwakamuchisya abale ni alongo ŵa mumpingo mwawo. M’yilambo yine, m’mipingo jejinji mukusaŵa achakulungwa ŵa mumpingo ŵajinji pakulandanya ni ŵakutumichila ŵakamuchisya. Mwamti ŵajinji mwa ŵakutumichila ŵakamuchisyaŵa nganaŵa ŵachinyamata. Gulu ja Yehofa pajikukula, pakusosekwa ŵachinyamata ŵajinji ŵakuti akamuleje masengo gakwasamalila abale ni alongo. Naga akukola mtima ŵakusachilila kutumichila kulikose kwakukusosechela chachiŵa ŵakusangalala. Tukuŵecheta yeleyi ligongo chachimsangalasya Yehofa. Kupwatika pelepa, abale ni alongo chachiyiwona kuti akwete mtima wakusaka kwakamuchisya ŵane, nambosoni chachikola chisangalalo chachikusayika ligongo lyakwakamuchisya ŵane.
Aklistu ŵa ku Yudeya ŵatisile ni komboka Lusulo lwa Yolodani ni kwawula ku Pela. Ŵandu ŵaŵayiche mwachitema mumsindawu akwagayila yakulya Aklistu achimjawo ŵagambile kopochela kwene (Alole ndime 13)
13-14. Ana tukusosekwa kutenda chichi kuti twakamuchisye abale n alongo ŵetu? (Alole chiwulili cha pachikuto.)
13 Amanyilileje yakusosechela ya ŵane. Ndumetume Paulo jwasalile Aklistu ŵaŵatamaga ku Yudeya kuti, “Mkasimliŵalila kutendelana yambone ni kamuchisyana jwine ni mjakwe, ligongo mbopesi syamti myiyi sikusamsangalasya Mlungu.” (Ahe. 13:16) Kusala yisyene malangisoga galiji gambone. Mkanipapite ndaŵi panyuma pa kupochela malangisogo, Aklistu ŵa ku Yudeya ŵasosekwe kuleka nyumba syawo, mabisinesi gawo soni achalongo achimjawo ŵangakulupilila ni ‘kutilila ku matumbi.’ (Mat. 24:16) Mwangakayichila, pandaŵiji jemanjaji ŵasosekwe kamusyangana jwine ni mjakwe. Naga jemanjaji mkanasimane ni yeleyi ŵakamulichisyaga masengo malangiso ga Paulo, gakuti akamusyanganeje jwine ni mjakwe, nikuti yikaliji yangasawusya kusyoŵelela umi wasambano.
14 Ngaŵa kuti ndaŵi syosope abale ni alongo mpaka atusalileje yakusosechela. Mwachisyasyo, M’bale jwele ŵamkwakwe ajasiche mpaka akole chanasa chekulungwa. M’baleju mpaka asosekwe kumkamuchisya mwakumpa yakulya, kumkamuchisya pa kajende soni masengo gane ga pamlango. Komboleka kuti jwalakwe mpaka atendeje sooni kuŵenda chikamuchisyo paganisya kuti chiŵalagasye abale. Nambope jwalakwe mpaka ayamichile mnope naga tukutenda yampaka tukombole pakumkamuchisya. Ngatukusosekwa ganisyaga kuti ŵane chamkamuchisye kapena kwembecheyaga kuti atuŵende kaje chikamuchisyo. Akusosekwa kuliwusya kuti, ‘Yikaŵe kuti ngusimana ni yakusawusya mpela yeleyi, ana ngasachile kuti ŵane andendele chichi?’
15. Ana tukusosekwa kutenda chichi kuti tukombole kwakamuchisya ŵane?
15 Atendeje yakuti abale ni alongo ayiwoneje kuŵa yangasawusya kwaŵenda chikamuchisyo. Komboleka akwamanyilila abale ni alongo mumpingo mwawo ŵakusaŵa ŵakoseka kwakamuchisya ŵane. Jemanjaji ŵangaganisyaga kuti tukwalagasya. Kusala yisyene, tukusamanyilila kuti jemanjaji chachiŵa ŵakoseka kutukamuchisya ndaŵi jilijose. M’wejisoni tuchisaka kuŵa mpela jemanjaji. Jwamkulungwa jwa mumpingo jwine jwa yaka 45 lina lyakwe Alan, jwasakaga kuti ŵakamuchisyeje ŵane. Alan pajwaganichisyaga chisyasyo cha Yesu jwasasile kuti, “Yesu jwakolaga yakutenda yejinji, nambope ŵandu ŵamisingu jakulekanganalekangana ŵaŵaga ŵagopoka kum’ŵenda chikamuchisyo. Ŵanduŵa ŵamwonaga Yesu kuti ali mundu jwakusiŵaganichisyaga. Unejisoni ngusasaka kumsyasya Yesu soni ngusasaka kuŵa mundu jwangasawusya kunjichila ŵandu soni jwakwaganichisya ŵane.”
16. Ana kamulichisya masengo lilemba lya Salimo 119:59, 60 mpaka kutukamuchisye chamtuli kumsyasya Yesu?
16 Ngatukusosekwa kudandawula mnope naga tukulepela kusyasya ndendende mwakusatendela yindu Yesu. (Yak. 3:2) Mundu jwakulijiganya kwambula, nganaŵa akombwele kwambula ndendende mpela mwakusatendela mtichala jwakwe. Nambo pakulingalinga kusyasya chisyasyo cha mtichalajo soni kulijiganya pa yindu yakusalepela, pambesi pakwe akusaŵa jwakwambula jwambone. Mwakulandana ni yeleyi, naga tukusatenda yatulijiganyisye m’Baibulo, soni kulinganya patukusosekwa kongolela, mpaka tukombole kumsyasya Yesu.—Aŵalanje Salimo 119:59, 60.
UMBONE WAKWAKAMUCHISYA ŴANE
Achakulungwa ŵa mumpingo pakumsyasya Yesu mwakwakamuchisya ŵane, nombe ŵachinyamata akusajigalila chisyasyo chawo (Alole ndime 17) *
17-18. Ana tuchipata umbone wamtuli patukusyasya chisyasyo cha Yesu?
17 Naga tukusitwakamuchisya ŵane nombe nawo chachijigalila chisyasyo chetu. Jwamkulungwa jwa mumpingo jwine lina lyakwe Tim jwasasile kuti, “Tukwete abale ŵachinyamata ŵakwawula pasogolo soni ali ŵakutumichila ŵakamuchisya. Ŵane mwa jemanjaji ŵatandite kutumichila ali ŵachinandipile mnope. Jemanjaji ŵakombwele kutenda yeleyi ligongo lyakulola chisyasyo chambone cha ŵandu ŵaŵakwete mtima wakusaka kwatumichila achimjawo. Ŵachinyamataŵa akusakamuchisya mpingo wetu soni akusiŵakamuchisya mnope achakulungwa ŵa mumpingo.”
18 Tukutama mchilambo chegumbale ni ŵandu ŵakulinonyela. Nambo ŵakutumichila ŵa Yehofa akusaŵa ŵakulekangana ni jemanjaji. Chisyasyo cha Yesu chatukambilene munganiji chitulimbikasisye mnope, soni tuli ŵakusimichisya kukuya chisyasyo chakwe. Kusala yisyene nganituŵa tukombwele kumsyasya Yesu ndendende, nambo mpaka tukombole ‘kukuya sajo syakwe.’ (1 Pet. 2:21) Patukutenda yeleyi, tuchiŵa ŵakusangalala ligongo lyakumsangalasya Yehofa.
NYIMBO NA. 13 Klistu Ali Chisyasyo Chetu
^ Yesu jwaŵikaga pamalo gandanda yakusaka ya ŵane. Munganiji chitulole yampaka tutende kuti tumsyasyeje jwalakwe. Chitulolesoni umbone wampaka tupate patukulinga kumsyasya jwalakwe.
^ KULONDESYA CHIWULILI: M’bale jwachinyamata lina lyakwe Dan, akwawona achakulungwa ŵaŵili ali ayiche kukwasonda babagwe kuchipatala. Chisyasyo cha achakulungwa ŵa mumpingo ŵala chamkamuchisye Dan kuti nombe najo akombole kwakamuchisya ŵane. M’bale jwachinyamata jwine lina lyakwe Ben, akulola chisyasyo cha Dan. Yaŵatesile Dan yikumkamuchisya Ben kuti akamule nawo masengo gakuswejesya Nyumba ja Uchimwene.
