1. Mang reb e ban’en nib manigil ni gad ma guy u rarogon e girdi’ rok Jehovah?

 KE YIIYNAG e Bible ni girdi’ rok Got e yad ‘ra ognaged yad’ ni ngar pigpiggad ngak Jehovah mar folgad ko n’en ni yog Jesus. (Ps. 110:3) Be lebug e re yiiy ney e ngiyal’ ney. Gubin e duw ni ma machib e pi tapigpig rok Jehovah ni yad ba pasig u lan bokum milyon e awa. Danir pi’ puluwrad ni ngar rin’ed e re maruwel ney, ya yad be rin’ ni bochan e yad baadag. Ku yad ma tay e tayim ni ngar ayuweged pi walagrad ko tin nib t’uf rorad, mar pied e athamgil ngorad, mar ayuweged yad ko tirok Got ban’en. Piin piilal nge pi ministerial servant e boor e awa ni yad ma fanay ni ngar fal’eged rogon e welthin ni ngar pied u nap’an e muulung, maku yad ma yan ra guyed pi walagrad ni ngar pied e athamgil nga lanin’rad. Mang fan ni ma rin’ e girdi’ rok Jehovah e pi n’ey? Bochan nib t’uf Jehovah nge girdi’ rorad.​—Matt. 22:37-39.

2. Mang kanawo’ e dag Jesus nrayog ni ngan folwok riy nrogon ni bay ko Roma 15:1-3?

² I dag Jesus e kanawo’ nib fel’ nrayog ni ngan folwok riy u rogon ni i m’oneg e tin nib t’uf rok yugu boch e girdi’ mfini migid. Gad be athamgil u rogon nrayog rodad ni ngad folwokgad rok. (Mu beeg e Roma 15:1-3.) Faan gad ra rin’ e re n’ey, ma ra yib angin ngodad. I gaar Jesus: “Ba gel e felfelan’ ni ma yib ko pi’ ban’en ngak be’ ko bin ni be’ e nge pi’ ban’en ngom.”​—Acts 20:35.

3. Mang e gad ra weliy ko re article ney?

³ Gad ra weliy ko re article ney boch ban’en ni rin’ Jesus ni nge ayuweg e girdi’ nge rogon nrayog ni ngad folwokgad rok.  Ku gad ra weliy rogon nrayog ni ngari m’agan’dad ngay ni ngaud ayuweged yugu boch e girdi’.

4. Uw rogon ni m’oneg Jesus e tin nib t’uf rok yugu boch e girdi’ mfini migid?

⁴ I ayuweg Jesus e girdi’ ni yugu aram rogon ni ke aw parwon. Am lemnag e n’en ni rin’ u nap’an ni muulung e girdi’ ngak ni boor nga sigreen e burey u bangi ban’en nib chugur nga Kapernaum. Ba polo’ reb e nep’ ni ka i meybil. Dabisiy ni kari aw parwon, machane nap’an ni guy fapi girdi’ ni aram urngirad, mi ri taganan’ ko piin gafgow nge piin nib m’ar u fithik’rad. Gathi kemus ni golnagrad ya ki pi’ bogi welthin nri pi’ e athamgil nga lanin’rad ni yima yog fare Welthin u Daken e Burey ngay.​—Luke 6:12-20.

5. Uw rogon ni ma folwok e piin lolugen e tabinaw rok Jesus u rogon ni yad ma dag e t’ufeg ni yugu aram rogon ni ke aw parowrad?

⁵ Rogon ni be folwok e piin lolugen e tabinaw rok Jesus. Am lemnag e re n’ey: Tomuren ni ke sul reb e matam nga tafen ko maruwel, ma rayog ni ke aw parwon. Yugu aram rogon ni baadag ni nge yog ndab kun tay e Fol Bible ni Tabinaw e rofen nem, machane me meybil ngak Jehovah ni nge pi’ gelngin ni nge yarmiy e fol Bible ni ngan tay. I fulweg Jehovah taban e meybil rok, ma aram mar ted e fol Bible ni bod rogon ni yad ma rin’ u gubin e wik. I fil e bitir u lan fare tabinaw ban’en nib ga’ fan e rofen nem. Ra filed ni gallabthir rorad e yow ma m’oneg e tirok Got ban’en ko tin ka bay ban’en.

6. Mu weliy reb e kanawo’ ni tay Jesus e tayim ni fan ko girdi’ ni yugu aram rogon nib t’uf ni nge rin’ boch ban’en ni fan ngak.

⁶ Ma tay e tayim ni fan ko girdi’ ni yugu aram rogon nib t’uf ni nge rin’ boch ban’en ni fan ngak. Rayog ni ngam susunnag rogon laniyan’ Jesus u nap’an ni nang ni kan th’ab k’angan John ni Tataufe ni fager rok, fa? Dabisiy nrib gel e kireban’ ni tay. Be gaar e Bible: “Faani rung’ag Jesus [ni ke yim’ John], me af nga bowoch nge chuw u rom nge yan nga bang ni go ir ndariy be’ riy.” (Matt. 14:10-13) Rayog ni ngad nanged fan ni baadag ni nge yan nga bang ni yigoo ir. Bay boch e girdi’ nra kireban’rad, ma yad baadag ni nga ranod ra  pared nga bang ni yigoo yad. Machane de yag ni nge rin’ Jesus e re n’ey. Ya u m’on ni nge taw ngaram ma ke m’on ba ulung i girdi’ ngaram yad be sonnag. Ere mang e rin’ Jesus? I lemnag e tin nib t’uf rorad, ma aram mi ri “taganan’” ngorad. Manang nib t’uf ni nge ayuwegrad Got me fal’eg lanin’rad, ere ka chingiyal’ nem me ayuwegrad. Bin riyul’ riy e, “tabab i machibnag boor ban’en ngorad.”​—Mark 6:31-34; Luke 9:10, 11.

7-8. Mu weliy reb e kanawo’ ni ma folwok e piin piilal rok Jesus riy u nap’an nra t’uf e ayuw rok be’ u lan e ulung.

⁷ Rogon ni ma folwok e piin piilal rok Jesus. Rib ga’ fan u wan’dad e maruwel nib gel ni ma rin’ e piin piilal ni fan ngodad! Yooren e maruwel ni yad ma rin’ e der guy yooren e walag u lan e ulung. Bod nnap’an nra m’ar ara maad’ad reb e walag nib tomgin, ma ma gur e pi walag ko fare Hospital Liaison Committee ni ngar ayuweged pi walagrad. Yooren e pi n’ey e ba ga’ ni ma buch u lukngun e nep’! Machane bochan ni yad be runguy pi walagrad ni kar gafgowgad, ma pi piilal ney nge chon e tabinaw rorad e yad ma m’oneg e tin nib t’uf rok pi walagrad mfin ra migidgad.

⁸ Piin piilal e ku yad ma pi’ e ayuw ni ngan toy boch e Tagil’ e Liyor rodad nge boch e naun rodad, mu kur ayuweged e pi walag ni kar gafgowgad u nap’an e yoko’ ara durru’. Ku boor e tayim ni yad ma tay ni ngar filed ban’en ngodad mar pied e athamgil nga lanin’dad. Bay rogon ni ngad pininged e magar ko pi walag ney nge chon e tabinaw rorad. Manga yigi tow’athnagrad Jehovah ko maruwel nib gel ni yad be tay! Machane piin piilal e ku yad bod e tin ka bay e walag nib t’uf ni ngar gonopiyed rogon ni yad be maruwel ko tayim rorad. Ya susun e yugu dabi pag urngin  e tayim ni ngar ted ni fan e ngar rin’ed boch ban’en ni fan ko ulung, ma dakuriy e tayim ni ngar pied e tin nib t’uf ko tabinaw rorad.

9. Mang lem e susun ni nge maruweliy urngin e Kristiano nrogon ni be yog e Filippi 2:4, 5?

⁹ Mu beeg e Filippi 2:4, 5. Gathi gad gubin ni gadad boch e piilal, machane gad gubin nrayog ni ngad boded Jesus ma gad m’oneg e tin nib t’uf rok yugu boch e girdi’ mfin da migidgad. Be yog e Bible ni “yib i ngal’ nib tapigpig.” (Fil. 2:7) Am lemnag e n’en nrayog ni ngad filed ko re thin ney. Reb e tapigpig nib manigil e ma gay boch e kanawo’ nrayog ni nge felfelan’nag e masta rok riy. Bochan ni gadad e tapigpig rok Jehovah ma gad be pigpig ngak pi walagdad, ma gad baadag ni nge yib angidad ngak Jehovah nge pi walagdad. Gad ra lemnag e pi fonow ni baaray, ma aram e rayog ni ngad rin’ed e re n’ey.

10. Mang deer e rayog ni ngad fithed gadad riy?

¹⁰ Mu fal’eg i yaliy rogon e lem rom. Mu fithem ni nge lungum: ‘Rib m’agan’ug ngay ni nggu fanay e tayim rog nge gelngig ni nggu ayuweg yugu boch e girdi’, fa? Bod ni, mang e gu ra rin’ ni faanra ka nog ngog ni nggu wan gu nang salpen reb e walag ni pumoon ni ke pilibthir ara nggu fek reb e walag nib pin ni ke pilibthir ko muulung? Ba m’agan’ug ngay ni nggu pi’ e ayuw ni ngan klinnag e gin ngan tay reb e convention riy ara ngan ngongliy e yungin ke kireb ko Tagil’ e Liyor, fa?’ Ma felfelan’ Jehovah u nap’an nra guy ni gad be fanay e tayim rodad, nge gelngidad, nge boch ban’en ni bay rodad ni ngad ayuweged yugu boch e girdi’. Ireray e n’en nda micheged ngak Jehovah u nap’an nda ognaged gadad ngak. Ere faanra kad guyed nib t’uf ni ngad mon’oggad u rogon ni gad be fanay e pi n’ey, ma mang e rayog ni ngad rin’ed?

11. Uw rogon nra ayuwegdad e meybil ni nge m’agan’dad ngay ni ngad ayuweged yugu boch e girdi’?

¹¹ Mmeybil ngak Jehovah u fithik’ e yul’yul’. Sana rayog ni kam guy nib t’uf ni ngam mon’og u rogon ni ga ma ayuweg yugu boch e girdi’, machane gathi ri ga baadag ni ngam rin’ e re n’ey. Faanra aray rogon, mag meybil ngak Jehovah u fithik’ e yul’yul’. Mu weliy ngak rogon lanin’um ma gog ngak ni nge ‘pingeg lanin’um ni nge m’agan’um ngay ni ngam fol ko tin ni be finey.’​—Fil. 2:13.

12. Uw rogon nrayog ni nge ayuweg e pi walag ni ka yad ba pagel ni kar uned ko taufe e ulung rorad?

¹² Faanra gur reb e walag ni ka gab pagel ni kam taufe, ma gog ngak Jehovah ni nge ayuwegem ngam adag ni ngam yoornag e tin ga be rin’ ni fan ngak e pi walag u lan e ulung. U boch e nam e boor e piilal riy ko ministerial servant, ma boor ko pi ministerial servant nem e gathi ka yad ba pagel. Bochan ni be yoor girdien e ulung i yan, mab t’uf boch e walag ni ka yad ba pagel ni ngar ayuweged e girdi’ rok Jehovah. Faanra ba m’agan’um ngay ni ngam pi’ e ayuw ko gin nib t’uf e ayuw rom riy, ma ga ra felfelan’. Mang fan? Ya ga ra felfelan’nag Jehovah, me fel’ thim, ma ka ga ra felfelan’ ni ga be ayuweg yugu boch e girdi’.

13-14. Mang e rayog ni ngad rin’ed ni ngad ayuweged pi walagdad? (Mu guy e sasing ni bay u wuru’ e re ke babyor ney.)

¹³ Mu fal’eg i yaliy rarogon e pi walag ya ngam nang e ngiyal’ nib t’uf e ayuw rorad. I yog apostal Paul ngak e pi Hebrew ni gaar: “Dab mpaged talin ni ngam rin’ed e tin nib fel’ ma nge bigimed mi i ayuweg bigimed, ya ereray e pi maligach nib m’agan’ Got ngay.” (Heb. 13:16) Ba manigil e re fonow ney! Ya de n’uw nap’an nga tomuren ni pi’ e gi babyor ney ngorad, ma pi Kristiano ni yad ma par u  Judea e thingar ra digeyed e naun, nge siyobay rorad, nge girdi’ rorad ni gathi yad boch e Kristiano ngar “milgad nga daken e burey.” (Matt. 24:16) Ngiyal’ nem e dariy e maruwar riy nrib t’uf ni ngar ayuweged yad. Faanra ur folgad ko fonow ni pi’ Paul ngorad u m’on riy ni aram e ngaur pied e tin bay rorad ni fan ngak boch i yad, ma aram e ra mom ngorad ni nge fel’ u wan’rad ni ngar pared ni buchuuw e chugum rorad ko gin nga ranod ra pared ngay.

¹⁴ Sana gathi gubin ngiyal’ nra yog e pi walagdad ngodad e n’en nib t’uf rorad. Sana rayog ni bay reb e walag ni pumoon ni ke yim’ leengin. Ere gur, ba t’uf ni ngan ayuweg ngan pi’ boch e ggan ni nge kay, ara ngan fek nga bang, ara ngan rin’ boch e maruwel u tabinaw rok, fa? Sana der ning e ayuw ngodad ya be lemnag nra magawonnagdad. Machane ra felfelan’ ngay ni faan gad ra ayuweg u m’on ni nge ning e ayuw. Susun e dab da lemnaged ni bay be’ nra ayuweg fa reb e ra ning e ayuw ko ngiyal’ nib t’uf rok. Mu fithem ni nge lungum, ‘Faanra gag e re walag ney, ma mang ayuw e gu baadag ni ngan pi’ ngog?’

15. Mang e thingar da rin’ed ni faanra gad baadag ni ngad ayuweged e girdi’?

¹⁵ Mu momnag ko girdi’ ni ngar ninged e ayuw ngom. Dariy e maruwar riy ni ga manang boch e walag u lan e ulung rom ni gubin ngiyal’ nib m’agan’rad ngay ni ngar ayuweged yugu boch e girdi’. Darur k’aringed gadad ni ngad lemnaged ni gad be magawonnagrad. Gad manang nnap’an nra t’uf e ayuw rodad ma yad ra ayuwegdad, maku gad baadag ni ngad boded yad! Alan nreb e piilal ni 45 e duw rok e baadag ni nge mom ko girdi’ ni ngaur ninged e ayuw ngak. Nap’an ni lemnag e n’en ni rin’ Jesus me yog ni gaar: “Jesus e boor pa’ u puluwon, machane gubin e girdi’ ni yad baadag daken ma darur magagawongad ni ngar  ninged e ayuw ngak. Yad manang nriyul’ ni be lemnagrad. Gu baadag ni nggu bod Jesus nib mom ko girdi’ ni ngaur ninged e ayuw ngog, ma gub gol, ma gu be lemnag e girdi’.”

16. Faan gad ra fol ko Psalm 119:59, 60, ma uw rogon nra ayuwegdad ni ngad folwokgad rok Jesus u rogon feni chugur nrayog rodad?

¹⁶ Faanra der yag ni ngad folwokgad rok Jesus nib fel’ rogon, ma susun e dabi mulan’dad. (Jas. 3:2) Be’ ni yibe skulnag e dabiyog ni nge rin’ urngin ban’en ni ma rin’ e sensey rok nrib fel’ rogon. Machane faanra fil ban’en ko oloboch rok me athamgil ni nge folwok ko sensey rok u rogon nrayog rok, ma aram e ra ulul ni nge mon’og. Ku arrogodad ni faan gad ra fol ko n’en gad ma fil ko fol Bible ni gad ma tay ma gad guy rogon ni ngaud mon’oggad i yan, ma aram e rayog ni ngad folwokgad rok Jesus u rogon feni chugur nrayog rodad.​—Mu beeg e Psalm 119:59, 60.

17-18. Mang angin nra yib ngodad ni faan gad ra folwok rok Jesus?

¹⁷ Faanra ba m’agan’dad ngay ni ngaud ayuweged e girdi’, maku gad ra k’aring yugu boch e girdi’ ni ngkur rin’ed e re n’ey. I yog Tim nreb e piilal ni gaar: “Bay boch e walag u lan e ulung rog ni kar manged ministerial servant nri ka yad ba pagel. Reb i fan e bochan ni kar guyed rogon nib m’agan’ yugu boch e walag ngay ni ngar pied e ayuw, ma yad baadag ni ngar boded yad. Pi walag ney e yad ma ayuweg e ulung nge piin piilal.”

¹⁸ Gad be par u reb e fayleng nra be’ riy ma yigoo ir e be lemnag ir. Machane girdi’ rok Jehovah e yad ba thil. N’en kad filed u murung’agen rogon nib m’agan’ Jesus ngay ni nge m’oneg e tin nib t’uf rok yugu boch e girdi’ e ke pi’ e athamgil nga lanin’dad, ma gad baadag ni ngad folwokgad rok. Riyul’ ndabiyog ni ngad folwokgad rok nrib fel’ rogon, machane rayog ni ngad “leked luwan ay” u rogon feni chugur nrayog rodad. (1 Pet. 2:21) Gad ra athamgil u rogon nrayog rodad ni ngad folwokgad rok Jesus, ma gad ra felfelan’ ni bochan e gad be rin’ e n’en nib m’agan’ Jehovah ngay.