DILONGI 9
Landakana Kifuani ki Yesu ki Kusadisa Bankaka
“Mayangi malutidi kuidi mutu wumvana bika kuidi wuntambula.”—MAVA. 20:35.
NKUNGA 17 ‘Yitidi’
MAMBU TUANLONGUKA *
1. Mayindu mbi mafuana dikabu di Yave badi?
KIBIBILA kibikula ti dikabu di Yave, “bala kukivana mu kisalu kiandi” mu thuadusulu yi Muan’andi. (Minku. 110:3) Ayi mbikudulu ayoyo yidi mu kusalama bubu. Kadika mvu, bisadi bi Yave bikuikama bamvanganga mafunda na mafunda di bilokula mu kisalu ki kusamuna. Ayi bawu bamvangilanga mawu mu lutia luawu veka. Mvandi bambotulanga thangu muingi kusadisa zikhomba mu zitsatu ziawu zi kinsunyi ayi zi kiphevi. Bakulutu ba kimvuka bambotulanga thangu yiwombo muingi kukubika malongi ayi kukindisa zikhomba. Kibila mbi bamvangilanga mawu? Mu kibila ki luzolo—badi mu Yave ayi mu zikhomba.—Matai 22:37-39.
2. Dedi bummonisana Loma 15:1-3, kifuani mbi Yesu ka tuvana?
2 Yesu wuvana kifuani kimboti mu matedi kutula zitsatu zi bankaka vantuala zitsatu ziandi. Tuidi mu kuvanga mangolo muingi kulandakana zithambi ziandi (Tanga Loma 15:1-3.) Ayi batu banlandakananga kifuani kiandi bambakanga ndandu yiwombo. Yesu wutuba: “Mayangi malutidi kuidi mutu wumvana bika kuidi wuntambula.”—Mava. 20:35.
3. Mbi tunkuiza longuka mu dilongi adidi?
3 Mu dilongi adidi, tunkuiza mona ziphila Yesu kakivanina muingi kusadisa bankaka ayi buidi tulenda landikinina kifuani kiandi. Bosi tunkuiza tubila buidi tulenda buedila phuil’itu yi kusadisa bankaka.
LANDAKANA KIFUANI KI YESU
Kheti bo kaba wuvonga mbi Yesu kavanga bo nkangu wu batu bayenda vo kaba? (Tala lutangu 4)
4. Buidi Yesu katudila zitsatu zi bankaka vantuala zitsatu ziandi?
4 Yesu wukivana kheti mu thangu kaba wuvonga. Yindula buidi kabela bo nkangu wu batu bayenda ku kafalinawumi ku mongo kaba. Yesu wusambila builu boso. Ayi ḿba wuba wuvonga vayi bo kamona nkangu wu batu beni, wuba mona kiadi ayi wusadisa biphumbulu ayi zimbevu. Mvandi kasa babelusa ko to vayi wuvanga dilongi dikhindusulu—ku mongo ayi diawu dikidi nkinza nati bubu.—Luka 6:12-20.
Buidi tulenda landikinina kifuani ki Yesu ki kukivana? (Tala lutangu 5)
5. Buidi mfumu dikanda kalenda landikinina kifuani ki Yesu mu thangu kadi wuvonga?
5 Buidi mfumu dikanda kalenda landikinina kifuani ki Yesu. Yindulabu mfumu dikanda mafumina mu kisalu ayi widi wuvonga: Mu kibila ki phokongo nandi wunyindula kuvunza mbuongimini yi dikanda. Vayi bo kamvanga nsambu kuidi Yave muingi kudinda mangolo, Yave wuntambudila nsambu beni mu kunnungisa kuvanga mbuongimini yi dikanda dedi bo kamvangilanga kadika sabala. Bukiedika, mu kilumbu beni bana balenda longuka ti kuidi matata mawu mambu ma kiphevi, mawu malutidi nkinza kena mambu mankaka.
6. Vana kifuani kimmonisa ti Yesu wubotula thangu muingi kusadisa bankaka.
6 Yesu wubotula thangu muingi kusadisa bankaka kheti bo kaba tomba kuba va naveka. Dedi, yindulabu mu thangu Yesu kayuwa tsangu ti nkundi’andi Yoane Mbotiki babe mvonda. Yesu wuba beni mu kiunda, Kibibila kintuba: “Bo kayuwa [zitsangu zi lufua lu Yoane], Yesu wumaka mu buatu ayi wu yetomba kibuangu muingi kuba va naveka.” (Matai 14:10-13) Tulenda visa kibila mbi kaba tombila kuba va naveka. Kibila befu bawombo bo tuidi mu kiunda tuntombanga kuba va befu veka. Vayi bakana ko mawu mamonika mu thangu beni. Kibila nkangu wu batu bavitila va kibuangu Yesu kaba kuenda ava nandi katuka. Mbi Yesu kavanga? Nandi “wuba mona kiadi” ayi wumona ziphasi ziwombo baba viokila. Mvandi baba tombulu mambu ma kiphevi ma kuba kindisa ayi kuba bomba mu zitsatu ziawu. Diawu Yesu “katonina kuba longa mambu mawombo.”—Malako 6:31-34; Luka 9:10, 11.
7-8. Vana kifuani kimmonisa buidi bakulutu ba kimvuka banlandikininanga kifuani ki Yesu mu thangu zikhomba badi mu zitsatu.
7 Buidi bakulutu ba kimvuka banlandikininanga kifuani ki Yesu. Tumvutula beni matondo mu phila bakulutu ba kivaninanga muingi ku tusadisa! Kibila bawu bamvanganga bisalu biwombo bio zikhomba mu kimvuka bakhambu monanga. Dedi, bo wumueka mu zikhomba kambakana kimbevu ki phasi, dingumba di Colih mu thinu bakivananga muingi kunsadisa ayi khumbu zinkaka builu mambu amomo mammonikanga! Vayi mu luzolo ayi kiadi badi mu zikhomba zimbela, bakulutu abobo ayi makanda mawu bantulanga zitsatu ziawu va khonzo muingi kusadisa zikhomba.
8 Bakulutu ba kimvuka mvawu bambuelanga mioko kutunga zinzo zi Kintinu, bibuangu binkaka bi zikhutukunu ayi kubuela mioko zikhomba babe monikina kivuka. Mvandi bamviokisanga bilokula biwombo muingi kukubika malongi bankuiza vana mu kimvuka ayi kukindisa zikhomba. Tuntonda beni zikhomba aziozio ayi makanda mawu. Bika Yave katatamana kuba sakumuna mu kisalu kiawu kimboti bamvanganga! Vayi dedi befu boso, bakulutu ba kimvuka bafueti tadila kiyeku kiawu mu phila yifuana. Busa fuana ko kuviokisanga thangu yoso mu mambu ma kimvuka ayi kukhambu viokisanga thangu na makanda mawu.
BUIDI WULENDA KUNINA KHADULU YI KUKIVANA
9. Dedi bummonisina Filipi 2:4, 5, mayindu mbi baklisto bafueti kuna?
9 Tanga Filipi 2:4, 5. Kheti befu boso tuisi ko bakulutu ba kimvuka, vayi tulenda longuka kukivana mu kulandakana kifuani ki Yesu. Kibibila kintuba ti nandi “wukituka kuba mvinka” (Fili. 2:7) Yindula mu mambu amomo, mvinka wumvanganga mamoso muingi kukuangidika mfumu’andi. Ayi befu bo tuidi mimvika mi Yave ayi minsadisi mi zikhomba zitu, tufueti luta buela kukivana muingi kubuela mioko Yave ayi zikhomba zitu. Ngie wulenda vanga mawu mu kuvanga mambu manlanda.
10. Biuvu mbi tufueti kuyikuvusa muingi kuyifiongunina?
10 Wu kifiongunina. Wu kiyuvusa: ‘Yikivananga muingi kusadisa bankaka? Mvutu mbi yilenda vana boti babe kundinda muingi yetala khomba yima nuna ku nzo’andi, voti kunata khomba yinkieto yi manuna mu zikhutukunu? Yimfika kukivananga muingi kusadisa kudiodisa kibuangu ki zikhutukunu zi mavula voti Nzo yi Kintinu? Yave wunkuangalalanga beni bo tukivana ayi tunsadila thangu’itu, biuma tuidi muingi kusadisa bankaka. Bo tukifiongunina ayi tummona vama tufueti buedila mangolo, mbi tufueti vanga?
11. Buidi nsambu wulenda ku tusadisila kubalula mambu mantombulu?
11 Zibudila ntim’aku kuidi Yave. Yindulabu ti ngie wuntomba kubalula mua mambu vayi wisi ko mangolo muingi kuvanga mawu. Mu mambu ma phila ayoyo wufueti sambila kuidi Yave. Nkamba mabanza maku. Ayi dinda Yave muingi ka kuvana “phuila ayi mangolo ma kuvangila mambu.”—Fili. 2:13.
12. Buidi khomba yi ditoko wubotama kalenda buela sadisila kimvuka?
12 Boti ngie widi khomba yi ditoko mabotama, dinda kuidi Yave muingi ka kusadisa kukuna phuila yi kubuela kukivana mu kimvuka. Mu zitsi ziwombo bakulutu ba kimvuka bawu balutidi mu thalu kena minsadisi mi bakulutu ayi bawombo mu minsadisi beni, beka phunga yinangama voti bama nuna. Bo kimvuka ki Yave kintatamana kukonzuka mu thalu, vantombulu zikhomba zi matoko babuela mioko ayi kukieba dikabu di Yave. Boti ngie widi wukubama muingi kusadila kuidi tsatu, ngie wala baka beni mayangi. Kibila mbi? Kibila ngie wala kuangidika Yave ayi mvandi wala ba ntungukulu wumboti kuidi bankaka ayi wala baka mayangi mu kuba sadisa.
Baklisto bawombo ku Yuda basabuka Muila wuYolidani muingi benda ku Pela. Zikhomba baba kalanga kuna badi mu kuvana bidia kuidi zikhomba zifumina ku Yuda (Tala lutangu 13)
13-14. Mambu mbi tulenda vanga muingi kusadisa zikhomba badi mu tsatu? (Tala foto yidi vathonono levista.)
13 Fiongunina zitsatu zi bankaka. Mvuala Polo wulubula baklisto baba ku Ebeleo: ‘Lubika zimbakana kuvanga mamboti ayi kukabila bio muidi kuidi bankaka, kibila Nzambi wunkuangalalanga mu makaba amomo.’ (Ebe. 13:16) Bukiedika, adiodio diba dilongi dimboti kaba vana! Kibila bo batambula nkanda awowo, mua thangu to yivioka Baklisto bawombo ku Yuda babika zinzo ziawu, lungoso ayi makanda mawu baba khambu sadilanga Yave muingi “batinina ku myongo.” (Matai 24:16) Mu thangu beni, vasa ba ko divuda ti bawu baba viokila mu tsatu yingolo ayi vaba tombulu bayisadisa. Boti bawu basadila dilongi mvuala Polo kaba vana di kukabilanga bankanka, buna disa ba ko diambu diphasi kuvanga mawu mu thangu beni.
14 Bakana ko khumbu zioso zikhomba zitu bala ku tuzabikisa zitsatu badi mu kuviokila. Dedi, yindula khomba befuilu nkanzi. Nandi kalenda tomba lusalusu muingi kukubika bidia, voti mambu mankaka. Ayi ḿba nandi kasinkuiza tuba ko muingi kabika monika ti widi mu kutukuika kunsadisa. Vayi nandi kalenda kuangalala befu kutuama ntuala muingi kumvana lusalusu mu mambu kadidi tsatu. Busa fuana ko kuyindula ti vadi batu bankaka bankuiza nsadisa voti kuvingila theti khomba beni ka tudinda lusalusu. Diawu buboti kuyikuvusa: ‘Boti minu yidi mu kuviokila mu mambu amomo, khanu lusalusu mbi yinkuiza tomba kuidi bankaka?’
15. Boti tutidi kusadisa bankaka, mbi tufueti ba bakubama muingi kuvanga?
15 Ba mutu bankaka balenda fika fikama. Tuidi lufiatu ti ngie zebi zikhomba mu kimvuka badi bakubama muingi kusadisa bankaka. Ayi bawu bavanganga ko bankaka kuyindula ti kutatisa baku batatisa. Ayi befu tuzebi ti tulenda fiatila mu lusalusu luawu bo tuidi mu tsatu ayi mvandi tutidi kulandakana kifuani kiawu. Alan, widi nkulutu wu kimvuka widi 40 di mimvu, tidi kukuna khadulu beni. Mu kuyindula kifuani ki Yesu Alan wutuba: ‘‘Yesu wuba mambu mawombo ma kuvanga. Vayi batu ba ziphunga zioso baba zolanga kumfikama ayi kundinda lusalusu. Bawu baba monanga ti Yesu waba kuba vuanga nkinza. Minu yintomba kulandakana kifuani ki Yesu mu kuba mutu wu mayangi, wu luzolo ayi no bankaka balenda fika fikama.”
16. Buidi kusadila matangu madi mu Minkunga 119:59, 60 malenda tusadisila kulandakana kifuani ki Yesu?
16 Tulendi ba ko mu kiunda befu khambu nunga kulandakana mu phila yisulama kifuani ki Yesu. (Yako. 3:2) Nlonguki va thonono kanunganga ko kuvanga kisalu mu phila nlongisi’andi kamvangilanga. Vayi bumviokila thangu bo kamvanga zinzimbala ayi kamvanga mangolo muingi kubuela pisuka mu kisalu beni, nandi wunkuiza zabanga kuvanga kiawu buboti. Bobuawu mvandi, befu kuvanga mangolo muingi kusadila mambu tunlonguka mu ndongukulu’itu yi Kibibila ayi kuvanga mangolo mungi kuludika zinzimbala zitu, tulenda nunga kulandakana ntungulu Yesu ka tubikila.—Tanga Minkunga 119:59, 60.
NDANDU TUMBAKANGA MU KUKIVANA
Bo banlandakana kifuani ki Yesu ki kukivana, bakulutu bamvana kifuani kimboti kuidi matoko (Tala lutangu 17) *
17-18. Ndandu mbi tuala baka mu kulandakana kifuani ki Yesu ki kukivana?
17 Khadulu yi kukivana yilenda tambakana mvandi kuidi bankaka. Tim widi nkulutu wu kimvuka wutuba: “Tuidi zikhomba zi matoko bama konzuka mu kiphevi ayi beka minsadisi mi bakulutu—mawu mamonikina kibila balandakana kifuani ki zikhomba badi khadulu yi kukivana muingi kusadisa bankaka. Mangolo bamvanganga ma kukivana mansadisanga beni kimvuka ayi bakulutu ba kimvuka.”
18 Tuidi mu kuzingila mu nza yiwedi beni buimi. Vayi dikabu di Yave badi disuasana. Befu tunlandakananga ntungulu wu Yesu wu kukivana ayi tuidi bakubama muingi kutatamana kulandakana kifuani kiandi. Tuzebi ti tulendi landakana ko ntungulu’andi mu phila yivedila, vayi tulenda nunga “kulandakana zithambi ziandi.” (1 Pete. 2:21) Bo tumvanga mangolo muingi kulandakana kifuani ki Yesu ki kukivana, mvitu tuala baka mayangi ayi lunungu va meso ma Yave.
NKUNGA 13 Klisto, Ntungulu’itu
^ Lut. 5 Yesu wabe tulanga zitsatu zi bankaka vantuala zitsatu ziandi. Mu dilongi adidi, tunkuiza mona ziphila tulenda landikinina kifuani kiandi. Mvandi tunkuiza mona buidi kulandakana kifuani ki Yesu ki tutuadisilanga ndandu.
^ Lut. 57 MAMBU MADI MU ZIFIKULA: Dan, khomba yi ditoko wummona phila bakulutu buadi ba kimvuka babe kuiza kindisila tat’andi ku nzo mbuku. Dan wulandakana kifuani kimboti bakulutu abobo bamonisa. Ayi kiawu kimvanga kusadisa zikhomba zinkaka mu kimvuka. Khomba yinkaka yi ditoko bantedilanga Ben, wummona phila Dan kammonisina luzolo kuidi bankaka. Ayi kifuani Dan kamonisa kisadisa Ben kukivana muingi kudiodisa Nzo yi Kintinu.
